1. Nk’Omugabe Daudi, ni enki eki abamwe bari kubasa kubuza?

TWENA nitwenda kubaho twine obusinge. Tihine ori kwenda kubaho ayemerize omutima. Konka obumwe, hine obu turi kuhurira twemerize omutima. Kandi bamwe omu bahereza ba Yehova, nibabasa kubuza ekibuzo nk’eki Omugabe Daudi yaburize Yehova ati: ‘Omuzigu wange aryahisya he kunyetunguraho?’—Zab 13:2.

2. Ni enki eki twaza kushwijuma omuri eki kicweka?

² N’obu tutari kubasa kwihiraho kimwe enyehurira z’okwemereza omutima, nitubasa kugira eki twakora tuzicendeza. Omuri eki kicweka, twaza kubanza turebe ebintu ebiri kutuma twayemereza omutima. Bwanyima nituza kushwijuma ebintu mukaga ebi turi kubasa kukora tukaguma tuturize n’obu twakuba twine ebizibu.

3. Ni biha bizibu ebi turi kubugana, kandi shi ni enki eki tutari kubasa kubikoraho?

³ Hine obu tutari kubasa kugira eki twakora aha bintu ebiri kutwemereza omutima. Ecokureberaho: Tituri kubasa kugira eki twahindura aha kweyongera kw’ebeyi y’ebyokurya, ebijwaro, ah’okutura ninga shi ebindi bintu ebi turi kucenera buri mwaka. Kandi tituri kubasa kugira eki twahindura aha ku abu turi kukora na bo ninga shi abu turi kwega na bo bari kuguma kutugeza ngu tucumure. Kandi tituri kubasa kwemereza obugomi oburi kubera ahu tutwire. Nitubugana  ebyo bigezo ahabw’okuba tutwire omu nsi erimu abantu abine emitekatecere etari kubugana n’emisinge ya Bibuli. Sitaane, ruhanga w’eyi nsi, namanya ku abantu abamwe barije kwikiririza “amaganya g’ensi” kubaremesa kugumizamu bari kuhereza Yehova. (Mat 13:22; 1 Yoh 5:19) Tikiri kututangaza twareba eyi nsi eyijwiremu ebintu ebiri kutwemereza omutima!

4. Ni enki ekiri kubaho twayemereza omutima?

⁴ Ebizibu ebi turi kubugana nibibasa kutuma twayemereza omutima. Ecokureberaho: Nitubasa kutina ngu nitwija kubura esente eziri kumara z’okutubisaho ninga shi ngu nitubasa kurwara rero tuferwe omurimo gwitu. Nambwenu nitubasa kutina ngu titurije kuguma turi abesigwa twagezibwa ngu tuhende ebiragiro bya Ruhanga. Juba aha, Sitaane nayija kutuma abu ari kutegeka batahirira abahereza ba Ruhanga, obwe rero, nitubasa kwebuza oku turije kutwaza omuri oko kutahirirwa. Nitubasa kwebuza ngu, ‘Mbehi kigwire kwemereza omutima ahabw’ebyo bintu?’

5. Ni enki eki Yesu yabire ari kumanyisa obu yagambire ngu, ‘mutariyemereza emitima’?

⁵ Nitwijuka ku Yesu yagambire abakurasi beye ati: ‘Mutariyemereza emitima.’ (Mat 6:25) Mbehi akaba namanyisa ku tutashemerire kwemereza omutima aha kintu cona? Ingaha mazima! Omu bwire bwa kare bamwe omu bahereza ba Yehova b’abesigwa, bakemereza omutima, konka Yehova yaguma ari kubasima. * (1 Bag 19:4; Ps. 6:3) Yesu akaba ari kutuhamiza. Akaba atari kwenda ngu twemereza omutima munonga ngu kihike n’aha kugira engaruka mbi aha murimo ogu turi kukorera Ruhanga. Mbwenu shi ni bata oku turi kubasa kucendeza enyehurira z’okwemereza omutima?—Reba akashanduku akari kugira ngu: “ Oku ori kubasa kukikora.”

6. Tukuratize ebiri omu Bafilipi 4:6, 7, ni enki ekiri kubasa kutukwasa kutuza twaba twemerize omutima?

⁶ (1) Okushaba obutosha. Abakristo abari kuba bine ebizibu nibatunga okuhumurizibwa ku bari kushaba Yehova. (1 Pet 5:7) Nagarukamu eshara zawe ari kukuha ‘obusinge bwa Ruhanga, oburengire okwetegereza k’omuntu wena.’ (Shoma omu Bafilipi 4:6, 7.) Yehova natuma twatuza birabire aha mwika gweye oguri kwera.—Gal 5:22.

7. Ni enki eki tushemerire kuguma turi kutekatekaho twaba turi kushaba Ruhanga?

⁷ Waba ori kushaba Yehova, mugambire byona otarabire aha rubaju. Mugambire ekizibu eki oyine kandi omushobororere oku ori kwehurira. Haba hine eki ori kubasa kukora, mushabe obwenge oburakukwase kukibona n’amani g’okukikora. Eco kizibu caba kirengire obushoborozi bwawe, shaba Yehova kugira ngu akukwase kitakwemereza omutima munonga. Washaba otarabire aha rubaju, noyija kwerebera ku Yehova ari kugarukamu eshara zawe. Yaba atakugarukiremu ahonaho ocamara kumushaba, otahwa amani. Yehova tari kwenda tumushabe tutarabire aha rubaju kusha, ahobwe nambwenu nayenda ngu tugumizemu kumushaba.—Luk 11:8-10.

8. Ni enki eki tushemerire kugamba omu shara zitu?

⁸ Ku oragambire Yehova ebiri kukwemereza omutima omu shara, oyijuke n’okumusima. Ni kirungi kutekateka aha migisha eyi twine, n’obu twakuba turi omu mbera zigumire. Caba kiri kukugumira kutunga ebigambo by’okwereka enyehurira zawe z’omu nda, yijuka ku Yehova ari kuba  ayetegwire kukuha obuyambi obu ori kwetenga.—2 Bus 18:31; Rom 8:26.

9. Ni nkahe ahu turi kubasa kwiha oburinzi obwa buzima?

⁹ (2) Yesige obwenge bwa Yehova, butari obwawe. Omu kinyigana ca munana M.Y., abantu b’omuri Yuda bakahurira bemerize omutima ahabw’Abasiriya. Kugira ngu berinde okutahirirwa n’Abasiriya, bakarondera obuyambi ahari Misiri. (Isa 30:1, 2) Yehova akabagambira ku omuhanda ogu babire bashaziremu gwabire gurabaretere akabi. (Isa 30:7, 12, 13) Yehova abirabize aha muhanuzi Isaya, akagambira abahereza beye oku babire barije kubona oburinzi obwa buzima. Akabagambira ngu: ‘Omu kutuza n’omu kwesiga [Yehova] ni mwo amani ganyu gariruga’.—Isa 30:15b.

10. Ni ziha mbera eziri kubasa kutuhikaho zikatushaba kwereka ku nitwesiga Yehova?

¹⁰ Ni bata oku turi kubasa kwereka ku nitwesiga Yehova? Tekateka ahari ebi byokureberaho. Reka tugire ngu watunga omurimo murungi oguri kushashura ge, oguri kukushaba kukora eshaha zirengire, kandi gukatuma otagumizamu n’entebekanisa yawe y’eby’omwika. Ninga reka tugire ngu omukozi mugenzi wawe yakukunda, kandi tari omuhereza wa Yehova owabatizibwe. Ninga shi reka tugire ngu omunyabuzare wawe owu ori kukunda yakugira ngu osharemu ahagati yeye na Ruhanga. Omuri ezi mbera zona, noba oyine ensharamu egumire y’okukora, konka Yehova nayija kukuha obuhabuzi obu ori kwetenga. (Mat 6:33; 10:37; 1 Kor 7:39) Mbwenu shi, noyija kwesiga obwo buhabuzi bweye kandi obute omu nkora?

11. Ni ziha nkuru z’omuri Bibuli ezi turi kubasa kwega zikatukwasa kuguma tuturize n’obu twakuba turi kuhiganisibwa?

¹¹ (3) Yegera aha byokureberaho birungi n’ebibi. Omuri Bibuli harimu enkuru nyingi eziri kwereka omugasho g’okuguma tuturize n’okwesiga Yehova. Ku orabe noyega ezo nkuru, oyetegereze oku abahereza ba Yehova bari kuguma baturize n’obu bakuba bari kuhiganisibwa. Ecokureberaho: Ishengero rikuru ry’Abayudaya ku ryaragire entumwa kwemereza kuburira, tiziratinire. Ahobwe zikagamba zine obumanzi ngu: ‘Tushemerire kworobera Ruhanga okukira abantu.’ (Byak 5:29) Na bwanyima y’okubatera enkoni, tibaremerize omutima munonga. Ahabw’enki? Ni ahabw’okuba bakaba nibamanya ngu Yehova ari na bo. Akaba nabasima. Eco kikatuma bagumizamu kuburira obutumwa burungi. (Byak 5:40-42) N’entumwa Sitefano ku yabire yaza kwitwa, akaguma ayine obusinge kandi ‘aha misho geye hashwa nk’aha marayika.’ (Byak 6:12-15) Ahabw’enki? Ni ahabw’okuba akaba nayesiga atari kubanganisa ku Yehova ari kumusima.

12. Tukuratize ebiri omuri 1 Petero 3:14 na 4:14, ahabw’enki turi kuguma tushemerirwe twaba turi kuhiganisibwa?

¹² Entumwa zikerebera ebihamya ebiri kwereka ku Yehova yabire ari na zo. Yehova akaba yabahire amani g’okukora ebyokutangaza. (Byak 5:12-16; 6:8) Konka itwe ti ko kiri omuri obu bwire. N’obu kirabe kiri kisyoya, Yehova akoresize Ekigambo ceye, natuhamiza ku n’obu twakubonabona ahabw’okuhikirira, ari kutusima kandi omwika gweye niguba guri n’itwe. (Shoma omuri 1 Petero 3:14; 4:14.) Obwe rero, omu mwanya g’okuta omutima aha ku turije kutwaza twahiganisibwa omu biro by’omu misho, tushemerire kuguta aha ki turi kubasa kukora hati kugira ngu tukizeho kwesiga ku Yehova ari kubasa kutucungura. Nk’abegi b’omu kinyigana c’okubanza, n’itwe tushemerire kwesiga ekiraganiso ca Yesu ekiri kugira ngu: ‘Ahabw’okuba ndyabaha orurimi n’obwenge,  ebi abazigu banyu bataribasa kurwanisa n’obu kwakuba okuhakanisa.’ Yesu akaturaganisa ati: ‘Omu kwehangana ni mwo murijunira amagara ganyu. (Luk 21:12-19) Kandi ogume oyijuke ku Yehova ari kugumizamu kwijuka buri kantu kona aha bahereza beye abafire bari kumwesiga. Ebyo nibyo birije kutuma yabazora.

13. Ni bata oku turi kugasirwa ku turi kwega ebyokureberaho by’abantu abaremirwe kuguma baturize n’okwesiga Yehova?

¹³ Nambwenu, nitubasa kwegera aha byokureberaho by’abantu abaremirwe kuguma baturize n’okwesiga Yehova. Ebyo byokureberaho bibi, nibitukwasa kwerinda kukora enshobe nk’ezi bakozire. Ecokureberaho: Hahwire obwire buce Asa Omugabe wa Yuda agire aha ngoma, omutwe muhango gukamutahirira, konka yayesiga Yehova, kandi Yehova na we akamuha omugisha yamusingurira. (2 Bus 14:9-12) Konka bwanyima, omutwe muce gwa Baasha omugabe wa Isirayeli ku gwamutahirire, akarondera obuyambi aha basirikare ba Siriya omu mwanya g’okuburondera ahari Yehova nk’oku yabire akikozire omu kubanza. (2 Bus 16:1-3) Kandi ari hihi kufa, akarwara endwara y’amani, konka tiyarondera obuyambi ahari Yehova.—2 Bus 16:12.

14. Ni enki eki turi kwegera aha nshobe za Asa?

¹⁴ Omu kubanza, Asa akaba narondera obuyambi ahari Yehova ku yabire nabugana ebigezo. Konka bwanyima akaremwa kurondera obuyambi ahari Ruhanga, ahobwe yayenda ngu abyemarire. Omu kubanza, entebekanisa ya Asa y’okurondera obuyambi ahari Siriya ngu barwanise Abisirayeli ekarebeka nk’eyakora. Konka oko kusingura kweye kukamara obwire buce. Yehova akamugambira birabire aha muhanuzi ngu: ‘Ahabw’okuba oyesigire omugabe wa Siriya, tiwayesiga [Yehova] Ruhanga wawe, ni co ihe ry’omugabe wa Siriya rikukirireho.’ (2 Bus 16:7) Twaba twine ebizibu titushemerire kweyesiga munonga ngu tubyemarire twenka ngu turemwe kurondera obuhabuzi ahari Yehova birabire aha Kigambo ceye. N’obu twakuba turi kwenda kukora ensharamu eri kwetengwa juba, tushemerire kutuza tukarondera obuhabuzi ahari Yehova, kandi nayija kutukwasa tusingure.

15. Ni enki eki tushemerire kukora twaba turi kushoma Bibuli?

¹⁵ (4) Guma okwate omu mutwe enyiriri z’omuri Bibuli. Wabugana enyiriri z’omuri Bibuli eziri kwereka ku amani gari kuruga omu kutuza n’omu kwesiga Yehova, tamu amani kugira ngu ogume ozijuke. Nikibasa kukugasira wazishoma omu iraka eriri kuhurirwa ninga shi okazihandika kugira ngu ogume ori kuzeyijusa burijo. Yoshuwa akaragirwa kushoma ekitabo c’ebiragiro burijo omu iraka eriri kuhurirwa, n’okukitekatekaho kugira ngu akore ebirungi. Eco kikaba nikija kumukwasa kuhwa obwoba bw’okwebembera abantu ba Ruhanga. (Yos 1:8, 9) Ebiri omu Kigambo ca Ruhanga nibibasa kutuma wagira obusinge bw’omu mutima n’obu wakuba ori omu mbera eziri kubasa kutuma wahurira oyemerize omutima.—Zab 27:1-3; Enf 3:25, 26.

16. Ni bata oku Yehova ari kukoresa benetata na banyanyazi kugira ngu batukwase kuguma tuturize n’okumwesiga?

¹⁶ (5) Yekwatanise n’abahereza ba Ruhanga. Yehova nakoresa benetata na banyanyazi kugira ngu batukwase kuguma tuturize n’okumwesiga. Omu nterane, nitugasirwa na toku ezi turi kuhurira, ebitekateko ebiri kutangwa, n’ebiganiro ebiri kombeka ebi turi kugira na benetata na banyanyazi. (Heb 10:24, 25) Nambwenu nikitugaruramu amani twagambira banywani bitu abu turi kwesiga b’omu kibina oku  turi kwehurira. “Ekigambo kirungi” c’omunywani witu nikibasa kutukwasa kucendeza enyehurira ezi turi kuba twine z’okwemereza omutima.—Enf 12:25.

17. Tukuratize ebiri omu Baheburaayo 6:19, ni bata oku amasiko g’Obukama gari kubasa kutukwasa kuguma tuturize n’obu twakuba turi omu bigezo?

¹⁷ (6) Guma oyine amasiko gahamire. Amasiko gitu g’Obukama ni nk’‘[ekiri kusika] amagara,’ kikatuma twaguma tuturize n’obu twakuba turi kuraba omu bigezo ninga twemerize omutima. (Shoma omu Baheburaayo 6:19.) Tekateka aha biraganiso bya Yehova by’omu biro by’omu misho kugira ngu bikukwase kweyihamu ebitekateko bibi. (Isa 65:17) Yerebe ori omu nsi ensya erimu obusinge, erije kuba etarimu ebiri kukwemereza omutima. (Mik 4:4) Nambwenu, amasiko gawe nigija kukizaho kuhama wagagambira abandi. Kora cona ekiri kubasika oyekwatanise omu murimo g’okuburira n’okuhindura abantu abegi. Ku orakikore basyoya, noyija ‘kugira amatsiko otari kubanganisa okuhisya aha muheru.’—Heb 6:11.

18. Ni biha bigezo ebi turije kubugana omu biro by’omu misho, kandi shi ni bata oku turije kubisingura?

¹⁸ Obu eyi si mbi eri kuhika aha muheru, nitwija kukizaho kubugana ebigezo ebiri kutuma twayemereza omutima. Ecahandikirwe c’omwaka gwa 2021 nikibasa kutukwasa kwehanganira ebyo bigezo, tuguma tuturize, tutari kwesiga obwenge bwitu, ahobwe turi kwesiga Yehova. Omu mwaka ogurije, nimureke twereke omu bikorwa ku nitwesiga ekiraganiso ca Yehova ekiri kugira ngu: ‘Omu kutuza n’omu kwesiga ni mwo amani ganyu gariruga.’—Isa 30:15.