1. Ni enki ekiri kwereka ku abantu batari kukundana omuri obu bwire?

BIBULI ekaba yagambire ku omu bwire bw’aha mperu, abantu babire barije kuba ‘abatari kukunda ababo.’ (2 Tim 3:1, 3) Nitureba obwo buhanuzi buri kuhikirira omuri obu bwire. Ecokureberaho: Amaka mingi gakataana, catuma abataana batarebana ge, kandi n’abana bahurira batari kukundwa. N’abari kusharamu kuguma hamwe, nibaba batari kukundana. Ecokureberaho: Omuhabuzi w’eby’amaka akagira ati: “Omushija, omukazi n’abana, tibari kuganira, ahobwe obwire bwabo nibabumarira ahari za kompiyuta, amasimu n’aha mizano ya za vidiyo. N’obu bari kuba batwire omu nju emwe, nibaba batari kumanyana ge.”

2-3. (a) Tukuratize ebiri omu Barooma 12:10, ni baha abu tushemerire kwereka rukundo eya buzima? (b) Ni enki eki twaza kushwijuma omuri eki kicweka?

² Tituri kwenda kushushana n’ab’ensi abatari kukundana. (Rom 12:2) Ahobwe, nitwenda kukizaho kwereka rukundo eya buzima ab’omu maka gitu na benetata na banyanyazi. (Shoma omu Barooma 12:10.) Rukundo eya buzima ni enki? Ni ekigambo ekiri kukoresibwa kiri kumanyisa rukundo eyi ab’omu ka emwe bari kuba bine. Eyo ni yo rukundo eyi tushemerire kwega kwereka ab’omu ka yitu y’eby’omwika, ni okumanyisa benetata na banyanyazi. Twayereka eyo rukundo eya buzima, nikituma habaho obumwe kandi ni kimwe omu kuramya okw’amazima.—Mik 2:12.

³ Kugira ngu tugire rukundo eya buzima kandi tuyereke, twaza kushwijuma eki turi kubasa kwegera aha byokureberaho by’omuri Bibuli.

4. Ni bata oku omuri Yakobo 5:11 hari kutukwasa kusima Yehova ahabwa rukundo yeye?

⁴ Bibuli netugambira emitwarize mirungi ya Yehova. Ecokureberaho: Netugambira ku ‘Ruhanga ari rukundo.’ (1 Yoh 4:8) Twamanya eco nikituma twayenda kuba banywani beye. Nambwenu Bibuli negamba ku Yehova ayine embabazi nyingi.” (Shoma omuri Yakobo 5:11.) Eyo ku ni emitwarize mirungi eri kwereka ku Yehova ari kutukunda!

5. Ni bata oku Yehova ari kwereka esaasi, kandi shi nitubasa kumutoreza tuta?

⁵ Yijuka ku omuri Yakobo 5:11 hari kugamba ku Yehova ayine embabazi nyingi kandi hakashuba hakagamba ogundi mutwarize oguri kutuma twamuhika hihi, ni okugamba esaasi. (Kur 34:6) Oburyo bumwe obu Yehova ari kutwerekamu esaasi ni okutusaasira enshobe ezi turi kukora. (Zab 51:1) Omuri Bibuli ekigambo esaasi, nikimanyisa ebiri kukira aha kusaasira kusha. Esaasi ni enyehurira ez’omuntu ari kugira yareba ondijo ari kubonabona kandi kituma yagira eki yakora kugira ngu amukwase. Yehova nagamba ku enyehurira ezi ari kugira ngu atukwase ziri kukirira kimwe ezi omukazi ari kuba ayinire omwana weye. (Isa 49:15) Twaba turi kubonabona, ahabw’okuba Yehova atwinire essasi, natukwasa. (Zab 37:39; 1 Kor 10:13) Nitwereka benetata na banyanyazi ku tubinire esaasi turi kubasaasira kandi tutari kubabikira enzika batushobeza. (Efe 4:32) Konka oburyo oburi kukira obundi obu turi kubasa kwerekamu benetata na banyanyazi esaasi, ni okubashagika baba bari omu mbera zigumire. Rukundo yitu ku eri kutuma twayereka abandi esaasi, nitutoreza Yehova, ari we ecokureberaho kirungi, omu kwereka embabazi nyingi.—Efe 5:1.

6. Ni bata oku Yonasaani na Daudi bayerekine rukundo eya buzima?

⁶ Omuri Bibuli harimu enkuru z’abantu abatahikirire abayerekire rukundo eya  buzima. Tekateka aha cokureberaho ca Yonasaani na Daudi. Bibuli negira eti: ‘Omutima gwa Yonasaani gwanywana n’ogwa Daudi; Yonasaani yamukunda nk’oku ayekunda.’ (1 Sam 18:1) Daudi akatoranwa kugira ngu abe omugabe omu mwanya gwa Saulo. Bwanyima Saulo akagirira Daudi ihari yagezaho n’okumwita. Konka Yonasaani mutabani wa Saulo tarayekwatanisize n’ishe omuri eyo ntebekanisa mbi y’okwita Daudi. Yonasaani na Daudi bakaragana kuguma bari abanywani kandi bari kuyambayambana.—1 Sam 20:42.

7. Ni enki ecabire kiri kubasa kutuma Yonasaani na Daudi bataba abanywani?

⁷ Ku turi kutekateka ahari rukundo eya buzima eyi Yonasaani na Daudi babire bine nitutangara ahabw’ebintu bimwe ebyabire biri kubasa kutuma bataba abanywani. Ecokureberaho: Yonasaani akaba nakiza Daudi emyaka eri kuhika ahari 30. Yonasaani akaba ari kubasa kutekateka ku atine eki ari kubasa kubuganiraho n’ogo mwojo muto owabire atine byingi ebi ari kumanya. Konka nabwo, Yonasaani tararebire Daudi nk’ow’ahaasi ninga shi ngu amutwarize kubi.

8. Ahabw’enki turi kubasa kugamba ku Yonasaani yabire ari munywani murungi wa Daudi?

⁸ Yonasaani akaba nabasa kugirira Daudi ihari. Ahabw’okuba Yonasaani yabire ari omwana w’omugabe Saulo, akaba ari kubasa kuguma ari kutekateka ku ni we owabire arabe omugabe bwanyima y’ishe. (1 Sam 20:31) Konka Yonasaani akaba ari omucurezi, kandi ari omwesigwa ahari Yehova. Obwe rero, akashagika Daudi owu Yehova yabire atorine ngu abe omugabe. Nambwenu akaguma ari omwesigwa ahari Daudi, n’obu cabire kiragwise kubi Saulo.—1 Sam 20:32-34.

9. Mbehi Yonasaani akaba ayinire Daudi ihari? Shoborora.

⁹ Yonasaani akaba ayinire Daudi rukundo eya buzima, ni yo nshonga ataramugirire ihari. Yonasaani akaba ari omurwani omanyirire kandi ari emanzi. We n’ishe, Saulo, bakaba ‘nibarahuka okukira empungu kandi bine amani okukira entare.’ (2 Sam 1:22, 23) Obwe rero, Yonasaani akaba nabasa kwerata ahabw’ebintu by’amani ebi yabire akozire. Konka, Yonasaani tarahayahayanire na Daudi kandi taramugirire ihari. Ahobwe, Yonasaani akasima Daudi ahabw’obumanzi bweye n’okwesiga Yehova. Yonasaani akatandika kukunda Daudi nk’oku ari kwekunda, obu Daudi yayisire Goliyasi. Ni bata oku turi kubasa kwereka rukundo nk’eyo eya buzima benetata na banyanyazi?

10. ‘Okukundana munonga tubyihire aha mutima’ nikimanyisa ki?

¹⁰ Bibuli netugambira ngu, ‘tukundane munonga twihire aha mutima.’ (1 Pet 1:22) Yehova akatuteraho ecokureberaho kirungi. Natukunda munonga, kandi ku turi kugumizamu kuba abesigwa ahari we, tihine ekiri kubasa kwemereza eyo rukundo. (Rom 8:38, 39) Ekigambo c’Orugurika “munonga” nikiba kiri kumanyisa kutaho amani. Obumwe, hine obu turi kwetenga kutaho amani mingi kugira ngu twereke Abakristo bagenzi bitu rukundo eya buzima. Abandi batugwisa kubi, tushemerire kugumizamu ‘nitugumisiririzana omuri rukundo, turi kwezirika kurinda obumwe bw’[omwika], tuterinwe omurunga g’obusinge.’ (Efe 4:1-3) Twatamu amani kugira ngu tugumye ‘omurunga g’obusinge,’ titurije kuta omutima aha nshobe za benetata.  Nitwija kugezaho kureba benetata nk’oku Yehova ari kubareba.—1 Sam 16:7; Zab 130:3.

11. Ahabw’enki kwereka rukundo eya buzima hine obu kiri kuguma?

¹¹ Kwereka rukundo eya buzima benetata na banyanyazi burijo nikiba kitorobi, na munonga twaba turi kumanya enshobe zabo. Eco ni co ecahikire aha Bakristo bamwe b’omu kinyigana c’okubanza. Ecokureberaho: Ewodiya na Suntuke tibararebire okukora na Paulo ‘omurimo gw’engiri’ nk’ekizibu. Konka kukwatanisa kikaba nikibagumira ahabw’enshonga zimwe. Konka Paulo akabahiga ngu ‘bikirizane omuri Mukama.’—Fil 4:2, 3.

12. Ni bata oku turi kubasa kwereka benetata na banyanyazi rukundo eya buzima?

¹² Ni bata oku turi kubasa kwereka benetata na banyanyazi rukundo eya buzima omuri obu bwire? Twamanya ge Abakristo bagenzi bitu, kumanya embera ezi barimu nikitworobera, kandi tubagirira rukundo eya buzima. Nitubasa n’okuba banywani babo n’obu twakuba tutari kwinganisa emyaka ninga shi twakurire omu mbera ezitari kushushana. Oyijuke ku Yonasaani yabire ari kukiza Daudi emyaka 30; konka akaba munywani weye. Mbehi n’iwe tori kubasa kwereka rukundo eya buzima, n’abu mutari kwinganisa emyaka? Ku orakikore basyoya, noba wayereka ku nokunda benetata.—1 Pet 2:17.

13. Ahabw’enki turi kubasa kukunda bamwe omu kibina okukira abandi?

¹³ Mbehi kugirira Abakristo bagenzi bitu rukundo eya buzima nikimanyisa kugirira ab’omu kibina bona rukundo eri kwingana? Ingaha, eco tikiri kubasika. Ti kibi kugira omuntu owu wakunda okukira abandi ahabw’ebintu ebi muri kubuganiraho. Yesu akagamba ku entumwa zeye zona zabire ziri “banywani” beye, konka akaba nakunda Yohaana munonga. (Yoh 13:23; 15:15; 20:2) Konka, Yesu tarerekire ku Yohaana ari murungi okukira abandi. Ecokureberaho: Obwire obu Yohaana na murumuna weye Yakobo bashabire omwanya mukuru omu Bukama bwa Ruhanga, Yesu akabagambira ati: ‘Okushitama aha rubaju  rwange rwa buryo nari shi aha rwa bumosho, ti inye ori kubikuha.’ (Mak 10:35-40) Nka Yesu, titushemerire kwereka ku banywani bitu bari barungi okukira abandi. (Yak 2:3, 4) Twakikora basyoya nikituma omu kibina habamu okwebaganisamu kandi kituma hatabamu obusinge.—Yuda 17-19.

14. Tukuratize ebiri omu Bafilipi 2:3, ni enki ekirije kutukwasa kwerinda omwika g’okusingasingana?

¹⁴ Twayerekana rukundo eya buzima, nikija kurinda ekibina kwijamu omwika g’okusingasingana. Yijuka ku Yonasaani ataragirire Daudi ihari, ari kwenda ngu abe ni we owaba omugabe. Twena, nitubasa kutoreza ecokureberaho ca Yonasaani. Titushemerire kugirira ihari Abakristo bagenzi bitu ahabw’obushoborozi bwabo, ahobwe ‘omu bucurezi omuntu wena asime mugenzi weye okukira oku ari kwesima.’ (Shoma omu Bafilipi 2:3.) Yijuka ku buri omwe ari kubasa kugira eki yakora omu kukwasa ekibina. Twaguma turi abacurezi, nitwija kureba ebirungi omuri benetata na banyanyazi kandi tugasirwe n’ebyokureberaho byabo.—1 Kor 12:21-25.

15. Ni enki eki turi kwegera aha byahikire ahari Tanya n’ab’eka yeye?

¹⁵ Twabugana ebigezo ebi tutetegwire, Yehova natuhumuriza akoresize rukundo eya buzima n’obuyambi oburi kurebeka obu benetata na banyanyazi bari kutuha. Tekateka aha byahikire ah’ab’eka emwe ruri Orwamukaga baruga omu kiterane kihango c’omu gwa 2019 omuri Amerika, ecabire kine omutwe oguri kugira ngu: “Rukundo teri kuhwaho!” Omukazi ori kwetwa Tanya, oyine abana bashatu, akagamba ati: “Obu twabire turi omu motoka turi kugaruka omuri hoteli eyi twabire  tupangisize, endijo motoka ekatomera eyitu. Tihine owahutire, konka twena tukaruga omu motoka twayemerera omu muhanda tushobirwe. Tukabona omuntu ahabiso ari kutweta ngu twije tugende omu motoka yeye. Akaba ari mwenetata na we owabire yaruga omu kiterane eki twabire turimu. Kandi ti we wenka owayemerire. Abandi Bahamya batano b’omuri Suwideni na bo bakemerera. Abanyanyazi bakatuhobera nyowe na muhara wange, catukwasa kuguma tuturize! Tukabagambira ku twabire turije kuba ge, konka nabwo tibaratusigireho. Bakaguma n’itwe na bwanyima y’okutambirwa, kandi batuha byona ebi twabire turi kwetenga. Omuri ezo mbera zona, tukerebera rukundo ya Yehova. Ebyatubireho bikatuma twakizaho kukunda benetata na banyanyazi, kandi byatuma twakizaho kukunda Yehova n’okumusima.” Mbehi noyijuka obwire obu wabire ori kwetenga obuyambi rero Omukristo mugenzi wawe akakwereka rukundo eya buzima?

16. Ni ziha nshonga eziri kutuma twayerekana rukundo eya buzima?

¹⁶ Tekateka aha birungi ebi turi kutunga ku turi kwerekana rukundo eya buzima. Nituhumuriza benetata na banyanyazi baba bine ebizibu. Nitutuma omu kibina habamu obumwe. Nitwereka ku turi abegi ba Yesu, kandi eco nikituma abantu abine emitima mirungi bayija omu kuramya okw’amazima. Ekiri kukira byona, nituhimbisa ‘Tata ow’okusaasira, kandi Ruhanga ow’okuhumuriza kona,’ Yehova. (2 Kor 1:3) Nimureke twena tugumizemu kugira rukundo eya buzima kandi tuyereke abandi!