Ahabw’enki Yesu yagambire ebigambo bya Dawudi ebiri omuri Zaaburi ya 22:1 yaza kufa?

Bimwe omu bigambo bya bwanyima ebi Yesu yagambire atakafire harimu ebiri omuri Matayo 27:46 ebiri kugira ngu: “Ruhanga wange, Ruhanga wange, ni enki ecakunsigisaho?” Obu yagambire ebyo bigambo, akaba yahikiriza ebigambo bya Dawudi ebiri omuri Zaaburi ya 22:1. (Mak 15:34) Tikihikire kutekateka ku Yesu yagambire ebyo bigambo ahabw’okuba yabire ari kureba Yehova nk’omusigireho ninga ahabw’okuba yabire atine okwikiriza. Yesu akaba namanya ge enshonga yabire yaza kufa kandi akaba ayetegwire kukikora. (Mat 16:21; 20:28) Nambwenu, akaba namanya ku aha kufa kweye Yehova yabire ataramurinde embaju zona. (Yob 1:10) Obwe rero, Yehova akikiririza Yesu ngu arabe omuri ebyo bigezo kugira ngu ayereke ku ni omwesigwa n’obu yakuhikwaho n’okufa.—Mak 14:35, 36.

Mbwenu shi ahabw’enki Yesu yagambire ebyo bigambo by’omuri Zaaburi? N’obu tutari kumanya ge enshonga, reka turebe enshonga zimwe. *

Mbehi obu Yesu yagambire biri bigambo, akaba nayereka ku Yehova yabire atarije kumuyamba omu kufa kweye? Yesu akaba ashemerire kuhayo ekitambo Yehova atamuyambire. Akaba ari omuntu nk’itwe  kandi akaba ashemerire ‘kufa omu mwanya gw’abantu bona.’—Heb 2:9.

Mbehi Yesu akagamba ahari ebyo bigambo by’omuri Zaaburi, ari kwenda ngu tutekateke ahari Zaaburi yona? Omuri obwo bwire, Abayudaya bakaba nibakira kukwata ebicweka bya Zaaburi omu mutwe. Ku babire nibahurira orunyiriri rumwe rw’omuri Zaaburi, bakaba nibahika bari kwijuka Zaaburi yona. Yaba ni co eki Yesu yabire ari kwenda, akijusya abakurasi beye b’Abayudaya obuhanuzi bwingi oburi omuri Zaaburi oburi kugamba ah’izoba ry’okufa kweye. (Zab 22:7, 8, 15, 16, 18, 24) Nambwenu, enyiriri eziri kuhendera eyo Zaaburi nizihimbisa Yehova kandi zigamba ku Obugabe bweye buribuga ensi yona.—Zab 22:27-31.

Mbehi Yesu akagamba ahari ebyo bigambo bya Dawudi ari kwereka ku yabire nazira busha? Mbere y’okufa kwa Yesu, abantu bakamushinja ku ari kujuma Ruhanga kandi ku atari kuha ekitinisa izina ryeye. (Mat 26:65, 66) Orwo rubanja rukaba nyekiro kandi tirwakuratiza ebiragiro. (Mat 26:59; Mak 14:56-59) Obu Yesu yaburize kiri kibuzo ekitari kwetenga ecokugarukamu, nabasa kuba yabire ari kwereka ku hatine ekibi eki yabire akozire c’okumwitisa.

Mbehi Yesu akaba nayijusya abandi ku kuba Yehova yayikirize ngu Dawudi, omuhandiki w’egi Zaaburi abonabone, kiri kumanyisa ku yabire amwihireho emikono? Ekibuzo ca Dawudi tikiri kwereka ku yabire abuzire okwikiriza. Ku yamazire kubuza eco kibuzo, akongeraho ebigambo ebiri kwereka ku yabire ari kwesiga ku Yehova ari omujuni, kandi Yehova na we akagumizamu kumuha emigisha. (Zab 22:23, 24, 27) Ni co kimwe, obu Yesu ‘Omwana wa Dawudi,’ yabonabonire aha kiti c’obusaasi, kikaba kitari kumanyisa ku Yehova atari kumwikiriza.—Mat 21:9.

Mbehi Yesu akaba ari kwereka obusaasi bweye, ahabw’okuba Yehova yamwihireho emikono kugira ngu we wenka ayereke ku ari omwesigwa? Yehova ari kuhanga Yesu akaba atagenderire ngu omwana weye ayije kubonabona ninga ngu afe. Ebyo bikabaho ahabw’obugomi. Yesu tarakozire ekibi, ahobwe akabonabona kandi yafa kugira ngu agarukemu ekibuzo eki Sitaane yaresireho n’okugira ngu agarureho eki Adamu yabire aburize. (Mak 8:31; 1 Pet 2:21-24) Kugira ngu eco kibasike, Yehova akaba ashemerire kumwihaho emikono obwire buce kugira ngu atufire.

Mbehi Yesu akaba ari kwenda kushobororera abakurasi beye enshonga ahabw’enki Yehova yayikirize ngu afe omuri obwo buryo? * Yesu akaba ari kumanya ku abantu bingi babire barije kutera ensibo bamureba ari kufera aha kiti c’obusaasi nk’enkozi y’ebibi. (1 Kor 1:23) Abegi ba Yesu bakaba barije kucenga ge eki orufu rwa yesu rwabire ruri kumanyisa, kuri batire omutima aha nshonga eyatumire yafa. (Gal 3:13, 14) Bakaba nibija kumureba nk’omucunguzi batamurebe nk’enkozi y’ebibi.

Enshonga yona eyatumire Yesu yagamba ebyo bigambo, akaba namanya ku omu bizibu byona ebi yabire ari kubugana yabire ari kukora ebi Yehova ari kukunda. Yesu ku yamazire kugamba ebyo bigambo by’omuri Zaaburi, akagamba ati: ‘Cahwa!’ (Yoh 19:30; Luk 22:37) Mazima, ahabw’okuba Yehova yarekire kurinda Yesu omuri obwo bwire kikatuma Yesu yahikiriza eki yabire amutumire kukora omu nsi. Nambwenu kikatuma yahikiriza ebintu byona ebyabire ‘bimuhandikirweho omu biragiro bya Musa n’omu by’abahanuzi n’omuri Zaaburi.’—Luk 24:44.