1-2. Ni bata oku turi kubasa kutora omu muhanda ogu Yesu yarabiremu? Gamba ecokureberaho.

REKA tugambe ngu ori n’abantu bingi muri kutamburira omu muhanda mubi kandi gurimu ebyondo. Rero omuntu omanyirire abebembire. Ku yaba ari kutambura, ahu yaraba yagenda ari kusigaho ebigeri. Ku yahika aho, yabasiga timwashuba kumureba! Konka timwayitwa obwoba. Ahobwe, iwe na bagenzi bawe mwagenda muri kukuratira ahu yaribata oku muri kubasa!

² Itwe Abakristo turi nk’abantu abari kutamburira omu mwanya mubi, ni okugamba egi nsi ya Sitaane. Konka ekiri kutushemeza, Yehova akatuha omuntu w’okutwebembera, ni okugamba Omwana weye Yesu Kristo owu turi kubasa kukuratira. (1 Pet 2:21) Ekitabo kimwe ekiri kushoborora Bibuli nikigamba ku Petero yageranisize Yesu n’omuntu ori kwebembera. Nk’oku omuntu oyebembire abandi ari kusiga ebigeri ahu yaraba, ni ko Yesu na we yasigire ebigeri enyima ebi turi kubasa kukuratira. Reka tushwijume ebi bibuzo bishatu: Okutora omu muhanda ogu Yesu yarabiremu nikimanyisa ki? Ahabw’enki tushemerire kugurabamu? Kandi shi, ni bata oku turi kubasa kugurabamu?

3. Okutora omuhanda ogu omuntu yarabiremu nikimanyisa ki?

³ Okutora omuhanda ogu omuntu yarabiremu nikimanyisa ki? Omuri Bibuli, ebigambo “okugenda” n’‘ebigeri,’ nibiba biri kumanyisa ebi omuntu ari kukora omu kubaho kweye. (Kut 6:9; Enf 4:26) Ebi omuntu ari kukora nibibasa kugeranisibwa n’ebigeri ebi ari kusiga ahu yaraba. Obwe rero, okutora omuhanda ogu omuntu yarabiremu, nikimanyisa okutoreza ecokureberaho ceye.

4. Okutora omuhanda ogu Yesu yarabiremu nikimanyisa ki?

 ⁴ Mbwenu shi okutora omuhanda ogu Yesu yarabiremu nikimanyisa ki? Omu bigambo bice, nikimanyisa okutoreza ecokureberaho ceye. Omu cahandikirwe kikuru c’eki kicweka, entumwa Petero akaba ari kugamba aha cokureberaho ca Yesu c’okwehanganira ebizibu. Konka, hariho obundi buryo bwingi obu turi kubasa kutorezamu Yesu. (1 Pet 2:18-25) Mazima, ebi Yesu yagambire n’ebi yakozire, byona ni ecokureberaho eki turi kubasa kutoreza.

5. Mbehi abantu abatahikirire nibabasa kutoreza ecokureberaho ca Yesu ohikirire? Shoborora.

⁵ Mbwenu shi itwe abantu abatahikirire, tukabasa kutoreza ecokureberaho ca Yesu? Yego, nikibasika. Yijuka ku Petero ataratushabire ngu ‘tutore omuhanda ogu [Yesu] yarabiremu,’ omu bwijwire. Ku turi kutora omuhanda ogu Yesu yarabiremu, turi kukora cona eki turi kubasa nk’abantu abatahikirire, nituba turi kuta omu nkora ebigambo by’entumwa Yohana ebiri kugamba biti: ‘Tushemerire kutwaza nka we [Yesu] oku yabire natwaza.’—1 Yoh 2:6.

6-7. Ahabw’enki turi kugamba ku twakizaho kutora omuhanda ogu Yesu yarabiremu turi kukizaho kugira obunywani burungi na Yehova?

⁶ Okutora omuhanda ogu Yesu yarabiremu nikituma twagira obunywani burungi na Yehova. Ahabw’enki twagamba basyoya? Ec’okubanza: Yesu akatuteraho ecokureberaho kirungi c’okubaho omu buryo oburi kuhimbisa Ruhanga. (Yoh 8:29) Obwe rero twatora omuhanda ogu Yesu yarabiremu, nituhimbisa Yehova. Kandi nitwesiga tutari kubanganisa ku Tata witu w’omu iguru arije kuhika hihi omuntu wena ori kutaho amani ngu abe munywani weye.—Yak 4:8.

⁷ Ecakabiri: Yesu akatoreza Ishe omu bwijwire. Ni yo nshonga Yesu yagambire ngu: ‘Ondebire buri arebire Tata.’ (Yoh 14:9) Twatoreza  emitwarize ya Yesu n’oburyo obu yabire natwarizamu abantu, nk’embabazi ezi yagirire omubembe, esaasi ezi yagirire omukazi owabire orwire endwara mbi munonga, n’ezi yabire nagirira ababire baferirwe abakundwa babo, nambwenu nituba turi kutoreza Yehova. (Mak 1:40, 41; 5:25-34; Yoh 11:33-35) Oku turi kukizaho kutoreza Yehova, ni ko turi kukizaho kuba banywani beye.

8. Ni bata oku kutora omuhanda ogu Yesu yarabiremu kiri kutukwasa ‘kusingura’ ensi?

⁸ Okutora omuhanda ogu Yesu yarabiremu nikituma tutayikiriza ngu ebintu by’omuri egi nsi mbi bituhuzye. Omu kiro ecabandize okufa kwa Yesu, akagamba ati: ‘Nyowe nsingwire ensi.’ (Yoh 16:33) Akaba ari kumanyisa ku atarikiririze emitekatecere, entego, n’ebikorwa by’egi nsi ngu bimushishe. Yesu tarikirize ngu ekintu cona kitume yayebwa ecamuresire omu nsi, ni okugamba okuhimbisa Yehova. Ni enki eki turi kubasa kumwegeraho? Omuri egi nsi, harimu ebintu byingi ebiri kubasa kutuhuzya. Konka twagumizamu kuta omutima aha kukora ebi Yehova ari kukunda nk’oku Yesu yakikozire, n’itwe nitwija ‘kusingura’ ensi.—1 Yoh 5:5.

9. Ni enki eki tushemerire kukora, twaba turi kwenda kuguma omu muhanda oguri kutasya omu magara agatahwaho?

⁹ Okutora omuhanda ogu Yesu yarabiremu nikija kutuma twatunga amagara agatahwaho. Omusigazi w’omugiga ku yaburize eki ari kubasa kukora kugira ngu atunge amagara agatahwaho, Yesu akamugarukamu ati: ‘Oyije onkuratire.’ (Mat 19:16-21) Yesu akagambira Abayudaya abamwe ababire batari kwikiriza ku ari Kristo, ati: ‘Entama zange nizinkuratira, nziha amagara agatahwaho.’ (Yoh 10:24-29) Nambwenu, Yesu akagambira Nikodemu, omwe omu bategeki b’Abayudaya owabire ari kwenda kumanya byingi ebiri kukwata aha nyegesa za Yesu, ku ‘abari kumwikiriza’ barije kutunga ‘amagara agatahwaho.’ (Yoh 3:16) Nitwereka ku nitwikiriza Yesu turi kuta omu nkora ebi yayegesize kandi turi kutoreza ecokureberaho ceye. Ku turakikore basyoya, nitwija kuguma omu muhanda oguri kutasya omu magara agatahwaho.—Mat 7:14.

10. Ni enki eki tushemerire kukora ngu tumanye ge Yesu? (Yohaana 17:3)

¹⁰ Kugira ngu tutore omuhanda ogu Yesu yarabiremu tushemerire kubanza twamumanya. (Shoma omuri Yohaana 17:3.) ‘Okumanya Yesu,’ ni ekintu eki tushemerire kugumizamu kukora. Tushemerire kugumizamu kumwegaho byingi, ni okugamba emitwarize yeye, emitekatecere yeye, n’emisinge yeye. Emyaka yona eyi twakuba tumazire omu mazima, tushemerire kugumizamu turi kukora cona eki turi kubasa ngu tumanye Yehova n’Omwana weye.

11. Ni enki ekiri kugambwa omu bitabo bina by’engiri?

¹¹ Kugira ngu tumanye Omwana wa Yehova, akata ebitabo bina by’Engiri omu Kigambo ceye. Ebyo bitabo nibitugambira oku  Yesu yabireho n’oku yakozire omurimo g’okuburira. Nibitugambira ebi Yesu yagambire, bitwereka ebi yakozire, kandi bitushururira n’oku yabire ari kwehurira. Ebyo bitabo bina byona nibitukwasa ‘kutekateka’ twetonzire aha cokureberaho ca Yesu. (Heb 12:3) Eco cokureberaho ni byo bigeri ebi Yesu yasigire enyima. Obwe rero twashwijuma ebiri omu bitabo by’engiri nitumanya ge Yesu. Eco nikija kutuma twagendera omu muhanda ogu Yesu yarabiremu.

12. Ni enki eki tushemerire kukora kugira ngu ebiri omu bitabo by’Engiri bitugasire?

¹² Kugira ngu ebitabo by’engiri bitugasire omu bwijwire, tushemerire kukora ebiri kukira aha kubishoma kusha. Tushemerire kukwata obwire tukabyega twetonzire kandi tukabitekatekaho. (Geranisa n’ebiri omuri Yoshua 1: 8.) Reka tushwijume obuhabuzi bubiri oburi kubasa kutukwasa kutekateka aha biri omu bitabo by’engiri kandi tukabita omu bikorwa.

13. Ni bata oku ori kubasa kureba enkuru y’omu kitabo c’engiri nk’eri kubaho omuri obu bwire?

¹³ Ecokubanza: Shusha nk’owareba enkuru eri kugambwa omu ngiri nkeri kubaho omuri obu bwire. Gezaho kutera akashushani, ohurire, kandi ogezeho kwehuriza oku ebintu byabire biri. Kugira ngu okizeho kubishoborocerwa, condoreza omu bikoreso ebi ekitongore ca Yehova kiri kutuha. Shwijuma ebyabireho mbere na nyuma y’enkuru eyi wayegaho. Rondesa ebindi bintu ebirakukwase kushoborocerwa ahu eyo nkuru yaberire n’embera ezabire ziriho. Geranisa enkuru eyi ori kwegaho n’ezindi eziri kushushana na yo eziri omu bindi bitabo by’engiri. Hine obu omuhandiki w’engiri ari kuba yatiremu ekintu c’omugasho eki ondijo muhandiki ataratiremu.

14-15. Ni enki eki tushemerire kukora kugira ngu tute omu nkora ebi twayegera omu nkuru ya Yesu?

¹⁴ Ecakabiri: Ta omu bikorwa ebi washoma omu ngiri omu mbera zawe za burijo. (Yohaana 13:17) Wamara kushoma enkuru y’omu kitabo c’Engiri, yebuze ngu: ‘Mbehi hine eki nayega eki ndi kubasa kuta omu bikorwa omu kubaho kwange? Ni bata oku ndi kubasa kukoresa eyi nkuru omu kukwasa abandi?’ Tekateka aha muntu owu eyo nkuru  eri kubasa kugasira, rero omu bwire burungi oyimugambire omu muringo gwa rukundo.

¹⁵ Reka turebe oku turi kubasa kuta omu nkora obwo buhabuzi bubiri. Twaza kushwijuma enkuru y’omufakazi w’omucene owu Yesu yabwine omuri hekalu.

16. Shoborora enkuru eri kugambwa omu Mako 12:41.

¹⁶ Shusha nk’ori kureba egi nkuru eri kubaho omuri obu bwire. (Shoma omuri Mako 12:41.) Gezaho kutera akashushani orebe oku ebintu byabire biri. Turi aha kiro ca 11 Nisani omu mwaka gwa 33 B.Y., kandi hari kubura ebiro bice ngu Yesu afe. Yesu asibire omuri hekalu izoba ryona ari kwegesa. Abakuru b’amadini abari kumuhakanisa bamuri kubi. Mbere y’aho, abamwe omuri bo bakaba bamuburize aha bushoborozi obu ayine. Abandi bakagezaho kumutegera omu bibuzo. (Mak 11:27-33; 12:13-34) Hati Yesu yaza omu kindi kicweka c’omuri hekalu. Hanuya nabasa kuba yabire ari ahabire hari kwetwa orugo rw’abakazi, ahu yabire ari kubasa kureba otushanduku tw’ebiconco otwabire turi aha rubaju rw’ekisika. Akashitama, rero yareba oku abantu babire bari kuta ebiconco omu bushanduku. Akareba abagiga bari kutamu esente nyingi. Nabasa kuba yabire ari kuhurira oruyombo rw’ebiceri biri kugwa omu bushanduku.

17. Ni enki eki omufakazi w’omucene ori kugambwa omuri Mako 12:42 yakozire?

¹⁷ Shoma omuri Mako 12:42. Bwanyima hakija omukazi yakora Yesu aha mutima. Akaba ari omufakazi w’omucene. (Luk 21:2) Amagara gakaba gamugumire, kandi nabasa kuba yabire nakora n’amani kugira ngu atunge eby’okumubisaho. Konka, akaza ahari kamwe omu bushanduku omu ibanga, yatamu obuceri bubiri obwabire butari kubasa kuyomba bwagwa omu kashanduku. Yesu akaba namanya eki ogo mufakazi yatamu, ni okugamba otuceri tubiri, tw’omuhendo muce omuri obwo bwire. Tukaba tutari n’okubasa kugura ekiterankumba kimwe, emwe omu nyonyi ezabire nizigura esente nce.

18. Tukuratize ebiri omuri Mako 12:43, 44, ni enki eki Yesu yagambire aha kiconco c’omufakazi?

¹⁸ Shoma omuri Mako 12:43, 44. Yesu akashemererwa ahabw’ogo mufakazi. Aketa abegi beye, yamubereka, rero yabagambira ati: ‘Omufakazi oriya omworo yatamu byingi okukira bariya bona.’ Bwanyima akabashobororera ati: ‘Abo [bagiga] bona batamu aha bibashagire; konka omufakazi oriya yatamu ebi ayine byona, kandi ni ryo itungo’ eri yaba ayine ryonka. Ogo mufakazi ku yatire obwo busente obu yabire ayine omu kashanduku, kikereka ku yabire nayesiga obuyambi bwa Yehova.—Zab 26:3.

19. Ni enki eki turi kwegera aha bigambo ebi Yesu yagambire aha mufakazi w’omucene?

¹⁹ Ta omu bikorwa ebi washoma omu nkuru. Yebuze ngu, ‘Ni enki eki ndi kubasa kwegera aha bigambo ebi Yesu yagambire ebiri kukwata aha mufakazi w’omucene. Tekateka ahari ogo mufakazi. Hatariho okubanganisa, akaba nayenda ngu ahe Yehova ebirungi ebiri kukira ebindi. Obwe rero, akakora cona eki yabire ari kubasa ngu ahe Yehova ebirungi ebiri kukira ebindi. Kandi Yesu akamanya ku ebitambo ebi yabire yatanga byabire biri eby’omuhendo omu misho g’Ishe. Ebyo nibitwegesa ishomo ry’omugasho: Yehova nashemererwa twamuha ebirungi ebi twine, ni okugamba kumukorera n’omutima gwitu gona n’amagara gitu gona. (Mat 22:37; Kol 3:23) Nikishemeza Yehova yareba turi kukora cona eki turi kubasa ngu tumuhereze! Ogu musinge nigukwata aha bwire n’amani ebi turi kuta omu bintu by’omwika, harimu kukora omurimo g’okuburira hamwe n’okuza omu nterane.

20. Ni bata oku ori kubasa kuta omu bikorwa ebi wayegera omu nkuru y’omufakazi? Gamba ecokureberaho.

²⁰ Ni bata oku ori kubasa kuta omu bikorwa ebi wayegera aha nkuru y’omufakazi? Gezaho  kutekateka aha bantu abu ori kubasa kugumya wabagambira ku Yehova ari kushemerererwa ebi bari kukora. Ecokureberaho: Mbehi nomanya omunyanyazi ori kwehurira kubi ninga ori kuhurira atine omugasho ahabw’okuba atacayine amani g’okukora byingi nk’ebi yabire ari kukora omu murimo g’okuburira? Mbehi tori kubasa kutekateka ahari mwenetata ori kuhurira acwekire entege ahabw’okuba atakibasa kuza omu nterane zona? Kwasa abantu nkabo ori kubagambira ‘ebigambo birungi’ ebiri kubasa kubagumya. (Efe 4:29) Bagambire ebintu ebi wayegire omu nkuru y’omufakazi ebiri kubasa kubombeka. Ebigambo birungi ebi orabagambire nibituma bayesiga ku Yehova ari kushemererwa twamuha ebirungi ebi turi kubasa. (Enf 15:23; 1Tes 5:11) Wasima abandi ahabw’okuha Yehova ebirungi n’obu byakuba biri bice, noba ori kutora omu mumuhanda ogu Yesu yarabiremu.

21. Ni enki eki wamaririra kukora?

²¹ Mazima, ebitabo by’engiri nibitugambira enkuru z’ebyahikire ahari Yesu! Ezo nkuru nizituma twamutoreza kandi turaba omu muhanda ogu yarabiremu. Mbehi tori kubasa kweyegesa ebyo bitabo ninga shi mukabyegaho omu kuramya kw’eka? Mwijuke ku ekiratukwase kugasirwa n’ebi turi kweyegesa ari okureba enkuru nk’eri kubaho omuri obu bwire, kandi ebi twayega tukabita omu bikorwa omu kubaho kwitu. Nambwenu kugira ngu tutoreze ebi Yesu yakozire, tushemerire kuhurikiza n’ebi yagambire. Omu kicweka ekiri kukurataho turyashwijuma eki turi kwegera aha bigambo ebi Yesu yagambire mbere y’okufa kweye.