1-2. Shoborora embera ezi Yesu yagambiremu ebigambo byeye by’aha muheru.

HAKABA hari aha kiro 14 Nisani omu mwaka gwa 33 B.Y. Ku bamazire kuta ahari Yesu omushango g’okukora ekibi aki atarakozire, bakamujuma, bamubonabonesa, kandi bamuhanika n’aha kiti c’obusaasi. Bakamutera emisimari omu ngaro n’omu bigeri. Ebyo bikatuma yaraba omu busaasi bwingi. Konka akehangana yagamba ahakuba akaba ayine ebintu by’omugasho ebi yabire ari kwenda kugamba.

² Reka tushwijume ebigambo ebi Yesu yagambire ari aha kiti c’obusaasi, turebe n’eki turi kubasa kubyegeraho. Omu bindi bigambo, reka ‘tumuhurikize.’—Mat 17:5.

3. Yesu nabasa kuba yabire ari kumanyisa baha obu yagambire ngu: ‘Tata, obasaasire’?

³ Ni enki eki Yesu yagambire? Obu Yesu yabire ahanikire aha kiti c’obusaasi, akashaba ngu: ‘Tata, obasaasire.’ Ngu asaasire baha? Ebigambo bya Yesu ebyakuratireho, nibitukwasa kumanya abo bantu. Akagamba ati: ‘Tibari kumanya eki bari kukora.’ (Luk 23:33, 34) Yesu nabasa kuba yabire ari kugamba abasirikare b’Abaroma abamutire emisumari omu ngaro n’omu bigeri. Bakaba batari kumanya owu Yesu ari we by’amazima. Nambwenu, nabasa kuba yabire ari kumanyisa abantu ababire bari kugamba ngu ayitwe, konka ababire barije kumwikiriza bwanyima. (Byak 2:36-38) Yesu tarikirize ngu okutwarizibwa kubi oku yabugine kutume yayitwa ekiniga ninga ngu abike enzika. (1 Pet 2:23) Ahobwe,  akashaba Yehova ngu asaasire ababire baza kumwita.

4. Ni enki eki turi kubasa kwegera aha ku Yesu yabire ayetegwire kusaasira ababire bari kumuhakanisa?

⁴ Ni enki eki turi kubasa kwegera aha bigambo bya Yesu? N’itwe tushemerire kuba twetegwire kusaasira abandi nk’oku Yesu yakikozire. (Kol 3:13) Abanyabuzare bitu nibabasa kutuhiganisa ahabw’okutamanya enyikiriza yitu. Nibabasa kutubeherera, batujoga omu misho g’abandi bantu, bacwanyagura ebitabo byitu kandi batutinatinisa kutukora kubi. Omu mwanya g’okubabikira enzika, nitubasa kushaba Yehova ngu ayigure amisho g’abo na bo bikirize amazima. (Mat 5:44, 45) Obumwe nikibasa kutugumira kubasaasira baba baratutwarize kubi munonga. Konka twayikiriza ngu rwango n’okubika enzika bisinge emizi omu mutima gwitu, n’itwe biri kugiraho engaruka. Omunyanyazi omwe akashoborora ati: “Nkerebera ku okusaasira abandi kitari kumanyisa ku ebi bakozire biri birungi ninga ku mbikiririze ngu bagume kuntwariza kubi. Ahobwe nikimanyisa ku ndi kusharamu kutababikira enzika.” (Zab 37:8) Twasaasira abandi, ebintu bibi ebi bari kuba batukorire tibirije kutuma twayitwa ekiniga.—Efe 4:31, 32.

5. Ni enki eki Yesu yaraganisize omwe omu bashuma ababire bahanikire aha rubaju rweye, kandi shi ahabw’enki yakimuraganisize?

⁵ Ni enki eki Yesu yagambire? Abashuma babiri bakaba bahanikire aha rubaju rwa Yesu. Omu kubanza, abo bashuma bakamujuma. (Mat 27:44) Konka bwanyima, omwe akahindura emitekatecere. Akamanya ku hatine ekibi eki Yesu yabire akozire. (Luka 23:40, 41) Nambwenu akereka ku yabire ari kwesiga ku Yesu yabire arazoke omu bafu akaba Omugabe. Akagambira Omujuni ngu: ‘Yesu, ku orija omu Bukama bwawe, onyijuke.’ (Luk 23:42) Mazima ogo mushija akereka ku yabire ayine okwikiriza! Yesu akamugarukamu ati: ‘Buzimazima ninkugambira erizoba nti: Noyija kuguma nanye [hatari omu Bukama, ahobwe] omuri Paradiso.’ (Luk 23:43) Yetegereze ku ekiraganiso ca Yesu cabire kitari kureba abantu bingi, ahobwe ku cabire kiri kureba omuntu omwe. Ahabw’okuba Yesu yabire ari kumanya ku Ishe ari omunyambabazi, akagambira ogo mushuma ebigambo ebyatumire yagira amasiko.—Zab 103:8.

6. Ni enki turi kwegera aha bigambo ebi Yesu yagambire omushuma?

⁶ Ni enki eki turi kubasa kwegera aha bigambo bya Yesu? Yesu ayine emitwarize nk’ey’Ishe. (Heb 1:3) Yehova natura ayetegwire kutusaasira n’okutugirira embabazi ku turi kwehana tubyihire aha mutima kandi tukiriza ekitambo ca Yesu Kristo. (1 Yoh 1:7) Nikibasa kugumira bamwe kwikiriza ku Yehova ari kubasa kubasaasira ebibi ebi bakozire kare. Yaba hine obu ori kwehurira basyoya, tekateka ahari eki: Hari kuburaho obwire buce ngu Yesu afe, akereka embabazi omushuma owabire yatandika kwereka okwikiriza. Mbwenu shi Yehova tari kukora ekiri kukira ahari eco ari kwereka embabazi abari kumuramya kandi bakakora cona eki bari kubasa ngu borobere ebiragiro byeye?—Zab 51:1; 1 Yoh 2:1, 2.

7. Nk’oku biri kugambwa omuri Yohaana 19:26, ni enki eki Yesu yagambire Mariya na Yohana kandi ahabw’enki yabibagambire?

⁷ Ni enki eki Yesu yagambire? (Shoma omuri Yohaana 19:26, 27.) Yesu akaba nayenda kufa ahari nyina, ori kubasa kuba yabire ari omufakazi. Benenyina  bakaba barije kumureberera omu by’omubiri. Konka shi ni oha owabire arije kumureberera omu by’omwika? Tihine ekihamya ekiri kwereka ku benenyina babire bari abegi beye omuri obwo bwire. Konka, Yohana akaba ari entumwa ya Yesu kandi ari munywani weye owa buzima. Yesu akaba nareba abayikirize kwekwatanisa na we omu kuramya Yehova nk’ab’omu ka yeye y’eby’omwika. (Mat 12:46-50) Obwe rero, rukundo eyi Yesu yabire ari kukunda Mariya, ekatuma yamuhereza Yohana ngu amufeho omu by’omwika. Akagambira nyina ati: ‘Reba omwana wawe!’ Nambwenu akagambira Yohana ati: Reba mama wawe! Kwiha eryo izoba, Yohana akaba nka mutabani wa Mariya kandi  yaguma ari kumufaho nk’ori kufa ahari nyina. Mazima Yesu akereka rukundo omukazi owamureberire kwiha yamara kuzarwa, kandi owamugumire aha rubaju mpaka afire!

8. Ni eki turi kwegera aha bigambo ebi Yesu yagambire Mariya na Yohana?

⁸ Ni enki eki turi kubasa kwegera aha bigambo bya Yesu? Obunywani obu twine na benetata na banyanyazi nibubasa kukira obu twine n’abanyabuzare bitu. Abanyabuzare nibabasa kutuhakanisa ninga batwange, konka nk’oku Yesu yakituraganisize, twaguma tuhamire ahari Yehova n’ekitongore ceye, nitwija kutunga ebiri kukira ebi twaferirwe ‘emirundi eri kukira igana.’ Abingi nibija kutubera abatabani, abahara, ba mama, na ba tata abari kutukunda munonga. (Mak 10:29, 30) Mbehi noyehurira ota ahakuba ori omu ka y’eby’omwika ya benetata na banyanyazi abari kukunda Yehova kandi abari kukundana?—Kol 3:14; 1 Pet 2:17.

9. Ni enki eki turi kwegera aha bigambo bya Yesu ebiri omuri Matayo 27:46?

⁹ Ni enki eki Yesu yagambire? Hari kuburaho obwire buce ngu Yesu afe, akagamba ati: ‘Ruhanga wange, Ruhanga wange, ni enki ecakunsigisaho?’ (Mat 27:46) Bibuli teri kushoborora enshonga ahabw’enki Yesu yagambire ebyo bigambo. Konka tekateka aha ki turi kubyegeraho. Yesu akagamba ebyo bigambo ari kuhikiriza obuhanuzi oburi omuri Zaaburi ya 22:1. * Nambwenu, ebyo bigambo nibyereka ku Yehova yabire atarinzire Omwana weye. (Yob 1:10) Yesu akaba namanya ku Ishe yabire ayikirize ngu ahebweyo omu mikono y’abangi beye kugira ngu bamugeze, kandi tihine omuntu owaragezibweho nkawe. Nambwenu, ebyo bigambo bikaba nibihamya ku yabire atakozire ekintu na kimwe ecabire kishemerire kumwitisa.

10. Ni enki eki turi kwegera aha bigambo ebi Yesu yagambire Ishe?

¹⁰ Ni enki eki turi kubasa kwegera aha bigambo bya Yesu? Titushemerire kutekateka ngu Yehova nayija kuturinda ebizibu ebiri kugeza okwikiriza kwitu burijo. Nk’oku Yesu yagezibwe konka akaguma ari omwesigwa kuhisya aha kufa, n’itwe tushemerire kuba twetegwire kukikora caba kiri kwetengesa. (Mat 16:24, 25) Konka, nitwesigira kimwe ku Ruhanga ataritwikiriza ngu tugezibwe ekigezo eki tutari kubasa kwehanganira. (1 Kor 10:13) Nambwenu nka Yesu, abantu nibabasa kutubonabonesa bari kutuziza busha. (1 Pet 2:19, 20) Abantu nibatuhiganisa ahabw’okuba tutari ab’ensi kandi turi kuburira obutumwa burungi. (Yoh 17:14; 1 Pet 4:15, 16) Yesu akaba namanya enshonga ahabw’enki Yehova yayikirize ngu abonabone. Konka, hine obu Abakristo b’abesigwa abari omu bigezo bari kwebuza enshonga ahabw’enki Yehova yayikirize ngu bibabeho. (Hab 1:3) Ruhanga witu oyine embabazi kandi ori kwehangana tari kureba abo Bakristo nk’ababuzire okwikiriza, ahobwe nabareba nk’abari kwetenga okuhumurizibwa.—2 Kor 1:3, 4.

11. Ahabw’enki Yesu yagambire ebigambo ebiri omuri Yohaana 19:28?

¹¹ Ni enki eki Yesu yagambire? (Shoma omuri Yohaana 19:28.) Ahabw’enki Yesu yagambire ngu: ‘Nagira iriho’? Akabigamba kugira ngu ahikirize obuhanuzi oburi omuri Zaaburi ya 22:15, oburi kugira  ngu: ‘Amani gampwiremu, nyomire nk’orugusyo, orurimi rundamatire aha nkanka; ontire omu mucucu g’okufa.’ Nambwenu, n’obu Yesu Yesu yabire ayine obusaasi, akaba ayine n’iriho. Akaba nayetenga ec’okurimara.

12. Ni enki eki turi kwegera aha bigambo bya Yesu ebiri kugira ngu: ‘Nagira iriho’?

¹² Ni enki eki turi kwegera aha bigambo bya Yesu? Yesu tararebire kugamba oku ari kwehurira nka kibi, obwe rero n’itwe tushemerire kugamba oku turi kwehurira. Abamwe omuri itwe tituri kukunda kushaba abandi obuyambi. Konka twaba turi kubwetenga, titushemerire kureka kubushaba abandi. Ecokureberaho: Twaba tukuzire ninga shi turwire nitubasa kushaba munywani witu atukwasa kuhika aha duka ninga shi ahirwariro. Twaba tucwekire entege, nitubasa kushaba omuzehe ninga shi Omukristo obuyambi. Natuhurikiza kandi atugambira “ekigambo kirungi” ekiri kutugaruramu amani. (Enf 12:25) Twijuke ku benetata na banyanyazi bari kutukunda kandi ku nibaba betegwire kutukwasa ‘omu bwire bw’ebihikirizi’ (Enf 17:17) Konka tibari kureba omu mutima. Nibaba batari kumanya yaba turi kwetenga obuyambi, obwe rero ni itwe abashemerire kuba ab’okubanza kubibagambira.

13. Ni biha bintu ebi Yesu yahikirize ahabw’okuguma ari omwesigwa kuhisa aha kufa?

¹³ Ni enki eki Yesu yagambire? Hihi aha shaha mwenda z’ihangwe aha kiro ca 14 Nisani, Yesu akagamba n’iraka rihango ati: ‘Cahwa!’ (Yoh 19:30) Ebyo bigambo nibitwereka ku Yesu yakozire ebi Yehova yabire amushabire kukora. Ahakuba Yesu yagumire ari omwesigwa kuhisya aha kufa, akahikiriza ebintu byingi. Ecokubanza: Akereka ku Sitani ari omubihi. Yesu akereka ku omuntu ohikirire ari kubasa kuguma ari omwesigwa n’obu Sitaane yakumukorera ebintu bibi. Ecakabiri: Yesu akahayo amagara geye nk’ekitambo. Ekitambo ceye kikatuma abantu abatahikirire bagira ecemerero kirungi ahari Ruhanga, kandi kikabaha omugisha g’okwija kubaho ebiro byona. Ecakashatu: Yesu akereka ku Yehova ari we oshemerire kuba Omutegeki ohikirire kandi yahimbisa n’izina ry’ishe.

14. Ni enki eki tushemerire kumaririra kukora buri izoba? Shoborora.

¹⁴ Ni enki eki turi kwegera aha bigambo bya Yesu? Tushemerire kumaririra kuguma turi abesigwa buri izoba. Reba ebi mwenetata Maxwell Friend, owabireho omwegesa w’ishomero rya Giliyadi yagambire. Omu kiterane c’ensi yona, mwenetata Friend akaha toku eri kugamba aha bwesigwa. Akagambamu ati: “Otarireka kukora ebi ori kwenda kukora ninga shi kugamba ebi ori kwenda kugamba erizoba ngu otegerize nyensakare. Mbwenu shi nomanya yaba nyensakare orije kuba oriho? Buri izoba ogume ori kurireba nk’eri aha muheru ry’okwerekeramu ku ori kwenda kubaho ebiro byona.” Nimureke buri izoba tumaririre kuguma turi abesigwa! Ku turakikore basyoya, n’obu twakufa, nitwija kuba turi kumanya ku twagumire turi abesigwa, ku twayerekire ku Sitaane ari omubihi, ku twayerekire ku Yehova ari we oshemerire kututegeka kandi ku twahimbisize izina ryeye!”

15. Tukuratize ebiri omuri Luka 23:46, ni enki eki Yesu yabire ari kwesiga atari kubanganisa?

¹⁵ Ni enki eki Yesu yagambire? (Shoma omuri Luka 23:46.) Yesu akagamba ayine obumanzi ati: ‘Tata, nata [omwika] gwange omu mikono yawe.’ Yesu akaba  nayesiga atari kubanganisa ku ebiro byeye by’omu misho byabire byegamire ahari Yehova, kandi ku yabire arije kumwijuka.

16. Ni enki eki wayegera aha cokureberaho ca mwenetata omwe oyine emyaka 15?

¹⁶ Ni enki eki turi kwegera aha bigambo bya Yesu? Ba oyetegwire kuta amagara gawe omu mikono ya Yehova. Kugira ngu ohike ahari ebyo, oshemerire ‘kwesiga Yehova n’omutima gwawe gona.’ (Enf 3:5) Yetegereze ecokureberaho ca mwenetata Joshua oyine emyaka 15, orwire endwara mbi munonga. Akanga kutambirwa omu buryo oburi kushisha emisinge ya Bibuli. Ku yabire ari hihi kufa, akagambira nyina ati: “Mama we, ndi omu mikono ya Yehova . . . Mama reka nkugambire. Nimanya ntari kubanganisa ku Yehova arije kunzora. Nareba omu mutima gwange, kandi nimukunda.” * Buri omwe omuri itwe nabasa kwebuza ngu, ‘Mbehi mbugine embera ezigumire eziri kubasa kugeza okwikiriza kwange, nimbasa kuta amagara gange omu mikono ya Yehova kandi nyesiga ntari kubanganisa ku arije kunyijuka?’

17-18. Ni gaha mashomo agu twayega? (Nabwenu reba akashanduku akari kugira ngu: “ Ebi turi kwegera aha bigambo bya Yesu by’aha muheru.”)

¹⁷ Mazima, ebigambo bya Yesu by’aha muheru nibitwegesa amashomo g’omugasho! Nibitwijusya ku tushemerire kusaasira abandi kandi ku n’itwe Yehova arije kutusaasira. Twine benetata n’abanyanyazi ab’omu kibina abari kuba betegwire kutukwasa. Konka twaba turi kwenda obuyambi bwabo, ni itwe abashemerire kubanza kububashaba. Nitumanya ku Yehova arije kutukwasa kwehanganira ebizibu byona ebi turi kubugana. Nambwenu, buri izoba tushemerire kubaho turi kwereka ku turi abesigwa, kandi eco nikija kutuma twayesiga tutari kubanganisa ku Yehova arije kutuzora n’obu twakufa.

¹⁸ Mazima, ebigambo ebi Yesu yagambire ari kufera aha kiti c’obusaasi nibitwegesa ebintu byingi! Ku turate omu bikorwa ebi twayega, nitwija kuba turi korobera ebigambo ebi Yehova yagambire aha Mwana weye ati: “Mumuhurire.”—Mat 17:5.