EKICWEKA C’OKWEGA 17
Yehova nakureba nk’ow’omuhendo!
‘[Yehova] ashemerererwa abantu beye.’—ZAB 149:4.
ECESHONGORO CA 108 Rukundo ya Ruhanga Etarikuhwaho
EMPINYE *
Tata witu w’omu iguru ‘nashemerererwa’ buri omwe omuri itwe (Reba paragurafu ya 1)
1. Ni enki eki Yehova ari kureba omu bantu beye?
YEHOVA RUHANGA ‘nashemerererwa abantu beye.’ (Zab 149:4) Eco ku nikituma twashemererwa munonga! Yehova nareba emitwarize yitu mirungi, areba ebi turi kubasa kandi atukwasa kuba abanywani beye. Twaguma turi abesigwa ahari we nayija kuguma ari munywani witu ebiro byona!—Yoh 6:44.
2. Ahabw’enki abamwe bari kubanganisa yaba Yehova ari kubakunda?
2 Abamwe nibabasa kwebuza ngu: ‘Nimanya ku Yehova ari kukunda abahereza beye bona, konka shi mazima nankunda nyowe aha bwange?’ Ni enki ekiri kubasa kutuma abamwe bayebuza eco kibuzo? Oksana, * owabonabwine munonga acari omwana akagamba ati: “Ku nabatizibwe kandi nkatandika obupayoniya nkashemererwa munonga. Konka bwanyima y’emyaka 15, nkatandika kwijuka ebintu bibi ebyampikiriho. Nkatandika kutekateka ku Yehova atacasima ebi ndi kukora kandi ku atacankunda.” Yua, omunyanyazi w’omupayoniya na we owabonabwine acari omwana, akagamba ati: “Nkeha Yehova ahakuba nkaba ndi kwenda kumushemeza. Konka, nkareba atari kubasa kunkunda na kace.”
3. Ni enki eki twaza kushwijuma omuri eki kicweka?
3 Nk’Abakristo b’abesigwa abu twamara kureba, n’iwe nokunda Yehova munonga, konka nobasa kubanganisa yaba ari kukunda. Ni enki ekirakukwase kwikiriza otari kubanganisa ku Yehova ari kukunda? Kandi shi ni enki ekiri kubasa kukukwasa watandika kugira emitekatecere mibi? Reka tushwijume eby’okugarukamu by’ebyo bibuzo.
OKUBANGANISA AHARI RUKUNDO YA YEHOVA NI KIBI
4. Ahabwenki kiri kibi okubanganisa yaba Yehova ari kutukunda?
4 Rukundo ni amani agari kutuhiga kukora ekintu. Twayesiga tutari kubanganisa ku Yehova ari kutukunda kandi ku ari kutufaho, nikija kutuma twayenda kumuhereza n’omutima gwitu gona, n’obu twakuba turi kuraba omu bizibu. Konka, ku turi kubanganisa yaba Yehova ari kutukunda, ‘amani gitu nigaba mace.’ (Enf 24:10) Kandi ku turi kucweka entege, tukaremwa kwikiriza ku Yehova ari kutukunda, nikija kutugumira kwangira ebigezo bya Sitaane.—Efe 6:16.
5. Ni enki ecahikire ahari benetata na banyanyazi ahabw’okubanganisa yaba Ruhanga ari kubakunda?
5 Bamwe omu Bakristo b’abesigwa b’omuri obu bwire bakacweka entege ahabw’okubanganisa. Omuzehe ori kwetwa James akagamba ati: “N’obu nabire ndi kukora ahari Beteli kandi ndi kushemerererwa omurimo ogu nabire ndi kukorera omu kibina ecabire kiri kukoresa orurimi rw’abanyamahanga, na bwo nkaba ndi kwebuza yaba Ruhanga ari kwikiriza ebi ndi kumukorera. Hine n’obu nabire ndi kwebuza yaba Ruhanga ari kuhurira eshara zange.” Eva, ori kukora omurimo g’obwire bwona na we akagamba ati: “Nkashanga kiri kibi kubanganisa yaba Yehova ari kukukunda, ahakuba eco nikituma wacweka entege. Nikituma twayenda kureka ebintu by’omwika kandi kituma twabura okushemererwa omu murimo gwa Yehova.” Michael, omupayoniya w’obwire bwona, kandi ari n’omuzehe akagamba ati: “Waba otari kwikiriza ku Ruhanga ari kukunda, nohaba ohika ori kumurugaho.”
6. Ni enki eki tushemerire kukora twatandika kubanganisa yaba Ruhanga ari kutukunda?
6 Ebi by’okureberaho byona nibyereka ku emitekatecere mibi eri kushisha obunywani bwitu na Yehova. Konka shi ni enki eki turi kubasa kukora twatandika kubanganisa yaba Ruhanga ari kutukunda? Tushemerire kuhika turi kweyihamu eyo mitekatecerere mibi! Shaba Yehova akukwase kweyihamu ebitekateko bibi, ogire ‘obusinge bwa Ruhanga oburengire okwetegereza k’omuntu wena oburije kuguma buri kurinda omutima gwawe n’obwenge bwawe.’ (Zab 139:23; Fil 4:6, 7) Kandi oyijuke ku otari wenka. Hariho n’abandi benetata n’abanyanyazi b’abasigwa abari kwehanganira enyehurira mbi. Nambwenu hariho n’abandi bahereza ba Yehova b’omu bwire bwa kare abayehanganire embera nk’ezo. Reka tushwijume eki turi kubasa kwegera aha cokureberaho c’entumwa Pawulo.
EKI TURI KWEGERA AHA COKUREBERAHO CA PAWULO
7. Ni biha bizibu ebi Pawulo yabire ayine?
7 Mbehi hine obu ori kuhurira oremerirwe ahabw’okuba oyine emirimo myingi? Caba kiri kisyoya, n’iwe ori kuraba omu mbera nk’ezi Pawulo yarabiremu. Akemereza omutima ahabw’ebibina byona. (2 Kor 11:23-28) Mbehi oyine endwara eri kutuma wabura okushemererwa? Pawulo akaba ayine ‘ihwa ry’omu mubiri’ kandi niribasa kuba riri endwara eyi yabire ari kwenda ngu akire. (2 Kor 12:7-10) Mbehi hine obu ori kuhurira ocwekire entege ahabw’obweremwa bwawe? Ebyo bikaba nibihika n’ahari Pawulo. Akeyeta “omuntu enshoberwa” ahabw’okuba yabire ari kurwana n’obweremwa bweye.—Rom 7:21-24.
8. Ni enki ecakwasize Pawulo kwehanganira ebizibu ebi yabire ayine?
8 N’obu Pawulo yabire ari kubugana ebizibu byingi ebiri kumucwa entege, akaguma ari kuhereza Yehova. Ni enki ecabire kiri kumugaruramu amani? N’obu yabire ari kumanya obweremwa bweye, akaba nayikiriza munonga ekitambo. Akaba namanya ekiraganiso ca Yesu ekiri kugira ngu, ‘omuntu wena ori kwikiriza [Yesu] aryatunga amagara agatawaho.’ (Yoh 3:16; Rom 6:23) Pawulo akaba ari omu bantu bingi ababire nibikiriza ekitambo. Akaba nayikiriza atari kubanganisa ku Yehova ari kusaasira abantu bona abari kuba bakozire ebibi, konka bakehana.—Zab 86:5.
9. Ni enki eki turi kwegera aha bigambo bya Pawulo ebiri omu Bagalatia 2:20?
9 Nambwenu, Pawulo akaba nayesiga ku Ruhanga yabire ari kumukunda kandi ku yabyerekire obu yatumire Yesu ngu amufire. (Shoma omu Bagalatia 2:20.) Reba ebigambo ebi yagambire ari kuhendera orwo runyiriri. Pawulo akagamba ati: “Omwana wa Ruhanga, owankunzire akehayo aha bwange.” Pawulo taratekatekire ku Yehova ari kukunda benetata, ngu konka we tari kumukunda. Pawulo akijusa Abaroma ati: ‘Ku twabire tukiri abanyabibi, Kristo yatufera.’ (Rom 5:8) Ruhanga nakunda abantu bona!
10. Ni enki eki turi kwegera aha biri omu Barooma 8:38, 39?
10 Shoma omu Barooma 8:38, 39. Pawulo akaba nayikiriza ku Ruhanga ari kumukunda. Akahandika ngu: ‘Tihine ekiribasa kututanisa n’okukunda kwa Ruhanga.’ Pawulo akaba namanya oku Yehova yayehanganire ihanga rya Isirayeli. Nambwenu akaba nayijuka oku Yehova yamwerekire embabazi. Omu bindi bigambo, Pawulo akaba ari kugamba ati: ‘Yehova akohereza Omwana weye ngu anfire; obwe shi nyine enshonga y’okubanganisa ahari rukundo yeye?’—Rom 8:32.
Eki Ruhanga ari kufaho ni ebi turi kukora hati hamwe n’ebi turije kukora omu biro by’omu misho; tari kufa aha nshobi ezi twakozire kare (Reba paragurafu ya 11) *
11. N’obu Pawulo yakozire ebibi nk’ebiri kugambwa omuri 1 Timoseo 1:12-15, ahabw’enki yabire ari kwesiga ku Ruhanga ari kumukunda?
11 Shoma omuri 1 Timoseo 1:12-15. Pawulo akehurira kubi ahabw’ebi yakozire atakabire Omukristo. Tikiri kutangaza kuba yayeyesire omusisi ‘w’okubanza.’ Pawulo atakamanyire amazima akaba nahiganisa Abakristo, abamwe ari kubata omu bihome kandi ashagika ababire bari kwenda kubita. (Byak 26:10, 11) Tekateka oku Pawulo yabire nayehurira ku yabire nabugana Omukristo ocari muto owu abazire beye bayisirwe ari we obyikirize! Pawulo akaba nayefuza ahabw’enshobi ezi yakozire, konka akaba namanya ku hatariho eki ari kubasa kubikoraho. Akaba nayikiriza ku Kristo yamuferire; ni yo nshonga yahandikire atari kubanganisa ngu: ‘Ahabw’embabazi za Ruhanga ndi nk’oku ndi.’ (1 Kor 15:3, 10) Ebyo nibitwegesa ki? Guma oyikirize ku Kristo yakuferire kandi ku yakuterireho omuhanda g’okugira obunywani burungi na Yehova. (Byak 3:19) Eki Ruhanga ari kufaho ni ebi turi kukora hati hamwe n’ebi turije kukora omu biro by’omu misho; tari kufa aha nshobi ezi twakozire kare, yaba twabire turi Abahamya ba Yehova ninga tutari bo.—Isa 1:18.
12. Ni bata oku ebigambo ebiri omuri 1 Yohaana 3:19, 20 biri kutukwasa twahurira tutine mugasho ninga tutari kukundwa?
12 Watekateka ku Yesu yafire ahabw’ebibi byawe nobasa kugamba ngu: ‘Eki tinkishemerire.’ Ahabw’enki ori kubasa kugamba basyoya? Emitima yitu etahikirire nebasa kutubihabiha, etuma twayehurira nk’abatine mugasho ninga shi nk’abatari kukundwa. (Shoma omuri 1 Yohaana 3:19, 20.) Omu bwire nk’obwo, tushemerire kwijuka ku ‘Ruhanga ari mukuru okukira emitima yitu.’ Rukundo n’embabazi bya Tata witu w’omu iguru nibikirira kimwe enyehurira mbi ezi turi kuba twine. Tushemerire kwesiga tutari kubanganisa ku Yehova ari kutukunda. Kugira ngu ebyo tubihikeho, tushemerire kwega Ekigambo ceye burijo, tukashaba buri izoba, kandi tukekwatanisa n’abahereza beye b’abesigwa. Ahabw’enki tushemerire kukora ebyo bintu?
OKU OKWEYEGESA BIBULI, OKUSHABA, N’ABANYWANI BARUNGI BIRI KUBASA KUTUKWASA
13. Ni bata oku kweyegesa Ekigambo ca Ruhanga kiri kubasa kutukwasa? (Nambwenu, reba akashanduku akari kugira ngu: “ Oku Ekigambo ca Ruhanga kiri kubakwasa.”)
13 Yeyegese Ekigambo ca Ruhanga buri izoba, kandi eco nikija kutuma wakizaho kureba ge emitwarize ya Yehova. Noyija kureba oku ari kukukunda. Okutekateka aha Kigambo ca Ruhanga buri izoba nikituma waba ge omu bitekateko n’omu mutima. (2 Tim 3:16) Omuzehe ori kwetwa Kevin owabire ari kwehurira nk’otine mugasho akagamba ati: “Okushoma Zaaburi ya 103 n’okugitekatekaho kikatuma nahindura eyo mitekatecere, kandi namanya ku Yehova ari kunkukunda.” Eva, owu tubire tugambireho akagira ati: “Nimpendera izoba ndi kutekateka ahari Yehova. Nikituma nagira obusinge bw’omu mutima kandi kituma okwikiriza kwange kwaguma.”
14. Ni bata oku eshara eri kubasa kutukwasa?
14 Shaba obutosha. (1 Tes 5:17) Kugira ngu ogire obunywani n’omuntu, noba oshemerire kuganira na we buri izoba. Ni ko kiri n’aha bunywani bwitu na Yehova. Ku turi kugambira Yehova oku turi kwehurira birabire omu kushaba, nituba turi kwereka ku turi kumwesiga kandi ku turi kumanya ku ari kutukunda. (Zab 94:17-19; 1 Yoh 5:14, 15) Yua, owu tubire tugambireho akagira ati: “Ku ndi kushaba Yehova, tindi kumugambira ebyambaho omu izoba ryona kusha, ahobwe nimugambira enyehurira zange zona. Mporampora, nkakizaho kureba ku Yehova atari nka bosi w’ekitongore, ahobwe ku ni Tata ori kukunda abana beye.”—Reba akashanduku akari kugira ngu: “ Mbehi okakishoma?”
15. Ni bata oku Yehova ari kwereka ku natufaho?
15 Gumu oyekwatanise n’abanywani b’abesigwa. Eco ni ekiconco eki Yehova yatuhire. (Yak 1:17) Tata w’omu iguru natwereka ku ari kutufaho ari kutuha eka y’eby’omwika ya benetata na banyanyazi abari kutwereka rukundo ‘ebiro byona.’ (Enf 17:17) Omu baruha eyi Pawulo yahandikire Abakolosayi, akagambamu Abakristo abamushagikire kandi yagamba ku ‘bamuhumurize.’ (Kol 4:10, 11) Yesu na we akaba nayetenga obuyambi bwa banywani beye, harimu ba marayika n’abantu.—Luk 22:28, 43.
16. Ni bata oku abanywani b’abesigwa bari kubasa kukukwasa kugira obunywani burungi na Yehova?
16 Mbehi nogasirwa omu bwijwire n’ekiconco eki Yehova yakuhire c’abanywani b’abesigwa? Okugambira munywani wawe okuzire ebiri kukwemereza omutima tikiri kwereka ngu ohwiremu amani, ahobwe nikibasa kukurinda. James owu tubire tugambireho akagira ati: “Okugira obunywani n’Abakristo abakuzire omu by’omwika kikankwasa munonga. Ku ndi kugira ebitekateko bibi, abo banywani nibampurikiza betonzire kandi banyijusya ku bari kunkunda. Nibatuma nayerebera ku Yehova ari kunkunda kandi ku ari kunfaho.” Ku ni ec’omugasho munonga kugira obunywani bwa hihi na benetata na banyanyazi!
GUMA OMURI RUKUNDO YA YEHOVA
17-18. Ni oha owu tushemerire kuhurikiza, kandi ahabw’enki?
17 Sitaane nayenda ngu turuhe kandi tureke kukora ebihikire. Nayenda ngu tutekateke ku Yehova atari kutukunda kandi ku tutari ab’omugasho ahari we. Konka nk’oku tukirebire, byona ni ebishuba.
18 Yehova nakukunda. Ori ow’omuhendo omu misho geye. Ku oragumizemu kumworobera, noyija kuguma omuri rukundo yeye ebiro byona, nka Yesu. (Yoh 15:10) Obwe rero, otarihurikiza Sitaane ninga shi ebitekateko byawe bibi by’omu mutima. Ahobwe ogume ohurikize Yehova, ori kuturebamu ebirungi. Ogume omanye ku Yehova ari ‘kushemerererwa abantu beye’ harimu n’iwe!
ECESHONGORO CA 141 Amagara Nigatangaaza
^ par. 5 Abamwe omuri benetata na banyanyazi nibabanganisa yaba Yehova ari kubakunda. Omuri eki kicweka, twaza kushwijuma enshonga tushemerire kwesiga tutari kubanganisa ku Yehova ari kukunda buri omwe omuri twe. Nambwenu twaza kwega eki turi kubasa kukora twaba turi kubanganisa yaba Yehova ari kutukunda.
^ par. 2 Amazina gamwe gakahindurwa.
^ par. 67 EKISHUSHANI: Pawulo atakegire amazima, akaba nahiganisa Abakristo kandi abata omu bihome. Ku yayikirize ebi Yesu yamukorire, akahinduka kandi yagumya Abakristo bagenzi beye, abu yabire yahiganisize abanyabuzare babo.
