1. Ni gaha amazima agari kukwata ahari benetata abacari bato?

BENETATA abacari bato, mwine omugasho omu kibina. Abingi omuri imwe mwine amani mingi. (Enf 20:29) Nimukora ebintu byingi ebiri kukwasa ekibina. Nobasa kuba ori kwenda ngu obe omuhereza w’ekibina. Konka nabwenu, nobasa kureba abandi bari kukutwara nk’ocari muto ninga nk’otari kubasa kukora emirimo eyi wahebwa. N’obu wakuba ocari muto, hariho ebintu ebi ori kubasa kukora hati kugira ngu ab’omu kibina bakuhe ekitinisa kandi bakwesige.

2. Ni enki eki twaza kushwijuma omuri eki kicweka?

² Omuri eki kicweka, twaza kushwijuma munonga aha byahikire aha Mugabe Dawudi. Nambwenu, twaza kureba kace aha byahikire aha bagabe babiri ba Yuda, ari bo Asa na Yehoshafati. Twaza kushwijuma ebizibu ebi abo bashija bashatu babugine, oku batwarize n’eki benetata abacari bato bari kubasa kubegeraho.

3. Ni buha buryo bumwe obu benetata abacari bato bari kubasa kukwasamu benetata b’omu kibina abakuzire?

³ Obu Dawudi yabire acari muto, akagira obumanyi obu abandi babire bari kureba nk’obw’omugasho. Mazima akaba akuzire omu by’omwika, kandi akega omwoga g’okweshongora ogu yakoresize omu kuyamba Sawulo, omugabe owu Ruhanga yabire atorine. (1 Sam 16:16, 23) Mbehi benetata abacari bato, n’imwe mwine emyoga eyi muri kubasa kukoresa  omu kukwasa ab’omu kibina bona? Abingi omuri imwe mugine. Ecokureberaho: Nimubasa kwegesa benetata na banyanyazi abakuzire oku bari kubasa kukoresa amasimu omu kweyegesa n’omu nterane. Ebi ori kumanya ahari ago masimu nibibasa kugasira Abakristo abakuzire.

4. Nka Dawudi, ni guha mutwarize ogu benetata abacari bato bashemerire kugira? (Reba ekishushani c’aha kishembeso.)

⁴ Omu kubaho kwa Dawudi, akereka ku yabire ari omwesigwa. Ecokureberaho: Obu yabire acari muto, akakora n’amani omu kureberera entama z’ishe. Konka akatunga ebizibu omuri ogo murimo. Bwanyima Dawudi akashobororera Omugabe Sawulo ati: ‘Nyowe, omwiru wawe, nkaba ndisa entama za tata. Ku habire hija entare nari edubu, yakwata omwana gw’entama omu busyo, nkaba ngikurata, ngitera, ngugiiha omu kanwa.’ (1 Sam 17:34, 35) Dawudi akaba namanya ku ashemerire kureberera entama kandi akazirwanirira ayine obumanzi. Benetata abacari bato nibabasa kutoreza Dawudi bari kutamu amani omu kukora omurimo gona ogu bahebwa.

5. Tukuratize ebiri omuri Zaaburi ya 25:14, ni kiha kintu kikuru eki benetata abacari bato bari kubasa kukora?

⁵ Dawudi akaba ayine obunywani burungi na Yehova. Obwo bunywani bukaba buri obw’omuhendo ahari Dawudi kukira obumanzi n’omwoga g’okutera enanga ebi yabire ayine. Yehova akaba ari Ruhanga wa Dawudi kandi ari na munywani weye ow’aha mara. (Shoma omuri Zaaburi ya 25:14.) Imwe benetata abacari bato, ekintu kikuru eki muri kubasa kukora ni okugumya obunywani obu mwine na Tata witu w’omu iguru, kandi eco nikituma mwatunga endijo mirimo myingi omu kibina.

6. Ni eha mitekatecere etahikire ayi abantu bamwe babire bine ahari Dawudi?

⁶ Dawudi akaba ayine kwehanganira emitekatecere etahikire ayi abantu babire bamwineho. Ecokureberaho: Obu yabire ari kwenda kuta amagara geye omu kabi ngu arwanise Goliyasi, Omugabe Sawulo akagezaho kumucwa entege ari kumugira ati: ‘Ocari muto.’ (1 Sam 17:31-33) Ebyo bitakabireho, benishe ba Dawudi na bo bakaba bamugambire ku hatine eki ari kubasa kukora. (1 Sam 17:26-30) Konka, Yehova we akaba atari kureba Dawudi  nk’omwana ninga nk’otine eki ari kubasa kukora. Akaba ari kumanya ge ogo mwojo muto. Kandi ahabw’okuba Dawudi yayesigire munywani weye, Yehova, na we akamuha obumanzi, yasingura Goliyasi.—1 Sam 17:45, 48-51.

7. Ni enki eki ori kubasa kwegera aha nkuru emwe ya Dawudi?

⁷ Ni enki eki turi kubasa kwegera ahari Dawudi? Tushemerire kugira omutwarize g’okwehangana. Nikitwara obwire kugira ngu abari kutekateka ku ocari muto batandike kukureba nk’omuntu okuzire. Konka, nobasa kwesiga otari kubanganisa ku Yehova ari kureba ebiri kukira aha biri kurebwa n’amisho. Nakumanya ge kandi namanya n’ebi ori kubasa kukora. (1 Sam 16:7) Gumya obunywani obu oyine na Ruhanga. Eco Dawudi akakikora ari kwetegereza ebi Yehova yahangire. Dawudi akatekateka aha ku ebyo byahangirwe biri kumwegesa aha mitwarize y’Omuhangi. (Zab 8:3, 4; 139:14; Rom 1:20) Nambwenu, shaba Yehova amani agu ori kwetenga. Ecokureberaho: Abu ori kwega na bo ah’ishomero baba bari kukushecerera ahabw’okuba ori Omuhamya ba Yehova, shaba Yehova amani g’okwehangana, kandi ote omu nkora obuhabuzi obu ori kutunga omu Kigambo ceye n’omu bitabo byitu ebiri kwegesa Bibuli na za vidiyo. Oku ori kizaho kureba oku Yehova ari kukukwasa kwehanganira ekizibu eki oyine, ni ko ori kizaho kumwesiga. Nambwenu, abandi ku barireba oku ori kurondera obuyambi ahari Yehova, nibija kukwesiga.

8-9. Ni enki ecakwasize Dawudi kutegereza ayehangine, kandi shi ni enki eki benetata abacari bato bari kubasa kumwegeraho?

⁸ Reba ekindi kizibu eki Dawudi yabugine. Bwanyima y’okutoranwa nk’omugabe, akaba ashemerire kutegereza emyaka myingi ayehangine kugira ngu aze aha kitebe c’obugabe bwa Yuda. (1 Sam 16:13; 2 Sam 2:3, 4) Mbwenu shi ni enki ecamukwasize kuguma ategerize ayehangine omuri obwo bwire bwona? Omu mwanya g’okuhwamu amani, akakoresa obwo bwire omu kukora ebi yabire ari kubasa. Ecokureberaho: Obu yabire ahungire omu kacweka k’Abafilisitiya, akakoresa obwo bwire omu kurwanisa abangi b’Abisirayeli. Eco kikatuma yarinda emipaka y’ekicweka ca Yuda.—1 Sam 27:1-12.

⁹ Ni enki eki benetata abacari bato bari kwegera ahari Dawudi? Koresa buri mugisha ogu wabona ori kuhereza benetata. Tekateka aha byahikire ahari mwenetata ori kwetwa Ricardo. * Obu yabire acari omunyeto, akaba ayine entego y’okukora obupayoniya bw’obwire bwona. Konka akaba ataketebekanisize. Omu mwanya g’okuhwamu amani, akagumizamu kutamu amani omu kukora omurimo g’okuburira. Akagamba ati: “Ku ndi kureba enyima, nindeba ku nabire nshemerire kongera kutunguka. Nkata omutima aha kugaruka kutayayira ababire bari kwenda kwega kandi ntebekanisa ebi ndabegese. Nambwenu nkatunga omuntu w’okwegesa Bibuli. Oku nagumire ndi kugira obumanyi bwingi ni ko nagumire ndi kukizaho kweyesiga.” Hati Ricardo ni omupayoniya w’obwire bwona ori kukora n’amani kandi ni omuhereza w’ekibina.

10. Ni enki eki Dawudi yakozire izoba rimwe atakakozire ensharamu?

¹⁰ Reba ekindi ecahikire ahari Dawudi. Omu bwire obu we n’amahe geye babire besherekire, tibaragenzire n’ab’omu maka gabo. Ku babire batariho, abangi bakija batahirira ab’omu maka gabo babanyaga. Dawudi akaba nabasa kutekateka ngu ahabw’okuba yabire ari omusirikare omanyirire, akaba nabasa kukoresa  akakoryo, ajuna ab’omu maka gabo. Konka omu mwanya gw’eco, Dawudi akarondera obuhabuzi ahari Yehova. Kandi Dawudi ayambirwe n’omutambi ori kwetwa Abiyasaari, akabuza Yehova ati: ‘Ku ndakurate ezo ngabo, ninza kuzihika?’ Yehova akagambira Dawudi ngu azikurate kandi yamuhamiza ku arazisingure. (1 Sam 30:7-10) Ebyo nobasa kubyegeraho enki?

11. Ni enki eki ori kubasa kukora otakakozire ensharamu?

¹¹ Ronda obuhabuzi otakakozire ensharamu. Nobasa kuganira n’abazire bawe. Nambwenu nobasa kutunga obuhabuzi burungi aha bazehe b’ekibina abamanyirire. Yehova nayesiga abo bashija abu yatorine kandi n’iwe nobasa kubesiga. Yehova nabareba nk’‘ebiconco’ omu kibina. (Efe 4: 8) Noyija kugasirwa watoreza okwikiriza kwabo kandi okahurikiza obuhabuzi obu bari kukuha. Hati reka turebe eki turi kwegera aha Mugabe Asa.

12. Ni eha mitwarize eyi Omugabe Asa yabire ayine obu yatandikire kutegeka?

¹² Omugabe Asa acari muto, akaba ari omucurezi kandi ari emanzi. Ecokureberaho: Obu yabire omugabe omu mwanya gw’ishe, Abiya, akataho entebekanisa y’okurwanisa okuramya ebishushani. Nambwenu ‘akaragira Abayuda kusherura [Yehova] Ruhanga wa bishenkuru n’okorobera ebiragiro ebyatirweho.’ (2 Bus 14:1-7) Kandi obu Zeera owa Esiyopiya yayijire kubarwanisa n’engabo 1,000,000, Asa akashaba Yehova obuyambi, ari kugira ati: ‘Ayi [Yehova], tihine ori kwingana n’iwe omu kuhwera abatine amani. [Yehova] Ruhanga witu, tuhe emikono ahabw’okuba n’iwe turi kwesiga.’ Ebyo bigambo birungi nibyereka ku Asa yabire ari kwesiga Yehova. Asa akesiga Ishe w’omu iguru kandi ‘[Yehova] akasingura Abanyesiyopiya.’—2 Bus 14:8-12.

13. Ni enki ecahikire ahari Asa bwanyima, kandi ahabw’enki?

¹³ N’iwe noyikiriza ku okurwana n’engabo 1,000,000 kitorobi kandi ni co kizibu eki Asa yasingwire. Konka ekiri kushasha, Asa ku yabugine akazibu kace, akaremwa kurondera obuyambi ahari Yehova. Obu Baasha Omugabe wa Isirayeli yamurwanisize, akahika ari kurondera obuyambi aha mugabe wa Siriya. Eco kikarugamu akabi kahango! Yehova akoresize omuhanuzi Hananiya, akagambira Asa ati:  ‘Ahabw’okuba oyesigire omugabe wa Siriya, tiwayesiga Yehova Ruhanga wawe, ni co ihe ry’omugabe wa Siriya rikukirireho.’ Okuruga obwo, Asa tararugire omu ntaro. (2 Bus 16:7, 9; 1 Bag 15:32) Ebyo nibitwegesa ki?

14. Ni bata oku ori kubasa kurondera obuhabuzi ahari Yehova, kandi shi tukuratize ebiri omuri 1 Timoseo 4:12, noyija kugasirwa ota ku orakikore basyoya?

¹⁴ Guma ori omucurezi kandi ogumizemu kwesiga Yehova. Obu wabatizibwe, okereka ku oyine okwikiriza kandi ku noyesigira kimwe Yehova. Kandi Yehova akakuha omugisha g’okuba omu ka yeye. Obwe rero, gumizamu kurondera obuhabuzi ahari Yehova. Okurondera obuhabuzi ahari Yehova nikibasa kurebeka nk’ecorobi waba ori kukora ensharamu zigumire. Kandi shi omu mbera zawe za burijo? Mazima ni ec’omugasho kurondera obuhabuzi ahari Yehova n’omu bwire obu ori kutorana eby’okweshemeza, kuronda omurimo g’okukubisaho, n’entego zawe! Otayesiga obwenge bwawe. Ronda obuhabuzi bw’omuri Bibuli oburi kukwata aha mbera zawe kandi obukuratire. (Enf 3:5, 6) Ku orakikore basyoya, noyija kushemeza Yehova kandi ab’omu kibina nibija kukuha ekitinisa.—Shoma omuri 1 Timoseo 4:12.

15. Tukuratize ebiri omu 2 Busingye 18:1-3; na 19:2, ni ziha nshobe ezi Omugabe Yehoshafati yakozire?

¹⁵ Ni amazima, tituhikirire kandi hine obu turi kukora enshobe. Konka, eco tikishemerire kukuremesa kukora cona eki ori kubasa omu murimo gwa Yehova. Yetegereze ecokureberaho c’Omugabe Yehoshafati. Akaba ayine emitwarize mirungi myingi. Obu yabire ari muto, ‘akakuratira Ruhanga w’ishe kandi yaguma nayorobera ebiragiro byeye.’ Nambwenu, akatuma abatware omu ndembo za Yuda ngu begesa abantu ebiri kukwata ahari Yehova. (2 Bus 17:4, 7) Konka n’obu Yehoshafati yabire ayine eyo mitwarize mirungi, hine obu yabire nakora enshobe. Kandi eco kikatuma omuhanuzi wa Yehova yamuha obuhabuzi. (Shoma omu 2 Busingye 18:1-3; 19:2.) Ni enki eki ori kubasa kwegera ahari eyo nkuru?

16. Ni enki eki ori kubasa kwegera aha byahikire ahari Rajeev?

¹⁶ Yikiriza obuhabuzi kandi obute omu nkora. Nk’abandi abacari bato, nikibasa kuba kikugumire kweteraho entego  y’okukorera Yehova. Otahwamu amani. Tekateka ahari mwenetata ocari muto ori kwetwa Rajeev. Akagamba aha myaka yeye y’obunyeto, ati: “Mazima obwo bwire nkaba ntari kumanya eki ndikoresa amagara gange. Nk’abandi abacari bato, nkaba ninkunda munonga eby’emizano n’okweshemeza okukira okuza omu nterane n’omu murimo g’okuburira.” Ni enki ecakwasize Rajeev? Omuzehe w’omu kibina akamuha obuhabuzi. Rajeev akashoborora ati: “Akankwasa kutekateka aha musinge oguri omuri 1 Timoseo 4:8.” Rajeev akecureza yahurikiza obwo buhabuzi kandi yashwijuma entego zeye. Akagamba ati: “Nkasharamu kweteraho entego z’eby’omwika.” Ni enki ecarugiremu? Rajeev akashoborora ati: “Bwanyima y’emyaka mice mpibwe obwo buhabuzi, nkaba omuhereza w’ekibina.”

17. Ni bata oku abakuzire bari kureba benetata abacari bato abari kukorera Yehova?

¹⁷ Abakuzire nibasima abacari bato munonga ahabw’okukora na bo “n’omutima gumwe”! (Zef 3:9) Nibabakunda ahabw’okuba mwine omutima g’okukora kandi murikukora n’amani omurimo gona ogu mwahebwa. Mazima nibabasima kandi nibabesiga.—1 Yoh 2:14.

18. Tukuratize ebiri omu Nfumu 27:11, Yehova nayehurira ata yareba benetata abacari bato abari kumukorera?

¹⁸ Imwe benetata abacari bato, mutariyebwa ku Yehova ari kubakunda kandi ku ari kubesiga. Akaba yagambire ku omu biro by’aha mperu, hine abasigazi ababire barije kwehayo bekundire. (Zab 110:1-3) Namanya ku muri kumukunda kandi ku muri kwenda kukora cona eki muri kubasa ngu mumuhereze. Obwe rero, oyehanganire abandi kandi n’iwe ogire omutwarize g’okutegereze. Wakora enshobe, oyikirize okuhaburwa n’okuhanwa oku ori kutunga, kandi obirebe nk’ebyaruga ahari Yehova. (Heb 12:6) Kora n’amani omurimo gona ogu wahebwa. Kandi ekiri kukira byona, shemeza omutima gwa Tata w’omu iguru omuri byona ebi ori kukora.—Shoma omu Nfumu 27:11.