1. Ni enki ecakutangarize ku watandikire kugambira abandi amazima agu wayegire omuri Bibuli?

MBEHI noyijuka izoba eri wamanyireho ku wabona amazima? Okahika ori kushoborocerwa ebi wabire noyega omuri Bibuli! Okatekateka ngu buri omwe nabasa kushemererwa yayega amazima agu wayikirize. Okikiriza otari kubanganisa ku amazima g’omuri Bibuli gari kubasa kutuma babaho bashemerirwe hati n’omu biro by’omu misho. (Zab 119:105) Eco kikatuma watandika kugambira ago mazima abanywani bawe n’abanyabuzare bawe. Konka shi bakagikiriza? Ingaha. Ahobwe ecakutangarize ni oku abingi omuri bo bayangire kugahurikiza.

2-3. Ni eha mitekatecere eyi abantu bingi b’omu bwire bwa Yesu babire bine ahari we n’obutumwa bweye?

² Titushemerire kutangara abandi bayanga kuhurikiza obutumwa obu turi kuburira. Omu bwire bwa Yesu, abantu bingi bakanga kumuhurira, n’obu yabire ari kukora eby’okutangaza, ari kweraka ku Ruhanga yabire ari kumuha amani. Ecokureberaho: Yesu akakora ecokutangaza yazora Lazaro, eki ababire bari kumuhakanisa babire batari kubasa kuhakana. Konka, Abebembezi b’Abayudaya bakanga kwikiriza ku yabire ari Mesiya. Nambwenu bakaba bari kwenda kwita Yesu na Lazaro!—Yoh 11:47, 48, 53; 12:9-11.

³ Yesu akaba ari kumanya ku abantu bingi babire barije kwanga kwikiriza ku yabire ari Mesiya. (Yoh 5:39-44) Akagambira abegi ba Yohana Omubatizi ati: ‘Otari kumbanganisaho ayine omugisha.’ (Mat 11:2, 3, 6) Ahabw’enki abantu bingi baremirwe kwikiriza Yesu?

4. Ni enki eki twaza kushwijuma omuri eki kicweka?

⁴ Omuri eki kicweka, n’ekiri kukurataho, twaza kushwijuma enshonga ezatumire abantu bingi b’omu kinyigana c’okubanza  bayanga kwikiriza Yesu. Nambwenu nitwija kureba enshonga eziri kutuma abantu bingi b’omuri obu bwire bari kubanganisa. Ekiri kukira byona, nitwija kwega enshonga ahabw’enki tushemerire kugira okwikiriza kuhamire kugira ngu tutabanganisa.

5. Ahabw’enki abantu abamwe babanganisize ngu Yesu tari we Mesiya owaraganisibwe?

⁵ Abantu bingi bakabanganisa ahari Yesu ahabw’ahu yakurire. Bakaba nibikiriza ku Yesu yabire ari omwegesa ori kutangaza kandi ku yabire ari kukora eby’okutangaza. Konka nambwenu, bakamureba nk’omutabani w’omubiji w’omucene. Kandi akaba atwire omuri Nazareti, etawuni eyabire eri kurebwa nk’ey’ahaasi munonga. Nataniyeli, owizire kuba omwegi wa Yesu na we akabanza yagamba ati: ‘Nogira ngu omuri Nazareti nihabasa kurugamu ekintu kirungi?’ (Yoh 1:46) Nataniyeli nabasa kuba atarakunzire etawuni eyi Yesu yakuriremu. Ninga shi nabasa kuba yabire ari kwijuka obuhanuzi oburi omuri Mika 5:2, obwagambire ku Mesiya yabire arizarirwa omuri Betelehemu, hatari omuri Nazareti.

6. Ni enki ecabire kirakwase abantu b’omu bwire bwa Yesu kumanya ku ari we Mesiya?

⁶ Eki Ebyahandikirwe biri kukigambaho. Omuhanuzi Isaaya akagamba ku abangi ba Yesu babire batarije kuta omutima aha biri kukwata aha ‘b’omu businge bwa [Mesiya]’ ni okugamba aha bukomoko bweye. (Isa 53:8) Ebyo byona bikaba byahanwirwe. Kuri abo bantu bagizire obwire bw’okushwijuma obwo buhanuzi bwona betonzire, bakaba barije kumanya ku Yesu yazarirwe omuri Betelehemu kandi ku yabire akomokire aha Mugabe Dawudi. (Luk 2:4-7) Obwe rero, Yesu akazarirwa omuri Betelehemu nk’oku byabire byagambirwe omu buhanuzi oburi omuri Mika 5:2. Mbwenu shi, ni kiha kizibu eki abantu babire bine? Abantu bakarahuka kucwa orubanja. Bakaba batari kumanya amazima gona. Kandi eco kikatuma babanganisa.

7. Ahabw’enki abantu bingi b’omuri obu bwire bari kubanganisa aha bahereza ba Yehova?

⁷ Mbehi eco kizibu kiriho n’omuri obu bwire? Yego. Abahamya ba Yehova abingi tibari abagiga ninga shi abantu b’ekitinisa, kandi abantu bingi nibabareba nk’‘bataregire.’ (Byak 4:13) Abamwe nibatekateka ngu abahereza ba Yehova tibashemerire kwegesa Bibuli ahakuba bataregire amashomero g’edini. Abandi nibagamba ku Abahamya ba Yehova bari “edini y’Abanyamerika,” kandi Abahamya ba Yehova 14 ahari igana ari bo abatwire omuri Amerika. Nambwenu abandi bakagambirwa ku Abahamya ba Yehova batari kwikiriza Yesu. Hakahwa emyaka myingi, abantu bari kweta abahereza ba Yehova “abakomunisiti,” “edini y’abajungu,” n’“abantu abari kugomera obutegeki.” Kandi ahakuba abantu abu bari kugambira ebyo bintu batari kutumanyaho amazima gona, nikituma batubanganisaho.

8. Tukuratize ebiri kugambwa omu Byakozirwe 17:11, ni enki eki abantu bashemerire kukora kugira ngu batabanganisa aha bahereza ba Yehova?

⁸ Oku omuntu ari kubasa kwerinda okubanganisa. Abantu bashemerire kushwijuma, bakamanya amazima gona. Eco ni co eki omuhandiki w’engiri ori kwetwa Luka yabire amarire kukora. Akatamu amani kugira ngu ayege ‘byona okuruga ahu byatandikire.’ Akaba ari kwenda ngu abarabishome ‘bamanye ge amazima g’ebi’ babire bahurire ahari Yesu. (Luk 1:1-4) Abayudaya b’omuri Beroya ya kare, na bo bakaba bari nka Luka. Ku bahurire obutumwa burungi oburi kukwata ahari Yesu aha murundi g’okubanza, bakashwijuma Ebyahandikirwe by’Oruheburayo kugira ngu barebe yaba gari amazima. (Shoma omu Byakozirwe 17:11.) N’abantu bashemerire  kushwijuma ebihamya kugira ngu bamanye amazima gona. Bashemerire kugeranisa ebi abahereza ba Ruhanga bari kubagambira n’Ebyahandikirwe. Nambwenu bashemerire kwega ebiri kukwata aha bahereza ba Yehova b’omuri obu bwire. Bashwijuma amazima gona betonzire, tibarije kwikiriza ebi abantu bari kugamba aha Bahamya ba Yehova ngu bitume bababanganisaho.

9. Ni enki ecabireho Yesu ku yayangire kwereka abantu akamanyiso akari kuruga omu iguru?

⁹ Abantu bamwe b’omu bwire bwa Yesu tibaramazirwe n’ebi yabegesize. Bakaba bari kwenda ebindi. Bakaba bari kwenda ngu ayereke ku ari Mesiya ari ‘kubereka akamanyiso akari kuruga omu iguru.’ (Mat 16:1) Nibabasa kuba bakimushabire ahabw’ebi bahurire omuri Danieli 7:13, 14. Konka, obwire obu Yehova yabire arihikirizamu obwo buhanuzi bukaba butakahikire. Ebi Yesu yayegesize bikaba biri kumara kugira ngu bitume bayikiriza batari kubanganisa ku Yesu yabire ari we Mesiya. Konka ku yayangire kubereka akamanyiso aku babire bari kwenda, bakamubanganisaho.—Mat 16:4.

10. Ni bata oku Yesu yahikirize ebi Isaaya yagambire ahari Mesiya?

¹⁰ Eki Ebyahandikirwe biri kukigambaho. Omuhanuzi Isaaya akaba yagambire ahari Mesiya ati: ‘Taritongana, tariyomba, n’iraka ryeye tiririhurirwa omu mihanda.’ (Isa 42:1, 2) Yesu akakora omurimo g’okuburira aturize kandi ayecurerize. Tarombekire za hekalu, kandi akaba atari kujwara ebijwaro by’okumutanisa aha bandi ninga shi ngu ayende ngu abantu bamwete amazina g’ekitinisa. Ku yabire ari kucwerwa orubanja, akanga kutangaza Omugabe Herode ari kumukorera ec’okutangaza. (Luk 23:8-11) Ni amazima Yesu akakora bimwe omu by’okutangaza, konka omurimo g’okuburira obutumwa burungi ni go yatireho omutima munonga. Akagambira abegi beye ku ari co yabire ‘ayizire.’—Mak 1:38.

11. Ni eha mitekatecere etahikire ayi abantu bamwe b’omuri obu bwire bine?

¹¹ Mbehi eco kizibu kiriho n’omuri obu bwire? Yego. Omuri obu bwire, abantu bingi nibashemererwa ahabw’ebyombeko by’amadini  bihango n’ebishushani ebiri kusera ebirimu, abebembezi bago bine amazina g’ekitinisa, kandi bine emigenzo etari omu Byahandikirwe. Konka abo bantu abari omuri ago madini tibari kwega ebiri kukwata ahari Ruhanga n’ekigendererwa ceye. Abari kwekwatanisa omu nterane z’Abahamya ba Yehova bo nibega ebi Yehova ari kwenda n’oku bari kubasa kubikora. Enju zitu z’Obukama niziba ziyonjire, konka zitarimu ebintu ebiri kugura esente nyingi. Abari kutwebembera tibari kujwara ebijwaro ebiri kubatanisa n’abandi ninga shi ngu bagire amazina g’ebitinisa. Ebi turi kwegesa n’ebi turi kwikiriza nibiruga omuri Bibuli. N’obu kirabe kiri kisyoya, abantu bingi nibanga obutumwa obu turi kubagambira ahakuba tutine emigenzo nk’eyabo. Kandi ebi turi kwegesa nibihakanisa ebi bari kwikiriza.

12. Nk’oku biri kugambwa omu Baheburaayo 11:1, 6, okwikiriza kwitu kushemerire kuba kwegamire ahari ki?

¹² Oku turi kubasa kwerinda okubanganisa. Entumwa Pawulo akagambira Abakristo ababire batwire omuri Roma ati: ‘Okwikiriza kuruga omu bi tuhurira, kandi ebi tuhurira biruga omu kigambo ca Kristo.’ (Rom 10:17) Obwe rero, nitugumwa okwikiriza kwitu twayeyegesa Ekigambo ca Ruhanga, tutari kwekwatanisa omu migenzo y’amadini etari omu Byahandikirwe, n’obu yakuba eri kushemeza. Tushemerire kugira okwikiriza kuhamire ahakuba omuntu ‘otari kwikiriza tari kubasa kushemeza’ Ruhanga (Shoma omu Baheburaayo 11:1, 6.) Ni yo nshonga tutari kwetenga ecokutangaza ekiri kuruga omu iguru kugira ngu tubone kumanya ku twabona amazima. Okushwijuma ge amazima g’omuri Bibuli ni co ekirije kutuma tutabanganisa.

13. Ni enki ecatumire abingi babanganisa ahari Yesu?

¹³ Omu bwire bwa Yesu, abegi ba Yohana bakatangara ahakuba abegi ba Yesu bakaba batari kwesibyako. Yesu akabashobororera ku batari kwetenga kwesibyako acahurire. (Mat 9:14-17) N’obu cabire kiri kisyoya, Abafarisayo n’abandi ababire bari kumuhakanisa bakamwanga ahakuba yabire atari  kukuratira emigenzo yabo. Bakitwa ekiniga ku yatambire abarwire aha Sabato. (Mak 3:1-6; Yoh 9:16) Ekiri kutana n’eco bakaba nibarebeka nk’abari kuha ekitinisa Sabato, konka bikiririza abantu kukorera obushubuzi omuri hekalu. Bakagubwa kubi Yesu ku yababingire ngu bareke kubikora. (Mat 21:12, 13, 15) Kandi abu Yesu yaburire omuri sinagogi y’omuri Nazareti bakagubwa kubi ku yagambire enkuru mbi y’Abisirayeli ari kubereka ku bari kwekunda kandi ku bine okwikiriza kuce. (Luk 4:16, 25-30) Ahakuba Yesu yakozire ebi babire batari kwenda ngu akore kikatuma bamubanganisaho.—Mat 11:16-19.

14. Ahabw’enki Yesu yarwanisize emigenzo y’abantu eyabire etari omu Byahandikirwe?

¹⁴ Eki Ebyahandikirwe biri kukigambaho. Yehova akoresize omuhanuzi Isaya akagamba ati: ‘Abantu aba nibanyirira hihi, bampa ekitinisa n’akanwa kabo n’eminwa yabo, konka emitima yabo endi hare, kandi okuntina kwabo n’ekiragiro eki bayegesibwe abantu.’ (Isa. 29:13) Yesu akaba ahikire kurwanisa emigenzo y’abantueyabire etari omu Byahandikirwe. Abayehugize Ebyahandikirwe bakata ebiragiro n’emigenzo by’abantu omu mwanya g’okubanza bakabanganisa ahari Yehova n’owu yatumire ari we Yesu.

15. Ni enki ekiri kutuma abantu bingi b’omuri obu bwire bareba kubi Abahamya ba Yehova?

¹⁵ Mbehi eco kizibu kiriho n’omuri obu bwire? Yego. Abantu bingi nibagubwa kubi Abahamya ba Yehova ku bari kwanga kwekwatanisa na bo omu migenzo etari omu Byahandikirwe, nk’ebiro by’amazarwa na Noheli. Abandi nibagubwa kubi ku bari kureba Abahamya ba Yehova batari kwekwatanisa omu biro bikuru by’ihanga n’emigenzo eri kukorerwa abafire etari omu Kigambo ca Ruhanga. Abantu nk’abo abari kubanganisa nibabasa kutekateka ku bari kuramya Ruhanga omu buryo obu ari kusima. Konka tibari kubasa kushemeza Ruhanga baba bari kwehuzya amazima g’omu Kigambo ca Ruhanga bakakuratira emigenzo y’omu nsi.—Mak 7:7-9.

16. Tukuratize ebiri omuri Zaaburi ya 119:97, 113, 163-165, ni enki eki tushemerire kukora, kandi ni enki eki tushemerire kwerinda?

¹⁶ Oku turi kubasa kwerinda okubanganisa. Tushemerire kukizaho kukunda ebiragiro bya Yehova n’emisinge yeye. (Shoma omuri Zaaburi ya 119:97, 113, 163-165.) Twakunda Yehova nitwija kwerinda emigenzo yona etari kumushemeza. Titurije kwikiriza ekintu cona ngu kishishe rukundo eyi turi kukunda Yehova.

17. Ni biha bintu ebyatumire abantu bingi babanganisa omu bwire bwa Yesu?

¹⁷ Abantu bamwe b’omu bwire bwa Yesu bakaba bari kwenda ngu ahike ari kuhindura obutegeki. Bakaba bari kumanya ngu Mesiya nayija kubiha omu mikono y’Abaroma. Konka ku bagerizeho kugira Yesu omugabe, akanga. (Yoh 6:14, 15) Abandi bo harimu n’abatambi bakaba batinire ku Yesu yabire arije kuhindura obutegeki kikagwisa kubi Abaroma, rero bakabaka omwanya ogu babire babahire omu butegeki bwabo. Ebyo na byo bikatuma Abayudaya bingi babanganisa.

18. Ni buha buhanuzi bw’omuri Bibuli oburi kukwata ahari Mesiya obu abantu bingi bayehugize?

¹⁸ Eki Ebyahandikirwe biri kukigambaho. N’obu obuhanuzi bwingi bwabire buri kugamba ku Mesiya yabire arije kuba omurwani ori kusingura, obundi bwo bukagamba ku yabire arije kubanza kufa ahabw’ebicumuro byitu. (Isa 53:9,12) Mbwenu shi ahabw’enki abantu babire bari kumutekatekaho ebindi? Abingi b’omu bwire bwa  Yesu bakehuzya obuhanuzi bwingi obwabire butari kuraganisa okwihwaho kw’ebizibu byabo.—Yoh 6:26, 27.

19. Ni biha bintu ebiri kutuma abantu bingi b’omuri obu bwire batubanganisaho?

¹⁹ Mbehi eco kizibu kiriho n’omuri obu bwire? Yego. Abantu bingi b’omuri obu bwire nibatubanganisaho ahakuba tutari kwejwanga omu by’obutegeki. Nibaba bari kwenda ngu n’itwe tutorane abategeki. Konka, twayetoranira omutegeki w’omuntu, nituba twayanga Yehova. (1 Sam 8:4-7) Nambwenu abantu nibatekateka ku tushemerire kombeka amashomero n’amarwariro n’okukora ebindi bintu ebiri kuyamba abantu. Nibabanganisa ahakuba turi kuta omutima gwitu aha murimo g’okuburira, kandi bo bari kutekateka ngu tushemerire kukora ebintu by’okubihiraho ebizibu omuri obu bwire.

20. Nk’oku Yesu yabigambire omuri Matayo 7:21-23, ni enki eki tushemerire kutaho omutima?

²⁰ Oku turi kubasa kwerinda okubanganisa. (Shoma omuri Matayo 7:21-23.) Eki tushemerire kutaho omutima ni okukora omurimo ogu Yesu yaturagire kukora. (Mat 28:19, 20) Titushemerire kuhuga ahabw’eby’obutegeki ninga shi ebindi bintu by’omu nsi. Nitukunda abantu kandi tufa aha bizibu byabo, konka nitumanya ku oburyo burungi bw’okukwasa abatahi ari okubegesa ebiri kukwata aha Bukama bwa Ruhanga kandi tukabakwasa kugira obunywani burungi na Yehova.

21. Ni enki eki tushemerire kumarira kukora?

²¹ Omuri eki kicweka, twashwijuma ebintu bina ebyatumire abantu bingi babanganisa ahari Yesu omu kinyigana c’okubanza, kandi ebiri kubasa kutuma bamwe b’omuri obu bwire babanganisa aha bakurasi beye. Konka shi ni byo ebi tushemerire kwerinda kusha? Ingaha. Omu kicweka ekiri kukurataho, turyashwijuma ebindi bintu bina ebiri kutuma abantu babanganisa. Nimureke tumaririre kweyihamu ebintu byona ebiri kubasa kutuma twabanganisa kandi tugume twine okwikiriza kugumire!