1-2. Ni enki eki omuhandiki omwe yahandikire, kandi shi ni enki eki twaza kushwijuma omuri eki kicweka?

OMURI bu bwire, abantu bingi nibegamba ku bari kwikiriza Yesu, konka oshanga batari kwikiriza ebi yayegesize. (2 Tim 4:3, 4) Omuhandiki omwe akahandika ati: “Mbehi omuri obu bwire ku hakuba hariho Yesu ori kubasa kugamba nk’ebi Yesu yagambire, . . . nitubasa kumubanganisaho nk’oku cabireho omu myaka nk’enkumi ibiri eyahwire? . . . Abantu bingi bakagarukamu ngu: Yego, nikibasika.”

² Abantu bingi b’omu kinyigana c’okubanza bakahurira ebi Yesu yagambire kandi bareba eby’okutangaza ebi yakozire, konka tibaramwikirize. Ahabw’enki? Omu kicweka ecabandize eki, tukashwijuma enshonga ina ezatumire abantu babanganisa aha bi Yesu yagambire n’ebi yakozire. Twaza kushwijuma ezindi nshonga ina. Ku turazishwijume, nitureba enshonga ahabw’enki abantu bingi b’omuri obu bwire bari kubanganisa aha bakurasi beye n’oku turi kubasa kucerinda.

3. Ni enki eki Yesu yakozire ecatumire abamwe bamubanganisaho?

³ Obu Yesu yabire ari omu nsi, akaba namara obwire n’abantu b’emiringo yona. N’obu yabire ari kurya hamwe n’abagiga n’abine obushoborozi, akaba namara obwire n’abacene n’ababire bari kwetenga obuyambi bweye. Nambwenu, akaba nagirira embabazi abantu abu abandi babire bari kureba nk’abasisi. Abamwe ababire bari kwereba nk’abahikirire bakabanganisa ahabw’ebi Yesu yakozire. Bakabuza abegi beye ngu: ‘Ahabw’enki nimurya kandi nimunywa  n’abahoza n’abasisi?’ Yesu na we akabagarukamu ati: ‘Abahurire tibari kwetenga [omudokita], kureka abarwire. Tindizire kweta abahikirire kureka abasisi ngu [behane].’—Luk 5:29-32.

4. Tukuratize obuhanuzi bwa Isaaya, ni enki eki Abayudaya babire bari kumanya aha bikwatirine na Mesiya?

⁴ Eki Ebyahandikirwe biri kukigambaho. Hacaburayo obwire buringwa ngu Mesiya ayije, omuhanuzi Isaaya akaba yagambire ku ensi yabire etarije kumwikiriza. Akahanura ku abantu babire barije kugaya Mesiya kandi bakamwanga, bakamureba nk’otine omugasho. (Isa 53:3) Obwe rero, Abayudaya b’omu kinyigana c’okubanza bakaba bari kumanya ku abantu babire barije kubanganisa ahari Mesiya.

5. Ni bata oku abantu bingi b’omuri obu bwire bari kureba abakurasi ba Yesu?

⁵ Mbehi eco kizibu kiriho n’omuri obu bwire? Yego. Abebembezi bingi b’amadini nibashemererwa ku abantu ba ruranganwa, abagiga n’abari kurebwa nk’abanyabwenge bari kuza omu madini gabo. Nikibashemeza n’obu abo bantu bakuba bari kukora ebikorwa by’obushambani ninga shi batari kukuratiza emisinge ya Ruhanga omu kubaho kwabo. Abo bebembezi b’amadini nibajoga Abahamya ba Yehova abari kukora n’amani kandi abari kugendera aha misinge ya Ruhanga y’eby’emicwe, kandi ensi nebareba nk’abantu b’ahaasi. Nk’oku Pawulo yakigambire, Ruhanga akatorana abantu abari kurebwa nk’‘ab’ahaasi.’ (1 Kor 1:26-29) Konka, Yehova we nareba abahereza beye b’abesigwa nk’ab’omuhendo.

6. Ni enki eki Yesu yagambire omuri Matayo 11:25, 26, kandi shi ni bata oku turi kubasa kumutoreza?

⁶ Oku turi kubasa kwerinda okubanganisa. (Shoma omuri Matayo 11:25, 26.) Otayikiriza ngu oku ensi eri kureba abahereza ba Ruhanga bikushishe. Ogume oyijuka ku Yehova ari kukoresa abantu b’abacurezi kusha omu kukora ebi ari kwende. (Zab 138:6) Kandi ogume oyijuka ku yahikirize ebi ari kwenda akoresize abantu abu ensi eri kureba nk’abatine obwenge ninga nk’abatashomire.

7. Ahabw’enki Yesu yayesire Abafarisayo endyarya, kandi shi ni bata oku bayehurire?

⁷ Yesu akasherekura oburyarya bw’abebembezi b’amadini b’omu bwire bweye ayine obumanzi. Ecokureberaho: Akasherekura oburyarya bw’Abafarisayo, ababire bari kufa aha kunaba engaro zabo omu mwanya g’okufa aha bazire babo. (Mat 15:1-11) Abegi ba Yesu bakatangara ahabw’ebigambo ebi yagambire. Bakamugambira bati: ‘Nomanya ku Abafarisayo bagubwa kubi ahabw’okuhurira ebyo ebi wagamba?’ Na we akabagarukamu ati: ‘Buri muti gona ogu Tata ow’omu iguru atarabyire, guryakurwa. Mubareke! N’abebembezi empumi, haza na bo bahumire. Mumanye ngu empumi ku eyebembera endijo, zombi zigwa omu kina.’ (Mat 15:12-14) N’obu abebembezi b’amadini bagwibwe kubi ahabw’ebi Yesu yabagambire, tararekire kugamba amazima.

8. Ni bata oku Yesu yayerekire ku Ruhanga atari kwikiriza enyikiriza zona z’amadini?

⁸ Nambwenu, Yesu akasherekura enyegesa z’ebishuba z’amadini. Taragambire ku Ruhanga ari kwikiriza enyikiriza zona z’amadini, ahobwe, akagamba ku abantu bingi ari bo babire barije kuza omu muhanda muhango oguri kutasya omu kucwecerera kandi ku abace ari bo babire barije kuza omu kahanda kace akari kutasya omu magara agatahwaho. (Mat 7:13, 14) Akashoborora ge ku abamwe babire barije kurebeka nk’abari kuhereza Ruhanga, konka batari kumuhereza. Akarabura ati: ‘Mwerinde abahanuzi b’ebishuba ababijira nibeshushanisa nk’entama, haza omunda bari  emishega eshegire. Muryabamanyira aha byana byabo.’—Mat 7:15-20.

9. Ni ziha nyegesa z’ebishuba ezi Yesu yasherekwire?

⁹ Eki Ebyahandikirwe biri kukigambaho? Obuhanuzi bw’omuri Bibuli bukaba bwagambire ku Yesu yabire arije kusaasibwa enju ya Yehova. (Zab 69:9; Yoh 2:14-17) Eco ni co ecatumire Yesu yasherekura enyegesa z’ebishuba n’emigenzo y’amadini. Ecokureberaho: Abafarisayo bakaba nibegesa ku omwika gutari kufa, konka Yesu we akegesa ku abafire bagwejegire. (Yoh 11:11) Abasadukayo bakaba nibikiriza ku hataribaho okuzoka, konka Yesu akazora munywani weye Lazaro. (Yoh 11:43, 44; Byak 23:8) Abafarisayo bakaba nibegesa ku ebintu byona ebi turi kukora ari Ruhanga ori kuba abitushariremu, konka Yesu we akegesa ku abantu ari bo abari kweshariramu kuhereza Ruhanga ninga shi batamuhereze.—Mat 11:28.

10. Ahabw’enki abantu bamwe bari kugubwa kubi ahabw’enyegesa zitu?

¹⁰ Mbehi eco kizibu kiriho n’omuri obu bwire? Yego. Abantu bingi nibabanganisa ahakuba enyegesa zitu ezirugire omuri Bibuli nizisherekura enyegesa z’amadini z’ebishuba. Abebembezi b’amadini nibegesa abakurasi babo ku Ruhanga ari koceza abantu omu murimo ogutari kurara. Nibakoresa eco kishuba kugira ngu babone oku bategeka abantu eki bari kwenda cona. Itwe abahereza ba Yehova, Ruhanga oyine rukundo, nitukwasa abantu kushoborocerwa ku eyo nyegesa eri ekishuba. Nambwenu abebembezi b’amadini nibegesa ku omwika gutari kufa. Nitukwasa abantu kumanya ku eyo nyegesa etari omuri Bibuli, ahakuba ebire eri amazima hakaba kataribaho okuzoka. Kandi n’obu amadini mingi gari kwegesa ku ebi turi kukora byona ari Ruhanga ori kuba abitushariremu, nitwegesa ku abantu ari bo bine obugabe bw’okweshariramu kuhereza Ruhanga. Ni bata oku abebembezi b’amadini bari kwehurira ku turi kusherekura ebishuba byabo? Obwire obwingi, nikibanyiza!

11. Tukuratize ebiri omuri Yohaana 8:45-47, ni enki eki Ruhanga ari kwenda aha bahereza beye?

¹¹ Oku turi kubasa kwerinda okubanganisa. Twaba turi kukunda amazima tushemerire  korobera ebigambo bya Ruhanga. (Shoma omuri Yohaana 8:45-47.) Titurije kuruga omu mazima nka Sitaane omuregi. Titurije kukora ekintu cona ekiri kuhakanisa amazima agu turi kwikiriza. (Yoh 8:44) Ruhanga nayenda ngu abahereza beye ‘bangire kimwe ekibi’ kandi ‘bahamire aha kirungi’ nk’oku Yesu yakikozire.—Rom 12:9; Heb 1:9.

12. Ahabw’enki oburyo obu Yesu yafiremu bwaterize ensibo abingi omu Bayudaya?

¹² Ni kiha kindi kintu ecatumire Abayudaya b’omu bwire bwa Yesu babanganisa? Pawulo akagamba ati: ‘Konka itwe nituburira Kristo owahanikirwe aha kiti, kandi aha Bayudaya kikababera ekiteza nsibo.’ (1 Kor 1:23) Ahabw’enki oburyo obu Yesu yafiremu bwaterize Abayudaya bingi ensibo? Ahakuba Yesu yaferire aha kiti, kikatuma bamureba nk’omushuma ninga nk’omusisi, catuma batayikiriza ku ari Mesiya.—Bir 21:22, 23.

13. Ni enki eki ababanganisize ahari Yesu baremirwe kumanya?

¹³ Bamwe omu Bayudaya ababanganisize ahari Yesu, bakaremwa kumureba nk’omuntu murungi, nk’owacwerirwe orubanja orutahikire kandi nk’owatwarizibwe kubi. Abacwerire Yesu orubanja tibarakuratize ebiragiro by’oburinganiza. Abaramuzi b’omu ishengero rikuru ry’Abayudaya bakahika bari kubuganira hamwe ngu bacwere Yesu orubanja. (Luk 22:54; Yoh 18:24) Omu mwanya g’okuhurira ebi abantu babire bari kurega Yesu n’ebihamya byabo, abo baramuzi bakerondera ‘ebirego by’ebishuba by’okubeherera Yesu ngu bamwite.’ Ku babuzire ebirego, omutambi mukuru akagezaho kurahura Yesu ngu ayegambire. Ebiragiro ti ko byabire biri kugamba. (Mat 26:59; Mak 14:55-64) Kandi Yesu ku yamazire kuzoka, abo baramuzi babi bakashashura abasirikare b’Abaroma ababire barinzire ekituro ceye ‘esente nyingi’ ngu bagende bari kubiha ku abegi ba Yesu ari bo bamwibire.—Mat 28:11-15.

14. Ni enki eki Ebyahandikirwe byabire byagambire aha bikwatirine n’okufa kwa Mesiya?

 ¹⁴ Eki Ebyahandikirwe biri kukigambaho. N’obu Abayudaya bingi b’omu bwire bwa Yesu babire batari kwikiriza ku Mesiya yabire arije kufa, obuhanuzi bw’omuri Bibuli bwo bukaba bwagambire buti: ‘Akashuka amagara ge okuhisya aha kufa, yabarirwa hamwe n’enkozi z’ebibi, yayekorera ebibi bya bingi, kandi yatonganira abasisi.’ (Isa 53:12) Obwe rero, ahakuba Yesu yafire nk’omusisi kikaba kitashemerire kutuma Abayudaya babanganisa.

15. Ni biha bintu ebi bari kubeherera Abahamya ba Yehova ebyatumire abantu bamwe babanganisa?

¹⁵ Mbehi eco kizibu kiriho n’omuri obu bwire? Yego! Abantu bakacwera Yesu emanja z’ebishuba kandi bamubeherera, kandi n’Abahamya ba Yehova ni ko bari kubatwariza. Reba ebyokureberaho bimwe. Omu myaka ya za 1930 na 1940 omuri Amerika, bakatwima obugabe bwitu bw’okuramya kandi baguma bari kututaho emanja z’ebishuba. Abaramuzi bamwe bakaba bari kuturwanisa. Omu kacweka ka Quebec, omuri Kanada,edini ekekwatanisa n’abategeki omu kurwanisa omurimo gwitu g’okuburira. Ababurizi bingi bakasibwa ahabw’okuburira batahi babo obutumwa burungi bw’Obukama bwa Ruhanga. Omuri Jamani, ekibina ca Nazi kikita benetata bingi abacari bato b’abesigwa. Omu myaka eyahwire, benetata bingi b’omuri Burusiya bakasibwa ahabw’okuganira n’abandi ahari Bibuli, kandi bagamba ku bari kugomera obutegeki. Kandi Bibuli y’Obuhinduzi bw’ensi ensya y’omu rurimi rw’Orurusiya ekemerezibwa, kandi ahakuba eri kukoresa izina Yehova bagamba ngu ni ekitabo ekiri kugamba eby’okugomera obutegeki.

16. Nk’oku biri kugambwa omuri 1 Yohaana 4:1, ahabw’enki ebishuba ebi bari kugamba aha Bahamya ba Yehova bitashemerire kututinisa?

¹⁶ Oku turi kubasa kwerinda okubanganisa. Tushemerire kwega, tukamanya amazima gona. Omuri toku ya Yesu y’aha rushozi, akarabura ababire bamuhurikize ku abantu bamwe babire barije ‘kubabeherera ekigambo cona ekibi’ ahabw’eye. (Mat 5:11) Sitaane ni we oyesherekire enyima y’ebyo bishuba byona. Nakoresa abari kutuhakanisa kugira ngu bajanjaze ebishuba ebi bari kutubeherera. (Kush 12:9, 10) Titushemerire kwikiriza ebyo bishuba by’abahakani. Titushemerire kwikiriza ngu bitutinise ninga shi ngu bicendeze okwikiriza kwitu.—Shoma omuri 1 Yohaana 4:1.

17. Ni biha bintu ebyabireho omu kiro eki Yesu yaferireho ebyatumire bamwe babanganisa?

¹⁷ Yesu atakafire, omwe omu ntumwa zeye 12 akamugambanira. Omwe omu ntumwa za Yesu akamwehakana emirundi ishatu kandi n’ezindi ntumwa zeye zona zikamusigaho omu kiro eki yaferireho. (Mat 26:14-16, 47, 56, 75) Eco tikiratangarize Yesu. Akaba yagambire ku ebyo byabire birije kubaho. (Yoh 6:64; 13:21, 26, 38; 16:32) Abarebire ebyo byona nibabasa kuba babanganisize, rero bayebuza ngu, ‘yaba ari ko entumwa za Yesu zamutwarize, obwe rero tindije kwekwatanisa na bo!’

18. Ni buha buhanuzi obwahikirire omu kiro eki Yesu yaferireho?

¹⁸ Eki Ebyahandikirwe biri kukigambaho. Hacaburayo ebinyigana byingi, Yehova akaba yagambire omu Kigambo ceye ku Mesiya yabire arije kugambanirwa n’empiha 30 z’efeza. (Zek 11:12, 13) Yesu akaba arije kugambanirwa na munywani weye w’omwesigwa. (Zab 41:9) Nambwenu omuhanuzi Zekariya akahandika ati: ‘Tera omurisa, entama zitatane.’ (Zek 13:7) Okwikiriza kw’abantu b’emitima mirungi kukakizaho kuhama, ku barebire obwo buhanuzi buri kuhikirira ahari Yesu.

19. Ni enki eki abantu b’emitima mirungi bari kumanya?

 ¹⁹ Mbehi eco kizibu kiriho n’omuri obu bwire? Yego. Omuri obu bwire, bamwe omu Bahamya ba Yehova bakaruga omu mazima, baba abahakani, kandi bagezaho kushisha abandi. Bakatangaza enkuru z’ebishuba, bagamba amazima gatijwire, kandi bagamba ebishuba aha Bahamya ba Yehova bakoresize ebinyamakuru na intaneti. Konka abantu b’emitima mirungi tibari kubanganisa. Omu mwanya gw’eco, nibamanya ku Bibuli yabire yagambire ku ebyo byabire birije kubaho.—Mat 24:24; 2 Pet 2:18-22.

20. Ni enki ekirije kutukwasa kwerinda okubanganisa ahabw’abantu abarugire omu mazima? (2 Timoseo 4:4, 5)

²⁰ Oku turi kubasa kwerinda okubanganisa. Tushemerire kugumizamu turi kweshomesa Bibuli, turi kushaba burijo kandi turi kuhugira omu murimo ogu Yehova yatuhire. (Shoma omuri 2 Timoseo 4:4, 5.) Ku turi kugira okwikiriza, titurije kutina batugambaho ebishuba. (Isa 28:16) Rukundo eyi turi kukunda Yehova, Ekigambo ceye, n’Abakristo bagenzi bitu neyija kutuma twayerinda okubanganisa ahabw’abantu abarugire omu mazima.

21. N’obu abantu bingi bari kwanga kuhurira obutumwa burungi omuri obu bwire, ni enki eki turi kwesiga tutari kubanganisa?

²¹ Abantu bingi b’omu kinyigana c’okubanza, bakabanganisa kandi basigaho Yesu. Konka, abingi bakamwikiriza. Omuri abo hakaba harimu omwe owabire ari omu Ishengero ry’Abayudaya hamwe n’‘abatambi bingi.’ (Byak 6:7; Mat 27:57-60; Mak 15:43) Ni co kimwe n’omuri obu bwire, abantu bingi tibarabanganisize. Ahabw’enki? Ahabw’okuba nibamanya amazima g’omu Byahandikirwe kandi nibagakunda. Ekigambo ca Ruhanga nikigira kiti: ‘Abakunda ebiragiro byawe bine obusinge bwingi; tihariho ekirikubasa kubateza ensibo.’—Zab 119:165.