EKICWEKA C’OKWEGA 21
Yehova nayija kukugumya
‘Ku mba omweremwa, ni bwo ngira amani.’—2 KOR 12:10.
ECESHONGORO CA 73 Otuhe Obumanzi
EMPINYE *
1-2. Ni biha bizibu ebi Abahamya ba Yehova abingi bari kubugana?
ENTUMWA Pawulo akahiga Timoteyo kuhikiriza omurimo gweye g’okuburira, kandi eco nikikwata n’aha Bakristo bona omuri obu bwire. (2 Tim 4:5) Obwe rero twena nitukora cona eki turi kubasa kugira ngu tukuratize obwo buhabuzi bwa Pawulo. Konka nitubugana ebizibu byingi. Hariho benetata na banyanyazi bingi abu kiri kushaba obumanzi kugira ngu bekwatanise omu murimo g’okuburira. (2 Tim 4:2) Tekateka nk’ahari benetata abatwire omu mahanga ahu omurimo gwitu gwayemerizibwe. Nibakora omurimo g’okuburira n’obu bari kumanya ku amagara gabo gari omu kabi!
2 Abahereza ba Yehova nibabugana ebizibu byingi ebiri kubasa kubacwa entege. Ecokureberaho: Abingi nibakora amashaha mingi kugira ngu babone eby’okutunga ab’omu maka gabo. Nibaba bari kwenda kukora byingi omu murimo, konka oshanga baruhire omuri wikendi. Abandi tibari kukora byingi ahabw’oburwire ninga ahabw’emyaka ya za bukuru; noshanga batari n’okubasa kuruga omu ka. Kandi abandi noshanga bari kwehurira nk’abatine omugasho. Mary, * otwire omuri Burugwizoba bwa rwagati, akagira ati: “Naba ncwekire entege ninkoresa amani mingi kugira ngu ndwanise enyehurira mbi kandi eco nikituma naruha omu bitekateko. Bwanyima ninyecwera orubanja ahakuba nikituma nabura obwire n’amani g’okukora omurimo g’okuburira.”
3. Ni enki eki twaza kushwijuma omuri eki kicweka?
3 Ekizibu cona eki twakuba turi kubugana, Yehova natuha amani g’okucehanganira kandi tugumizamu kumukorera oku turi kubasa. Mbere y’okushwijuma oku Yehova ari kutukwasa, reka turebe oku yakwasize Pawulo na Timoteyo kuhikiriza omurimo gwabo n’obu babire bari kubugana ebizibu.
YEHOVA NATUHA AMANI G’OKUHIKIRIZA OMURIMO G’OKUBURIRA
4. Ni biha bizibu ebi Pawulo yabugine?
4 Pawulo akabugana ebizibu byingi. Akaba nayetenga ow’okumugumya omu bwire obu yabire naterwa enkoni n’amabare n’obu yabire asibirwe. (2 Kor 11:23-25) Pawulo akikiriza ku hine obu yabire ari kurwanisa enyehurira mbi. (Rom 7:18, 19, 24) Nambwenu akaba ayine ‘ihwa ry’omu mubiri’ eri yabire ari kwenda ngu Ruhanga amwiheho.—2 Kor 12:7, 8.
Ni enki ecakwasize Pawulo kuhikiriza omurimo gweye g’okuburira? (Reba paragurafu ya 5-6) *
5. Ni biha bintu ebi Pawulo yakozire n’obu yabire ari kubugana ebizibu?
5 Yehova akaha Pawulo amani g’okugumizamu kuburira n’obu yabire ari kubugana ebizibu. Tekateka aha bintu ebi Pawulo yakozire. Ecokureberaho: Obu yabire asibirwe omu nju omuri Roma, akaburira abategeki obutumwa burungi ayine obumanzi. Nambwenu akaburira abasirikare bingi ababire bari kurinda Kayisari, n’abantu ababire bari kumutayayira. (Byak 28:30, 31; Fil 1:13) Omuri obwo bwire, ni bwo obu Pawulo yahandikire amabaruha agari kugasira Abakristo omuri obu bwire. Nambwenu, ecokureberaho ca Pawulo kikagumya ekibina c’omuri Roma, kandi kikatuma benetata ‘bayeyongera kugira obumanzi bw’okugamba Ekigambo ca Ruhanga batine obwoba.’ (Fil 1:14) N’obu hine ebintu ebi Pawulo yabire atari kubasa kukora nk’oku yabire ari kwenda, akakora eki yabire ari kubasa, kandi ebyamubireho bikatuma obutumwa burungi bwaza omu misho.—Fil 1:12.
6. Tukuratize ebiri omu 2 Bakorinso 12:9, 10, ni enki ecakwasize Pawulo kuhikiriza omurimo gweye?
6 Pawulo akaba namanya ku byona ebi yakozire omu murimo g’okuburira yabibasize ahabw’amani ga Yehova. Akagamba ku amani ga Ruhanga ari go agabire nigamukwasa obu yabire ari omweremwa. (Shoma omu 2 Bakorinso 12:9, 10.) Yehova akoresize omwika gweye oguri kwera akakwasa Pawulo kuhikiriza omurimo gweye omu bwijwire, n’obu yabire ari kuhiigwa, ari kusibwa kandi ari kubugana ebindi bigezo.
Ni enki ecakwasize Timoteyo kuhikiriza omurimo gweye g’okuburira? (Reba paragurafu ya 7) *
7. Ni biha bizibu ebi Timoteyo yabire ashemerire kwehanganira kugira ngu ahikirize omurimo gweye g’okuburira?
7 Timoteyo, owakozire na Pawulo acari muto, na we akashaba amani ga Ruhanga kugira ngu ahikirize omurimo gweye. Timoteyo akekwatanisa na Pawulo omu murimo g’obumishonari. Nambwenu, Pawulo akamutuma omu bibina ngu abigaruremu amani. (1 Kor 4:17) Timoteyo nabasa kuba yahurire atari kubibasa. Nebasa kuba ariyo enshonga eyatumire Pawulo yamugambira ati: ‘Hatagira owagaya obusigazi bwawe.’ (1 Tim 4:12) Konka omuri obwo bwire ni bwo Timoteyo yabire ari kutura arwire. (1 Tim 5:23) Akaba namanya ku omwika gwa Yehova gwabire gurije kumuha amani g’okuburira obutumwa burungi n’okuhereza benishe.—2 Tim 1:7.
YEHOVA NATUKWASA KUGUMA TURI ABESIGWA N’OBU TWAKUBA TURI OMU BIZIBU
8. Ni bata oku Yehova ari kugumya abahereza beye omuri obu bwire?
8 Omuri obu bwire, Yehova naha abahereza beye ‘amani agari kukirira kimwe’ kugira ngu bagumizemu kumuhereza bari abesigwa. (2 Kor 4:7) Reka tushwijuma ebintu bina ebi Yehova yatuhire ebiri kutugumya kandi bikatukwasa kuguma turi abesigwa; eshara, Bibuli, Abakristo bagenzi bitu, n’omurimo g’okuburira.
Yehova natugumya birabire aha shara (Reba paragurafu ya 9)
9. Ni bata oku eshara eri kutukwasa?
9 Eshara. Nk’oku biri kugambwa omu Baefeso 6:18, Pawulo akagira ngu tugume tushabe Ruhanga ‘obutosha.’ Ruhanga nagarukamu eshara zitu ari kutugumya. Jonnie, otwire omuri Bolivia, akatunga obwo buyambi obu yabire ari kubugana ebizibu ebikuratine. Omukazi weye n’abazire beye bona bakarwarira kimwe endwara mbi. Kikagumira Jonnie kurondera bona bashatu ebi babire bari kwetenga. Nyina akafa kandi hakahwa obwire buringwa ishe n’omukazi weye batakakizire. Jonnie akagamba aha byamubireho ari kugira ati: “Ku nabire ndi kuhurira ntinire, nkaba ninshaba Yehova kandi mugambira byona ntari kumushereka.” Yehova akaha Jonnie amani g’okwehangana. Ronald, omuzehe w’omuri Bolivia, na we akamanya ku nyina yabire arwire kansa. Nyina akafa bwanyima y’okwezi kumwe. Ni enki ecamukwasize kwehangana? Akagamba ati: “Okushaba Yehova nikituma namugambira ebindi aha mutima byona. Namanya ge kukira omuntu wena n’okukira oku ndi kwemanya.” Hine obu turi kuhurira twine ebizibu byingi, tubura n’ebigambo by’okuta omu shara zitu. Konka Yehova natweta ngu tumushabe n’obu cakuba kitugumire kugamba oku turi kwehurira.—Rom 8:26, 27.
Yehova natugumya birabire aha Bibuli (Reba paragurafu ya 10)
10. Tukuratize ebiri omu Baheburaayo 4:12, okushoma Bibuli n’okutekataka aha bi twashoma kitwinire guha mugasho?
10 Bibuli. Nk’oku Pawulo yabire ari kushoma Bibuli kugira ngu emugumye, n’itwe ni co eki tushemerire kukora. (Rom 15: 4) Ku turi kushoma Ekigambo ca Ruhanga kandi tukatekateka aha bi twashoma, Yehova nakoresa omwika gweye oguri kwera gutukwasa kumanya ge oku turi kubasa kubita omu bikorwa omu kubaho kwitu. (Shoma omu Baheburaayo 4:12.) Ronald, owu tugambireho, akagira ati: “Hati nyine okushemererwa ahakuba nkemanyiza kushoma Bibuli buri izoba. Nintekateka aha mitwarize ya Yehova na rukundo eyi ari kukunda abahereza beye. Eco nikituma nagira amani.”
11. Ni bata oku Bibuli yakwasize omunyanyazi owabire ayine ebizibu?
11 Ku turi kutekateka aha Kigambo ca Ruhanga nitugira emitekatecere mirungi aha bizibu ebi turi kubugana. Reba oku Bibuli yakwasize omufakazi owabire ayine ebizibu. Omuzehe akamugambira ku yabire arije kugasirwa yashoma ekitabo ca Yobu. Ku yatandikire kukishoma, akahika ari kucwera Yobu orubanja ahabw’emitekatecere yeye mibi. Akaguma ari kuhabura Yobu ati: “Iwe Yobu! Reka kuguma ori kutekateka aha bizibu byawe kusha!” Konka bwanyima akahika aho yareba ku ayine emitekatecere nk’eya Yobu. Eco kikamukwasa kuhindura oku yabire nareba ebintu kandi camukwasa kwehanganira obusaasi bw’okuferwa omushija weye.
Yehova natugumya birabire aha Abakristo bagenzi bitu (Reba paragurafu ya 12)
12. Ni bata oku Yehova ari kutugumya akoresize Abakristo bagenzi bitu?
12 Abakristo bagenzi bitu. Nambwenu Yehova nagumya abahereza beye akoresize Abakristo bagenzi babo. Pawulo akagamba ku yabire ayine ekihika c’‘okugumyana’ na benishe. (Rom 1:11, 12) Mary, owu tugambireho, nakunda kuba hamwe na benetata na banyanyazi. Akagamba ati: “Yehova akakoresa benetata na banyanyazi ababire batari n’okumanya ebi ndi kurabamu. Bakangambira ebigambo by’okungumya, bampandikira otubaruha, kandi ni byo ebi nabire ndi kwetenga. Nambwenu nikinkwasa kuganira n’abanyanyazi abine ebizibu nk’ebyange, mbegeraho byingi. Kandi burijo abazehe nibatuma nayereba nk’ow’omugasho omu kibina.”
13. Ni bata oku turi kubasa kugumyana twaba turi omu nterane?
13 Hamwe omu hantu harungi ahu turi kubasa kwiha ab’okutugumya, ni omu nterane. Mbehi wayija omu nterane, tori kubasa kuba ow’okubanza omu kugaruramu abandi amani kandi okabasima? Ecokureberaho: Mbere y’enterane, omuzehe ori kwetwa Peter akagambira omunyanyazi oyine omushija otari kuramya Yehova ati: “Mazima nitushemererwa ku turi kukureba oyijire omu nterane. Noreta abana bawe mukaga bona omu nterane kandi batebekanisize ge ngu batange ebitekateko.” Amisho geye gakijura amarira, rero yagarukamu ati: “Mazima wangaruramu amani, kandi ni co eki naba ndi kwetenga kuhurira erizoba.”
Yehova natugumya birabire aha n’omurimo g’okuburira (Reba paragurafu ya 14)
14. Ni bata oku okwekwatanisa omu murimo g’okuburira kiri kutugasira?
14 Omurimo g’okuburira. Twagambira abandi amazima g’omuri Bibuli nitwehurira ge n’obu bakugikiriza ninga shi batagikirize. (Enf 11:25) Eco ni co ecahikire aha munyanyazi ori kwetwa Stacy. Omwe omu b’omu ka yeye ku yabingirwe omu kibina kikamugwisa kubi, rero yaguma ari kwebuza ngu: ‘Nangwa shi kuri hine eki nakozire ngu mukwase?’ Eco ni co eki Stacy yabire ari kutekatekaho kusha. Ni enki ecamukwasize kwehanganira eco kizibu ecabire kitorobi? Ni omurimo g’okuburira! Ku yabire naza kuburira, omutima gweye akaba naguta aha bantu abari kwetenga obuyambi bweye. Akagamba ati: “Omuri obwo bwire, Yehova akankwasa kutunga omwegi wa Bibuli owakozire entunguka juba. Eco kikangumya munonga. Ecankwasize munonga ni omurimo g’okuburira.”
15. Ni enki eki wayegera aha bi Mary yagambire?
15 Ahakuba abantu bamwe bine ebizibu, nibahurira batari kubasa kukora byingi omu murimo g’okuburira. Yaba n’iwe ari ko ori, yijuka ku Yehova ari kushemererwa wakora ebi ori kubasa. Yetegereze ecokureberaho ca Mary. Ku yafurukire omu kacweka akari kukoresa orundi rurimi, akehurira nk’otine omugasho. Akagamba ati: “Hine obu nabire ndi kubasa kugamba ebigambo bice, nshoma orunyiriri rwa Bibuli, ninga shi ngaba akatabo kace omu murimo g’okuburira.” Akaba nayehurira nk’otine omugasho ku yabire nayegeranisa n’abandi abari kugamba ge orurimi. Konka akamara yahindura emitekatecere yeye. Akahika aho yamanya ku Yehova ari kubasa kumukoresa n’obu yabire atari kumanya ge orurimi. Akagamba ati: “Amazima g’omuri Bibuli gorobi kucenga, kandi nigahindura amagara g’abantu.”
16. Ni enki kiri kubasa kukwasa abatari kuruga omu ka kutunga amani?
16 Yehova nareba amani agu turi kutamu kugira ngu tukore omurimo g’okuburira n’obu twakuba tutari kubasa kuruga omu nju kandi atusima. Nabasa kutukwasa kuburira abari kutureberera ninga shi abadokita. Twageranisa ebi turi kukora hati n’ebi twakozire omu bwire bwa kare, nitubasa kucweka entege. Konka twamanya ku Yehova ari kutukwasa omuri obu bwire, nitwija kugira amani g’okwehanganira ebigezo twine okushemererwa.
17. Tukuratize ebiri omu Mubuurizi 11:6, ahabw’enki tushemerire kugumizamu kukora omurimo g’okuburira n’obu twakuba tutari kureba ebirungi ebiri kurugamu?
17 Tituri kumanya embibo z’amazima ezi twahingire ezirije kusinga emizi zikakura. (Shoma omu Mubuurizi 11:6.) Ecokureberaho: Omunyanyazi ori kwetwa Barbara, oyine emyaka y’omuri za 80, nakunda kuburira akoresize esimu n’amabaruha. Hine ebaruha eyi yagabire eri n’Omunara g’Omurinzi gw’aha kiro ca 1, Okwakashatu 2014, ogurimu ekicweka ekiri kugira ngu: “Eki Ruhanga yakukorire.” Akaba atari kumanya ku yasindikire eyo baruha omushija n’omukazi ababire batacari Abahamya ba Yehova. Bakaguma bari kushoma eyo baruha bari kugigarukamu. Omushija akahurira Yehova ari nk’ori kugamba na we. Bakatandika kwekwatanisa omu nterane burijo, kandi emyaka 27 yona eyi babire bamara, bakashuba baba Abahamya ba Yehova abari kukora n’amani. Tekateka oku cagarwiremu amani Barbara ku yarebire ebirungi ebyarugire omu baruha yeye!
Yehova natugumya birabire aha (1) shara, (2) Bibuli, (3) Abakristo bagenzi bitu, (4) n’omurimo g’okuburira (Reba paragurafu ya 9-10, 12, 14)
18. Ni enki eki tushemerire kukora kugira ngu amani ga Ruhanga gatugasire?
18 Yehova natuha amani geye. Twakoresa ebintu ebi Yehova yatuhire harimu eshara, Bibuli, Abakristo bagenzi bitu, n’omurimo g’okuburira, nituba twayereka ku nitumwesiga kandi ku nitwenda ngu atuhe obuyambi bweye. Nimureke twena turondere obuyambi ahari Tata witu w’omu iguru, ori kwendera kimwe ‘kweyoreka ku ari ow’amani kuhwera abantu abine emitima [mirungi] ahari we.’—2 Bus 16:9.
ECESHONGORO CA 61 Abajurizi ba Yehova, Mugumizemu!
^ par. 5 Turi omu bwire bw’ebigezo, konka Yehova natukwasa kubyehanganira. Omuri eki kicweka, twaza kushwijuma oku Yehova yakwasize entumwa Pawulo na Timoteyo kugumizamu bari kumuhereza n’obu babire bari kubugana ebizibu. Twaza kushwijuma ebintu bina ebi Yehova yatuhire ngu bitukwase kwehangana omuri obu bwire.
^ par. 2 Amazina gakahindurwa.
