EKICWEKA C’OKWEGA 33
Okuzoka nikwereka rukundo ya Ruhanga, obwenge bweye, n’okwehangana kweye
‘Haryabaho okuzoka.’—BYAK 24:15.
ECESHONGORO CA 151 Naija Kweta
EMPINYE *
1. Ahabw’enki Yehova yahangire amagara?
HARIHO obwire obu Yehova yabire ariho wenka. Konka eco kikaba kitari kumushasha. Akaba atari kwetenga ondijo ngu atunge okushemererwa. Konka Yehova akaba ari kwenda ngu n’abandi bashemerererwe amagara. Ahabwa rukundo akatandika kuhanga.—Byak 17:24, 25; 1 Yoh 4:19.
2. Ni bata oku Yesu na ba marayika bari kwehurira aha bikwatirine n’omurimo gwa Yehova g’okuhanga?
2 Omu kubanza Yehova akahanga omwana weye Yesu. Ebindi ‘bintu byona bikahangwa’ birabire omuri ogo mwana, otwariremu na ba marayika. (Kol 1:16) Yesu akaba nashemerererwa kukora n’Ishe. (Enf 8:30) Kandi na ba marayika bakaba bine enshonga eri kutuma bashemererwa. Bakaba bariho obu Yehova n’Omukozi Mukuru Yesu, babire bari kuhanga iguru n’ensi. Ni bata oku ba marayika bayerekire okushemererwa? ‘Bona bakatera akari k’okushemererwa’ obu ensi yabire eri kuhangwa, kandi hatariho okubanganisa, bakagumizamu kushemerererwa ebi Yehova yahangire harimu n’abantu. (Yob 38:7; Enf 8:31) Ebintu byona ebi Ruhanga yahangire nibyereka rukundo n’obwenge bweye.—Zab 104:24; Rom 1:20.
3. Nk’oku biri kugambwa omu 1 Bakorinso 15:21, 22, ekitambo ca Yesu nikituma habaho enki?
3 Yehova akaba nayenda ngu abantu bashemerererwe kutura omu nsi ebiro byona. Konka obu Adamu na Eva bagomire Ishe w’omu iguru ori kubakunda kikatuma batabaho ebiro byona. (Rom 5:12) Yehova akakora ki? Akahika nakora entebekanisa y’oku arije kurokora abantu. (Kush 3:15) Yehova akahayo omwana weye Yesu nk’ekitambo kugira ngu abakomokire ahari Adamu na Eva babase kucungurwa aha kibi n’okufa. Nambwenu akikiririza buri omwe kumuhereza kugira ngu atunge amagara agatahwaho.—Yoh 3:16; Rom 6:23; shoma omu 1 Bakorinso 15:21, 22.
4. Ni biha bibuzo ebi twaza kushwijuma omuri eki kicweka?
4 Hariho ebibuzo byingi ebi turi kubasa kwebuza aha bikwatirine n’ekiraganiso ca Yehova c’okuzora abafire. Ecokureberaho: Okuzoka kuryaba kuri kuta? Mbehi turyamanya abakundwa bitu abafire ku barizoka? Ni bata oku okuzoka kurituretera okushemererwa? Kandi shi ni bata oku okutekateka aha kuzoka kuri kutuma twakizaho kusima Yehova aha bwa rukundo, obwenge n’okwehangana kweye? Reka tushwijume ebyo bibuzo.
OKUZOKA KURYABA KURI KUTA?
5. Ahabw’enki kihikire kwesiga ku abantu batarizoka aha izoba rimwe?
5 Obu Yehova yabire ari kuzora abantu akoresize Yesu, kikatwereka ku abantu bona batarizoka aha izoba rimwe. Ahabw’enki? Ahakuba habaho ebintu ebiri kushasha nibituma abantu bayehurira kubi. Yehova tari kukora ebintu omu mujagararo. Namanya ku ebintu bishemerire kuba biri aha ntebekanisa kugira ngu abantu babeho omu businge. (1 Kor 14:33) Yehova Ruhanga akereka obwenge n’okwehangana obu yabire ari kutebekanisa ensi ari na Yesu batakahangire omuntu. Kandi na Yesu aryayereka eyo mitwarize omu bwire bw’emyaka rukumi obu ariba ari hamwe n’abarihonoka Haramagedoni bari kutebekanisa ensi kugira ngu eyije kwakira abazokire.
Abarihonoka Haramagedoni baryayegesa abazokire ebikwatirine n’Obukama bwa Ruhanga n’ebi Yehova ari kwenda ngu bakore (Reba paragurafu ya 6) *
6. Tukuratize ebiri omu Byakozirwe 24:15, omu bu Yehova arizora harimu baha?
6 Ekiri kukira byona, abarihonoka Haramagedoni baryayegesa abazokire ebikwatirine n’Obukama bwa Ruhanga n’ebi Yehova ari kwenda ngu bakore. Ahabw’enki? Ahakuba abingi omu barizoka ni ‘abatahikirire.’ (Shoma omu Byakozirwe 24:15.) Baryaba bashemerire kukora empindahinduka kugira ngu bagasirwe n’ekitambo ca Kristo. Tekateka aha murimo g’okwegesa abantu bingi abariba bazokire abatari kumanya ekintu na kimwe aha mazima ga Yehova. Mbehi buri omwe aryatunga obuhabuzi bw’okwegesa abantu Bibuli nk’oku kiri omuri obu bwire? Mbehi abarizoka baryatebwa omu bibina kandi bamanyizibwe kugira ngu na bo begese abandi abarizoka bwanyima yabo? Reka tutegereze turebe oku birigenda. Konka eki turi kumanya ni oku aha muheru g’Obutegeki bwa Kristo bw’emyaka rukumi, ‘okumanya [Yehova] kuryabuga ensi yona.’ (Isa 11:9) Buzima turyaba twine omurimo gw’amani konka guri kushemeza munonga!
7. Ahabw’enki abahereza ba Ruhanga bariba bashemerire kwereka embabazi abazokire bari kubegesa?
7 Omu Butegeki bwa Kristo bw’emyaka rukumi abahereza ba Ruhanga bona omu nsi baryaba bashemerire kukora empinduka kugira ngu bamuhimbise. Obwe rero bona baryaba bashemerire kukwasa abazokire kusingura ekibi kugira ngu babeho bari kugendera aha misinge ya Yehova. (1 Pet 3:8) Hatariho okubanganisa abarizoka baryareba ku abahereza ba Yehova bashemerire kuba abacurezi kandi ‘abari kuhikiriza okujunwa kwabo.’—Fil 2:12.
MBEHI TURYAMANYA ABAKUNDWA BITU ABAFIRE KU BARIZOKA?
8. Ahabw’enki turi kwesiga ku turimanya abanyabuzare bitu n’abanywani bitu abarizoka?
8 Twine enshonga eziri kutuma twayikiriza ku abantu barimanya abakundwa babo abafire ku barizoka. Ecokureberaho: Tukwatire aha kuzoka okwabireho nituhamya ku Yehova arizora abantu bari kurebeka nk’oku babire bari, bari kugamba iraka nk’eri babire nibagamba, kandi bari kutekateka nk’oku babire bari batakafire. Yijuka ku Yesu yageranisize okufa n’okuhungira kandi okuzoka akakugeranisa n’okusisimuka. (Mat 9:18, 24; Yoh 11:11-13) Omuntu yasisimuka nareba kandi atekateka nk’oku abire ari atakahungire. Reka tushwijume ecokureberaho ca Laazaaro. Hakaba hahwire ebiro bina afire; obwe rero omubiri gweye gukaba gwatandikire kujunda. Obu Yesu yamuzorire banyanyazi beye bakahika bari kumumanya kandi Laazaaro na we akahika ari kubijuka.—Yoh 11:38-44; 12:1, 2.
9. Ahabw’enki abarizoka batariyija bine obwenge n’omubiri ebihikirire?
9 Yehova naturaganisa ku omuri paradiso hatariho omutuzi wayo origira ati ‘ndwire.’ (Isa 33:24; Rom 6:7) Abarizoka Yehova aryabaha amagara marungi. Konka tibarihika bari kuba abahikirire. Ahakuba kibire kisyoya tibakamanyana n’abantu babo abarizoka. Obwe rero, omu Butegeki bwa Kristo bw’emyaka rukumi abantu baryagenda nibahika aha kuhikirira mporampora. Abantu baryaba abahikirire omu bwijwire obu Yesu arigarurira Ishe Obukama. Nambwenu Obukama buryaba bwamaririza omurimo gwabwo omu bwijire, harimu n’okuhisya abantu aha kuhikirira.—1 Kor 15:24-28; Kush 20:1-3.
NI BATA OKU OKUZOKA KURITURETERA OKUSHEMERERWA?
10. Okuzoka kuryatuma wayehurira ota?
10 Tekateka oku oriyehurira obu oriba ori kwakura abakundwa bawe abafire ku barizoka. Mbehi enyehurira ezi origira ni ez’okusheka ninga ziryatuma warira? Mbehi oryashemererwa rero kitume wayeshongora ebyeshongoro by’okuhimbisa Yehova? Eki oshemerire kumanya otari kubanganisa, ni oku oryakizaho kuhurira wakunda Yehova n’omwana weye ahabw’ekiconco c’omutano c’okuzora abafire.
11. Tukuratize ebigambo bya Yesu ebiri omuri Yohaana 5:28, 29, ni enki ekirihika aha bantu abarigumizamu korobera Ruhanga?
11 Tekateka oku abarizoka bariyehurira obu barijura omuntu owa kare, bakabaho bari kubuganisa n’emisinge ya Ruhanga ehikirire. Abo abariyegesibwa bakahinduka baryabaho ebiro byona omuri Paradiso. Konka abariyanga korobera Ruhanga aryabacwekereza.—Isa 65:20; Shoma omuri Yohaana 5:28, 29.
12. Ni bata oku abantu bona abariba bari omu nsi Yehova aribaha emigisha?
12 Abahereza ba Ruhanga bona baryayerebera ku ebiri kugambwa omu Nfumu 10:22, ebiri kugira ngu: ‘Omugisha ogu [Yehova] aha, gutungisa abantu, kandi tagongeraho busaasi’ biri amazima. Ahabw’omwika oguri kwera gwa Yehova ogurikorera aha bahereza beye baryakizaho kukura omu by’omwika, kandi beyongere omu kuba nka Kristo kuhisya bahika aha kuhikirira. (Yoh 13:15-17; Efe 4:23, 24) Burizoba baryagumizamu nibagira amagara marungi. Buzima amagara garyaba gari marungi munonga! (Yob 33:25) Ni bata oku okutekateka aha kuzoka kiri kukukwasa hati?
YEREKA KU NOSIMA YEHOVA AHA BWA RUKUNDO YEYE
13. Ni bata oku omuri Zaaburi ya 139:1-4, hari kutwereka ku Yehova ari kutumanya, kandi shi ni bata oku okuzoka kuri kukihamya?
13 Nk’oku tukirebire, Yehova ku arizora abantu aryabagaruza obushoborozi bw’okwijuka ebi babire bari kumanya batakafire. Konka shi ebyo nibimanyisa ki? Ahabw’okuba Yehova ari kukukunda munonga naguma kwijuka ebi ori kutekateka, oku ori kwehurira, oku ori kugamba, n’ebi ori kukora. Mbwenu shi yaba ari kubasa kukuzora tikirije kumworobera kwijuka ebi wabire ori kutekateka, ebi wabire ori kukora, n’emitwarize yawe! Omugabe Daudi akaba ari kumanya ku Yehova ari kumanya ge buri muntu wena. (Zaaburi ya 139:1-4.) Mbwenu shi kumanya ku Yehova ari kutumanya ge nikitukwataho kita?
14. Ni bata oku kutekateka aha ku Yehova ari kutumanya ge kiri kutukwataho munonga?
14 Twatekateka aha ku Yehova ari kutumanya ge nikituma tutatina. Ahabw’enki? Yijuka ku Yehova ari kutufaho omuri byona. Nareba buri omwe omuri itwe nk’ow’omutano. Namanya byona ebiri kutuhikaho omu kubaho kwitu. Mbehi eco tikiri kuhumuriza! Titurigaruka kutekateka ku turi twenka. Burizoba Yehova naba ari n’itwe kandi naba ayetegwire kutukwasa.—2 Bus 16:9.
YEREKA KU NOSIMA YEHOVA AHABW’OBWENGE BWEYE
15. Ni bata oku okuzoka kuri kutuma twakizaho kwikiriza ku Yehova ayine obwenge?
15 Omuntu yaba ari kutina kufa abangi beye nibamugema kukora ebi bari kwenda kugira ngu batamwita. Abambari ba Sitaane ni co eki bari kukora kugira ngu batume abahereza ba Yehova batagumizamu kumwesiga. Konka obwo buryo ti buri kukora ahari itwe. Nitumanyira kimwe ku abangi bitu batwita Yehova arije kutuzora. (Kush 2:10) Nitwesigira kimwe ku hatariho ekintu na kimwe eki bari kubasa kutukorera ngu kitutanise na Yehova. (Rom 8:35-39) Yehova akatwereka obwenge bweye obu yatuhire amasiko g’okuzoka! Ni ahabw’eco, tituri kutina abu Sitaane ari kukoresa bari kwenda kutwita ahabw’okwanga kukora ebi bari kutushaba. Nambwenu eco nikituma twaguma tuhamire ahari Yehova.
Mbehi ensharamu zitu nizereka ku nitwikiriza ekiraganiso ca Yehova c’oku arituha ebi turi kwetenga? (Reba paragurafu ya 16) *
16. Ni biha bibuzo ebi oshemerire kwebuza kandi shi ni bata oku ebyokugarukamu byawe biri kutuma wamanya oku ori kwesiga Yehova?
16 Mbehi abangi ba Yehova bakutinisa ngu baza kukwita nogumizamu kwesiga ku Yehova arikuzora? Ni enki ekirituma wagumizamu kumwesiga omuri obwo bwire? Oburyo bumwe ni okwebuza ngu: ‘Mbehi ensharamu ezi ndi kukora burizoba nizereka ku ndi kwesiga Yehova?’ (Luk 16:10) Ekindi kibuzo eki oshemerire kwebuza ni ekiri kugira ngu: ‘Mbehi oku ndi kubaho nibyereka ku ninyikiriza ekiraganiso ca Yehova c’oku arimpa ebi ndi kwetenga nagumizamu kuta eby’Obukama omu mwanya g’okubanza?’ (Mat 6:31-33) Yaba ecokugarukamu cawe ahari ebyo bibuzo ari yego, yereka ku noyesiga Yehova kandi obe oyetegwire kugumizamu kumwesiga n’omu bwire bw’ebigezo.—Enf 3:5, 6.
YEREKA KU NOSIMA YEHOVA AHABW’OKWEHANGANA KWEYE
17. (a) Ni bata oku okuzoka kuri kwereka ku Yehova ari kwehangana? (b) Ni bata oku turi kwereka ku nitusima Yehova ahabw’okwehangana kweye?
17 Yehova akataho obwire n’eshaha bw’okucwekererezaho eyi nsi mbi ya Sitaane. (Mat 24:36) Aryagumizamu kwehangana kandi tarigira eki yakora obwire butakahikire. Ayetegwire kuzora abafire, konka nayehangana. (Yob 14:14, 15) Aryagumizamu kutegereza kuhisya obu obwire burihika. (Yoh 5:28) Twine enshonga eziri kutuma twayereka ku nitusima Yehova ahabw’okwehangana kweye. Tekateka ahari eki: Ahabw’okuba Yehova ari kwehangana, ‘nayenda ngu bona bahike aha kwetisa,’ n’itwe turimu. (2 Pet 3:9) Yehova nayenda ngu abantu bingi abari kubasika bije kutunga amagara agatahwaho. Obwe rero, mureke twereke ku nitusima Yehova ahabw’okwehangana kweye. Tuta shi? Turi kuronda abetegwire kwikiriza amazima kandi tubakwase kukunda Yehova n’okumuhereza. (Byak 13:48) Rero baryagasirwa n’okureba ku Yehova ari kwehangana nk’itwe.
18. Ahabw’enki tushemerire kugumizamu kwehanganira abandi?
18 Yehova aryagumizamu kwehangana kuhisya aha muheru gw’emyaka rukumi atakatwikiririze kuba abahikirire. Kuhisya obwo bwire Yehova natura ayetegwire kutusasira ebibi byitu. Obwe rero, tushemerire kutoreza eco cokureberaho kirungi turi kureba ebirungi omu bandi kandi turi kubehanganira. Yetegereze ecokureberaho ca munyanyazi omwe owu omushija weye yabugine ebigezo, kikatuma yareka kuza omu nterane. Akagamba ngu: “Eco kikanshasha munonga. Entebekanisa zitu z’omu biro by’omu misho zona zikahinduka.” Konka ekiri kukira byona, omukazi weye akamwehanganira kandi yagumizamu kumukunda. Akagumizamu kwesiga Yehova kandi tarahwire mani. Nka Yehova, ogo mukazi akehuzya ebizibu, yata omutima aha birungi ebyabire birije kuhika aha mushija weye. Akagamba ngu: “Omushija wange ayine emitwarize mirungi kandi mporampora nakora ekiri kubasika cona kugira ngu abe ge.” Mbehi ti ec’omugasho munonga kwehanganira ab’omu ka ninga ab’omu kibina abari kugezaho kurwanisa ebizibu!
19. Ni enki eki wamaririra kukora?
19 Yesu na ba marayika bakashemererwa obu Yehova yabire ari kuhanga ensi. Konka tekateka oku babire barashemerererwe kureba ensi yona eyijwire abantu abahikirire, abari kukunda Yehova kandi abari kumuhereza. Tekateka aha kushemererwa oku abariza omu iguru kutegeka na Yesu baritunga ku barireba abantu omu nsi bari kutunga emigisha ahabw’emirimo y’emikono yabo. (Kush 4:4, 9-11; 5:9, 10) Nambwenu tekateka oku amagara gariba gari obu omu mwanya gw’amarira g’obusaasi turirira amarira g’okushemererwa, obu oburwire, okucura n’okufa biriba bitakiriho. (Kush 21:4) Kuruga hati maririra kutoreza Tata w’omu iguru ori kwereka rukundo, obwenge n’okwehangana. Ku orikikora osyo, oryaguma oyine okushemererwa n’obu wakubugana ebizibu. (Yak 1:2-4) Mbehi tituri kushemererwa ahabw’ekiraganiso ca Yehova c’oku ‘haribaho okuzoka kw’abahikirire n’abatahikirire’!—Byak 24:15.
ECESHONGORO CA 141 Amagara Nigatangaaza
^ par. 5 Yehova ni Tata oyine rukundo, obwenge, kandi ori kwehangana. Nitubasa kumanya eyo mitwarize yeye twareba oburyo obu yahangiremu ebintu byona n’ekigendererwa ceye c’okuzora abantu abafire. Omuri eki kicweka twaza kushwijuma ebibuzo ebi turi kubasa kwebuza aha kuzoka kandi twaza kushwijuma oku turi kubasa kwereka ku nitusima Yehova ahabwa rukundo, obwenge, n’okwehangana kweye.
^ par. 59 EKISHUSHANI: Omushija owamazire emyaka myingi yafire ari kuzoka omu bwire bw’obutegeki bwa Kristo bw’emyaka rukumi. Mwenetata owahonokire Haramagedoni ari kwegesa omuntu ozokire ebi ashemerire kukora kugira ngu agasirwe n’ekitambo ca Kristo.
^ par. 61 EKISHUSHANI: Mwenetata ari kugambira bosi weye ku hine ebiro by’omu sande ebi atarakoreho eshaha ezirengire. Yamushobororera ku omuri ebyo biro ari kuba ayine entebekanisa z’okuramya Yehova, nk’okuza omu nterane, kwebembera okuramya kw’eka, n’okuburira. Konka omu bundi bwire caba kiri kwetengesa nabasa kukora eshaha ezirengire.
