Twine ebihamya ebiri kwereka ku Yesu yabire Omutambi Mukuru obu yamazire kubatizibwa omu mwaka gwa 29 B.Y. Eco nitukimanya tuta? Obu Yesu yabire ari kubatizibwa akaba yayereka ku yahayo amagara geye nk’ekitambo kugira ngu akore ebi Ruhanga ari ‘kusima.’ (Gal 1:4; Heb 10:5-10) Kwiha obwe, eco kitambo kikaba kiri ec’omugasho omuri hekalu y’omu buryo bw’omwika eyabireho obu Yesu yabire ari kubatizibwa. Eyo hekalu ya Yehova y’omu buryo bw’omwika negeranisa ekintu cona ekiri kutuma twabasa kuramya Yehova omu buryo buhikire birabire aha kitambo ca Yesu.—Mat 3:16, 17; Heb 5:4-6.

Eyo hekalu nkuru y’omu buryo bw’omwika ekaba eri kwetenga Omutambi Mukuru. Kugira ngu eco kibasike, Yehova akatorana Yesu ngu abe Omutambi Mukuru. (Byak 10:37, 38; Mak 1:9-11) Mbwenu shi ni enki ekiri kutuhamiza ku Yesu yatirweho ngu abe Omutambi Mukuru atakafire ngu azoke? Nitubona ebihamya ku turi kushwijuma ecokureberaho ca Arooni n’abandi batambi bakuru ababire nibagendera aha biragiro bya Musa.

Tukuratize ebiragiro ebi Yehova yahire Musa, Omutambi mukuru wenka ni we wabire ashemerire kutaha Ahari kwera Munonga ha hekalu. Ahari kwera Munonga n’Ahari kwera hakaba nihatanisibwa n’omwenda. Omutambi Mukuru akaba natahayo aha Izoba ry’Okurihiriraho. (Heb 9:1-3, 6, 7) Kugira ngu Arooni n’abandi batambi batahe ahari Kwera Munonga Yehova akaba nabanza yabashukaho amajuta; konka Yesu we nk’Omutambi Mukuru Yehova, akamushukaho omwika oguri kwera atakafire ngu azoke aze omu iguru. (Heb 10:20) Ahabw’eyo nshonga, entumwa Paulo akagamba ahari Yesu ku yizire kuba omutambi ‘mukuru’ kandi ‘yaraba omu Ihema eriri kukira obukuru n’okuhikirira, eritakozirwe bantu,’ ni okugamba omu iguru henyine.—Heb 9:11, 24.

Tihariho entanisa eri ahagati y’okutebwaho n’okutandika kukora kw’endagano ensya. Ahabw’enki? Obu Yesu yagarukire omu iguru akereka omugasho gw’amagara geye agahikirire; obwe akaba yatera entambwe y’okubanza omu ntambwe ishatu ngu ahike aha ndagano eyabire yaza kutandikaho. Ezo ntambwe zikaba ziratume endagano ensya yatandika kukora. Konka shi ezo ntambwe ni ziha?

Ey’okubanza; Yesu akeyereka omu misho ga Yehova; nambwenu Yesu akereka omugasho gw’ekitambo ceye ahari Yehova; eya bwanyima Yehova akikiriza omugasho gw’eshagama ya Yesu. Ezo ntambwe zona zitakahikirire endagano ensya ekaba etakatandikire kukora.

Bibuli teri kutugambira butunu obwire bwenyine obu Yehova yayikirize omugasho gw’ekitambo ca Yesu. Obwe rero tituri kubasa kugamba obwire bwenyine obu endagano ensya yatirweho n’obwire obu yatandikire kukora. Konka nitumanya ku Yesu yagire omu iguru hari kubura ebiro ikumi ngu izoba rya Pentekoote rihike. (Byak 1:3) Omuri obwo bwire niho yayerekire omugasho gw’ekitambo ceye ahari Yehova. (Heb 9:12) Ekiri kubihamiza kimwe ni ecabireho aha izoba rya Pentekoote. (Byak 2:1-4, 32, 33) Kwiha obwe endagano ensya ekaba yatebwaho kandi yatandika kukora.

Omu bugufu; endagano ensya ekatebwaho kandi yatandika kukora obu Yehova yayikirize omugasho gw’eshagama ya Yesu eyayasirwe. Endagano ku yatandikire kukora ekaba eyine Omutambi Mukuru ariwe Yesu, nk’Omubuganisa.—Heb 7:25; 8:1-3, 6; 9:13-15.