1. Nk’oku kiri kugambwa omuri 3 Yohaana 3, 4, ni enki ekiri kutushemeza?

MBEHI nobasa kutera akashushani, oreba oku entumwa Yohaana yabire ari kuhurira ashemerirwe, ku yabire nahurira ku abu yayegesize amazima bagumizemu kuhereza Yehova omu bwesigwa? N’obu babugine ebizibu byingi, Yohaana akaba nataho amani kugira ngu agumye okwikiriza kw’abo Bakristo abu yabire nakwata nk’abana beye omu by’omwika. N’itwe nituhurira twashemererwa abana bitu ninga abo turi kwegesa Bibuli bayeha Yehova bekundire ngu bamuhereze.—Shoma omuri 3 Yohaana 3, 4.

2. Ni kiha kigendererwa c’amabaruha agu Yohaana yahandikire?

² Omu mwaka gwa 98 B.Y., Yohaana nabasa kuba yabire atwire omuri Efeso ninga shi hihi yaho. Nabasa kuba yagarukireyo ku yarugire omu kihome aha kirwa ca Patimo. Omuri obwo bwire omwika gwa Yehova oguri kwera gukamukwasa rero yahandika amabaruha ashatu. Ekigendererwa c’ago mabaruha kikaba kiri ec’okuhiga Abakristo b’abesigwa ngu bagumizemu kwesiga Yesu kandi bagume kugendera omu mazima.

3. Ni biha bibuzo ebi twaza kugarukamu omuri eki kicweka?

³ Omu ntumwa, entumwa Yohaana ni we wafire bwanyima, kandi akagamba aha ku abegesa b’ebishuba babire barishisha ekibina. * (1 Yoh 2:18, 19, 26) Abo begesa b’ebishuba bakaba nibagamba ebya Ruhanga, konka bakaba batari korobera ebiragiro bya Yehova. Reka turebe okurabura kwa Yohaana.  Omuri eki kicweka twaza kugarukamu ebibuzo bishatu: Kugendera omu mazima nikimanyisa ki? Ni enki ekiri kubasa kutuzibira kugagenderamu? Kandi shi ni bata oku turi kubasa kukwasa abandi kuguma omu mazima?

4. Tukuratize ebiri omuri 1 Yoh 2:3-6 na 2 Yoh 4, 6, kugendera omu mazima nikitwariramu enki?

⁴ Kugira ngu tugendere omu mazima, tushemerire kumanya amazima g’omu Kigambo ca Ruhanga, Bibuli. Kandi tushemerire ‘korobera ebiragiro’ bya Yehova. (Shoma omuri 1 Yohaana 2:3-6; 2 Yohaana 4, 6.) Yesu akatuteraho ecokureberaho kihikirire omu korobera Yehova. Oburyo obu turi kubasa koroberamu Yehova, ni okutoreza ecokureberaho ca Yesu oku biri kubasika kona.—Yoh 8:29; 1 Pet 2:21.

5. Ni enki eki tushemerire kuhamya tutari kubanganisa?

⁵ Kugira ngu tugume tugendere omu mazima, tushemerire kuba turi kuhamiza kimwe ku Yehova ari Ruhanga ow’amazima kandi ku ebi ari kutugambira omu Kigambo ceye Bibuli, biri amazima. Kandi tushemerire kwikiriza ku Yesu ari we Mesia owaraganisibwe. Omuri obu bwire, abingi nibabanganisa ku Yesu yatorinwe ngu abe Omugabe w’Obukama bwa Ruhanga. Yohaana akagamba ku habire haribaho ‘abari kuhabisa bingi,’ ababire barahabise abatari kurwanirira amazima agari kukwata ahari Yehova na Yesu. (2 Yoh 7-11) Yohaana akahandika ngu: ‘Omubihi ni oha? Ti ogo ohakana ku Yesu ari Kristo?’ (1 Yoh 2:22) Oburyo obu turi kwerindamu kuba abahakani ni okweyegesa Ekigambo ca Ruhanga. Ku turikikora tusyoya nitwija kumanya Yehova na Yesu. (Yoh 17:3) Kandi eco nikija kutuhamiza ku turi omu mazima.

6. Ni kiha kizibu eki munyanyazi omwe yabugine?

⁶ Abakristo twena tushemerire kwerinda kuhabisibwa enyegesa z’ebishuba. (1 Yoh 2:26) Abacari bato na bo nibaba bashemerire kwerinda ezo nyegesa. Munyanyazi w’omuri Bufaransa ori kwetwa Alexia, * oyine emyaka 25 akagira ngu: “Ku nabire ncari muto, eby’ensi bikaba nibinjagaraza  munonga, ahakuba nkegesibwa enyegesa y’oku ebintu biri kubaho biri kuruga omu bindi hamwe n’ezindi nyegesa z’ebishuba. Ezo nyegesa zikankwataho munonga. Konka nkatekateka ku nshemerire kureka enyegesa z’ebishuba ezi nayegire nkesiga Yehova.” Alexia akega akatabo akari kwetwa ngu: Amagara gakabaho gata? Aha bwa butandu ninga gakahangwa? (How Did It Get Here? By Evolution or by Creation?) Kwiha obwe taragarukire kubanganisa. Alexia akagira ngu: “Nkikiriza ku Bibuli erimu amazima. Kandi nkamanya ku kugendera aha misinge ya yo kirituma natunga obusinge n’okushemererwa.”

7. Ni enki eki tushemerire kwerinda kukora kandi ahabw’enki?

⁷ Twena Abakristo, abato n’abakuru, nitubugana ekizibu c’okubaho omu mbera z’amahara kubiri. Yohaana akagamba ku tutari kubasa kugendera omu mazima turi n’okukora ebikorwa bibi. (1 Yoh 1:6) Twaba turi kwenda kuhereza Yehova tushemerirwe, tushemerire kwijuka ku ari kureba ebi turi kukora byona. Obwe rero ha kibi na kimwe ecesherekire ahakuba byona bishuurwirwe omu misho ga Yehova.—Heb 4:13.

8. Ni enki eki tushemerire kwetantara?

⁸ Tushemerire kwetantara oku ensi eri kureba ekibi. Entumwa Yohaana akahandika ngu: ‘Ku tugira ngu titwine kibi, tuba nitwebiha, kandi tuba tutine mazima.’ (1 Yoh 1:8) Omu bwire bwa Yohaana, abahakani bakaba nibagamba ku omuntu ari kubasa kukora ekibi kandi akaguma ayine obunywani na Ruhanga. Omuri obu bwire na bwo, tutwire omu bantu abari kureba ebintu basyoya. Abingi nibagamba ku nibesiga Ruhanga, konka tibari kwikiriza oku Yehova ari kureba ekibi, na munonga aha bikwatirine n’obushambani. Hariho emitwarize eyi Yehova ari kwanga, konka abantu bo bagamba ku etine enshonga.

9. Ahabw’enki kiri kirungi Abakristo abacari bato bata omu nkora eki Bibuli eri kwegesa?

 ⁹ Abakristo abacari bato nikibasa kubagumira kureba obushambani omu buryo buhikire, yaba abu bari kwega hamwe ninga abu bari kukora hamwe batari kwikiriza eki Bibuli eri kukigambaho. Eco ni co cahikire ahari Aleksandar. Akagira ngu: “Abahara bingi abu twabire nitwega hamwe bakaba nibangema kunyamana na bo. Bakaba nibangambira ngu obu ntine omuhara owu turi kukundana, ndi ekitingwa.’ Waba ori omu mbera nk’ezo, yijuka ku wabaho ori kugendera aha misinge y’omuri Bibuli kiri kurinda ekitinisa ca we, amagara ga we, emitekatekere ya we, n’obunywani bwa we na Yehova. Kandi ku ori kusingura ebigezo, nikikorobera kukora ebihikire. Yijuka ku oku ensi eri kureba obushambani biri kuruga ahari Sitaane. Ku orayetantare emitekatekere y’ensi ‘nosingura Omubi.’—1 Yoh 2:14.

10. Ni bata oku ebiri omuri 1 Yohaana 1:9 biri kutukwasa kuhereza Yehova twine omuntuwomunda murungi?

¹⁰ Nitwikiriza ku Yehova ari we ari kumanya ekibi eki ari co. Kandi nitukora cona eki turi kubasa ngu tutakora ekibi. Konka ku turi kukora ekibi, nitushaba Yehova embabazi omu shara. (Shoma omuri 1 Yohaana 1:9.) Kandi twakora ekibi c’amani, nituba tushemerire kushaba obuyambi abazehe abu Yehova yatorine ngu batufeho. (Yak 5:14-16) Twaba tutakikozire, nituguma turi kutekateka aha kibi eki turi kuba twakozire. Ahabw’enki? Ahakuba Tata witu ow’omu iguru yatuhire ekitambo c’omwana weye, nabasa kutusasira ebibi byitu. Yehova nagamba ku ari kusasira abasiisi abari kwehana. Obwe rero tihariho ekintu ekiri kubasa kutuzibira kuhereza Yehova twine omuntuwomunda murungi.—1 Yoh 2:1, 2, 12; 3:19, 20.

11. Ni bata oku turi kubasa kwerinda enyegesa z’ebishuba eziri kushisha okwikiriza kwitu?

 ¹¹ Tushemerire kwetantara enyegesa z’abahakani. Kwiha ekibina c’Abakristo catandika, Sitaane atwire nakoresa abahakani bingi ngu babibe okubanganisa omu mitima yitu. Obwe rero tushemerire kumanya entanisa eri ahagati y’amazima n’ebishuba. * Abangi bitu nibakoresa intaneti ninga embuga z’okuganiriraho kugira ngu bagezeho kutuzibira kwesiga Yehova kandi tutakunda benetata. Otayesiga ebyo bishuba, ahakuba nibiruga ahari Sitaane.—1 Yoh 4:1, 6; Kush 12:9.

12. Ahabw’enki tushemerire kwereka ku nitusima ahabw’amazima agu twayegire?

¹² Kugira ngu tusingure ebigezo bya Sitaane, tushemerire kwesiga Yesu ahakuba Yehova ni we ari kukoresa omu kuhikiriza ekigendererwa ceye. Kandi tushemerire kwesiga Omwambari omwesigwa owu Yehova ari kukoresa ngu aturise omuri obu bwire. (Mat 24:45-47) Kugira ngu tugume turi kubesiga tushemerire kweyegesa Bibuli burijo. Ku turikikora tusyoya, okwikiriza kwitu nikwija kuba nk’emizi y’ekiti eyashumire hare omu itaka. Paulo akagaruka ahari obwo buhabuzi ari kuhandikira ekibina c’omuri Kolosai. Akagira ngu: ‘Nk’oku mwayakire Kristo Yesu Mukama, mube ni ko mwagendera mutyo omuri we, musimbire emizi omuri we, mwombekirwe omuri we, kandi muhamibwe omu kwikiriza.’ (Kol 2:6, 7) Tihariho ekintu eki Sitaane ninga abari kumushagika bari kubasa kukora ngu kitume Abakristo bareka kugendera omu mazima.—2 Yoh 8, 9.

13. Ni enki eki tushemerire kwikiriza kandi ahabw’enki?

¹³ Tushemerire kwikiriza ku ensi eri kutwanga. (1 Yoh 3:13) Yohaana akatwijusya ku ‘ensi yona eri omu butegeki bw’omubi ogo.’ (1 Yoh 5:19) Oku eyi nsi eri kukizaho kuhika hihi n’omuheru, ekiniga ca Sitaane nikikizaho kweyongera. (Kush 12:12) Nakoresa oburyo bwingi ngu atuhabise, nk’obushambani ninga shi ebishuba by’abahakani. Nambwenu nakoresa oburyo obutari kurebwa butunu. Sitaane namanya ku asigize obwire buce bw’okugezaho kwemereza omurimo g’okuburira ninga shi kutuma twareka kugendera omu mazima. Obwe rero tikiri kututangaza omu mahanga agatari gamwe na gamwe kuba omurimo gwitu guri kwemerezibwa. Konka benetata na banyanyazi b’omuri ago mahanga nibagumizamu kwehangana. Nibamanya ku hatariho ekigezo eki Sitaane ari kubasa kuturetera eki tutari kubasa kusingura!

14. Ni bata oku turi kubasa kukwasa benetata na banyanyazi ngu bagume bahamire omu mazima?

¹⁴ Kugira ngu tukwase benetata na banyanyazi kuguma bahamire omu mazima tushemerire kubereka embabazi. (1 Yoh 3:10, 11, 16-18) Tushemerire kwerekana rukundo hatari omu bwire burungi kusha ahobwe na twakuba turi omu bizibu. Ecokureberaho: Mbehi hine omuntu owu ari kumanya owafisize omukundwa weye ori kwetenga okuhumurizibwa ninga shi obundi buyambi omu bikorwa? Ninga shi nomanya Abakristo bagenzi bitu abari kubonabona ahabw’ebihikirizi bari kwetenga obuyambi bw’okombecerwa Ebyombeko by’Obukama ninga shi amaju ga bo? Tushemerire kwereka benetata na banyanyazi rukundo atari omu bigambo kusha ahobwe n’omu bikorwa.

15. Tukuratize ebiri omuri 1 Yohaana 4:7, 8, ni enki eki tushemerire kukora?

¹⁵ Nitutoreza Tata witu w’omu iguru ori kutukunda twaba turi kukundana. (Shoma omuri 1 Yohaana 4:7, 8.) Oburyo bw’omugasho munonga obu turi kwerekamu rukundo  ni okusasirana. Ecokureberaho: Omuntu nabasa kutushobeza konka bwanyima atushaba embabazi. Nitwereka rukundo turi kumusasira kandi twebwa ebi yatukorire. (Kol 3:13) Mwenetata ori kwetwa Aldo akabugana eco kigezo obu yahurire mwenetata owu yabire ari kuha ekitinisa yamugambaho kubi. Aldo akagamba ngu: “Nkashaba Yehova munonga ngu ankwase ntatekateka kubi ahari ogo mwenetata.” Konka Aldo hariho ekindi kintu eki yakozire. Akashaba ogo mwenetata ngu bagende hamwe omu murimo g’okuburira. Ku babire bari hamwe, Aldo akamugambira ku ebi yamugambireho byamushashire. Aldo akagamba ngu: “Obu mwenetata yahurire oku byanshashire akanshaba embabazi. Nkuratize iraka eri yakoresize, nkahika nindeba ku yayefuza ahabw’ebi yagambire. Ebizibu tukabita aha rubaju rero twagaruka kuba abanywani.”

16-17. Ni enki eki twamaririra kukora?

¹⁶ Entumwa Yohaana akaba nakunda benetata munonga, kandi akaba ari kwenda ngu bagire okwikiriza kugumire; ebyo ni byo yafireho omu mabaruha geye ashatu. Mbehi tikiri kutugaruramu amani kumanya abo bashija n’abakazi abashukirweho omwika nka Yohaana, abaritegeka na Kristo omu iguru!—1 Yoh 2:27.

¹⁷ Obuhabuzi obu twatunga, buzima bwatukora aha mutima! Reka tumaririre kugendera omu mazima, turi korobera Yehova omu bi turi kukora byona, turi kweyegesa Ekigambo ceye burijo kandi tute omu nkora ebi turi kwega, turi kukizaho kwikiriza Yesu, turi kwetantara enyegesa z’abahakanyi, kandi turi kwerinda kubaho omu mbera z’amahara kubiri eziri kutuma twagwa omu bibi. Tushemerire kubaho turi kugendera aha misinge ya Yehova eri kukirayo. Reka tukwase benetata na banyanyazi kuguma bahamire omu mazima turi kusasira abari kutushobeza kandi tuhe obuyambi abari kubwetenga. Ku turayehanganire ebigezo ebi turi kubugana, nitwija kuguma turi kugendera omu mazima.