Nkazarirwa St. Paul, omu tawuni ya Minnesota, y’omuri Amerika omu mwaka 1954, tukaba tutari aboro ninga shi abagiga kandi omu ka tukaba turi abakaturiki. Ndi omwana wa kabiri omuri batano abu turi kuzarwa hamwe. Nkaza kwega omu ishomero ry’Abakaturiki kandi nkaba ndi omuhereza omu kereziya. Konka nkaba ntari kumanya byingi ahari Bibuli. N’obu nabire ndi kwikiriza ku Ruhanga yahangire ebintu byona nkaba ntari kwikiriza ebi abakaturiki bari kwegesa.

Ncayega omu mwaka g’okubanza omuri yunivasiti ya William Mitchell omu by’ebiragiro, Abahamya ba Yehova bakija owange. Nkaba mpugire omu by’obuyonjo, rero nashaba ogo mushija n’omukazi weye kugaruka obundi bwire. Obu bagarukire nkababuza ebibuzo bibiri ebiri kugira ngu: “Ahabw’enki ababi bari kutunga ebi bari kwenda kukira abari kukora ebirungi?” n’ekiri kugira ngu: “Ni enki ekiri kureta okushemererwa?” Bakampa akatabo akari kugira ngu: Oruguuto orw’Amagara Agatahwaho na Bibuli y’Obuhinduzi bw’Ensi Ensya bw’Ebyahandikirwe ebiri Kwera. Rero nkikiriza kwega Bibuli.  Buzima ebyo bikankwasa kumanya byingi. Kandi nkashemerererwa kwega ku Obukama bwa Ruhanga aribwo butegeki oburitegeka ensi. Nkerebera ku obutegeki bw’abantu buri kutuma abari omu nsi babugana obusaasi, bakabonabona, kandi bakatwarizibwa kubi.

Nkeha Yehova omu mwaka gwa 1982 kandi nabatizibwa omuri ogo mwaka omu Kiterane ecabire kine omutwe oguri kugira ngu: “Amazima g’Obukama” ecaberire omu tawuni ya St. Paul civic center. Omu sande eyakuratireho nkagaruka omuri civic center kukora ekizamu ca bwanyima kugira ngu mbase kuba omuramuzi. Omu Kwikumi bakangambira ku nasingire ku ndi kubasa kuba omuramuzi.

Omuri eco kiterane ecabire kine omutwe oguri kugira ngu: “Amazima g’Obukama” nkabugana mwenetata ori kwetwa Mike Richardson, owabire arugire ahari Beteli ya Brooklyn, yatushobororera oku ekishenge c’eby’ebiragiro catandikire ahari ofisi nkuru yitu. Nkaba ninyijuka ebigambo by’omukonwa w’omunyesiyopia ebiri omu Byakozirwe 8:36 rero catuma nayebuza ngu: ‘Ni enki ekiri kutuma ntashaba kuza kukora omu Kishenge c’eby’ebiragiro?’ Nkahika ndi kwijuza fomu y’okukora ahari Beteli.

Ku nabire Omuhamya wa Yehova abazire bange tibarashemerirwe. Tata akambuza eki naza kukora ahari Beteli ekikwatirine n’ebiragiro ebi nayegire. Nkamushoborera ku naza kuyamba kusha. Nkamugambira ku buri kwezi baragume kumpa dola 75 z’okunyamba nk’omukozi wa Beteli.

Ku namazire kwemereza omurimo ogu nabire nyine, nkahika nintandika kukora ahari Beteli ya Brooklyn, omuri New York omu mwaka gwa 1984. Bakanta omu Kishenje c’eby’ebiragiro. Obumanyirizi obu natungire omu by’okucwa emanja bukanyamba.

Ecombeko ca Stanley Theater ekiri omu tawuni ya New Jersey, tukakigura omu Kwikuminakumwe 1983. Benetata bakashaba oruhusya rw’okushuba kugarukamu eby’amashanyarazi n’eby’amizi. Abo benetata ku bagire kubugana abategeki bakabashobororera ku bari kwenda kukoresa Stanley Theater ngu bagume bari kuyikoreramu ebiterane bihango by’Abahamya ba Yehova. Ebiragiro by’etawuni ya Jersey aha bikwatirine n’oku ebyombeko biri kukoresibwa, bikaba nibigamba ku ebyombeko by’okuramizamu bishemerire kuba biri omu kacweka akari kuturwamu kusha. Ecombeko ca Stanley Theater kikaba kiri omu kacweka k’eby’obushubuzi,  obwe rero abakuru b’etawuni bakatwima oruhusya. Benetata bakikiriza ecokugarukamu eki babahire.

Esande y’okubanza mpikire ahari Beteli, obwo bwire ekibina kikaba kine orubanja omu ishengero. Ahakuba nabire nakozire emyaka ibiri omuri eryo shengero rya St. Paul, omuri Minnesota, bakaba bamanyirire. Omushija omwe akagamba ku Stanley Theater yabire nekoresibwa omu bintu byingi ebiri kubuganisa abantu bingi, nk’okureberamu za filimu n’ebyeshongoro. Ahabw’enki, cabire kitari kwikirizibwa kukoreramu ebikorwa by’edini? Ishengero ry’etawuni ya Jersey rikashwijuma enshonga zona ezi twabire tubahire ryashanga etawuni etarahire ekitinisa obugabe bwitu bw’okuramya. Ishengero rikaragira etawuni kutwikiririza, kandi eco kikatuma Yehova yaha emigisha ekitongore ceye ari kukoresa ebiragiro, kugira ngu kize omu misho. Ku nabihurire kikanshemeza munonga.

Benetata bakahika nibahahunduza rero ku hahwireho omwaka gumwe, abegi b’omu ishomero rya 79 rya Gileadi bakakoresa Ecombeko c’Ebiterane c’omu tawuni ya Jersey aha biro 8 Okwamwenda 1985. Kukora ogo murimo ndi kukorera Yehova kikaba nikinshemeza munonga kukiza omurimo g’oburamuzi ogu nabire ndi kukora ntakizire ahari Beteli. Nimanya ku Yehova arimpa emigisha ahabw’omurimo ogu namukorire.

Omu myaka ya za 1980, obwo bwire ba dokita n’aha marwariro bakaba batamanyirire kutambira abantu batakoresize eshagama, obwo rero kikaba kitorobi kutambira Abahamya ba Yehova abakuzire batakoresize eshagama. Abakazi abine enda bakaba nibakira kubugana eco kizibu ahakuba abaramuzi bakaba bagambire ku batashemerire kwanga kuterwa eshagama. Abo baramuzi bakagamba ku omukazi yayanga kuterwa eshagama ashemerire kufa omwana akakura ari enfuzi.

Omunyanyazi ori kwetwa Denise Nicoleau, aha biro 29 Okwikuminabiri 1988, ku yaherize kuzara akajwa eshagama nyingi. Ahabw’okuba amagara geye gabire gari omu kabi, dokita akamugema ngu ayikirize bamutere eshagama. Munyanyazi Nicoleau akabyanga. Omu kasheshe akakuratireho, irwariro riketa omuramuzi ryamushaba ngu abikirize kutera ogo mukazi eshagama. Omuramuzi akahika ari kwikiriza ngu batere munyanyazi Nicoleau eshagama batamuburize ninga ngu babuze omushija weye.

Orwakatano, aha biro 30 Okwikuminabiri, Nicoleau bakaza kumutera eshagama, omushija weye n’abanyabuzare beye babyanga. Ogo mwebazo, abanyabuzare beye n’abazehe bakaba bari aho bazibira ba dokita kumutera  eshagama. Orwamukaga, aha biro 31 Okwikuminabiri, omu mpapura z’amahurire, ahari tivi n’aha marediyo g’omu tawuni ya New York bakabigambaho.

Aha rw’Okubanza omu kasheshe, nkakigambanaho n’omuramuzi ori kwetwa Milton Mollen. Nkamushobororera eco kizibu, kandi namugambira oku omuramuzi yakozire ensharamu y’okubikiriza kumutera eshagama batamuburize ninga ngu babuze omushija weye. Mollen akanshaba kuza kumureba ahari ofisi yeye, ngu tukiganireho kandi turebe n’ebiragiro ebiri kukigambaho. Ogo mwebazo, omureberezi wange Philip Brumley, akanshendekeza twaza kureba Mollen. Nambwenu omuramuzi akatumira aba ah’irwariro ngu tube turi na bo. Ebiganiro byitu bikaba birimu oruyombo. Mwenetata Brumley akaba ari kuhandika omu katabo keye, rero yangambira ngu ntuze. Obwo buhabuzi obu yampire bukaba burungi munonga, ahakuba bakaba banyombesize, nkaba ndi kwenda kwereka aba ah’irwariro ku bari omu nshobe.

Ku hahwire eshaha nk’emwe, Mollen akagamba ku orwo rubanja ari rwo aratandikireho omu kasheshe. Ku nabire ndi kuruga omu kishenge ceye, omuramuzi Mollen akagamba ku irwariro ryine omurimo gugumire omu kasheshe. Eco nikimanyisa ku irwariro ryabire ritine obugabe bw’okugema munyanyazi Nicoleau kwikiriza kuterwa eshagama. Nkamanya ku Yehova ari hamwe n’itwe omuri orwo rubanja. Kikantangaza kureba oku Yehova ari kutukoresa ngu ahikirize ebi ari kwenda.

Tukakora ekiro cona turi kutebekanisa ebi turagambe omu kasheshe. Ishengero rikaba riri hihi orugire ahari Beteli ya Brooklyn, obwe rero abingi abu twabire nitukora hamwe omu kishenge c’eby’ebiragiro bakaba bakozireyo. Abaramuzi bana ku baherize kuhurira ebitekateko byitu, bakihaho ekiragiro c’okuterwa eshagama. Ishengero rikuru rikamara orubanja rwa Munyanyazi Nicoleau, riri kugamba ku kugema omurwire kwikiriza kuterwa eshagama ari ekikorwa c’obugomi c’okutafa aha bugabe bw’omuntu.

Ishengero rikuru rikagamba ku Munyanyazi Nicoleau bashemerire kumutambira batakoresize eshagama. Eyo ni ensharamu y’okubanza omu nsharamu ina ezikwatirine n’eshagama ezi ishengero rikuru ryabire ryakozire, eyi nagiremu. (Reba akashanduku akari kugira ngu “ Ensharamu z’Ishengero Rikuru.”) Nambwenu  nkaza omu manja z’ahari Beteli z’abashija n’abakazi ababire bine ebizibu by’okufa aha bana, aha kutana, n’ebiragiro by’ebibanja n’ebyombeko.

Nkatasya omukazi ori kwetwa, Dawn, akaba yatine n’omushija weye kandi akaba ayine abana bashatu. Akaba ari kufa ahari abo bana kandi ari omupayoniya. Akaraba omu mbera mbi, kandi nkahurira namusasibwa munonga ahakuba akaguma ari kuhereza Yehova. Omu mwaka gwa 1992, tukaza omu kiterane kihango ecabire kine omutwe oguri kugira ngu “Okurebeka k’omushana” omu tawuni ya New York, rero namushaba yaba ari kwikiriza kumbera omukazi. Ku hahwire omwaka gumwe tukagitwa. Kugira omukazi ori kunkunda kandi ori kukunda Yehova nkaba ninkireba nk’ekiconco ecarugire ahari Yehova. Ebiro byona ebi namazire ndi na Dawn buzima nkaba nyine okushemererwa kwingi.—Enf 31:12.

Obu twatasine, abana beye bakaba bine emyaka 16, 13, na 11. Ahabw’okuba nabire ndi kwenda kubabera omuzire murungi, nkaba ninkira kushoma n’okuta omu nkora obuhabuzi oburi omu bitabo byitu obukwatirine n’okureberera abana. Nkashemererwa ahakuba abo bana bakandeba nk’omuzire kandi munywani wa bo ori kubafaho; konka omu kubanza kikaba kingumire. Tukaba nitwakira banywani b’abo bana omu ka owitu, kandi tukaba nitushemererwa kuba hamwe na bo.

Omu 2013, nyowe na Dawn tukafurukira omuri Wisconsin kureberera abazire beye ababire bakuzire. Konka ecantangarize, omurimo gwange ahari Beteli tiguremerire! Nkashabwa kuguma ndi kuyamba ekitongore kitu omu by’ebiragiro nk’omukozi w’obwire buce.

Omu Kwamwenda 2018, nkamanya ku nabire ndwire ekizimba omu muhogo. Dokita w’omu kacweka kitu akanshwijuma, konka yabura ecatumire narwara. Bwanyima, dokita ondijo akangambira ku nshemerire kuza kureba Dokita w’eby’obwonko. Omu Kwokubanza 2019, dokita ondijo akangambira ku ndwire endwara eri kuhika obwire ekakwata omubiri gona.

Ku hahwire ebiro bishatu nkaza kuzana omuzano ogu nabire ndi kukunda. Nkaza kuhurira nahurira nahendeka okuguru kwa buryo. Ogo muzano gukaba nigunshemeza munonga kandi nkaba mazire obwire buringwa ndi kuguzana, obwe rero nkamanya ku mbuzire obushoborozi bw’okurinda emisi yange. Ku narebire oku endwara yange eri kukura juba kikanshasha, kandi ekatuma kugamba byangumira, ntabase kutambura, kandi ekaba nemara amani.

Nikinshemeza munonga kuba nabire ndi kubasa kuhereza Yehova omu kitongore ceye nk’omuramuzi. Kandi nikinshemeza kuba nabire ndi kubasa kuhandika ebintu ebiri kubasa kukwasa ba dokita n’abaramuzi; nambwenu nkahereza za toku omu nsi yona z’okurwanirira obugabe bw’Abahamya ba Yehova omu bikwatirine n’okushemezibwa hamwe n’okubatambira hatakoresibwe eshagama. Nanye nimbasa kugamba ku ‘ndi omuhuku otine mugasho owakozire ebi yabire ashemerire kukora’ nk’oku Luka yakigambire omuri Luka 17:10.