1. Tukuratize ebiri kugambwa omu Bafilipi 2:3, ni bata oku obucurezi buri kutuma twagira obunywani burungi n’abandi?

NITWOROBERA emisinge ya Yehova, ahakuba nitumanya ge ku burijo ari kutwendeza ebirungi. (Efe 4:22-24) Obucurezi nibutuma twata ebi Yehova ari kwenda omu mwanya g’okubanza, kandi butuma twareba ku abandi bari kutukira. Eco nikituma twagira obunywani na Yehova n’Abakristo bagenzi bitu.—Shoma omu Bafilipi 2:3.

2. Ni enki eki entumwa Paulo yagambire, kandi shi ni enki eki twaza kushwijuma omuri eki kicweka?

² Twaba tutabire misho, nitubasa kugira emicwe nk’ey’abantu ab’omuri eyi nsi ya Sitaane, abari kwetungura kandi abari kwekunda. * Eco ni co cahikire aha Bakristo b’omu kinyigana c’okubanza, obu Paulo yahandikire Abarooma ngu: ‘Ningambira buri muntu wena omuri imwe, ngu arece kwetekatekaho okukira oku ari, kureka atekatece okutarenza oku ari.’ (Rom 12:3) Paulo akagamba ku tushemerire kwetekatekaho. Konka, obucurezi nibutuma twaringaniza. Omuri eki kicweka twaza kushwijuma ahantu hashatu ahu obucurezi buri kutukwasa kwerinda kwetekatekaho ekirenga. Aho ni (1) omu bushwere, (2) omu buhereza bwitu, hamwe (3) n’okukoresa embuga z’okuganiriraho.

3. Ahabw’enki omu bushwere hari kubasa kubamu ebizibu, kandi shi ni bata oku bamwe bari kugezaho kubitereza?

³ Yehova akatandikisa obushwere kugira ngu omushija n’omukazi bashemererwe. Bombi nibaba batahikirire, obwe rero nihabasa kubaho okutikirizingana. Mazima, Paulo akahandika ku abari kutaha omu bushwere baribugana ebizibu byingi. (1 Kor 7:28) Eco nikituma abamwe batekateka ku bashemerire kutura nibarwana n’abu batasine, ninga shi batekateka ngu kutaha omu bushwere ni kibi. Emitekatekere y’ensi yaba yarabatahiremu, nicoroba kuhika bari kutekateka ku omubazi guri okutana. Nibatekateka ku ekiri kukirayo oburungi ahari bo kiri eco.

4. Ni enki eki tushemerire kwerinda?

⁴ Tushemerire kwerinda okutamarwa omu bushwere. Nitumanya ge ku ebyahandikirwe biri kugamba ku obushambani ari bwo bwonka oburi kubasa kutanisa abatasine. (Mat 5:32) Obwe rero twabugana ebizibu ebi Paulo yahandikireho, titushemerire kwikiriza ngu okwetungura kutume twatekateka ngu: ‘Mbehi obu bushwere nibuhikiriza ebyetengo byange? Mbehi eyi niyo rukundo eyi nabire ndi kwenda? Mbehi tindi kubasa kutunga okushemererwa naronda ondijo?’ Buzima ebi bibuzo birimu akantu k’okwekunda. Obwenge bw’ensi nibukugambira ngu okore eki omutima gwawe guri kwenda kandi ekiri kukushemeza, nangwa na cakuba kiri kwetengesa okutana. Konka obwenge bwa Ruhanga bwo nibugira ngu: ‘Omuntu wena omuri imwe arece kweta aha bye wenka, kureka ayete n’aha by’abandi.’ (Fil 2:4) Yehova nayenda ngu ogume hamwe n’owu mwatasine, mutaritana. (Mat 19:6) Nayenda ngu ote omu mwanya g’okubanza ebyetengo by’owu mwatasine.

5. Tukuratize ebiri omu Baefeso 5:33, ni bata oku omushija n’omukazi bashemerire kutwarizana?

 ⁵ Omushija n’omukazi bashemerire kutwarizana omuri rukundo kandi bahana ekitinisa. (Shoma omu Baefeso 5:33.) Bibuli netuhiga ngu tute omutima aha kugaba okukira okuhebwa. (Byak 20:35) Ni guha mutwarize oguri kukwasa omushija n’omukazi kwerekana rukundo kandi bakahana ekitinisa? Ni obucurezi. Abashija n’abakazi abari kwecureza tibari kwerondera ebyabo, ahobwe nibaronda eby’okuhwera abandi.—1 Kor 10:24.

6. Ni enki eki turi kwegera aha bi Steven na Stephanie bagambire?

⁶ Obucurezi bukakwasa Abakristo bingi abatasine kutunga okushemererwa omu bushwere bwa bo. Ecokureberaho: Omushija ori kwetwa Steven akagira ngu: “Iwe n’omukazi wa we mushemerire kukorera hamwe, na munonga omu bwire bw’ebizibu. Omu mwanya g’okutekateka ekirungi ahari iwe wenka, oshemerire kutekateka ecakubabera kirungi mwena?” Omukazi weye ori kwetwa Stephanie, na we niko ari kwehurira. Akagira ngu: “Tihine omuntu ori kwenda kutura n’owu batari kwikirizingana. Ku hari kubaho ebizibu nitugezaho kubitereza. Nitushaba, tucondoza rero tukigambaho. Nitutereza ebizibu omuri rukundo.” Abashija n’abakazi nibatunga okushemererwa baba batari kwetekatekaho munonga okukira oku bari kutekateka aha wu batasine.

7. Mwenetata yatunga omurimo omu kibina naba ashemerire kutwaza ata?

⁷ Kuhereza Yehova oku turi kubasa nitukireba nk’omugisha. (Zab 27:4; 84:10) Mwenetata yaba ayetegwire kuha Yehova ebirungi ari kumuhereza nikiba kiri kirungi munonga. Ahabw’okuba Bibuli negira ngu: ‘Omuntu ku ayenda omurimo g’omureberezi,’ naba yayetenga omurimo murungi. (1 Tim 3:1) Obwe rero yatunga omurimo omu kibina tashemerire kwetekatekaho munonga ngu ahurire ku ari kukira abandi. (Luk 17:7-10) Ekigendererwa ceye kishemerire kuba eco kuhereza abandi omu bucurezi.—2 Kor 12:15.

8. Ni enki eki turi kwegera aha cokureberaho kibi ca Diotorefe, Uziya, na Abusalomu?

⁸ Bibuli erimu ebyokureberaho ebiri kurabura by’abantu ababire bari kwetekatekaho munonga. Diotorefe, akaba ari ‘kukunda kwekuza’ omu kibina. (3 Yoh 9) Uziya aketungura yakora omurimo ogu Yehova yabire ataramwikirize kukora. (2 Bus 26:16-21) Abusalomu akagezaho kwehisya rubanda ngu bamushagike, ahabw’okuba akaba ari kwenda ngu abe omugabe. (2 Sam 15:2-6) Nk’oku ezo nkuru z’omuri Bibuli ziri kubyereka, Yehova tari kukunda omuntu ori kwehisa ekitinisa. (Enf 25:27) Abantu abari kwetungura kandi abari kwerondera ekitinisa niberetera ebizibu.—Enf 16:18.

9. Ni kiha cokureberaho eki Yesu yatuterireho?

⁹ Ekiri kutana n’ebyo byokureberaho bibi yetegereze ecokureberaho ca Yesu: ‘Ogo n’obu arabe yabire ari omu muringo gwa Ruhanga, taratekatekire okwingana na Ruhanga.’ (Fil 2:6) Yesu ni owa kabiri ahari Yehova, konka taretekatekireho ebirengire. Akagambira abegi beye ngu: ‘Ahakuba omuto omuri imwe mwena, ogo n’iwe mukuru.’ (Luk 9:48) Ka ni omugisha kukora n’abapayoniya, abahereza, abazehe ninga abareberezi abari kutayayira ebibina, abari kutoreza Yesu omu kwereka obucurezi! Abahereza ba Yehova b’abacurezi niberekana rukundo omu kitongore ca Ruhanga.—Yoh 13:35.

10. Ni enki eki ori kubasa kukora wareba ebizibu by’omu kibina batari kubifaho omu bwijwire?

¹⁰ Ni enki eki ori kubasa kukora omu kibina haba harimu ebizibu kandi ori kureba  abazehe batari kubifaho? Omu mwanya g’okwetombita, noyereka obucurezi ori kubashagika. (Heb 13:17) Kugira ngu eco okibase yebuze ngu: ‘Mbehi ebibuzo ebi ndi kureba, buzima ni byo bigumire munonga ebiri kwetenga kuterezibwa? Mbehi obu ni bwo bwire burungi bw’okubitereza? Mbehi ni inye oshemerire kubitereza? Mbehi ndi kwenda kuretaho obumwe omu kibina, ninga ndi kwetungura?’

11. Tukuratize ebiri kugambwa omu Baefeso 4:2, 3, twahereza Yehova omu bucurezi nikija kutugasira kita?

¹¹ Yehova nafa munonga aha bucurezi bw’abahereza beye omu mwanya g’okufa aha bushoborozi obu bine. Obwe rero oshemerire kuhereza Yehova omu bucurezi. Ku orikikora basyoya, noyija kuretaho obumwe omu kibina. (Shoma omu Baefeso 4:2, 3.) Kora omurimo g’okuburira. Guma oyambe abandi ori kubakorera ebirungi. Guma oyakire abantu bona, otwariremu n’abatine obujunanizibwa omu kibina. (Mat 6:1-4; Luk 14:12-14) Ku orakore byona omu bucurezi, ab’omu kibina nibareba ku oyine obwenge konka eki bari kufaho munonga ni obucurezi.

12. Mbehi Bibuli netuhiga kugira abanywani? Shoborora.

¹² Yehova nayenda ngu tumare obwire turi kuganira n’abanywani n’abanyabuzare bitu. (Zab 133:1) Yesu akaba ayine abanywani barungi. (Yoh 15:15) Bibuli negamba omugisha g’okugira abanywani barungi. (Enf 17:17; 18:24) Kandi netugambira ku kitari kirungi kwetantara abandi. (Enf 18:1) Abingi nibatekateka ku embuga z’okuganiriraho  buri oburyo burungi bw’okutunga abanywani bingi kandi ku buri oburyo bw’okwerinda kwetantara abandi. Obwe rero tushemerire kwetonda omu kukoresa obwo buryo.

13. Ahabw’enki abamwe abari kukoresa embuga z’okuganiriraho bari kubasa kuhurira bari bonka ninga bahurira bayemereza omutima munonga?

¹³ Abanyabwenge bakagamba ku abantu abari kumara obwire buringwa bari kukoresa embuga z’okuganiriraho, bari kutaho ebishushani ninga bari kuhandikirana bari kuhendera bari bonka kandi bahurira bayemereza omutima munonga. Ahabw’enki? Enshonga y’okubanza eri kutuma abantu bata ebishushani aha mbuga ni okugira ngu bereke abandi oku babireho, berekane banywani babo, ninga bereke abandi ahu bari. Abantu abari kureba ebyo bishushani nibabasa kuhika bari kugamba ngu ogu muntu nabasa kuba ari nka nanka ninga bagira ngu tori ge. Munyanyazi ori kwetwa Christian oyine emyaka 19 akagira ngu: “Nkatandika kwehurira kubi obu nabire nindeba abandi bashemerirwe omuri za wikendi nyowe ndi omu ka.”

14. Ni bata oku obuhabuzi oburi omuri 1 Petero 3:8 buri kutukwasa kumanya oku tushemerire kukoresa embuga z’okuganiriraho?

¹⁴ Nangwa omuntu nabasa kukoresa embuga z’okuganiriraho ayine ekigendererwa kirungi; ecokureberaho: Nk’okuzikoresa ori kuganira n’abanyabuzare n’abanywani ba we. Mbehi okareba ku abantu abari kukira kuta ebishushani, za vidiyo ninga ebigambo aha mbuga z’okuganiriraho, bari kuba bari kwenda kwetungura? Nibaba bari kwenda kukugambira ngu: “Ndeba”. Abamwe nibataho ebishushani bibi ninga bagamba ebigambo bibi aha bi abandi batireho. Ekiri kutana n’eco, Abakristo nibahigwa kuba abacurezi; obwe rero tibashemerire kukoresa embuga z’okuganiriraho omuri ogo muringo.—Shoma omuri 1 Petero 3:8.

15. Ni bata oku Bibuli eri kutuma twayerinda kwetungura?

¹⁵ Ku orabe ori kukoresa embuga z’okuganiriraho, oshemerire kwebuza ngu: ‘Mbehi ebigambo, ebishushani, ninga za vidiyo ebi ndi kutaho nibituma bareba ku ari emizano? Mbehi nibituma abandi bagira ihari?’  Bibuli negira ngu: ‘Byona eby’omu nsi, ebi omubiri gwetenga, n’ebi amisho getenga, n’okwehimbisa ahabw’eby’amagara aga, tibiruga ahari Ishebona, kureka biruga omu nsi egi.’ (1 Yoh 2:16) Bibuli nekoresa ebigambo ‘okwehimbisa ahabw’eby’amagara aga’ eri kugamba aha muntu “ori kwecureza.” Abakristo tibashemerire kwetungura. Nibakuratiza obuhabuzi oburi omuri Bibuli oburi kugira ngu: ‘Turece kwehimbisiza ahari busha, n’obu kwakuba okugwisana kubi, nari okugirirana amahari.’ (Gal 5:26) Obucurezi nibutuma twayerinda omwika gw’ensi g’okwetungura.

16. Ahabw’enki tutashemerire kwetungura?

¹⁶ Tushemerire kwereka omutwarize g’obucurezi, ahabw’okuba abari kwetungura ‘nibetekatekaho okurenza oku bari.’ (Rom 12:3) Abantu abari kwetungura tibari kumarwa. Ebitekateko bya bo n’ebi bari kukora nibibashasha kandi bishasha n’abandi. Ku bari kuba batahindwire emitekatekere ya bo, nibaba empumi omu bitekateko kandi Sitaane naba abine ge. (2 Kor 4:4; 11:3) Konka omucurezi we tari kwetekatekaho kurenza oku ari. Naringaniza omu ku ari kwetekatekaho kandi areba ku abandi bari kumukira. (Fil 2:3) Nambwenu namanya ku ‘Ruhanga ari kurwanisa ab’amaryo, konka abacurezi abaha omugisha.’ (1 Pet 5:5) Abatari kwetekatekaho kurenza oku bari tibari kwenda kwetanisa na Yehova.

17. Ni enki eki tushemerire kukora ngu tugume turi abacurezi?

¹⁷ Kugira ngu tugume turi abacurezi tushemerire kukuratiza obuhabuzi oburi omuri Bibuli oburi kugira ngu: ‘Mujure omuntu owa ira n’emitwarize yeye, mujware omuntu omusya.’ Konka eco nikishaba kutaho amani. Tushemerire kwega kandi tukatoreza ecokureberaho ca Yesu oku biri kubasika kona. (Kol 3:9, 10; 1 Pet 2:21) Ku turakikore tusyoya nitwija kutunga emigisha myingi. Ku turayereke obucurezi nikituma ab’omu ka bashemererwa, tutume omu kibina habamu obumwe, kandi nikituma twamanya oku tushemerire kukoresa ge embuga z’okuganiriraho. Ekiri kukira byona nitwija kutunga emigisha eri kuruga ahari Yehova.