Omuri oru runyiriri nitushoma ngu: ‘Ku orireba omu ishaza aboro nibahatwa, emanja zabo nizitwa, kandi nibakwa n’amani ebi bashemerire, otaritangara; ahakuba orikukiza abakuru obukuru aryaba nabireba; kandi hariho orikubakirira kimwe.’​—Mub 5:8.

Twareba nk’oku abantu bari kureba, nitureba oru runyiriri ruri kugamba aha bantu abine obushoborozi omu butegeki. Konka twakizaho kurutekatekaho, nitumanya amazima agari kukwata ahari Yehova kandi kitugumya.

Omu Mubuurizi 5:8 nihagamba aha mutegeki ori kutwariza kubi aboro kandi akacwa kubi emanja zabo. Ogo mutegeki naba ashemerire kumanya ku hine ondijo mutegeki ori kumukiza obushoborozi ori kumureba. Kandi, nihabasa kuba hariho abandi abari kumukiza obushoborozi. Ekiri kushasha, omu butegeki bw’abantu, noshanga abategeki bona bari kurya za bituga kandi oshanga abantu bona bari kubugana ekizibu c’okutegekwa kubi.

N’obu hakuba hatariho amasiko gona, nituhumurizibwa twamanya ku Yehova ari kureba ebi abo bategeki b’abantu bari kukora. Nitubasa kushaba Yehova obuyambi kandi tumwegekerere emitwaro yitu. (Zab 55:22; Fil 4:6, 7) Nitumanya ku ‘amisho ga [Yehova] giruka oku n’oku nigabuga ensi yona, okweyoreka ku ari ow’amani kuhwera abine emitima [mirungi] ahari we.’​—2 Bus 16:9.

Obwe rero, omu Mubuurizi 5:8 nihatwijusya ku omu nsi harimu abategeki b’abantu kandi ku burijo hariho omutegeki ori kubakira. Ekirungi kukiraho, oru runyiriri nirutwijusya ku Yehova ari we Omutegeki mukuru ori kubakira bona. Hati nategeka birabire aha Mwana weye, Yesu Kristo, Omugabe w’Obukama bwa Ruhanga. Owobushoborozibwona, ori kureba ebintu byona n’abantu bona ni Omutegeki murungi kandi n’Omwana weye ni ko okwe.