1. Ni ryari obu kiri kuguma kuhereza Yehova?

NI RYARI obu kiri kuguma kuhereza Yehova? Mbehi ni obwire obu ori kuba oyine ebizibu, ninga ni obwire bw’obusinge? Ku turi kubugana ebizibu nicoroba kwesiga Yehova. Konka shi omu bwire bw’obusinge nitukora ki? Mbehi nikitugumira kuhereza Yehova? Yehova akarabura Abaisraeli aha bikwatirine n’ezo mbera.—Bir 6:10-12.

2. Ni kiha cokureberaho eki Omugabe Asa yatuterireho

² Omugabe Asa ni ecokureberaho kirungi omu kukoresa obwenge ari kwesiga Yehova omu bwijwire. Akahereza Yehova hatari omu bwire bubi kusha ahobwe n’omu bwire bw’obusinge. Kwiha kare, ‘omutima gwa Asa gukaguma guri ogw’amazima ahari [Yehova] ebiro bye byona.’ (1 Bag 15:14) Asa akereka ku nakunda Yehova n’omutima gweye gona ari kwiha okuramya kw’ekishuba omuri Yuda. Bibuli negira ngu: ‘Akihaho amatambiro g’enduga-mahanga n’emyanya mikuru y’okuramizamu, yashenya enyomyo z’amabare, yatema Ashera.’ (2 Bus 14:3, 5) Kandi yabinga na nyinenkuru Maaka, yaamwiha ahabwa nyinomugabe. Ahabw’enki? Ahakuba akaba nahiga abantu kuramya ebishushani.—1 Bag 15:11-13.

3. Ni enki eki twaza kushwijuma omuri eki kicweka?

³ Asa akakora ekirengire aha kwihaho okuramya kw’ekishuba. Akahiga abantu b’omu bugabe bwa Yuda kugaruka kuramya Yehova. Yehova akaha Asa n’Abaisraeli omugisha g’okubaho omu businge. * Omu myaka 10 y’obugabe bwa Asa, ‘Yuda ekaba eyine obusinge.’ (2 Bus 14:1, 4, 6) Omuri eki kicweka, twaza kushwijuma oku Asa yakoresize ge obwo bwire  bw’obusinge. Nambwenu nitwija kushwijuma ebyokureberaho by’Abakristo b’omu kinyigana c’okubanza abakoresize ge obwire bw’obusinge nka Asa. Nitwija kuhendera turi kugarukamu eki kibuzo: Yaba ori omu ihanga ahu oyine obugabe bw’okuramya Yehova, ni bata oku ori kubasa kwereka obwenge omu kukoresa ge obwo bwire bw’obusinge?

4. Tukuratize ebiri omu 2 Busingye 14:2, 6, 7, ni bata oku Asa yakoresize ge obwire bw’obusinge?

⁴ Shoma omu 2 Busingye 14:2, 6, 7. Asa akagambira abantu ku Yehova ari we yabahire ‘obusinge embaju zona.’ Asa taratekatekire ku obwo bwire bw’obusinge bwabire buri obwire bw’okuhumura. Ahobwe, akatandika kombeka endembo, ebisika, eminara, n’amarembo. Akagambira abantu ba Yuda ati: ‘Ensi ekiri eyitu.’ Asa akaba ari kwenda kumanyisa ki? Akaba ari kumanyisa ku hatariho omwangi w’okubazibira kugaruka omu ihanga n’okuryombeka. Akabahiga kukoresa ge obwo bwire bw’obusinge.

5. Ahabw’enki Asa yatebekanisize amahe geye?

⁵ Nambwenu Asa akakoresa ge obwire bw’obusinge omu kugumya amahe geye. (2 Bus 14:8) Mbehi eco nikimanyisa ku yabire atari kwesiga Yehova? Ingaha mazima. Asa akaba namanya ku guri omurimo gweye nk’omugabe kutebekanisa abantu kwija kwehanganira ebizibu omu biro by’omu misho. Akaba namanya ku obwire bw’obusinge bwabire butarigumaho omuri Yuda, kandi ni ko cabire.

6. Ni bata oku Abakristo b’omu kinyigana c’okubanza bakoresize obwire bw’obusinge?

⁶ N’obu Abakristo b’omu kinyigana c’okubanza bahiganisibwe, nambwenu bakashemerererwa obwire bw’obusinge. Ni bata  oku bakoresize ogo mugisha? Abo bashija n’abakazi abari kwesigwa bakaburira obutumwa burungi n’amani. Enkuru eri omu Byakozirwe negira ngu: ‘Bakakanya omu kugendera omu kutina [Yehova].’ Bakagumizamu kuburira obutumwa burungi, kandi ecarugiremu, ‘abantu bakeyongera kukanya.’ Mazima Yehova akabaha omugisha ahabw’amani agu batire omu murimo g’okuburira omu bwire bw’obusinge.—Byak 9:26-31.

7-8. Ni enki eki Paulo n’abandi babire bari kukora ku babire nibatunga omugisha? Shoborora.

⁷ Abakristo b’omu kinyigana c’okubanza bakaba nibakoresa omugisha gona ogu babire nibabona omu kujanjaza obutumwa burungi. Ecokureberaho; obu Paulo yabire ari omuri Efeso akamanya ku orwigi ruhango rwamwigurirwe, akakoresa ogo mugisha omu kuburira n’okuhindura abantu abegi omuri eyo tawuni.—1 Kor 16:8, 9.

⁸ Nambwenu Paulo n’abandi Bakristo bakatunga omugisha g’okuburira abantu bingi omu gwa 49 B.Y, obu entumwa n’abakuru omuri Yerusaalemu bakozire ensharamu y‘eby’okusharwa. (Byak 15:23-29) Ku baherize kujanjaza eyo nsharamu omu bibina, abegi bakakora n’amani ‘nibaburira Ekigambo ca Ruhanga.’ (Byak 15:30-35) Ni enki ecarugiremu? Bibuli negira ngu: ‘[Ebibina] bikagumibwa omu kwikiriza, abantu bayeyongera kukanya obutosha.’—Byak 16:4, 5.

9. Ni ziha mbera eziri omu mahanga mingi omuri obu bwire, kandi nikituma twayebuza kiha kibuzo?

⁹ Omuri obu bwire omu mahanga mingi, nitubasa kuburira omu businge. Mbehi ori omu ihanga eriri kukuha obugabe bw’okuramya? Caba kiri kisyoya, yebuze ngu: ‘Mbehi ninkoresa nta obu bugabe?’ Ebiro by’emperu nibishemeza aha Bahamya ba Yehova, ahakuba nibaba bahugire omu murimo g’okuburira, n’okwegesa kukira kare hona. (Mak 13:10) Hariho ebintu byingi ebi turi kubasa kukora omu murimo g’okuburira!

10. Omuri 2 Timoseo 4:2 nihatuhiga kukora ki?

¹⁰ Ni bata oku ori kubasa kukoresa ge obwire bw’obusinge? (Shoma omuri 2 Timoseo 4:2.) Mbehi iwe n’abanyabuzare bawe timuri kubasa kushwijuma embera zanyu mukareba yaba muri kubasa kongera aha murimo g’okuburira, muri kuhereza muri abapayoniya? Obu tobwire bw’okuronda eby’obugiga ahakuba tiburituma twahonoka okubonabona kwingi.—Enf 11:4; Mat 6:31-33; 1 Yoh 2:15-17.

11. Ni enki eki abamwe bakozire kugira ngu babase kuhisya obutumwa burungi aha bantu bingi oku biri kubasika?

¹¹ Ababurizi bingi bakega orurimi rusya kugira ngu barukorese omu murimo g’okuburira n’okwegesa. Ekitongore ca Yehova nikibashagika kiri kubarondera ebikoreso ebiri kubakwasa kuburira omu ndimi nyingi. Ecokureberaho; omu mwaka gwa 2010, ebitabo byitu bikaba nibirebeka omu ndimi nka 500 kusha, konka omuri obu bwire nibirebeka omu ndimi eziri kurenga 1,000!

12. Ni bata oku abantu bari kugasirwa bahurira obutumwa bw’Obukama omu rurimi rwabo? Gamba ecokureberaho.

¹² Ni bata oku abantu bari kwehurira ku bari kuhurira Ekigambo ca Ruhanga omu rurimi rwabo? Tekateka aha cahikire ahari munyanyazi owagasirwe omu kiterane ecaberire omuri Memphis, Tennessee, omuri Amerika. Eco kiterane kikaba kiri omu Runyarwanda, orurimi oruri kugambwa omuri Rwanda, Kongo (Kinshasa), na Uganda. Bwanyima y’ekiterane, omunyanyazi ori kugamba Orunyarwanda akagamba ngu: “Omu myaka 17 eyi namara nfurukire omuri Amerika, ogu nigo murundi g’okubanza kushoborocerwa  puroguramu yona y’eby’omwika.” Mazima, ogu munyanyazi kuhurira puroguramu omu rurimi rweye rwa buzarwa kikamuhika aha mutima. Mbehi yaba embera ezi orimu ziri kukwikiriza, tori kubasa kwega orundi rurimi kugira ngu okwase abandi omuri teritori yawe? Ni kikuru ahakuba omuri teritori yawe nihabasa kuba harimu abantu abari kugamba orundi rurimi. Okutaho amani kwawe kuryatuma wagira okushemererwa kwingi.

13. Ni bata oku benetata b’omuri Burusiya bakoresize ge obwire bw’obusinge?

¹³ Tiko benetata bona bari kuburira omu businge. Omu mahanga gamwe, benetata tibikirizibwe kuburira ahakuba za gavumenti zikemereza omurimo gwitu. Ecokureberaho; tekateka ahari benetata b’omuri Burusiya. Bakamara emyaka myingi bari kuhiganisibwa, konka omu Kwakashatu 1991, gavumenti ekabaha obugabe bw’okuramya. Omuri obwo bwire, omuri Burusiya hakaba hariyo ababurizi b’Obukama abari kuhika ahari 16,000. Bwanyima y’emyaka makumi abiri, ogo mubaro gukeyongera gwarenga aha baburizi 160,000! Mazima, benetata bakakoresa ge omugisha ogu babire bine g’okuburira omu businge. Obwo bwire bw’obusinge tiburagumireho. Konka n’obu embera ziri kuhinduka omuri eryo ihanga, nibagumizamu kutamu amani omu murimo. Nibagumizamu kukora ekiri kubasika cona ngu bahereze Yehova.

14-15. Ni bata oku Yehova yakoresize amani geye omu kukwasa Asa?

¹⁴ Omu bwire bwa Asa, obwire bw’obusinge bukahika aha muheru. Amahe mingi agari kurenga ahari miliyoni gakabatahirira garugire omuri Esiyopiya. Omukuru wabo ori kwetwa Zeera, hamwe n’amahe geye bakaba bine obwisige bw’okusingura Yuda. Konka, Omugabe Asa tarayesigire obwingi bwabo, ahobwe akaguma  ayesigire Yehova Ruhanga weye. Asa akashaba ngu: ‘[Yehova] Ruhanga witu, otuhe emikono, ahabw’okuba ni we turikwesiga, kandi omu izina ryawe twizire kurwanisa omutwe ogu muhango munonga ogw’engabo.’—2 Bus 14:11.

¹⁵ Amahe g’Abanyesiyopiya gakaba gari kukira aga Asa emirundi nk’ibiri , konka Asa akaguma kwesiga ku Yehova ayine amani kandi ku ayetegwire kurwanirira abahereza beye. Kandi Yehova taramushwarize; amahe g’Abanyesiyopiya gakasingurwa.—2 Bus 14:8-13.

16. Nitumanya tuta ku obwire bw’obusinge butarigumaho?

¹⁶ N’obu tutari kumanya ekirihika ahari buri omwe omu biro by’omu misho, nitumanya ku obwire bw’obusinge obu abahereza ba Yehova bari kutunga buri obw’akire kake. Yijuka ku Yesu yagambire ku omu bwire bw’emperu, abegi beye babire ‘bariyangwa amahanga gona.’ (Mat 24:9) N’entumwa Paulo akagamba ku ‘abamaririre kumara ebiro by’amagara gabo byona omuri Yesu nibatina Ruhanga baryahigwa.’ (2 Tim 3:12) Sitaane ayine “ekiniga kingi,” kandi kuhunga engaruka z’ekiniga ceye tikiri kubasika.—Kush 12:12.

17. Ni bata oku okwikiriza kwitu kuri kubasa kugezibwa

¹⁷ Juba aha, twena turyabugana ebiri kugeza okwikiriza kwitu. Omu nsi ‘haryabaho okubonabona kwingi okutakabagaho okwiha aha kuhangwa kw’ensi okuhisya hati.’ (Mat 24:21) Omuri obwo bwire, abanyabuzare bitu baryatuhiganisa kandi omurimo gwitu guryayemerezibwa. (Mat 10:35, 36) Mbehi buri omwe omuri itwe aryabasa kugumizamu kwesiga obuyambi n’oburinzi bwa Yehova, nka Asa?

18. Tukuratize ebiri omu Baheburaayo 10:38, 39, ni enki ekiritukwasa kwetebekanisiza omuheru g’obusinge?

¹⁸ Yehova ariyo natutebekanisa kugira ngu okwikiriza kwitu kukizeho kuhama. Nayebembera ‘omwambari w’omwesigwa kandi w’omunyabwenge,’ kugira ngu atutegurire ebyokurya by’omwika “omu bunaku obuhikire” kugira ngu tugume tuhamire. (Mat 24:45) Konka twena tushemerire kukora nk’oku turi kubasa kugira ngu tugumye okwikiriza kwitu.—Shoma omu Baheburaayo 10:38, 39.

19-20. Twashoma omu 1 Busingye 28:9, ni biha bibuzo ebi tushemerire kwebuza, kandi ahabw’enki tushemerire kubyebuza?

 ¹⁹ Nk’oku Omugabe Asa yakikozire, tushemerire “kusherura [Yehova].” (2 Bus 14:4; 15:1, 2) Nitutandika kuronda Yehova turi kumumanya kandi tukabatizibwa. Nitukora eki turi kubasa cona kugira ngu tugumye rukundo yitu na Yehova. Kugira ngu tweshwijume, tushemerire kwebuza ngu: ‘Mbehi burijo ninyekwatanisa omu nterane?’ Ku turi kuza omu nterane z’Abahamya ba Yehova, nitutunga okuhumurizibwa omu by’omwika turi hamwe na benetata abari kutukunda. (Mat 11:28) Nambwenu tushemerire kwebuza ngu: ‘Mbehi burijo ninyeyegesa Bibuli?’ Waba ori kutura n’ab’eka yawe, mbehi nogira okuramya kw’eka buri sande? Ninga shi waba ori wenka, noyeyegesa nk’oku wakubikora ori n’ab’omu ka? Mbehi noyekwatanisa omu murimo g’okuburira n’okuhindura abantu abegi oku ori kubasa kona?

²⁰ Ahabw’enki tushemerire kwebuza ebyo bibuzo? Bibuli netugambira ku Yehova ari kushwijuma emitekatekere yitu n’ebiri omu mitima yitu, obwe rero n’itwe tushemerire kweshwijuma. (Shoma omu 1 Busingye 28:9.) Twaba turi kwenda kukora empinduka aha bigendererwa byitu, ninga shi aha mitekatekere yitu, tushemerire kushaba Yehova obuyambi. Obu nibwo bwire bw’okwetebekanisiza okugezibwa okuri omu misho. Nyabura we, otayikiriza ekintu cona kukuremesa kukoresa ge obwire bw’obusinge!