1. Ni kuha kweta oku Yesu yeyesire abarobi bana, kandi bakakora ki?

ABEGI ba Yesu ari bo Petero, Andrea, Yakobo na Yohaana bakaba nibakora omurimo g’okuroba ebyenyanja. Tekateka oku bahurire batangara munonga obu bahurire Yesu ari kubeta ngu: ‘Mwije munkuratire, nanye ndyabagira abajubi b’abantu.’ * Abo bashija bakakora ki? Bibuli negira ngu: ‘Ahonaho basigaho obutimba bwabo, bamukuratira.’ (Mat 4:18-22) Eyo nsharamu eyi bakozire ekahindura amagara gabo ebiro byona. Omu mwanya g’okuroba ebyenyanja, bakaba baza kuguma bari ‘[kuroba] abantu.’ (Luk 5:10) Omuri obu bwire, Yesu nayeta abantu b’abacurezi abari kukunda amazima ngu bakore omurimo nk’ogo. (Mat 28:19, 20) Mbehi okikiriza okweta kwa Yesu kugira ngu obe omurobi w’abantu?

2. Ahabw’enki tushemerire kuha omuhendo ensharamu y’okuba abarobi b’abantu kandi shi ni enki ekiri kubasa kutukwasa kuyihikaho?

² Nobasa kuba watandikire kwega Bibuli, wakora n’empindahinduka omu kubaho kwawe, nkonka hati noyenda kuba omuburizi w’obutumwa burungi. N’obu ori kubasa kureba ku wacererirwe kwakira okweta kwa Yesu, otahwa amani. Nobasa kuba wacererirwe ahabw’okumanya ku eyo nsharamu eri ey’omuhendo munonga. Ni amazima, Bibuli negamba ku Petero na bagenzi beye basigire obutimba bwabo. Konka, Petero na mwen’ishe tibarahikire bari kukora ensharamu batabandize kukitekatekaho. Hakaba hahwire emyezi nka mukaga bamanyire kandi bikirize ku Yesu ari Mesia. (Yoh 1:35-42) Ni co kimwe n’iwe okega ebiri kukwata ahari Yehova na Yesu kandi noyenda kugumizamu  kukura omu by’omwika. Konka tori kubasa kukora eyo nsharamu otabandize kukitekatekaho oyetonzire. Ni enki ecakwasize Petero, Andrea, n’abandi kukora eyo nsharamu?

3. Ni eha mitwarize eri kutuma wagumya ecetengo cawe c’okwikiriza okwetwa kwa Yesu?

³ Abegi ba Yesu b’okubanza bakaba bari kumanya kukora ge emirimo yabo, bine obumanzi kandi bari kweferereza. Hatariho okubanganisa eyo mitwarize ekabakwasa kukunda omurimo g’okuroba abantu. Eki kicweka caza kukukwasa kukizaho kwereka eyo mitwarize kugira ngu okizeho kuba omwegi murungi wa Kristo.

4. Ni enki ecahigire Petero kuba omurobi w’abantu?

⁴ N’obu Petero yabire naroba kugira ngu ayambe ab’omu ka yeye, akaba nakunda ogo murimo gweye. (Yoh 21:3, 9-15) Nambwenu akashemerererwa kuroba abantu. Kandi ahabw’obuyambi bwa Yehova, Petero akakora ge ogo murimo.—Byak 2:14, 41.

5. Tukuratize ebiri omuri Luka 5:8-11, ahabw’enki Petero yatinire, kandi shi ni enki ekiri kutukwasa kusingura embera nk’ezi yabire arimu?

⁵ Nituburira ahabw’okuba nitukunda Yehova; eyo niyo nshonga nkuru eri kutuma twakora ogo murimo. Rukundo eyi turi kukunda Yehova netuma twagambira abandi ebiri kumukwataho na twakuba turi kuhurira tutine amani. Obu Yesu yayesire Petero ngu abe omurobi w’abantu akamugambira ngu: ‘Otatina.’ (Shoma omuri Luka 5:8-11.) Petero taratinire ebyabire birije kumuhikaho yahinduka omwegi wa Yesu. Ahobwe akatangara ahabw’ebyenyanja ebi Yesu yabire yatuma baroba rero yahurira atashemerire kukora na Yesu. Nka Petero, nobasa kuhurira  otinire watekateka aha bi oshemerire kukora ngu obe omwegi wa Kristo. Caba kiri kisyoya kizaho kukunda Yehova, Yesu, n’abatahi bawe kandi eco kiryakuhiga kwikiriza okweta kwa Yesu ngu obe omurobi w’abantu.—Mat 22:37, 39; Yoh 14:15.

6. Ni ziha nshonga ezindi eziri kutuma twaza kuburira?

⁶ Yetegereze ezindi nshonga eziri kutuma twaza kuburira. Nitwenda korobera ekiragiro ca Yesu ekiri kugira ngu: ‘Mugende muhindure abantu abegi.’ (Mat 28:19, 20) Nambwenu nituburira ahabw’okuba abantu ‘baburaburirwe kandi bashobirwe’ kandi bine iriho ry’okwega amazima g’Obukama. (Mat 9:36) Yehova nayenda ngu abantu b’emiringo yona bamanyire kimwe amazima kandi bahonoke.—1 Tim 2:4.

7. Ni bata oku omu Barooma 10:13-15 hari kutwereka ku okuburira guri omurimo g’omugasho munonga?

⁷ Twagumizamu kutekateka aha ku omurimo g’okuburira guri kurokora abantu nikija kutuma twakunda kugukora. Tituri nk’omurobi ori kuroba ebyenyanja kugira ngu abiguze ninga shi ngu abirye, ahobwe itwe nituroba abantu kugira ngu bahonoke.—Shoma omu Barooma 10:13-15; 1 Tim 4:16.

8-9. Ni enki eki omurobi ashemerire kumanya kandi ahabw’enki?

⁸ Omu bwire bwa Yesu Omuisraeli akaba namanya emiringo y’ebyenyanja ebi yabire ashemerire kuroba. (Lev 11:9-12) Bakaba bari n’okumanya ahantu ahu ebyenyanja biri kuba biri. Ebyenyanja nibikira kuba omu mwanya ogu biri kubasa kubonamu ebyokurya. Mbehi kumanya ebyo kikaba kitari kuyamba omurobi kumanya obwire burungi bw’okuroba? Aha bikwatirine n’obwire burungi bw’okukwata ebyenyanja, yetegereze ebi Omuhamya w’aha kirwa ca Pasifika yagambire obu yashabire omumishonari ngu bagende hamwe kuroba. Omumishonari akamugambira ngu: “Nitwija kubugana shaha ishatu z’omu kasheshe.” Mwenetata akamugarukamu ngu: “Tori kukimanya ku tushemerire kugenda omu bwire burungi bw’okukwata ebyenyanja butari obwire burungi ahari itwe?”

⁹ Ni co kimwe, abarobi b’abantu b’omu kinyigana c’okubanza bakaba nibaza omu mwanya ogu abantu babire bari kuturamu kandi omu bwire burungi obu bari kuba bariyo. Ecokureberaho: Abakurasi ba Yesu bakaba nibaburira omuri hekalu, omuri sinagogi, aha nju n’enju, n’omu butare. (Byak 5:42; 17:17; 18:4) N’itwe tushemerire kumanya obwire burungi obu abantu b’omuri teritori yitu bari kuba bari omu maka gabo. Tushemerire kuba twetegwire kuhindura entebekanisa zitu kugira ngu tubase kuburira.—1 Kor 9:19-23.

10. Ni biha bikoreso ebi Ekitongore ca Yehova catuhire?

¹⁰ Omurobi ashemerire kuba ayine ebikoreso kandi ari kumanya kubikoresa ge. N’itwe tushemerire kuba twine ebikoreso ebiri kumara kugira ngu tukore omurimo gw’itu g’okuburira. Kandi tushemerire kuba turi kumanya kubikoresa. Yesu akaha abegi beye obuhabuzi oburi kwetegerezibwa aha bikwatirine n’okuroba abantu. Akabagambira eki babire bashemerire kutwara, ahu babire baraburire, n’ebi babire baragambe. (Mat 10:5-7; Luk 10:1-11) Omuri obu bwire Ekitongore ca Yehova kikataho akashanduku akarimu ebikoreso by’okwegesezamu ebiri kutukwasa kukora ge ogo murimo. * Kandi nitwegesibwa oku turi kubasa kubikoresa. Obwo bumanyi nibutukwasa kweyesiga kandi tugira obumanyi  obu turi kwetenga twaba turi omu murimo g’okuburira.—2 Tim 2:15.

11. Ahabw’enki abarobi b’abantu bashemerire kugira obumanzi?

¹¹ Abarobi b’ebyenyanja nibaba bashemerire kugira obumanzi. Obumwe nibaba bine kwehanganira embera ezitorobi z’aha nyanja. Nibabasa kukora nyekiro omu mwirima nangwa n’omubwire obu enyanja eri kuba erimu emirabanamu. Abarobi b’abantu na bo bashemerire kugira obumanzi. Twatandika kuburira turi kweyanjura ku turi Abahamya ba Yehova, nitubasa kubugana emirabanamu kuruga aha banyabuzare bitu, abanywani bitu n’aha bandi bantu abari kwanga obutumwa obu turi kuburira. Konka eco tikiri kututangaza. Yesu akarabura abakurasi beye ku bariburira abantu abatari kubakunda.—Mat 10:16.

12. Kurugirira aha biri omuri Yoshua 1:7-9, ni enki ekiri kutukwasa kuguma twine obumanzi?

¹² Ni bata oku ori kubasa kuguma oyine obumanzi? Ec’okubanza, hamiza kimwe ku Yesu agumizemu kwebembera omurimo g’okuburira ari omu iguru. (Yoh 16:33; Kush 14:14-16) Eca kabiri, guma oyesige ku Yehova ari kukufaho. (Mat 6:32-34) Oku okwikiriza kwawe kurakizeho kuhama ni ko orakizeho kugira obumanzi. Petero na bagenzi beye bakereka ku bine okwikiriza kugumire bari kusigaho omurimo gwabo g’okuroba bakakuratira Yesu. Ni co kimwe, okereka ku oyine okwikiriza kugumire ori kugambira abanywani bawe  n’abanyabuzare bawe ku waza kwega Bibuli n’Abahamya ba Yehova kandi ku waza kutandika kwekwatanisa na bo omu nterane zabo! Hatariho okubanganisa okakora empindahinduka omu kubaho kwawe kugira ngu obeho ori kugendera aha misinge ya Yehova ehikirire. Eco na co nikishaba okwikiriza n’obumanzi. Ku oragumizemu kugira obumanzi noyija kwesiga ku ‘[Yehova] Ruhanga wawe aryaguma n’iwe eyi oriza hona.’—Shoma omuri Yoshua 1:7-9.

13. Ni bata oku kutekateka hamwe n’eshara biri kutuma twaguma twine obumanzi?

¹³ Nambwenu ni enki eki ori kubasa kukora ngu okizeho kugira obumanzi? Shaba Yehova akuhe obumanzi. (Byak 4:29, 31) Yehova nayija kugarukamu eshara zawe kandi tari kusigaho. Burijo natura ayetegwire kukushagika. Nambwenu, nobasa kutekateka oku Yehova yakwasize abahereza beye omu bwire bwa kare. Guma otekateke oku yakukwasize kwehanganira embera ezigumire n’oku yakuhire amani g’okuhinduka okareka emitwarize ya kare. Nk’oku yakwasize abantu beye aha nyanja eri kutukura n’iwe nabasa kukukwasa kuba omwegi wa Kristo. (Kur 14:13) Nobasa kugira okwikiriza kugumire nk’oku omuhandiki wa Zaaburi yagambire ngu: ‘[Yehova] ari aha rubaju rwange, tinditina; omuntu nabasa kungira ata?’—Zab 118:6.

14. Ni enki eki ori kwegera aha byabire ahari Masae na Tomoyo?

¹⁴ Obundi buryo oburi kutukwasa kuguma twine obumanzi ni okushwijuma oku Yehova yakwasize abahereza beye ababire bari kukira kugira enshoni hati bakaba bine obumanzi. Yetegereze ecokureberaho ca munyanyazi ori kwetwa Masae. Akaba nakira kugira enshoni kandi ahurira atari kubasa kuburira omu misho g’abantu bingi. Akaba natekateka ku kuganira n’abantu abu atari kumanya kigumire munonga kiri nk’okutemba ekisika kiringwa kandi akaba nahurira eco atari kukibasa. Obwe rero akataho amani kugira ngu ayongere ahari rukundo eyi ari kukunda Yehova n’abatahi. Akatekateka ayetonzire aha ku okukora omurimo g’okuburira kiri kwetengesa hati kandi yashaba Yehova ngu amukwase kuhikiriza ecetengo ceye. Akasingura obwoba rero yahereza nk’omupayoniya w’obwire bwona. Nambwenu Yehova nakwasa ababurizi abacari basya kugira obumanzi. Tekateka aha byahikire ahari munyanyazi ori kwetwa Tomoyo. Ku yatandikire kuburira aha nju n’enju nyineka owu babugine aha murundi g’okubanza akayomba ari kugamba ngu: “Tindi kwenda kugamba n’Abayehova!” rero yahika ari kutaho orwigi. Tomoyo akagambira owu babire bari hamwe ayine obumanzi ngu: “Wamuhurira? Naba ntashemerire kugira eki nagamba kandi akamanya ku ndi Omuhamya wa Yehova. Hati nyine okushemererwa!” Hati Tomoyo nahereza nk’Omupayoniya w’obwire bwona.

15. Okweferereza nikimanyisa ki, kandi shi ahabw’enki kiri kwetengesa aha Bakristo?

¹⁵ Omurobi w’abantu kugira ngu agire eki yahikaho naba ashemerire kweferereza. Okweferereza nikimanyisa obushoborozi oburi kutuma wakora ekintu eki oshemerire kukora. Omurobi w’ebyenyanja naba ashemerire kweferereza ayimuka kare aguma aha nyanja kuhisya obu yatunga ebyenyanja kandi ayehanganira embeho y’akasheshe. N’itwe tushemerire kweferereza, twehangana kugira ngu tuhikirize omurimo gwitu.—Mat 10:22.

16. Ni bata oku turi kubasa kukizaho kwereka omucwe g’okweferereza?

¹⁶ Tituri kuzarwa turi kumanya kweferereza. Ekiri kutana n’eco nituzarwa twine obushoborozi bw’okugira eki twakora. Nikishaba omutwarize g’okwerinda kugira ngu tubase kweferereza. Obwe rero, tushemerire kwemanyiza kukora ebintu ebiri kubasa kutugumira.  Yehova natuha obwo buyambi birabire aha mwika gweye oguri kwera.—Gal 5:22, 23.

17. Tukuratize ebiri kugambwa omu 1 Bakorinso 9:25-27, ni bata oku entumwa Paulo ari kushoborora amani agu yatireho kugira ngu ayeferereze?

¹⁷ Entumwa Paulo akaba nayeferereza. Konka akagamba ku yabire ari ‘kutera omubiri gweye’ kugira ngu akore ebihikire. (Shoma omu 1 Bakorinso 9:25-27.) Akashaba abandi kweferereza n’okukora ebintu byona ‘ge kandi bitebekanisibwe’. (1 Kor 14:40) Tushemerire kweferereza kugira ngu tugume tuhamire omu by’omwika otwariremu okukora omurimo g’okuroba.—Byak 2:46.

18. Ni enki ekiri kutuma Yehova yareba ku hine eki twahikireho?

¹⁸ Omurobi w’ebyenyanja yaheza kuroba nabara ebyenyanja ebi yakwata. Konka ekiri kutana n’eco omu murimo g’okuroba abantu tituri kubara abantu abu twaresire omu Kitongore ca Ruhanga. (Luk 8:11-15) Ku turi kuhugira omu murimo g’okuburira n’okwegesa abandi obutumwa burungi, Yehova nareba ku hine eki twahikireho. Ahabw’enki? Ahakuba nitugumizamu kukora ebi Yehova na Yesu bari kukunda.—Mak 13:10; Byak 5:28, 29.

19-20. Ni eha nshonga endijo eri kutuma twakora omurimo g’okuburira?

¹⁹ Omu mahanga agamwe, omurimo g’okuroba nigwikirizibwa omu mezi gamwe na gamwe. Omuri ago mahanga abarobi nibaba bine kukora n’amani kugira ngu barobe ebyenyanja byingi omuri obwo bwire burungi bw’okuroba. Obu turi kukizaho kuhika hihi n’omuheru gw’ensi tushemerire kukora omurimo g’okuburira n’amani! Obwire obusigireho bw’okukora ogu murimo g’okurokora abantu nibugenda buri kucendera. Obwe rero otayeziringa ninga shi ngu ohurire ku oshemerire kutegereza obwire burungi ngu okore ogo murimo g’omugasho.—Mub 11:4.

²⁰ Yeyongere omu kweyegesa Bibuli, ogumizemu kugira obumanzi kandi oyeferereze. Yekwatanise n’abarobi abari kurenga miliyoni munana kandi noyija kushemerererwa emigisha eyi Yehova ari kukuha. (Neh 8:10) Maririra kukoresa obwire bwawe omuri ogu murimo kandi ogumizemu kugukora kuhisya obu Yehova arigamba ngu gwahendera. Omu kicweka ekiri kukurataho turyashwijuma ebintu bishatu ebiri kubasa kutukwasa kugumizamu kukora omurimo g’okuburira.