1-2. Ni bata oku omu Mubuurizi 11:6 hari kubuganisa n’omurimo g’okuburira?

OMU mahanga agamwe, abantu nibahika bari kwenda kwega byingi bahurira obutumwa burungi. Nibaba batunga eki babire bategerize! Omu gandi mahanga, abantu tibari kukunda ebya Ruhanga ninga Bibuli. Omu kacweka kanyu kiri kita? Oku byakuba biri kona Yehova nayenda ngu tukore omurimo gweye kuhisa obu arigira ngu gwahendera.

² Aha bwire obu Yehova yatireho, omurimo g’okuburira guryahika aha muheru rero ‘emperu ehike.’ (Mat 24:14, 36) Butakahikire, ni bata oku turi kubasa korobera ebigambo ebiri kugira ngu: ‘Orece kugwisa omukono’? *—Shoma omu Mubuurizi 11:6.

3. Ni enki eki twaza kushwijuma omuri eki kicweka?

³ Omu kicweka ecabandize eki tukashwijuma ebintu bina ebi tushemerire kukora kugira ngu tukizeho kukunda omurimo g’okuroba abantu. (Mat 4:19) Omuri eki kicweka twaza kushwijuma oburyo bushatu obu turi kubasa kugumyamu ecetengo kitu c’okukora omurimo, n’obu twakuba turi omu bizibu. Nituza kushwijuma enshonga ahabw’enki kiri ec’omugasho (1) kuguma ohugire omu murimo, (2) kwehangana, n’(3) okuguma kugira okwikiriza kuhami.

4. Ahabw’enki tushemerire kuguma tutire omutima aha murimo ogu Yehova yatuhire?

⁴ Yesu akagamba ebyabire biribaho n’embera ezabire zirayereke ebiro by’emperu n’oku byabire birajabirize abakurasi  beye omu kuhikiriza omurimo g’okuburira. Akagambira ebegi beye ngu: ‘Mugume nimureba.’ (Mat 24:42) Omuri obu bwire, nitubugana embera eziri kubasa kutumara amani nk’ezatumire abantu b’omu bwire bwa Noa baremwa kuhurira okurabura kwa Noa. (Mat 24:37-39; 2 Pet 2:5) Niyo nshonga, tushemerire kuguma tutire omutima aha murimo ogu Yehova yatuhire.

5. Ni bata oku ebiri omu Byakozirwe 1:6-8 biri kugamba aha murimo g’okuburira?

⁵ Omuri obu bwire, tushemerire kuhugira omu murimo g’okuburira obutumwa burungi. Yesu akagamba ku abakurasi beye babire baragumize kuburira bwanyima y’okufa kweye kandi bakakora ebiri kukira ebyeye. (Yoh 14:12) Bwanyima y’okufa kwa Yesu, abamwe omu begi beye bakagaruka kuroba ebyenyanja. Yesu ku yamazire kuzoka, akakorera abegi bamwe ecokutangaza c’okukwata ebyenyanja bingi. Akakoresa eco cokutangaza kubahamiza ku omurimo gweye g’okuroba abantu gwabire guri og’omugasho munonga kukiza endijo yona. (Yoh 21:15-17) Yesu atakagarukire omu iguru, akagambira abegi beye ku omurimo g’okuburira ogu yatandikireho gwabire gurakorwe gukarenga ensharo za Israeli. (Shoma omu Byakozirwe 1:6-8.) Emyaka mice enyima, Yesu akereka entumwa Yohaana ebyabire birabeho ah‘izoba rya Mukama.’ * Omu bindi, Yohaana akareba ngu twebembirwe ba marayika, ‘engiri ey’ebiro n’ebiro’ eryaburirwa ‘omu mahanga gona n’enganda zona n’endimi n’abantu.’ (Kush 1:10; 14:6) Omuri obu bwire, Yehova nayenda ngu tukore omurimo g’okuburira obutumwa burungi kuhisya obu arigamba ngu gwahendera.

6. Ni bata oku turi kubasa kuhugira omu murimo g’okuburira?

⁶ Nitubasa kuta omutima aha murimo g’okuburira twafa aha bi Yehova ari kukora  kugira ngu atuyambe. Ecokureberaho; natutebekanisiza ebyokurya by’omwika kurabira omu bitabo ebihandikire, ahari intaneti, ebikwasirwe amaraka na za vidiyo, n’ebiganiro by’ahari Tivi yitu. Tekateka ahari eki: Aha rubuga rwitu, nitubishangaho omu ndimi eziri kurenga 1,000! (Mat 24:45-47) Abantu omu nsi nibebaganisamu ahakuba nibashagika eby’obutegeki kandi nibejumba omu madini konka abahereza ba Ruhanga abari kurenga miliyoni munana bine obumwe. Ecokureberaho; aha Rwakatano, ebiro 19 Okwakana, 2019, Abahamya omu nsi yona kurabira ahari vidiyo bakabuganira hamwe aha cahandikirwe ca burizoba. Ogo mwebazo, omutwe gw’abantu 20,919,041 bakabuganira hamwe omu Kijusyo c’Okufa kwa Yesu. Nitwenda kuhugira omu murimo g’okuburira turi kutekateka aha bintu birungi ebiri kubaho n’aha mugisha ogu twine g’okubyekwatanisamu.

7. Ni bata oku ecokureberaho ca Yesu kiri kutukwasa kuguma tuhamire?

⁷ Ogundi muringo ogu turi kubasa kuhugira omu murimo g’okuburira ni okukuratiza ecokureberaho ca Yesu. Tarikirize ekintu cona kumuzibira kukora omurimo g’okuburira. (Yoh 18:37) Tarahwire amani obu Sitaane yamugerize ari kumwereka ‘obugabe bwona bw’omu nsi n’ekitinisa cabwo’; nangwa n’omu bwire obu babire bari kwenda kumugira omugabe. (Mat 4:8, 9; Yoh 6:15) Tarikirize ecetengo c’okwenda kuba omugiga; ninga ngu abahakani batume yahwa amani. (Luk 9:58; Yoh 8:59) Okwikiriza kwitu kwagezibwa, nitubasa kuguma tuhamire twaba turi kwijuka obuhabuzi bw’entumwa Paulo. Akahiga Abakristo kukuratiza ecokureberaho ca Yesu, obwe rero tibashemerire ‘kuruha n’okugwa enshazi omu mitima’!—Heb 12:3.

8. Okwehangana ni enki kandi shi ahabw’enki turi kukwetenga omuri obu bwire?

⁸ Okwehangana ni obushoborozi bw’okutegereza ku ebintu bihinduka. Twaba turi omu mbera zigumire, ninga shi tutegerize okuhikirira kw’ecetengo kitu, nituba tushemerire kwehangana. Omuhanuzi Habakuuki akamara obwire buringwa ategerize omuheru gw’embera mbi omuri Buyudaaya. (Hab 1:2) Abegi ba Yesu bakaba bari kwesiga ku Obukama ‘burirebeka’ bukabiha omu buhuku bwa Rooma. (Luk 19:11) Tutegerize obwire obu Obukama bwa Ruhanga buritwihiraho obubi kandi bukatwebembera omu nsi ensya ehikirire. (2 Pet 3:13) Konka, tushemerire kwehangana tukategereza obwire obuhikire obu Yehova yatireho. Twaza kureba emiringo etari emwe eyi Yehova ari kutwegesamu kwehangana.

9. Ni biha byokureberaho ebiri kwereka ku Yehova ari kwehangana?

⁹ Yehova akatuteraho ecokureberaho kirungi c’okwehangana. Akaha Noa obwire oburi kumara bw’okombeka emeri n’obw’okuburira nk’omuburizi w’okuhikirira. (2 Pet 2:5; 1 Pet 3:20) Yehova akahurikiza obu Abrahamu yabire ari kumubuza aha bikwatirine n’okucwecereza abantu babi b’omu ndembo za Sodoma na Gomora. (Kut 18:20-33) Hakahwa ebinyigana byingi, Yehova ayehanganire ihanga rya Israeli eryabire ritari kwikiriza. (Neh 9:30, 31) Omuri obu bwire nitureba ebihamya ebiri kwereka ku Yehova ari kwehangana ari kwikiriza ngu hahwe obwire bona ‘bahice aha kwetisa.’ (2 Pet 3:9; Yoh 6:44; 1 Tim 2:3, 4) Ecokureberaho ca Yehova nikituha enshonga ndungi y’okutuma twayehangana tugumizamu kuburira n’okwegesa. Nambwenu natwegesa kwehangana kurabira aha byokureberaho by’omuri Bibuli.

10. Nk’oku biri omuri Yakobo 5:7, 8, ni enki eki turi kwegera aha cokureberaho c’omuhingi?

 ¹⁰ Shoma omuri Yakobo 5:7, 8. Ecokureberaho c’omuhingi nikitwegesa oku turi kubasa kwehangana. Ni amazima, embibo zimwe nizikura juba. Konka, embibo nyingi, na munonga nk’ebiti by’ebijuma, nibitwara emyaka myingi kugira ngu bikure. Omuri Israeli obwire bw’okukura bukaba buri kubasa kuhika aha mezi mukaga ninga garenga. Bwanyima y’enjura y’omu canda omuhingi nabiba embibo yeye, ategereza obwire buringwa kugira ngu ageshe. (Mak 4:28) Mbehi n’obu kiri kuba kitorobi tituri kubasa kwehangana nk’oku omuhingi ari kukikora?

11. Ni bata oku kwehangana kuritukwasa omu murimo g’okuburira?

¹¹ Abantu abatahikirire nibaba bari kwenda kuhika bari kutunga ecaruga omu mirimo y’emikono yabo. Obwe rero twaba turi kwenda ngu omusiri gwitu gwere, tushemerire kugufaho turi kuhinga, kubiba, kubagara n’okushukeramu amizi. Omurimo g’okuhindura abantu abegi nigwetengesa kukora n’amani agari kugumizamu. Nikitwara obwire kwegesa omwegi wa Bibuli kweyihamu omucwe g’okushorora. Twayehangana kiryatuma tutahwa amani abantu bayanga kutuhurikiza. Omuntu yatuhurikiza kandi akikiriza kwega, nabwe tushemerire kwehangana. Titushemerire kugema omwegi wa Bibuli kugira okwikiriza. Twijuke ku hine n’obu abegi ba Yesu babire batari kuhika bari kucenga ebi yabire nabegesa. (Yoh 14:9) Tushemerire kwijuka ku turi kubyara n’okushukera amizi, konka Ruhanga ni we ari kukuza.—1 Kor 3:6.

12. Ni bata oku turi kubasa kwehangana twaba turi kuburira abanyabuzare abatari Abahamya ba Yehova?

¹² Nikibasa kutugumira kwehangana twaburira omunyabuzare otari Omuhamya wa Yehova. Omusinge oguri omu Mubuurizi 3:1, 7 nigubasa kutukwasa. Nigugira  ngu: Hariho ‘obunaku bw’okuhunama, n’obunaku bw’okugamba.’ Emitwarize yitu mirungi nebasa kukwasa abanyabuzare abari kwenda kuhurira obutumwa, konka burizoba tushemerire kuba twetegwire kubagambira ebiri kukwata ahari Yehova. (1 Pet 3:1, 2) Nitwehanganira abantu bona, otwariremu abanyabuzare, turi kubaburira kandi turi kubegesa tutireho amani.

13-14. Ni biha byokureberaho by’okwehangana ebi tushemerire kutoreza?

¹³ Nitubasa kwega kwehangana kwihirira aha byokureberaho by’Abakristo abesigwa b’omuri Bibuli nangwa n’ab’omuri obu bwire. Habakuuki akehanganira obubi kumara obwire buringwa, kandi akagamba n’obwesige ngu: ‘Ninyija kwemerera kureba.’ (Hab 2:1) Entumwa Paulo akereka ecetengo ceye c’“okuheza” omurimo g’okuburira. Akagumizamu kwehangana kugira ngu “aheze orugendo rweye rw’obuhereza.’—Byak 20:24.

¹⁴ Tekateka aha cokureberaho c’omukazi n’omushija abaherize Ishomero rya Gileadi bakoherezibwa omu ihanga eririmu Abahamya bake kandi abantu bingi batari Abakristo. Abantu bingi omuri eryo hanga bakaba batari kwenda kwega Bibuli. Ekiri kutana n’eco, abu bayegire hamwe Ishomero rya Gileadi ababire bari kuhereza omu gandi mahanga bakaba nibakira kumusindikira za ripoti ku bine abegi ba Bibuli abari kutunguka omu by’omwika. Konka bakagumizamu kwehangana bagumizamu kuburira omuri eyo teritori n’obu abantu baho babire batari kwikiriza. Bwanyima y’emyaka munana bari kuburira omuri eyo teritori eyabire eri kurebeka nk’etari kwera, bakashemererwa obu omwe omu begi babo ba Bibuli yabatizibwe. Ni enki eki abo Bakristo ba kare n’ab’omuri obu bwire bari kubuganiraho? Abo Bakristo abesigwa tibaragwisize omukono ninga ngu bahwe amani, kandi Yehova akabaha emigisha ahabw’okwehangana. Mureke tutoreze abo abahungura ebyaraganisibwe ahabw’okwikiriza n’okwehangana!—Heb 6:10-12.

15. Ni bata oku okwikiriza kuri kutuma twahamira aha kuburira?

¹⁵ Nitwesiga obutumwa obu turi kuburira, kituma twabuhisa aha bantu bingi oku turi kubasa kona. Nitwesiga ebiraganiso ebiri omu Kigambo ca Ruhanga. (Zab 119:42; Isa 40:8) Nitwerebera obuhanuzi oburi kuhikirira omuri obu bwire. Tukerebera oku amagara g’abantu gari kuba marungi batandika kuta omu nkora obuhabuzi bw’omuri Bibuli. Eki kihamya nikituma twagumya ecetengo kitu c’okuburira abantu bona obutumwa bw’Obukama.

16. Kurugirira ahari Zaaburi ya 46:1-3, ni bata oku kwesiga Yehova na Yesu kiri kutuma twahamira aha kuburira?

¹⁶ Nambwenu nitwesiga Yehova, we burugo bw’obutumwa burungi, hamwe n’owu yagizire Omugabe w’Obukama, Yesu. (Yoh 14:1) Embera zona ezi twakuba turimu, Yehova ni we buhungiro bwitu n’amani gitu. (Shoma omuri Zaaburi ya 46:1-3.) Nambwenu, nitwesiga ku Yesu ari we ori kwebembera omurimo g’okuburira ari omu iguru, ari kukoresa amani n’obushoborozi obu Yehova yamuhire.—Mat 28:18-20.

17. Gamba ecokureberaho ekiri kwereka enshonga ahabw’enki tushemerire kugumizamu turi kuburira.

¹⁷ Okwikiriza nikutuma twakizaho kwesiga ku Yehova arituha emigisha ahabw’amani gitu, obumwe na bumwe omu buryo obu tutari kumanya. (Mub 11:6) Ecokureberaho; burizoba abantu bingi nibija kukwata ebitabo aha meza n’aha bugari bwitu. Mbehi ogu muringo g’okuburira ni murungi? Mazima! Akatabo Obuhereza bwitu (Our Kingdom Ministry) k’omu Kwikuminakumwe  2014 kakahandika aha mwegi omwe w’omuri yunivasiti owabire ari kwenda kubona Abahamya ba Yehova. Akaba ari kwenda kwija aha Nju y’Obukama, konka akabona ebitabo byitu aha meza yitu hihi ya yunivasiti, kandi akabonamu amakuru aha bi yabire ari kwenda kumanya. Bwanyima y’obwire buce akabatizibwa hati ni omupayoniya w’obwire bwona. Ezo nkuru nizituhiga kugumizamu turi kuburira ahakuba nizereka ku hacariho abantu abari kwenda kuhurira obutumwa bw’Obukama.

18. Ahabw’enki turi kwesiga tutari kubanganisa ku omurimo g’okuburira gurije kuhendera nk’oku Yehova ari kubyenda?

¹⁸ Nitwesigira kimwe ku omurimo g’okuburira gurihendera omu bwire bwago. Tekateka aha byabireho omu bwire bwa Noa. Yehova akatuhamiza kimwe ku namanya kukoresa ge obwire. Emyaka 120 enyima, Yehova akataho obwire obu omwijuro g’omu bwire bwa Noa gwabire guratandike. Bwanyima y’emyaka myingi, Yehova akagambira Noa kombeka obwato. Hacaburayo nk’emyaka 40 ninga 50 ngu omwijuro gubeho, Noa akagumizamu kuburira n’amani. N’obu abantu babire batari kwenda kumuhurikiza, akagumizamu kuburira obutumwa bw’okurabura kuhisya obu Yehova yagambire ku obwire bw’okutasya enyamishwa omu meri bwahika. Rero Yehova yakinga orwigi.—Kut 6:3; 7:1, 2, 16.

19. Ni enki eki turije kutunga ku turikirize kutagwisa omukono?

¹⁹ Juba aha Yehova aryayemereza omurimo g’okuburira; aryacwekereza ensi ya Sitaane rero arete ensi ensya. Mbehi obwo bwire butakahikire, titushemerire kutoreza Noa, Habakuuki, n’abandi abatarikirize kugwisa omukono! Reka tugume tuhugire omu murimo, twehangane, kandi tugume turi kwikiriza Yehova n’ebiraganiso byeye.