1-2. Tukuratize ebiri omuri 1 Timoseo 6:20, ni guha murimo ogu Timoseo yahibwe?

HINE obu turi kuha abantu ebintu byitu ngu babireberere. Ecokureberaho; nitubasa kubikisa esente omuri banka. Twakikora tusyoya nituba turi kwesiga ku esente zitu zirinzirwe kandi ku zitari kubasa kubura ninga ngu bazibe. Ni ahabw’eco tushoborokirwe eki kwesiga ondijo muntu tukamuha ekintu c’omuhendo kiri kumanyisa.

² Shoma omuri 1 Timoseo 6:20. Entumwa Paulo akijusya Timoseo ku yahibwe ekintu c’omuhendo, ni okugamba obwenge bw’okumanya ekigendererwa eki Ruhanga ayinire abantu. Nambwenu Timoseo akaba yahibwe omugisha g’‘okuburira ekigambo n’okukora omurimo g’omuburizi w’engiri.’ (2 Tim 4:2, 5) Paulo akahiga Timoseo kurinda eki yabire ahibwe. Nka Timoseo, n’itwe tukahebwa ebintu by’omuhendo. Ebyo bintu ni biha? Kandi shi ahabw’enki tushemerire kurinda ebyo bintu by’omuhendo ebi Yehova yatuhire?

3-4. Ni ziha nshonga eziri kutuma amazima g’omuri Bibuli gaba ag’omuhendo?

³ Yehova akatukunda yatuha amazima g’omuhendo agari omu Kigambo ceye Bibuli. Ago mazima ni ag’omuhendo ahakuba nigatwegesa oku turi kubasa kugira obunywani burungi na Yehova kandi gatushoborera oku turi kubasa kutunga okushemererwa okwa buzima omu kubaho kwitu. Ku turi kwikiriza ago mazima kandi tukagagenderamu nigaturinda enyegesa z’ebishuba kandi gatuma twayerinda emitwarize mibi.—1 Kor 6:9-11.

⁴ Endijo nshonga ahabw’enki amazima g’omu Kigambo ca Ruhanga gari ag’omuhendo ni oku Yehova ari kugashururira  abacurezi abari kuba betegwire kugikiriza. (Byak 13:48) Abo bantu b’abacurezi nibikiriza ku omwambari w’omwesigwa kandi w’omunyabwenge ari we ori kutwegesa amazima omuri obu bwire. (Mat 11:25; 24:45) Tituri kubasa kwega ago mazima aha bwitu kandi tihariho ekindi kintu c’omuhendo nk’okugamanya.—Enf 3:13, 15.

5. Ni kiha kindi kiconco eki Yehova yatuhire?

⁵ Nambwenu Yehova akatuha ekiconco c’okweegesa abandi amazima agari kumukwataho n’ekigendererwa ceye. (Mat 24:14) Obwo butumwa ni obw’omuhendo ahakuba nibukwasa abantu kwija omu ka ya Yehova kandi nibutuma bagira amasiko g’okwija kutunga amagara agatahwaho. (1 Tim 4:16) N’obu twakuba turi kukora eshaha nce ninga nyingi omu murimo g’okuburira, twena nitushagika ogo murimo g’omugasho oguri kukorwa omuri obu bwire. (1 Tim 2:3, 4) Ku ni omugisha gw’amani kuba abakozi abari kukora na Ruhanga!—1 Kor 3:9.

6. Ni enki ecahikire aha baremirwe kuguma kurinda ekiconco eki bakwasibwe?

⁶ Abakristo abamwe b’omu bwire bwa Timoseo bakaremwa kusima ekiconco eki babire bine c’okukora hamwe na Ruhanga. Ahakuba Deema yabire ari kukunda ensi, akaferwa ekiconco c’okuhereza na Paulo. (2 Tim 4:10) Figelo na Herumogene bakareka kukora omurimo g’okuburira ahakuba bakaba nibatina ku babire barije kuhiganisibwa nka Paulo. (2 Tim 1:15) Himenaayo, Alegizanda na Fileeto bakahinduka abahakani baruga omu amazima. (1 Tim 1:19, 20; 2 Tim 2:16-18) Abo bantu bona bakaba nibakunda Yehova munonga, konka bwanyima bakareka kureba eco kiconco nk’ec’omuhendo.

7. Ni buha buryo obu Sitaane ari kukoresa kugira ngu atume twaferwa ekiconco eki Yehova yatuhire?

⁷ Ni buha buryo obu Sitaane ari kukoresa kugira ngu atume twaferwa ekiconco eki Yehova yatuhire? Yetegereze oburyo obu ari kukoresa. Nakoresa eby’okweshemeza n’embuga z’okuganiriraho, kugira ngu atume twakora ebiri kutuma twareka korobera Yehova. Nakoresa abandi bantu kugira ngu batuhiganise rero twemereze omurimo gw’itu g’okuburira. Nambwenu nagezaho kutuma twahurikiza enyegesa z’ebishuba z’abahakani kugira ngu turuge omu mazima.—1 Tim 6:20, 21.

8. Ni enki eki turi kwegera aha byahikire ahari mwenetata Daniel?

⁸ Twaba tutetonzire nitubasa kuruga omu mazima mporampora. Tekateka aha byahikire ahari Daniel, * owabire ari kukunda  kuzana emizano ya vidiyo. Akashoborora ngu: “Nkatandika kuzana eyo mizano nyine emyaka ikumi. Omu kubanza nkaba ninzana emizano etari mibi munonga. Konka mporampora nkatandika kuzana emizano erimu obwitani n’ebikorwa bya ba dayimoni.” Bwanyima akaba namara amashaha 15 burizoba ari kuzana eyo mizano. Daniel akagamba ngu: “Nkaba nimanya ku emizano eyi nabire ndi kumara obwire ndi kuzana yabire eri kuntanisa ahari Yehova. Nkahinduka natandika kureba ku emisinge ya Bibuli etari kunkwataho.” Obwe rero twaba tutabire misho eby’okweshemeza nibibasa kutuma tutarinda amazima gitu. Eco cabaho, nituferwa ebiconco ebi Yehova yatuhire.

9. Tukuratize ebiri omuri 1 Timoseo 1:18, 19, ni enki eki Paulo yageranisize na Timoseo?

⁹ Shoma omuri 1 Timoseo 1:18, 19. Paulo akageranisa Timoseo n’omusirikare kandi yamuhiga kuguma ari ‘kurwana okurwana okurungi.’ Oko kurwana ti ok’omubiri ahobwe ni ok’omu buryo bw’omwika. Ni buha buryo obu Abakristo bari nk’abari omu rutaro? Itwe abasirikare ba Kristo, ni eha mitwarize eyi tushemirire kugira? Reka tushwijume amashomo atano agu turi kwegera aha cokureberaho ca Paulo. Ago mashomo nigabasa kutukwasa kuguma turinzire amazima.

10. Kukora ebi Ruhanga ari kukunda nikimanyisa ki, kandi ni ahabw’enki kiri kikuru?

¹⁰ Gumizamu kukora ebi Ruhanga ari kukunda. Omusirikare murungi naba ari omwesigwa. Narwana n’amani kugira ngu arinde owu ari kukunda ninga ebintu byeye by’omuhendo. Paulo akahiga Timoseo kugumizamu ari kukora ebi Ruhanga ari kukunda, ni okugamba kuguma ari omwesigwa ahari Yehova. (1 Tim 4:7) Oku turi kukizaho kukunda n’okukora ebi Ruhanga ari kukunda, ni ko turi kukizaho kugira ecetengo c’okurinda amazima.—1 Tim 4:8-10; 6:6.

11. Ahabw’enki tushemerire kwemanyiza kukora ebirungi?

¹¹ Guma kwemanyiza kukora ebirungi. Omusirikare ashemerire kugumizamu kwemanyiza kugira ngu abase kusingura omu rutaro. Timoseo akaguma ahamire omu by’omwika ahakuba akakuratiza obuhabuzi bwa Paulo bw’okureka ebyetengo bibi, kweyongera omu kwereka emitwarize mirungi n’okwekwatanisa n’Abakristo bagenzi beye. (2 Tim 2:22) Ebyo akabikora ahabw’okwemanyiza kukora ebirungi. Tushemerire kugumizamu kwemanyiza kukora ebirungi kugira ngu tubase kusingura ebyetengo by’omubiri. (Rom 7:21-25) Nambwenu tushemerire kwemanyiza kukora ebirungi kugira ngu tujure omuntu owa ira tujware omusya. (Efe 4:22, 24) Kandi twaruga aha murimo turuhire, nituba tushemerire kutamu amani kugira ngu tutayosha enterane.—Heb 10:24, 25.

12. Ni buha buryo obu turi kubasa kukizaho kukoresa ge Bibuli?

¹² Omusirikare ashemerire kwemanyiza kukoresa ebirwaniso byeye. Kugira ngu akorese ge ebirwaniso byeye naba ashemerire kwemanyiza burijo. Ni co kimwe, n’itwe tushemerire kugira obwenge omu kukoresa ge Ekigambo ca Ruhanga. (2 Tim 2:15) Nitubasa kwegera obwo bwenge omu nterane zitu. Konka twaba turi kwenda kukwasa abandi kwikiriza ku amazima g’omuri Bibuli gari kubasa kubakwasa, tushemerire kugeyegesa burijo. Tushemerire kukoresa Ekigambo ca Ruhanga kugira ngu kigumye okwikiriza kwitu. Eco nikimanyisa ekiri kukira aha kushoma Bibuli. Omuri ebyo harimu n’okutekateka aha bi twashoma kandi  tukacondoza omu bitabo byitu kugira ngu tumanye oku turi kubasa kukuratiza emisinge ya Bibuli. (1 Tim 4:13-15) Bwanyima nitwija kuba twetegwire kukoresa Ekigambo ca Ruhanga kugira ngu tucegese abandi. Eco nikimanyisa ngu tituri kubashomera orunyiriri rwa Bibuli kusha. Nitwetenga kukwasa abari kutuhurikiza kushoborokerwa orunyiriri kandi bakarukuratiza. Birabire omu kweyegesa burijo nitwija kuba abegesa ba Bibuli barungi.—2 Tim 3:16, 17.

13. Nk’oku biri kugambwa omu Baheburaayo 5:14, ni enki eki tushemerire kukora kugira ngu twege kutanisa ekirungi n’ekibi?

¹³ Gira obwenge. Omusirikare ashemerire kuba ari kubasa kumanya akabi kandi akakerinda. N’itwe tushemerire kumanya embera eziri kubasa kuturetera akabi kandi tukerinde. (Enf 22:3; Shoma omu Baheburaayo 5:14.) Ecokureberaho; tushemerire kutorana eby’okweshemeza n’obwenge. Za tivi nizereka vidiyo zirimu ebikorwa by’obushambani. Ebyo bikorwa tibiri kushemeza Ruhanga kandi n’itwe nibitushisha. Obwe rero, tushemerire kwerinda eby’okweshemeza ebiri kubasa kushisha obunywani bwitu na Ruhanga mporampora.—Efe 5:5, 6.

14. Ni bata oku kugira obwenge cakwasize Daniel?

¹⁴ Daniel, owu twaba tugambireho, akatandika kumanya ku emizano erimu obwisi n’ebikorwa bya ba dayimoni eyi yabire ari kuzana yabire eri kumuretera ebizibu. Akacondoza obuhabuzi bw’okumukwasa omuri eco kizibu omuri Watchtower Library. Ebyo bikamukwasa bita? Akareka kuzana emizano mibi ya vidiyo. Akemereza embuga zona ezine eyo mizano kandi yareka kuzana n’abantu abu yabire ari kuzana na bo. Daniel akagamba ati: “Omu mwanya g’okuzana eyo mizano ya vidiyo, nkatandika kumara obwire ndi kukora ebintu birungi na banywani bange b’omu kibina.” Hati Daniel nahereza nk’omupayoniya kandi ni omuzehe omu kibina.

15. Ahabw’enki ebishuba by’abahakani biri eby’akabi?

¹⁵ Nka Timoseo, n’itwe tushemerire kumanya akabi k’ebishuba by’abahakani. (1 Tim 4:1, 7; 2 Tim 2:16) Ecokureberaho; nibabasa kugezaho kutambuza ebishuba ebiri kugamba ahari benetata ninga shi ebiri kutuma tutayesiga ekitongore ca Yehova. Ebyo bishuba nibibasa kushisha okwikiriza kwitu. Tushemerire kwerinda kwikiriza ebyo bishuba. Ahabw’enki? Ahabw’okuba  ebyo bishuba nibitambuzibwa n’‘abantu abasisikire obwenge kandi bakihirirwaho amazima.’ Nibaba bari kwenda kutandikisaho ‘empaka n’okuhakana.’ (1 Tim 6:4, 5) Nibaba bari kwenda ngu twikirize ebishuba byabo rero tureke kwesiga benetata.

16. Ni biha bintu ebiri kutuhuzya ebi tushemerire kwerinda?

¹⁶ Yerinde ebiri kukuhuzya. ‘Nk’omusirikare murungi wa Kristo Yesu,’ Timoseo akaba ashemerire kuguma ari kwebanda aha murimo g’okuburira kukira kwebanda aha butungi. (2 Tim 2:3, 4) Nka Timoseo, titushemerire kwikiriza kuhuga ngu twetenge eby’obutungi. ‘Okubihwabihwa obutungi’ nikibasa kushisha obunywani bwitu na Yehova, kituma tutasima Ekigambo ca Ruhanga n’omugisha ogu twine g’okucegesa abandi. (Mat 13:22) Tushemerire korobya embera zitu tukakoresa amani gitu n’obwire bwitu turi ‘kubanza kusherura Obukama.’—Mat 6:22-25, 33.

17-18. Ni bata oku turi kubasa kurinda obunywani bwitu na Yehova?

¹⁷ Ba oyetegwire kugira eki wakora juba. Omusirikare nayetegura bucari kare kugira ngu amanye eki arije kukora kugira ngu ayerinde. Twaba turi kwenda kurinda ebintu ebi Yehova yatuhire, tushemerire kugira eki twakora juba twareba akabi. Ni enki ekiri kubasa kutukwasa kugira eki twakora juba? Tushemerire kwetegura bucari kare eki turikora twareba akabi.

¹⁸ Ecokureberaho; abantu baza aha mbaga, nibashabwa kumanya omuryango gwa hihi g’okushohoreramu entebekanisa etakatandikire. Ahabw’enki? Ni ahabw’okugira ngu habaho akabi babase kubona ah’okushohorera. Omu buryo nk’obwe, nitubasa kwetegura bucari kare eki turibasa kukora twabugana eby’obushambani, eby’obugomi, eby’abahakani ahari intaneti ninga shi turi kureba tivi. Twayetegura ebirije kubaho bucari kare, nitwija kwerinda ebiri kubasa kushisha obunywani bwitu na Yehova.—Zab 101:3; 1 Tim 4:12.

19. Ni eha migisha eyi turije kutunga ku turarinde ebintu by’omuhendo ebi Yehova yatuhire?

¹⁹ Tushemerire kurinda ebintu by’omuhendo ebi Yehova yatuhire harimu amazima g’omutano agari omu Kigambo ca Ruhanga n’ekiconco c’okugegesa abandi. Twakikora basyoya, nitwija kugira omuntuwomunda murungi, amagara agine ekigendererwa, n’okushemererwa okuri kuruga omu kukwasa abandi kumanya Yehova. Yehova nayija kutukwasa turinde ebiconco ebi yatuhire.—1 Tim 6:12, 19.