Yehova akaha amani abo baburizi. Omuri ogo mwaka, abakoruporuteri (abapayoniya) bakeyongera baruga ahari 225 bahika ahari 350. Kandi nibwe abakozi (ababurizi) abari kukira aha 8,000 batangire ripoti ahari ofisi yitu nkuru aha murundi g’okubanza. Yehova akabaha emigisha omu mirimo eyi babire nibamukorera.

Aha kiro ca 21 Okwakashatu 1920, Joseph F. Rutherford, owabire ari omwebembezi w’abegi ba Bibuli, akegesa aha mutwe oguri kugira ngu: “Abantu bingi abariho hati tibarifa.” Abegi ba Bibuli bakakora cona eki babire bari kubasa batumira abantu bona kwija kuhurikiza eyo toku. Bakapangisa enju emwe mpango eri kukorerwamu eby’okweshemeza kandi bagaba za kada z’okutumira eziri kuhika aha 320,000.

Hakija abantu bingi abu babire batari kutekateka. Ahabw’okuba enju ekaba eri ey’abantu 5,000, abantu 7,000 bakabura ahu baza bagarukayo. Omunara g’Omurinzi gukagamba ku ni kimwe omu biterane by’amani ebi Abegi ba Bibuli bakozire.

Abegi ba Bibuli bakamanywa munonga ahabw’okutangaza ku abantu bingi abariho hati batarifa. Omuri obwo bwire, bakaba batari kumanya ku habire hariho obutumwa bw’Obukama obu babire baraburire n’amani mingi. Konka nabwe, bakaguma bine amani omu kuburira. Ida Olmstead, owatandikire kwekwatanisa omu nterane omuri 1902, akagamba ati: “Tukaba nitumanya ngu turyagira emigisha kandi titurarekire kugambira obutumwa burungi abantu bona abu twabire turi kubugana omu murimo g’okuburira.”

Kugira ngu abantu babone ebyokurya by’omwika, benetata b’ahari Beteli bakatandika kucapa ebitabo byitu. Bakagura za mashini eziri kucapa bazita omu combeko eki bapangisize ecabire kiri ahari 35 Myrtle Avenue, Brooklyn New York, aha rubaju rwa Beteli.

Leo Pelle na Walter Kessler bakaza kukorera ahari Beteli omu kwezi Kokubanza 1920. Walter akagira ati: “Ku twahikireyo, omureberezi w’icapiro akatushaba kureta amabokisi g’ebitabo turi kugiha omu nju y’ahaasi turi kugata omu y’ah’iguru, rero yatugira ati: ‘Mwine eshaha emwe n’ekicweka y’okuba mwabimazireho tukaza ahari camushana.”

Leo akagamba ecabireho ah’izoba eryakuratireho: “Ni itwe abu bahire omurimo g’okoza ebisika by’aha nju y’okubanza y’eco combeko. Ni go murimo mubi munonga omu mirimo eyi natungire.  Konka gukaba guri omurimo gwa Mukama kandi eco kikatuma nagukunda.”

Omu sande nce, abahereza ababire bari kwehayo bekundire bakaba nibacapa Omunara g’Omurinzi. Za kopi enkumi magana mukaga z’Omunara g’Omurinzi gw’aha kiro ca 1 Okwakabiri, 1920, zikacapirwa omu nju ya kabiri y’ah’iguru. Ebyo bitakabireho, benetata bakata ebyoma by’okucapa omu nju y’ahaasi ebi bayesire obwato bw’entaro. Aha kiro ca 14 Okwakana 1920, Musisimuke! (The Golden Age) na yo ekatandika kucapwa. Hatariho okubanganisa, Yehova akaha emigisha abo benetata ahabw’amani agu batiremu.

Abahereza ba Yehova b’abesigwa bakashuba bashemerererwa kukorera hamwe kandi bagira obunywani. Konka kwiha omu mwaka gwa 1917 kuhisya omu gwa 1919, Abegi ba Bibuli abamwe bakaba barugire omu mazima. Ni enki ecabire kirakorwe kugira ngu kibakwase?

Omu Munara g’Omurinzi gw’aha kiro ca 1 Okwakana 1920, hakijamu ekicweka ekiri kugira ngu: “Reka tuture omu businge.” Eco kicweka kikabagambira ngu: “Nitwesiga tutari kubanganisa ku bona abari kwenda korobera Yehova barije kwebwa enshobi ezi bakozire enyima kandi nibija kugumizamu bari kwekwatanisa n’abandi omu kukora omurimo gweye.”

Abingi bakakuratiza ebyo bigambo. Omushija omwe n’omukazi weye bakahandika ngu: “Nitumanya ku emyaka ehwire yatuferire busha kandi abandi bari kukora omurimo g’okuburira. Nitwesiga ku tutarishuba kuhaba obundi.” Abo baburizi ababire bahwiremu amani bakaba bine emirimo myingi eyabire ebategerize.

Aha kiro ca 21 Okwamukaga 1920, Abegi ba Bibuli bakatandika kampeyini y’okugaba magazini ya “ZG,” omubumbe gw’ekitabo ekiri kushorora Bibuli (The Finished Mystery). * Ebyingi omuri ebyo bitabo bikaguma bibikirwe obu eco kitabo cabire cayemerezibwe omu mwaka gwa 1918.

 Ababurizi bona, batari abapayoniya bonka, baketwa ngu bekwatanise omu kukora ogo murimo. Ababatizibwe bona ab’omu bibina bakaba bari kubasa kwekwatanisa omuri ogo murimo bekundire. Bona baketeraho entego y’okugaba eco kitabo. Edmund Hooper akagamba ku eyo kampeyini yabire eri ey’okubanza omu kuburira aha nju n’enju ahari bingi. Akongeraho ati: “Tukatandika kushoborocerwa ecabire kitutegerize omuri ogo murimo ogwabire gushemerire kukorwa munonga omu nsi yona.”

N’obu cabire kitorobi kugamba n’abandi Begi ba Bibuli b’omu gandi mahanga omu bwire bw’Orutaro rw’ensi yona rw’okubanza, mwenetata Rutherford akaba nayenda kugumya abo benetata n’okugaruraho omurimo g’okuburira. Ni ahabw’eco aha kiro 12 Okwamunana 1920, we n’abandi benetata bana bakakora orugendo rw’okwetorora omuri Bungereza, omuri Buraya, n’omu Burugwizoba bw’ahagati.

Obwire obu Rutherford yatayayire Bungereza, Abegi ba Bibuli bakagira ebiterane bihango bishatu hamwe n’enterane 12 z’abantu bona. Abaterine bona bakahika aha 50,000. Omunara g’Omurinzi gukakigambaho guri kugira ngu: “Abari kukunda amazima bakagarurwamu amani. Bakakizaho kukundana n’okukora omurimo kandi ababire bine okushasha bakashemererwa.” Nambwenu omuri Paris, mwenetata Rutherford akashuba yayegesa aha mutwe oguri kugira ngu: “Abantu bingi abariho hati tibarifa.” Toku ku yatandikire, enju y’ekiterane yona ekaba eyijwire. Abantu magana ashatu bakashaba kwega ebiri kukiraho.

Omu sande ezakuratireho benetata abamwe bakatayayira omuri Aseene, Cairo, n’omuri Yerusaalemu. Kugira ngu bakwase abantu b’omuri ebyo bicweka ababire bari kwenda kwega ebiri kukiraho, mwenetata Rutherford akataho ibikiro ry’ebitabo omu tawuni ya Ramallah, hihi ya Yerusaalemu. Bwanyima akagaruka omuri Buraya yatandikisayo Ofisi y’omuri Buraya y’ahagati, kandi yakora entebekanisa y’okucapirayo ebitabo.

Omu Kwamwenda 1920, Abegi ba Bibuli bakashohoza Musisimuke! No. 27, eyashoborwire ge okuhiganisibwa kw’Abegi ba Bibuli omu mwaka gwa 1918. Ca coma c’okucapa eki twaba twagambireho, kikakora nyomushana na nyekiro cacapa za kopi z’eyo magazini eziri kurenga ahari miliyoni ina.

Abashomire eyo magazini bakamanya eby’orubanja rwa Emma Martin. Munyanyazi Martin  akaba ari omukoruporuteri omuri San Bernardino, y’omuri California. Aha kiro ca 17 Okwakashatu 1918, Emma Martin na benetata bashatu, E. Hamm, E. J. Sonnenburg, na E. A. Stevens, bakateranira hamwe n’Abegi ba Bibuli.

Omushija omwe akaba ayizire konka atagenderire kwega Bibuli. Bwanyima y’obwire akegambira ngu: “Nkaza omuri ezo nterane ndagirirwe n’abakozi abari kurondesa enshobe. Nkazayo kugira ngu mbone eby’okubashinja.” Akabona ekihamya eki yabire ari kuronda, ni okugamba ekitabo ekiri kushoborora Bibuli (The Finished Mystery). Ku hahwire ebiro bice, munyanyazi Martin na ba benetata bashatu bakakomwa. Bakabataho omushango g’okwita ebiragiro ahabw’okugaba ekitabo ecabire kizibirwe.

Emma n’abo benetata bakakomwa bamara emyaka ishatu omu kihome. Bakajurira emirundi myingi konka byayanga, rero aha kiro ca 17 Okwakatano 1920 batandika ebihano. Konka bwanyima y’obwire buce ebintu bikahika nibihinduka.

Aha kiro ca 20 Okwamukaga, 1920, mwenetata Rutherford akagamba aha nkuru yabo omu kiterane ekihango ecaberire omuri San Francisco. Ababire bahurikize bona bakasasira abo benetata, bahandikira purezidenti wa Amerika. Bakahandika ngu: ‘Nitureba okukomwa kwa munyanyazi Martin nk’obutari buringaniza. Abategeki bakakoresa amani g’ekirenga omu kugambanira munyanyazi Martin ngu atebwe omu kihome, kandi nitukireba nk’ekikorwa kibi ekirengire okwemera.’

Aha izoba eryakuratireho, Purezidenti Woodrow Wilson akahika ari kucendeza ekihano ecabire kihirwe munyanyazi Martin na benetata Hamm, Sonnenburg, na Stevens. Okwe ni ko barugire omu kihome.

Aha muheru gwa 1920 Abegi ba Bibuli bakareba ku hariho ebintu byingi ebyabireho ebi babire bashemerire kushemerererwa. Omurimo gw’ahari ofisi nkuru gukagumizamu kweyongera kukiza kare hona, kandi Abakristo ab’amazima bagumizamu kutangaza ku Obukama bwa Ruhanga ari bwo burije kwihaho ebizibu by’abantu byona. (Mat 24:14) Omwaka ogwakuratireho gwa 1921, gukaba gurabe omwaka gw’amani omu kutangaza amazima g’Obukama.