EKICWEKA C’OKWEGA 44
Mbehi baryahereza Ruhanga ku barikura?
‘Yesu yayeyongera kutunga obwenge n’okukura, nasimwa Ruhanga n’abantu.’—LUK 2:52.
ECESHONGORO CA 134 Abaana n’Obuhunguzi Kuruga Ahari Ruhanga
EMPINYE *
1. Ni eha nsharamu ndungi eyi buri omwe ashemerire kukora?
BURIJO, ensharamu ezi abazire bari kukora nizikwata aha bana babo kandi hahwa obwire buringwa. Abazire ku bari kukora ensharamu mbi nikiretera abana babo ebizibu. Konka ku bari kukora ensharamu ndungi, nikituma abana babo batunga okushemererwa omu kubaho kwabo. Konka, abana na bo bashemerire kukora ensharamu ndungi. Ensharamu ndungi eyi buri omwe ashemerire kukora ni okuhereza Tata witu w’omu iguru, Yehova.—Zab 73:28.
2. Ni ziha nsharamu ndungi ezi Yesu n’abazire beye bakozire?
2 Abazire ba Yesu bakaba bamaririre kukwasa abana babo kuhereza Yehova, kandi ensharamu ezi bakozire zikereka ku babire bari kutwara okuhereza Yehova nk’ok’omugasho omu kubaho kwabo. (Luk 2:40, 41, 52) Nambwenu, Yesu na we akakora ensharamu ndungi eyamukwasize kukora ebi Yehova yabire ari kwenda ngu akore. (Mat 4:1-10) Yesu akaba ari omunyambabazi, ari omwesigwa, kandi ari emanzi. Omuzire wena ori kutina Ruhanga naba ari kwetenga omwana oyine eyo mitwarize.
3. Ni biha bibuzo ebi twaza kushwijuma omuri eki kicweka?
3 Omuri eki kicweka, twaza kushwijuma ebi bibuzo: Ni ziha nsharamu ndungi ezi Yehova yakozire aha bikwatirine na Yesu? Ni enki eki abazire b’Abakristo bari kubasa kwegera aha nsharamu ezi abazire ba Yesu bakozire? Kandi shi ni enki eki Abakristo abacari bato bari kwegera aha nsharamu ezi Yesu yakozire?
YEGERA AHARI YEHOVA
4. Ni eha nsharamu ndungi eyi Yehova yakozire aha bikwatirine n’Omwana weye?
4 Yehova akatoranira Yesu abazire barungi munonga. (Mat 1:18-23; Luk 1:26-38) Ebigambo bya Mariya ebirugire aha mutima ebiri omuri Bibuli nibyereka ku yabire ari kukundira kimwe Yehova n’Ekigambo ceye. (Luk 1:46-55) Kandi oburyo obu Yosefu yayorobiremu obuhabuzi bwa Yehova nicereka ku yabire ari kutina Ruhanga kandi ari kwenda kumuhimbisa.—Mat 1:24.
5-6. Ni biha bizibu ebi Yehova yayikirize Omwana weye kurabamu?
5 Yijuka ku Yehova ataratoranire Yesu abazire b’abagiga. Ekitambo eki Yosefu na Mariya bahireyo bamara kuzara Yesu nicereka ku babire bari aboro. (Luk 2:24) Yosefu akaba ayine akaju kace k’okubijiramu omu ka yeye hihi na Nazareeti. Bakaba batine esente nyingi ahabw’okuba eka yeye ekeyongera bahika aha bana mushanju ninga abari kurenga.—Mat 13:55, 56.
6 Yehova akarinda Yesu akabi kingi, konka tararinzire Omwana weye ebigezo byona. (Mat 2:13-15) Ecokureberaho: Yesu akaba ayine abanyabuzare abatari kumwikiriza. Tekateka oku Yesu yayehurire ku abanyabuzare beye omu kubanza bayangire kwikiriza ku ni Mesia. (Mak 3:21; Yoh 7:5) Nambwenu, Yesu nabasa kuba yashashire munonga ku yaferirwe ishe Yosefu. Eco nikibasa kuba catumire Yesu, nk’omwana mukuru, yasigara ari kukora omurimo ogu ishe yabire ari kukora. (Mak 6:3) Yesu ku yakuzire akega oku ari kubasa kureberera ab’omu ka yabo. Nabasa kuba yakozire n’amani kugira ngu abashagike. Obwe rero akaba namanya eki kuruha ahabw’emirimo kiri kumanyisa.
Imwe bazire mwe, mutebekanisize abana banyu ebizibu ebi barije kubugana muri kubegesa kurondera obuhabuzi omu Kigambo ca Ruhanga (Reba paragurafu ya 7) *
7. (a) Ni biha bibuzo ebiri kukwasa abatasine kurera abana babo? (b) Ni bata oku ebiri omu Nfumu 2:1-6 biri kukwasa abazire omu kwegesa abana?
7 Ku orabe oyine eka kandi muri kwenda kuzara abana, mwebuze ngu: ‘Mbehi turi abantu b’abacurezi kandi bakuzire omu by’omwika abu Yehova ari kubasa kukoresa kureberera omwana?’ (Zab 127:3, 4) Ku orabe wabire omuzire, yebuze ngu: ‘Mbehi ndi kwegesa abana bange omugasho g’okukora n’amani?’ (Mub 3:12, 13) ‘Mbehi ningezaho kurinda abana bange akabi k’eby’omubiri n’omu by’omwika aku bari kubasa kubugana omuri eyi nsi ya Sitaane?’ (Enf 22:3) Mazima tori kubasa kurinda abana bawe ebigezo byona ebi bari kubasa kubugana. Ogo ni omurimo gugumire. Konka nobasa kubatebekanisiza ebizibu ebi baribugana ori kubegesa oku bari kubasa kurondera obuhabuzi omu Kigambo ca Ruhanga. (Shoma omu Nfumu 2:1-6.) Ecokureberaho: Omunyabuzare yaruga omu mazima, kwasa abana bawe kwega Ekigambo ca Ruhanga kugira ngu kibakwase kumanya ku kiri ec’omugasho kuguma bari abesigwa ahari Yehova. (Zab 31:23) Ninga shi mwafisa omuntu owu muri kukunda, yereka abana bawe enyiriri z’omuri Bibuli eziri kubasa kubakwasa kwehanganira obwo busaasi kandi bakatunga obusinge.—2 Kor 1:3, 4; 2 Tim 3:16.
YEGERA AHARI YOSEFU NA MARIYA
8. Ni buha buhabuzi oburi omu Ky’Ebiragiro 6:6, 7 obu Yosefu na Mariya bakuratize?
8 Abazire ba Yesu bakagendera aha bi Yehova ari kushaba abazire, bakwasa Yesu kukura ari kusimwa Ruhanga. (Shoma omu Ky’Ebiragiro 6:6, 7.) Yosefu na Mariya bakaba nibakundira kimwe Yehova kandi entego yabo y’okubanza ekaba eri ey’okukwasa abana babo kumukunda.
9. Ni eha nsharamu y’omugasho eyi Yosefu na Mariya bakozire?
9 Yosefu na Mariya bakasharamu kugira entebekanisa y’okuramya Yehova. Hatariho okubanganisa, buri sande bakaba nibaza omu nterane omuri sinagogi omuri Nazareeti nk’oku babire baza omuri Yerusaalemu buri mwaka aha bugenyi bw’Okuhingurwaho. (Luk 2:41; 4:16) Nibabasa kuba bakoresize obwire obu babire nibamara omu rugendo bari kuza Yerusaalemu bari kwegesa Yesu na benenyina aha bikwatirine n’ebyahikire aha bahereza ba Yehova aba kare, kandi nibabasa kuba barambwire emyanya eri kugambwaho omuri Bibuli. Kandi Yosefu na Mariya ku bagizire abana bingi, kugira entebekanisa y’okuramya Yehova nikibasa kuba cabagumire. Konka tekateka aha migisha yona eyi batungire! Ahabw’okuba babire bari kuta okuramya Yehova omu mwanya g’okubanza, eka yabo ekaguma eyine obunywani na we.
10. Ni enki eki abazire b’Abakristo bari kubasa kwegera ahari Yosefu na Mariya?
10 Ni enki eki abazire abari kutina Ruhanga bari kwegera ahari Yosefu na Mariya? Ec’omugasho, mwegese abana banyu omu bigambo n’omu bikorwa ku muri kukundira kimwe Yehova. Ekiconco ekiri kukirayo eki ori kubasa kuha abana bawe ni okubakwasa kukunda Yehova. Kandi ekintu c’omugasho eki ori kubasa kwegesa abana bawe ni okubegesa kugira entebekanisa y’okweshomesa Bibuli, kushaba, okuza omu nterane n’okwekwatanisa omu murimo g’okuburira. (1 Tim 6:6) Kandi oshemerire kuha abana bawe ebi bari kwetenga by’omubiri. (1 Tim 5:8) Konka oyijuke ku ekirakwase abana bawe kuhonoka omuheru gw’eyi nsi ya Sitaane kandi bakataha omu Bukama bwa Ruhanga ti obugiga obu bine ahobwe ni obunywani obu bine na Yehova. *—Ezek 7:19; 1 Tim 4:8.
Nikitushemeza kureba abazire b’Abakristo bari kukora ensharamu ndungi z’eby’omwika eziri kukwasa ab’omu maka gabo! (Reba paragurafu ya 11) *
11. (a) Ni bata oku obuhabuzi oburi omuri 1 Timoseo 6:17-19 buri kukwasa abazire kukora ensharamu ndungi baba bari kurera abana babo? (b) Ni ziha ntego ezi eka yawe eri kubasa kweteraho kandi shi ni eha migisha eyi muri kubasa kutunga? (Reba akashanduku akari kugira ngu: “ Ni ziha ntego ezi muri kubasa kweteraho?”)
11 Ku nikishemeza kureba abazire b’Abakristo bari kufa aha b’omu maka gabo omu by’omwika! Nibagezaho kuramiza hamwe burijo, bekwatanisa hamwe omu nterane n’omu biterane ebihango kandi bagenda hamwe omu murimo g’okuburira. Amaka agamwe nigaza kuburira obucweka obutari kukira kuburirwamu. Abandi nibatayayira ahari Beteli kandi bashagika omu kombeka amaju g’ekitongore. Amaka agamwe agari kusharamu kwekwatanisa omuri eyo mirimo nigakoresa esente zabo kandi eco nikibasa kubaretera oburemezi. Konka Yehova nabaha emigisha myingi ahabw’ebi bari kukora. (Shoma omuri 1 Timoseo 6:17-19.) Abana abari kukurira omuri ago maka nibagumizamu kugendera omu bi bayegire kandi tibari kwefuza!—Enf 10:22.
YEGERA AHARI YESU
12. Ni enki eki Yesu yabire ashemerire kukora?
12 Ishe wa Yesu w’omu iguru nakora ensharamu ndungi burijo kandi abazire ba Yesu b’omu nsi na bo ni ko babire bari kukora. Obwe rero, eco kikatuma Yesu na we yakura ari kumanya kukora ensharamu ndungi. (Gal 6:5) Na we akaba ayine ekiconco c’okweshariramu ebi ari kwenda. Akaba ari kubasa kweshariramu ebi ari kukunda. Konka, akasharamu kugumya obunywani bweye na Yehova. (Yoh 8:29) Ni bata oku ecokureberaho ceye kiri kukwasa abacari bato omuri obu bwire?
Imwe abacari bato, mutayehuzya obuhabuzi bw’abazire banyu (Reba paragurafu ya 13) *
13. Ni eha nsharamu ndungi eyi Yesu yakozire obu yabire acari muto?
13 Yesu acari muto, akasharamu korobera abazire beye. Taragerizeho kwetantara obuhabuzi bw’abazire beye, ari kutekateka ngu namanya byingi kubakira. Ahobwe, ‘akaguma naborobera.’ (Luk 2:51) Hatariho okubanganisa, Yesu akaba nakora byona ebi yabire ari kushabwa nk’omwana mukuru omu ka. Akaba natamu amani ngu ayegere byingi ahari Yosefu kugira ngu abase kushagika eka yabo.
14. Nitumanya tuta ku Yesu yabire ari kweshomesa Ekigambo ca Ruhanga?
14 Abazire ba Yesu nibabasa kuba bamugambire oku yazirwe omu buryo oburi kutangaza n’ebi abahanuzi babire bamugambireho. (Luk 2:8-19, 25-38) Konka ebi bamugambireho bikaba bitari kumumara. Nambwenu akeshomesa Ebyahandikirwe. Nitumanya tuta ku Yesu yabire ari kweshomesa Ekigambo ca Ruhanga? Nitukimanya ahakuba obu yabire acari muto, abegesa b’omuri Yerusaalemu ‘bakatangarira obwenge bweye n’ebi yabire nabagarukamu.’ (Luk 2:46, 47) Kandi obu yabire ayine emyaka 12 kusha, akereka ku Yehova ari Ishe.—Luk 2:42, 43, 49.
15. Yesu akereka ata ku yashaziremu kukora ebi Ishe ari kukunda?
15 Yesu ku yamanyire omwanya ogu ayine omu kuhikiriza ekigendererwa ca Yehova, akasharamu kwikiriza ogo murimo. (Yoh 6:38) Akaba namanya ku abantu bingi babire barije kumwanga kandi nabasa kuba yabire ari kukitekatekaho munonga. Konka nabwe, akasharamu kugumizamu korobera Yehova. Obu Yesu yabatizibwe omu mwaka gwa 29 B.Y., akata omutima aha kukora ebi Yehova ari kukunda. (Heb 10:5-7) Akagumizamu ari kukora ebi Ishe ari kukunda kuhika n’aha kufera aha kiti c’obusaasi.—Yoh 19:30.
16. Ni enki eki abana bari kubasa kwegera ahari Yesu?
16 Yorobera abazire bawe. Nka Yosefu na Mariya, abazire bawe na bo tibahikirire. Konka nabwe, Yehova akabaha omurimo g’okukurinda, okukumanyiza, n’okukureberera. Ku orayorobere obuhabuzi bwabo kandi okabaha ekitinisa noyija ‘kuba ge.’—Efe 6:1-4.
17. Tukuratize ebiri omuri Yoshua 24:15, ni eha nsharamu eyi abacari bato bashemerire kukora?
17 Sharamu owu orihereza. Oshemerire kwereka ku nomanya Yehova, ebi ari kukunda n’oku ori kubasa kubikora omu kubaho kwawe. (Rom 12:2) Ku orakikore basyoya, noyija kubasa kukora ensharamu ndungi omu kubaho kwawe, ni okugamba ensharamu y’okuhereza Yehova. (Shoma omuri Yoshua 24:15; Mub 12:1) Ku oragumizemu kushoma Bibuli burizoba kandi okayeyegesa burijo, noyija kukizaho kukunda Yehova kandi okwikiriza kwawe kukizeho kuhama.
18. Ni eha nsharamu eyi abacari bato bashemerire kukora, kandi nibyija kubagasira bita?
18 Sharamu kuta omu mwanya g’okubanza ebi Yehova ari kukunda omu kubaho kwawe. Ensi ya Sitaane nekuraganisa ngu ku orakorese obubasa bwawe ori kwerondera amagoba, notunga okushemererwa. Konka mazima, abari kuta omutima aha butungi nibatunga obusaasi bwingi. (1 Tim 6:9, 10) Ku orayorobere Yehova kandi okasharamu kuta omu mwanya g’okubanza ebi ari kukunda omu kubaho kwawe, noyija kugira ebi wahikaho kandi oyereke obwenge omu bi ori kukora byona.—Yos 1:8.
NI ENKI EKI WAZA KUKORA?
19. Ni enki eki abazire bashemerire kwijuka?
19 Imwe bazire mwe, mukore cona eki muri kubasa mukwase ab’omu maka ganyu kuhereza Yehova. Mumwesige, nayija kubakwasa kukora ensharamu ndungi. (Enf 3:5, 6) Mwijuke ku ebi muri kukora biri kukwata aha bana banyu kukira ebi muri kugamba. Obwe rero, mukore ensharamu eziratume Yehova yasima abana banyu.
20. Ni eha migisha eyi abacari bato bari kutunga ku bari kusharamu kuhereza Yehova?
20 Imwe bana mwe, abazire banyu nibabasa kubakwasa kukora ensharamu ndungi. Konka ni imwe abashemerire kwekorera ensharamu ndungi kugira ngu Yehova abasime. Obwe rero, toreza Yesu ori kusharamu kuhereza Isho ow’omu iguru ori kukukunda. Ku orakikore basyoya, noyija kutunga emigisha kandi ogire amagara marungi omuri obu bwire. (1 Tim 4:16) Kandi omu biro by’omu misho, noyija kutunga amagara agatahwaho agine okushemererwa!
ECESHONGORO CA 133 Ramya Yehova Okiri Omunyeeto
^ par. 5 Abazire b’Abakristo nibaba bari kwenda ngu abana babo bije kuhereza Yehova ku barikura. Ni ziha nsharamu ezi abazire bari kubasa kukora ezirije kukwasa abana babo kuhika ahari eyo ntego? Ni ziha nsharamu ezi Abakristo abacari bato bari kubasa kukora kugira ngu bagire eki bahikaho? Eki kicweka caza kugarukamu ebyo bibuzo.
^ par. 10 Reba ahari peji ya 69-70 omu kitabo ekiri kugira ngu: Okuramya okw’amazima kuri kugarurwaho (Pure Worship of Jehovah—Restored At Last) ahari paragurafu ya 17-18 omu Rungereza.
^ par. 65 EBISHUSHANI: Mariya akegesa Yesu kukunda Yehova acari muto. Ni co kimwe, abazire b’abakazi bashemerire kwegesa abana babo kukunda Yehova bacari bato.
^ par. 67 EBISHUSHANI: Yosefu akaba nareba kugenda n’abeka yeye omuri sinagogi nk’ec’omuhendo munonga. Abashija b’omuri obu bwire bashemerire kureba ku ni ec’omuhendo kugenda n’ab’omu ka gabo omu nterane.
^ par. 69 EBISHUSHANI: Yesu akegera byingi ahari ishe. Omuri obu bwire abacari bato na bo nibegera byingi ahari b’ishe.
