EKICWEKA C’OKWEGA 41
Oku turi kubasa kukwasa abegi ba Bibuli kuhika aha kubatizibwa—Ekicweka c’okubanza
‘Nimurebeka muri ebaruha ya Kristo eyi yatuhandikisize.’—2 KOR 3:3.
ECESHONGORO CA 78 ‘Okwegyesa Ekigambo kya Ruhanga’
EMPINYE *
Mbehi ab’omu kibina bona tibari kukizaho kushemererwa bareba omwegi owu bakwasize yakura akahika aha kubatizibwa? (Reba paragurafu ya 1)
1. Ni bata oku omu 2 Bakorinso 3:1-3 hari kutukwasa kushoborocerwa omugisha ogu twine g’okukwasa abegi ba Bibuli bakahika aha kubatiziwa? (Reba ekishushani c’aha kishembeso.)
MBEHI noyehurira ota wareba omwegi w’omu kibina canyu yabatizibwa? Mazima nikituma washemererwa! (Mat 28:19) Nambwenu yaba ari iwe owamwegesize Bibuli, nokizaho kushemererwa wareba ari kubatizibwa! (1 Tes 2:19, 20) Abegi basya abari kubatizibwa nibaba bari ‘ebaruha z’okusimisa,’ kandi tikiri kushemeza ababegesize kusha ahobwe n’ekibina cona.—Shoma omu 2 Bakorinso 3:1-3.
2. (a) Ni kiha kibuzo c’omugasho eki tushemerire kushwijuma kandi ahabw’enki? (b) Omwegi wa Bibuli ni oha? (Reba obugambo bw’ahaasi.)
2 Nikishemeza munonga kuba omu myaka ina eyahwire, buri kwezi habire nihaboneka abegi ba Bibuli * abari kuhika ahari 10,000,000 omu nsi yona. Kandi omu bwire bw’eyo myaka, abegi abari kuhika aha 280,000 buri mwaka bakaba nibabatizibwa baba Abahamya ba Yehova n’abegi ba Yesu Kristo. Ni bata oku turi kubasa kukwasa abo begi ba Bibuli kuhika aha kubatizibwa? Obu Yehova aceyehanganire abantu kandi ari kubaha omugisha g’okuba abegi ba Kristo, tushemerire kukora cona eki turi kubasa kugira ngu tubakwase kuhika aha kubatizibwa. Obwire buri kuhwayo!—1 Kor 7:29a; 1 Pet 4:7.
3. Ni enki eki twaza kushwijuma omuri eki kicweka aha bikwatirine n’okwegesa abegi ba Bibuli?
3 Ahabw’okuba omurimo g’okuhindura abantu abegi guri kwetengwa omuri obu bwire, Akakiko k’Abarisa kakabuza za ofisi eki turi kubasa kukora kugira ngu tukwase abegi ba Bibuli kuhika aha kubatizibwa. Omuri eki kicweka n’ekirakurateho, nitwija kushwijuma eki turi kubasa kwegera aha bapayoniya abamanyirire, abamishonari hamwe n’abareberezi abari kutayayira ebibina. * (Enf 11:14; 15:22) Bakashoborora eki abegesa n’abegi ba Bibuli bari kubasa kukora kugira ngu bagire eki bahikaho. Omuri eki kicweka twaza kushwijuma ebintu bitano ebi omwegi wa Bibuli ari kubasa kukora kugira ngu ahike aha kubatizibwa.
MWEGE BURI SANDE
Buza omwegi yaba ayine obwire buri kumara kugira ngu mutandike kwega Bibuli (Reba paragurafu ya 4-6)
4. Ni enki eki tushemerire kumanya aha bikwatirine n’okwegeseza omuntu aha muryango?
4 Benetata na banyanyazi abingi nibegesa abegi ba Bibuli obwire buce bemerire aha muryango. Ebyo biganiro tibiri kukira kubaho buri sande. N’obu buri oburyo burungi bw’okutuma omuntu yakunda Bibuli, konka tushemerire kukizaho kumutera ekihika. Kugira ngu abamwe bakihikeho nibashaba omuntu enamba yeye y’esimu rero bamuterera ninga bamuhandikira ka mesegi aha simu batakagireyo kugira ngu baganire ahari Bibuli. Ebyo biganiro nibibasa kumara amezi mingi atakarugiremu omwegi wa Bibuli ori kutunguka. Konka shi, omwegi nabasa kuhika aha kubatizibwa yaba atatire amani n’obwire bweye omu kwega Ekigambo ca Ruhanga? Tikiri kubasika.
5. Tukuratize ebiri omuri Luka 14:27-33, ni enki eki Yesu yagambireho ekiri kubasa kutukwasa omu murimo gwitu g’okuhindura abantu abegi?
5 Hine obu Yesu yakoresize ecokureberaho, yagamba eki kuba omwegi weye biri kushaba. Akagamba aha muntu ori kwenda kombeka omunara n’aha mugabe ori kwenda kuza aha rugamba. Yesu akagamba ku omwombeki ashemerire ‘kubanza yashutama akabaririra’ kugira ngu abase kumara kombeka ogo munara, kandi ku omugabe ashemerire ‘kubanza yashutama akehanuza’ kureba yaba amahe geye gari kubasa kukora emirimo. (Shoma omuri Luka 14:27-33.) Ni co kimwe, Yesu akaba ari kumanya ku omuntu yaba ari kwenda kuba omwegi weye ashemerire kubanza yashwijuma ayetonzire eki kumukuratira kiri kumanyisa. Eyo ni yo nshonga eshemerire kutuma twahiga abegi bitu ba Bibuli kwega buri sande. Eco tukakikora tuta?
6. Ni enki eki tushemerire kukora kugira ngu tukwase omwegi wa Bibuli kwega juba?
6 Tandika ori kongera aha bwire obu ori kumara ori kwegesa abo begi ba Bibuli. Nobasa n’okuganira na bo aha nyiriri ezeyongireho waza kubatayayira. Wamara obwire ori kutayayira nyineka, nobasa kumubuza yaba ayine obwire oburi kumara kugira ngu mutandike kwega Bibuli. Oku nyineka ari kugarukamu ni co kiri kwereka yaba ari kwenda kugumizamu kwega. Kugira ngu omukwase kwega juba oshemerire kumubuza yaba ari kubasa kwega emirundi ibiri omu sande. Konka, hariho ekindi eki ashemerire kukora ekiri kukira aha kwega emirundi ibiri omu sande.
TEBEKANISA BURIJO WAZA KWEGESA
Tebekanisa ge burijo waza kwegesa omwegi, kandi omwereke oku ari kubasa kutebekanisa (Reba paragurafu ya 7-9)
7. Ni bata oku omwegesa ari kubasa kutebekanisa ge burijo waza kwegesa omwegi wa Bibuli?
7 Nk’omwegesa, oshemerire kutebekanisa ge burijo waza kwegesa omwegi wa Bibuli. Nobasa kutandika ori kushoma ebi murayege hamwe n’ebyahandikirwe ebirimu. Gezaho kukwata omu mutwe enshonga nkuru. Tekateka aha mutwe gw’ekicweka, otutwe tuce, ebibuzo, ebyahandikirwe bihandikirweho ngu “shoma,” ebishushani, n’ahari za vidiyo eziri kubasa kukukwasa kushoborora eyo nyegesa. Bwanyima otekateke aha mwegi n’oku ori kubasa kumushobororera akacenga ebi wamwegesa kugira ngu abase kubita omu nkora.—Neh 8:8; Enf 15:28a.
8. Ebigambo by’entumwa Paulo ebiri omu Bakolosai 1:9, 10 nibitwegesa ki aha bikwatirine n’okushabira abegi bitu ba Bibuli?
8 Omu kutebekanisa, ta omwegi wawe omu shara n’ebi ari kwetenga. Shaba Yehova akukwase kuhika omwegi wawe aha mutima. (Shoma omu Bakolosai 1:9, 10.) Gezaho kwetegereza ahu omwegi wawe atari kucenga ge ninga shi ahari kumugumira kwikiriza. Guma oyijuke ku oyine entego y’okumukwasa kuhika aha kubatizibwa.
9. Ni bata oku omwegesa ari kubasa kukwasa omwegi kutebekanisa ge ebi arayege? Shoborora.
9 Nitwesiga ku kwegesa omwegi burijo kirije kutuma yasima Yehova na Yesu ahabw’ebi bamukorire kandi ahurire yayenda kwega byingi. (Mat 5:3, 6) Kugira ngu ebi omwegi ari kwega bimugasire omu bwijwire naba ashemerire kubitaho omutima. Obwe rero mukwase kucenga omugasho g’okutebekanisa atakegire. Omwegi ashemerire kutebekanisa kare ari kushoma kandi akatekateka oku ari kubasa kuta omu nkora ebi yayegire. Nobasa kumukwasa ota? Tebekanisa hamwe n’omwegi wawe kugira ngu omwereke oku ari kubasa kukikora. * Mwereke oku ari kubasa kutunga ecokugarukamu n’okuta akamanyiso aha bigambo bice ebiramukwase kuguma ari kwijuka. Bwanyima omushabe kuguma ari kugarukamu omu bigambo byeye. Ku arakikore basyoya, noyija kumanya yaba ari kucenga ebi ari kwega. Konka nabwe hariho ekindi kintu eki oshemerire kuguma kushaba omwegi wawe kukora.
MWEGESE KUGAMBA NA YEHOVA BURIZOBA
Yegesa omwegi wawe oku ari kubasa kugamba na Yehova omu kushaba (Reba paragurafu ya 10-11)
10. Ni guha mugasho g’okushoma Bibuli burizoba, kandi shi ni enki eki omwegi ashemerire kukora kugira ngu agasirwe?
10 Oyihireho kwega n’omwegesa buri sande, omwegi wa Bibuli nagasirwa yagira ebindi bintu ebi yayekorera aha bweye burizoba. Naba ashemerire kugamba na Yehova. Nakikora ata? Nakikora ari kuhurikiza kandi ari kugamba na Yehova. Nahurikiza Ruhanga ari kushoma Bibuli burizoba. (Yos 1:8; Zab 1:1-3) Mwereke oku ari kubasa kukoresa “Entebekanisa y’okushoma Bibuli” eri aha rubuga rwa jw.org. * Mukwase kugasirwa omu bi ari kushoma omuri Bibuli, omuhige kutekateka aha ki biri kumwegesa ahari Yehova n’oku ari kubasa kubita omu nkora omu kubaho kweye.—Byak 17:11; Yak 1:25.
11. Ni bata oku omwegi wa Bibuli ari kubasa kwega kushaba ge, kandi shi kushaba Yehova burizoba nikimugasira kita?
11 Higa omwegi wawe kugamba na Yehova ari kumushaba burizoba. Mwaza kutandika n’okuhendera kwega shaba obyihire aha mutima ori hamwe n’omwegi wawe kandi omute omu shara. Yahurira eshara zawe ezirugire aha mutima, nikituma na we yayega oku ari kubasa kushaba Yehova omu izina rya Yesu Kristo abyihire aha mutima. (Mat 6:9; Yoh 15:16) Tekateka oku kushoma Bibuli burizoba (kuhurikiza Yehova) n’okushaba (kugamba na Yehova) biri kubasa kukwasa omwegi kukizaho kuhika hihi ya Ruhanga! (Yak 4:8) Omwegi wa Bibuli yabikora burizoba kiryamukwasa kuhika aha kweha Yehova n’okubatizibwa.
KWASA OMWEGI WA BIBULI KUKIZAHO KUGIRA OBUNYWANI NA YEHOVA
12. Ni bata oku omwegesa ari kubasa kukwasa omwegi kukunda Yehova?
12 Ebi omwegi wa Bibuli ari kwega nibiba bishemerire kumuguma omu bwenge n’aha mutima. Ahabw’enki? Omutima gwitu oguri kutwariramu ebyetengo n’enyehurira, ni byo biri kutuhiga kugira eki twakora. Yesu akegesa abantu ebintu byingi kandi bakaba nibakunda kumuhurikiza. Konka, abantu bakamukuratira ahakuba akaba nabahika aha mutima. (Luk 24:15, 27, 32) Omwegi wawe ashemerire kureba Yehova nk’omuntu owa buzima, owu ari kubasa kugira na we obunywani, kandi akamureba nk’Ishe, Ruhanga weye, kandi munywani weye. (Zab 25:4, 5) Mwaba muri kwega Bibuli, ote omutima aha mitwarize mirungi ya Ruhanga. (Kur 34:5, 6; 1 Pet 5:6, 7) Enyegesa yona eyi mwakuba muri kwegaho, ote omutima aha burungi bwa Yehova. Kwasa omwegi wa Bibuli kushoborocerwa emitwarize mirungi ya Yehova, harimu rukundo, embabazi, n’okugira esaasi. Yesu akagamba ku ‘ekiragiro kikuru kandi ec’okubanza’ kiri ‘okukunda [Yehova] Ruhanga wawe.’ (Mat 22:37, 38) Gezaho kukwasa omwegi wawe kukunda Yehova n’omutima gweye gona.
13. Gamba oku turi kubasa kukwasa omwegi wa Bibuli kwega emitwarize mirungi ya Yehova.
13 Waba ori kuganira n’omwegi wawe, mushoborere ekiri kutuma wakunda Yehova. Eco nikituma omwegi yareba ku ashemerire kugira obunywani na Ruhanga. (Zab 73:28) Ecokureberaho: Mbehi omu kitabo eki muri kwega ninga omu cahandikirwe harimu ekintu ekiri kwereka rukundo, obwenge, oburinganiza n’amani ga Yehova ekiri kukuhika aha mutima? Kigambire omwegi wawe, kandi omwereke ku ni kimwe omu nshonga nyingi eziri kutuma wakunda Tata witu ow’omu iguru Yehova. Konka hariho ekindi kintu eki omwegi wa Bibuli ashemerire kukora kugira ngu ahike aha kubatizibwa.
MUHIGE KWIJA OMU NTERANE
Higa omwegi wawe kutandika kwija omu nterane juba! (Reba paragurafu ya 14-15)
14. Ni bata oku omu Baheburaayo 10:24, 25 hari kutugambira oku enterane ziri kukwasa omwegi kutunguka?
14 Twena nitwenda ngu abegi bitu bagire entunguka bahike aha kubatizibwa. Oburyo bumwe obu turi kubasa kubakwasamu ni okubahiga kwija omu nterane. Ababurizi abamanyirire bakagamba ku abegi abari kukunda kwija omu nterane bari kutunguka juba. (Zab 111:1) Ababurizi abamwe nibashobororera abegi babo ku barije kwegera byingi omu nterane ebi batari kwega baba bari kwega Bibuli. Shomera omwegi wawe omu Baheburaayo 10:24, 25, kandi omushoborere ebirungi ebi aritunga ku arije omu nterane. Omwereke vidiyo eyine omutwe oguri kugira ngu, Omu Nju y’Abahamya ba Yehova nihakorerwamu enki? * Kwasa omwegi wawe kwija omu nterane atari kosha.
15. Ni enki eki turi kubasa kukora kugira ngu tuhige omwegi kwija omu nterane burijo?
15 Ni enki eki ori kubasa kukora omwegi wawe yaba atari kwija omu nterane ninga shi atari kuzijamu burijo? Mugambire oshemerirwe ebi mwayegire omu nterane ezahwire. Eco nikibasa kumuhiga okukira okumweta. Muhe Omunara g’Omurinzi n’Akatabo k’Omukristo n’Omurimo g’okuburira ebi muri kwega. Mwereke ebi muriyega omu nterane ezirikurataho kandi omubuze ekiri kumushemeza. Ebi omwegi ararebe kandi akahurira aha nterane zeye z’okubanza nibyija kumunurira kukira byona ebi yahurire n’ebi yarebire omu gandi madini. (1 Kor 14:24, 25) Nayija kubuganayo abandi abu ari kubasa kutoreza ecokureberaho cabo kirungi kandi bamukwase kutunguka ahike aha kubatizibwa.
16. Ni bata oku turi kubasa kwegesa omwegi wa Bibuli kuhika aha kubatizibwa, kandi shi ni enki eki turishwijuma omu kicweka ekiri kukurataho?
16 Ni bata oku turi kubasa kwegesa omwegi wa Bibuli akahika aha kubatizibwa? Nitubasa kukwasa omwegi kureba omugasho oguri omu kwega Bibuli turi kumuhiga kwega buri sande n’okutebekanisa burijo waza kwega. Nambwenu nitumuhiga kugamba na Yehova burizoba omu kushaba n’okugira obunywani burungi na we. Nituhiga omwegi kwija omu nterane burijo. (Reba akashanduku akari kugira ngu: “ Ebi abegi bashemerire kukora kugira ngu bahike aha kubatizibwa.”) Konka, omu kicweka ekiri kukurataho turyashwijuma ebintu bitano ebi abegesa bashemerire kukora kugira ngu bakwase abegi ba Bibuli kuhika aha kubatizibwa.
ECESHONGORO CA 76 Nikukureetera Kwehurira Ota?
^ par. 5 Okwegesa omuntu ekintu nikimanyisa kumukwasa kutekateka, ninga kugira ekintu kisya eki yakora. Ecahandikirwe c’omwaka gwa 2020, kiri omuri Matayo 28:19, kikatwijusya omugasho g’okwegesa abantu Bibuli tukabahindura abegi ba Yesu Kristo ababatizibwe. Omuri eki kicweka n’ekiri kukurataho, nitwija kushwijuma oku turi kubasa kukora ge ogo murimo g’omugasho munonga.
^ par. 2 EBIGAMBO EBISHOBORWIRWE: Waba noganira n’omuntu ahari Bibuli burijo kandi mwine entebekanisa nikimanyisa ngu ni omwegi wa Bibuli. Nobasa kuhandika ogo mwegi ahari ripoti mwaba mwayegire emirundi ibiri bwanyima y’okukora entebekanisa, kandi okaba ori kwesiga ku aragumizemu kwega.
^ par. 3 Ebi bicweka birimu ebicweka ebyabire bikuratine ebyine omutwe oguri kugira ngu: “Yegesa abegi ba Bibuli abari kutunguka,” ebyashohwire omu butabo bw’Obuheereza Bwaitu obw’Obukama bw’omu Kwamushanju 2004 kuhisya omu Kwakatano 2005.
^ par. 9 Reba vidiyo eyine edakika ina, eyine omutwe oguri kukira ngu: Okwegyesa Omwegi wa Baibuli Kuteebekanisa. Ahari JW Library®, za ahari MEDIA > ENTEERANE ZAITU N’OBUHEEREZA > IMPROVING OUR SKILLS.
^ par. 10 Za ahari ENYEGESA ZA BIBULI > EBIKORESO BY’OKWEGESEZAMU BIBULI.
^ par. 14 Ahari JW Library®, za ahari MEDIA > ENTERANE ZITU N’OKUBURIRA > EBI TURI KUKORESA OMU KUBURIRA.
