1. Ni enki ekiri kubaho ku turi kuhwamu amani?

BURIZOBA nitubugana ebizibu kandi nituba twine kubyehanganira oku turi kubasa kona. Konka kwehanganira ebizibu nikitugumira twaba tuhwiremu amani. Obwe rero, tushemerire kureba okuhwamu amani nk’omushuma ori kubasa kutwibaho obwesige, obumanzi n’okushemererwa. Omu Nfumu 24:10 nihagira ngu: ‘Ku ori kugwa enshazi ah’izoba ry’okuhikirirwa, amani gawe gaba mace.’ Obwe rero, kuhwamu amani nikibasa kutuma twaremwa kwehanganira ebizibu ebi turi kubugana omu kubaho kwitu.

2. Ni biha bintu ebiri kubasa kutuma twahwamu amani, kandi shi ni enki eki twaza kushwijuma omuri eki kicweka?

² Hariho ebintu byingi ebiri kubasa kutumaramu amani, harimu ebi turi kurebesa amisho n’ebi tutari kurebesa amisho. Ebimwe omuri ebyo ni obutahikirira, obweremwa ninga shi endwara. Nambwenu, nibibasa kuba birimu okubura omurimo ogu twaba nitwetenga omu kitongore ca Yehova ninga kukorera omuri teritori erimu abantu abatari kuhurira obutumwa. Omuri eki kicweka, twaza kushwijuma ebintu ebi turi kubasa kukora kugira ngu tusingure ekizibu c’okuhwamu amani.

3. Ni enki ekiri kubasa kutukwasa kutetekatekaho kubi ahabw’obutahikirira bwitu?

³ Nikibasa kutworobera kuguma turi kwetekatekaho kubi ahabw’obutahikirira n’obweremwa bwitu. Eco nikibasa kutuma twatekateka ngu Yehova tarije kutuha omigisha g’okuhika omu nsi ensya ahabw’enshobi zitu. Mazima, eyo mitekatecere nebasa kuturetera akabi. Mbwenu shi ni bata oku tushemerire kureba obutahikirira bwitu? Bibuli negamba ku, oyihireho Yesu Kristo, abantu ‘bona bashishire.’ (Rom 3:23) Konka, omuhandiki wa Bibuli ari we Yehova tari kuta omutima  aha nshobi zitu ninga ngu atekateke ku turi abahikirire. Ahobwe, ni Tata ori kutukunda ori kwenda kutukwasa. Nambwenu Yehova natwehanganira. Nareba oku turi kutaho amani kugira ngu tusingure obweremwa bwitu n’okurwanisa ekizibu c’okwetekatekaho kubi, kandi naba ayetegwire kutukwasa.—Rom 7:18, 19.

4-5. Tukuratize ebiri omuri 1 Yohaana 3:19, 20, ni enki eki abanyanyazi babiri bakozire kikatuma batayikiriza kuhwamu amani?

⁴ Reba ecokureberaho ca Deborah na Maria. * Obu Deborah yabire acari omwana, akatwarizibwa kubi, kandi eco kikaba nikituma yayehurire ari busha. Akaba atari kusimwa. Eco kikatuma yatandika kwereba kubi. Ku yabire nakora akashobi kace, akaba nayehurira nk’otine omugasho. Maria na we eco ni co kizibu eki yabire ayine. Abanyabuzare beye bakaba nibamuhemukira. Eco kikaba nikituma yayehurira nk’otine mugasho. Na bwanyima y’okwija omu mazima, akaba nayereba nk’otahikire kwetererwa izina rya Ruhanga!

⁵ Konka abo banyanyazi tibararekire kuhereza Yehova. Ahabw’enki? Ahabw’okuba bakegecera Yehova omutwaro gwabo birabire omu kushaba bari kweshengereza. (Zab 55:22) Bakija kumanya ku Tata witu w’omu iguru ori kutukunda ari kumanya embera ezi twarabiremu n’oku ebitekateko byitu bibi biri kutumaramu amani. Nareba ebirungi omuri itwe, ni okugamba emitwarize yitu mirungi n’obu itwe tutari kubasa kugireba.—Shoma omuri 1 Yohaana 3:19, 20.

6. Ni enki eki omuntu ari kubasa kukora yagaruka kukora enshobi ezi yakozire?

⁶ Omuntu ori kutaho amani kugira ngu areke kukora ekibi nabasa kutera ensibo, rero ahurira yahwamu amani. Mazima, ti kibi kwecwera orubanja twacumura. (2 Kor 7:10) Konka, titushemerire kwecwera orubanja ngu turengesereze, tuhika n’aha kutekateka ngu titwine omugasho kandi ngu Yehova tari kubasa kutusaasira. Eyo emitekatecere ni mibi kandi nebasa kutuma twareka kuhereza Yehova. Yijuka ebi twashomire omu Nfumu 24:10: Ku turi kucweka entege amani gitu gaba mace. Ahobwe, tushemerire ‘kuhanuura’ hamwe na Yehova turi kumushaba ngu atusaasire. (Isa 1:18) Yehova yareba ku wayehana obyihire aha mutima, nayija kukusaasira. Nambwenu orondere obuhabuzi aha bazehe. Nibija kukukwasa kukira omu by’omwika.—Yak 5:14, 15.

7. Ahabw’enki tutashemerire kuhwamu amani twaba turi kugira eki twakora ngu tusingure obweremwa bwitu?

⁷ Omuzehe w’omuri Bufaransa ori kwetwa Jean-Luc akagambira abari kwehanganira  obweremwa ati: “Ohikirire omu misho ga Yehova ti ogo otari kukora enshobi, ahobwe ni ori kushasha ahabw’enshobi ezi yakora kandi akehana.” (Rom 7:21-25) Obwe rero, otayecwera orubanja waba ori kutamu amani ngu osingure obweremwa obu oyine. Yijuka ku twena turi abantu abatahikire omu misho ga Ruhanga. Obwe rero, twena nitwetenga embabazi za Ruhanga ezi ari kutuha birabire omu kitambo.—Efe 1:7; 1 Yoh 4:10.

8. Twahurira tuhwiremu amani, ni oha owu tushemerire kushaba obuyambi?

⁸ Nitubasa kuhika benetata na banyanyazi kugira ngu batugaruremu amani. Nibabasa kutuhurikiza ge twaba turi kubagambira kandi batuhumurize. (Enf 12:25; 1 Tes 5:14) Omunyanyazi w’omuri Nayigeriya ori kwetwa Joy owabire ahwiremu amani, akagamba ngu: “Nkabaho nta ntari hamwe na benetata na banyanyazi? Benetata na banyanyazi ni ekihamya ekiri kwereka ku Yehova ari kugarukamu eshara zange. Kandi nanye nkabegeraho kugumya abandi abahendekire omutima.” Konka, tushemerire kwijuka ku benetata na banyanyazi atari ko burijo bari kuba bari kumanya ku turi kwetenga obuyambi. Obwe rero, ni itwe tushemerire kuhika Omukristo okuzire omu by’omwika tukamugambira ku turi kwetenga obuyambi.

9. Ni bata oku ebigambo ebiri omuri Zaaburi ya 41:3 n’eya 94:19 biri kutugumya?

⁹ Shaba Yehova obuyambi. Twaba turwire, na munonga nk’endwara etari kukira, nitubasa kugira emitekatecere mibi. N’obu Yehova atari kutukiza omu buryo bw’ecokutangaza omuri obu bwire, nabasa kutuhumuriza kandi atuha amani agu turi kwetenga ngu twehangane. (Shoma omuri Zaaburi ya 41:3; 94:19.) Ecokureberaho: Nabasa kuhiga benetata na banyanyazi batukwasa omu mirimo y’omu ka, n’omu bindi. Nabasa n’okutuma benetata bashaba n’itwe. Nambwenu, nabasa kutukwasa kwijuka ebigambo by’omu Kigambo ceye ebiri kuhumuriza, nk’amasiko g’okwija kutura omu nsi ensya twine amagara marungi agatarimu oburwire n’obusaasi.—Rom 15:4.

10. Ni enki ecakwasize Isang kwerinda ekizibu c’okuhwamu amani bwanyima y’okukora butandu?

¹⁰ Mwenetata w’omuri Nayigeriya ori kwetwa Isang akatunga butandu, catuma omubiri gweye gwagangara. Omudokita weye akamugambira ku atarigaruka kugenda. Isang akagira ati: “Nkahurira nahendeka omutima.” Konka shi akaguma ahwiremu amani? Ingaha. Ni enki ecamukwasize? Isang akagamba ati: “Nyowe n’omukazi wange tukagumizamu kushaba Yehova obutosha n’okweyegesa Ekigambo ceye. Nambwenu tukagumizamu kutekateka aha migisha eyi twine, harimu amasiko g’okwija kugira amagara marungi omu nsi ensya.”

11. Ni enki ecakwasize Cindy kutunga okushemererwa obu yabire arwire?

¹¹ Omunyanyazi w’omuri Mekisiko ori kwetwa Cindy akarwara endwara yamani. Ni enki ecamukwasize kwehangana? Obu yabire ari omu irwariro, aketeraho entego y’okuburira burizoba. Akahandika ati: “Eco kikatuma nafa aha bandi omu mwanya g’okutekateka aha ndwara yange n’aha busaasi. Nkaba nintandikisa ekiganiro n’abadokita, ndi kubabuza ebikwatirine n’amaka gabo. Bwanyima, nkaba nimbabuza ecatumire bakora ogo murimo gugumire. Eco kikaba nikituma kumanya ebiri kubahika aha mutima canyanguhira. Abingi bakangambira ku abarwire batari kukira kubaganirira. Kandi abingi bakansima ahabw’okwereka ku nimbafaho. Abamwe bakampa n’enamba zabo zesimu. Obwe rero, omuri obwo bwire obwabire bungumire, Yehova akampa obusinge  bw’omu mutima, obu nabire ntari kutekateka!”—Enf 15:15.

12-13. Ni bata oku abarwire n’abine obumuga babasize kukora omurimo g’okuburira, kandi shi ni enki ecarugiremu?

¹² Abarwire n’abine obumuga nibabasa kuhurira bahwiremu amani ahabw’okuba batari kubasa kukora byingi omu murimo gwa Yehova. Konka nabwo, abingi nibagumizamu kuburira. Omunyanyazi ori kwetwa Laure w’omuri Amerika, akamara emyaka 37 ari omu coma ekiri kumukwasa kuhumeka! Akaba arwire kansa, bamushemize kandi arwire endwara z’oruhu. Konka ebyo bizibu tibiramuzibire kugumizamu ari kuburira. Akaba naburira abadokita n’abandi ababire nibija omu ka kumutayayira. Ni enki ecarugiremu? Akakwasa abantu 17 bona bayija omu mazima! *

¹³ Omuzehe w’omuri Bufaransa ori kwetwa Richard, hine eki ari kugambira abarwarire omu maka gabo n’aha marwariro. Nagira ati: “Nimbagambira ngu bate akameza k’ebitabo ahu abantu bari kureba. Abantu ku bari kurabaho nibabireba, rero babuza ebibuzo. Eco nikikwasa benetata na banyanyazi abatacabasa kuza kuburira aha nju n’enju.” Nambwenu, abatacabasa kuruga omu ka nibabasa kuburira bari kukoresa amabaruha n’esimu.

14. Ni kiha cokureberaho kirungi eki Omugabe Daudi yatuhire?

¹⁴ Hariho enshonga nyingi eziri kutuma tutatunga omurimo ogu turi kwenda omu kibina. Ecokureberaho: Nitubasa kuba turi omu myaka ya za bukuru ninga shi twine ebindi bizibu. Twahika omu mbera nk’ezo nitubasa kwegera aha cokureberaho c’Omugabe Daudi. Ku yagambirwe ngu ti we owu Ruhanga atorine ngu ayombeke hekalu, akashagika owu Ruhanga yatorine ngu akore ogo murimo, n’obu yabire ari kugwenda. Daudi akakora n’ekirengireho yatebekanisa ebikoreso by’okombecesa. Eco ku ni ecokureberaho kirungi eki tushemerire kutoreza!—2 Sam 7:12, 13; 1 Bus 29:1, 3-5.

15. Ni enki ecakwasize Hugues kwerinda kuhwamu amani?

¹⁵ Ahabw’okuba mwenetata Hugues w’omuri Bufaransa yarwire, akamereza omurimo g’obuzehe, kandi akaba atari kubasa n’okukora akarimo kanguhi omu ka. Akahandika ati: “Omu kubanza nkahurira ntine mugasho kandi nahwamu amani. Konka bwanyima y’obwire, nkareba omugasho g’okwikiriza ahu obushoborozi bwange buri kugarukira, kandi natunga okushemererwa ndi kukorera Yehova ebi mbasize. Mazima nkamaririra kwerinda kuhwamu amani. Nka Gideon n’abashija beye magana ashatu  ababire baruhire, nanye ndyagumizamu kurwana!”—Bar 8:4.

16. Ni enki eki turi kwegera ahari ba marayika?

¹⁶ Ba marayika ab’abesigwa ni ecokureberaho kirungi. Omu bwire bw’Omugabe Ahabu, Yehova akashaba ba marayika kumugambira oku bari kubasa kubihabiha ogo mugabe mubi. Ba marayika abamwe bakagamba ebi bari kutekateka. Konka Ruhanga akatorana marayika omwe yamugambira ku ekitekateko ceye kirije kukora. (1 Bag 22:19-22) Mbehi kikatuma abandi ba marayika bahwamu amani, obundi bari kutekateka ngu obwire bwabo bwafa busha? Ingaha mazima. Ba marayika ni abacurezi kandi nibaba bari kwenda ngu ekitinisa cona kibe eca Yehova.—Bar 13:16-18; Kush 19:10.

17. Ni enki eki turi kubasa kukora twahurira tuhwiremu amani ahabw’okutagira omurimo omu kibina?

¹⁷ Guma noyijuka omugisha ogu twine g’okwetererwa izina rya Ruhanga n’okuburira Obukama bweye. Nitubasa kutunga emirimo ninga shi tuyiferwa, konka ti yo eri kutuma twaba ab’omuhendo ahari Ruhanga. Okuba abacurezi ni co ekiri kutuma Yehova na benetata na banyanyazi batukunda. Obwe rero, shaba Yehova kugira ngu akukwase kuguma ori omucurezi. Guma otekateke aha byokureberaho by’abantu ababire bari abacurezi ebiri omu Kigambo ca Ruhanga. Guma obe oyetegwire kuhereza benetata na banyanyazi oku ori kubasa.—Zab 138:6; 1 Pet 5:5.

TWABA TWINE TERITORI ERIMU ABANTU ABATARI KUTUNGUKA

18-19. Ni bata oku ori kubasa kuguma oyine okushemererwa n’obu wakuba oyine teritori erimu abantu abatari kutunguka?

¹⁸ Mbehi hine obu wahurire ohwiremu amani ahabw’abantu b’omuri teritori yawe abatari kutunguka ninga shi abatari kushangwa omu ka? Ni enki eki turi kubasa kukora ngu tugume twine okushemererwa n’obu twakuba turi omuri ezo mbera? Reba obuhabuzi oburi kubasa kutukwasa omu kashanduku akari kugira ngu: “ Oku turi kubasa kuguma tushemerirwe omu murimo g’okuburira.” Nambwenu, ni ec’omugasho munonga kureba omurimo g’okuburira omu buryo buhikire. Eco nikimanyisa ki?

¹⁹ Guma otire omutima aha kumanyisa abantu izina rya Ruhanga n’Obukama bweye. Yesu akakigamba ge ku abantu bace ari bo barije kubona omuhanda gw’amagara. (Mat 7:13, 14) Twaba turi omu murimo g’okuburira nituba twine omugisha g’okukora na Yehova, Yesu na ba marayika. (Mat 28:19, 20;  1 Kor 3:9; Kush 14:6, 7) Yehova nayeyihiriza hihi abari kuba betegwire kumuhereza. (Yoh 6:44) Obwe rero, omuntu yaba atikirize obutumwa hati, nabasa kwija kubwikiriza obundi bwire.

20. Ni bata oku ebiri omuri Yeremia 20:8, 9 biri kutukwasa kurwanisa okuhwamu amani?

²⁰ Nitubasa kwegera byingi aha muhanuzi Yeremia. Akaba ayine teritori erimu abantu abatari kwenda kuhurira. Abantu bakaba nibamujuma kandi bamushecerera ‘izoba ryona.’ (Shoma omuri Yeremia 20:8, 9.) Eco kikatuma yahurira yahwamu amani yayenda n’okwemereza omurimo. Konka taragwemerize. Ahabw’enki? Ekigambo ca Yehova kikaba kiri nk’omuriro omuri Yeremia, kituma atareka kuburira. N’itwe nitubasa kuba nka we twashoma Bibuli burizoba kandi tukayitekatekaho. Eco nikija kutuma okushemererwa kwitu kwayeyongera kandi tuhike ahari byingi omu murimo g’okuburira.—Yer 15:16.

21. Ni enki ekiri kubasa kutukwasa kwerinda kuhwamu amani?

²¹ Deborah owu twaba tugambireho akagamba ngu: “Okuhwamu amani ni ekirwaniso eki Sitaane ari kukoresa kugira ngu atumaremu amani. Konka ebirwaniso bya Sitaane tibiri kukira ebya Yehova Ruhanga. Obwe rero, wahurira wahrwamu amani ahabw’enshonga eyari yo yona, ogume oshabe Yehova obuyambi. Nayija kukukwasa kusingura obutahikirira bwawe n’obweremwa bwawe. Nayija kukukwasa omu burwire bwawe. Nayija kukukwasa kugira emitekatecere mirungi aha murimo ogu oyine omu kibina. Nambwenu, nayija kukukwasa kugira emitekatecere mirungi aha murimo g’okuburira. Ekiri kukira byona, ogume ogambire Tata ori kutukunda ebizibu byawe byona. Mazima, Yehova nayija kukukwasa kwerinda kuhwamu amani.