BENETATA na banyanyazi bingi abarugire omu mahanga g’abagiga bakafurukira omu muhanga g’omu burengerwizoba, bakagaruka omu mahanga gabo. Rukundo eyi bari kukunda Yehova n’abatahi ekatuma baza kuburira ahari kwetengwa obuyambi. (Mat 22:37-39) Ni biha bintu ebi bayefererize, kandi shi ni eha migisha eyi batungire? Twaza kugamba ah’ihanga rya Kameruni omu burengerwizoba bwa Afurika.

Omu mwaka gwa 1998 mwenetata ori kwetwa Onésime akaruga omu ihanga ryeye rya Kameruni. Akamara emyaka 14 ari aheru y’ihanga. Izoba rimwe ari omu nterane, akahurira ecokureberaho ekiri kukwata aha murimo g’okuburira. Omugambi akagira ngu: “Abarobi babiri baba bari kurobera ebyenyanja omu myanya etari emwe, konka omwe akakwata byingi kukira ondijo, mbehi owaroba bice tari kubasa kuza ahu ari kubasa kuroba ebyenja byingi?”

Eco cokureberaho kikatuma Onésime yatekateka aha kugaruka omu ihanga rya Kameruni eririmu abantu bingi abine ekihika c’okwega Bibuli. Konka akaba atinire. Mbehi akaba arabase kumanyira embera z’omu ihanga ryeye eri yamazire emyaka myingi ataririmu? Kugira ngu Onésime amanyire, akatayaya omuri Kameruni yamarayo amezi mukaga. Rero omu mwaka gwa 2012, akazayo kuturayo.

Onésime akagira ngu: “Nkaba nyine kumanyira embera z’obutagasi n’oburyo busya bw’okubaho. Omu Nju y’Obukama, nkaba nyine kumanyira kushitama aha ntebe zitarimu obufariso. Akagamba ari kumwenya ngu: “Ku nagumizemu kuta omutima ahari puroguramu, kikatuma nayebwa entebe ezirimu obufariso.”

Omu mwaka gwa 2013, akagitwa na munyanyazi Géraldine, owabire amazire emyaka mwenda arugire omuri Bufaransa agarukire omuri Kameruni. Ni eha migisha eyi batungire ahabw’okuta Obukama omu mwanya g’okubanza? Onésime akagamba ngu: “Nyowe n’omukazi wange tukaza kwega Ishomero ry’Ababurizi b’Obukama bwanyima twaza kukora ahari Beteli. Omu mwaka ogwahwire, abegi ba Bibuli 20 omu kibina kitu bakabatizibwa. Eco kikatuma nareba ku ndi omu mwanya murungi g’okuroberamu.” (Mak 1:17, 18) Géraldine akongeraho ati: “Nkatunga emigisha myingi eyi nabire ntari kutekatekaho.”

Judith akafurukira omuri Amerika konka akaba ari kwenda kongera aha murimo gweye. Akagamba ngu: “Ku nabire ndi kutayayira abegi bange omuri Kameruni naza kutaha, nkaba nindira ahakuba nkaba nimanya ku ndi hihi kubasiga.” Konka, Judith taragarukire  omuri Kameruni. Akaba ayine omurimo murungi ogwabire guri kutuma yabasa kugurira emibazi ishe owabire ari omuri Kameruni. Konka, Judith akesiga Yehova yagaruka omuri Kameruni. Nagamba ku ari kuhurira asisire embera ndungi ezi yabire arimu omuri Amerika. Akashaba Yehova ngu amukwase kubuganisa n’embera kandi omureberezi ori kutayayira ebibina n’omukazi weye bakamugumya.

Judith akagamba ngu: “Nshemerirwe ahakuba omu myaka ishatu nkaba nabwine abana bana b’omu buryo bw’omwika.” Judith akaba omupayoniya w’omutano. Hati, nakora n‘omushija weye ori kwetwa Sam-Castel omu murimo g’okutayayira ebibina. Konka shi ni enki ecahikire ahari ishe wa Judith? Judith n’ab’eka yabo bakaronda irwariro ry’omu rindi ihanga kugira ngu bashemeze ishe. Ekiri kushemeza bakamushemeza kandi yakira.

Mwenetata ori kweta Victor akagaruka omuri Kanada. Ku yashomire Omunara g’omurinzi oguri kugamba aha kwega amashomero mingi, akatekateka aha mishomo yeye. Akareka kwega yunivasiti rero yaza kwega omwoga g’okukanika. Akagamba ngu: “Kikatuma natunga omurimo juba kandi catuma nabasa kukora omurimo g’obupayoniya.” Bwanyima, Victor akatasya munyanyazi ori kwetwa Caroline, kandi we n’omukazi weye bakaza kutayaya omuri Kameruni. Ku bagire kutayayira ofisi y’omuri Kameruni, kikatuma batekateka aha kuza kuherezayo. Victor akagamba ngu: “Tukashanga tutine enshonga y’okutuzibira kufurukirayo, kandi ku twaherize korobya embera, tukahika nituzayo.” N’obu Caroline yabire ari kukira kurwaragurika, bakafurukirayo.

Victor na Caroline bakatandika kuhereza bari abapayoniya b’obwire bwona kugira ngu bakwase abari kwenda kwega amazima. Ecabakwasize ni oku babire babicire esente eziri kumara. Bwanyima bakagaruka kukora amezi make omuri Kanada, ecatumire bagaruka omuri Kameruni kandi bagumizamu obupayoniya. Ni eha migisha eyi batungire? Bakega Ishomero ry’Ababurizi b’Obukama, bahereza nk’abapayoniya, kandi hati nibakora omu by’obwombeki. Victor akagira ngu: “Ku twikirize kuruga omu mwanya ogu twabire turi kukunda kikatuma twatunga obushagiki bwa Yehova.”

Omu mwaka gwa 2002, Alain owabire ari kwega omuri yunivasiti y’omuri Jamani, akashoma akatabo kace akari kugira ngu: Eminyeto; muryakoresa muta amagara ganyu? Ebi yashomiremu bikatuma yahindura entego zeye. Omu mwaka gwa 2006, akaza kwega Ishomero eriri kumanyiza abehireyo kukora emirimo rero yaza kuhereza omuri Kameruni ihanga eri yazarirwemu.

Omuri Kameruni, Alain akatunga omurimo g’okukora ebiro bice. Bwanyima, akatunga omurimo oguri kushashura esente nyingi, konka gukatuma atakora byingi omu murimo g’okuburira. Ku bamwesire ngu ahereze ari omupayoniya w’omutano, akahika ari kubyikiriza. Mukama weye akamuraganisa kumwongera omushara, konka Alain akaguma ahamiire aha nsharamu yeye. Bwanyima, Alain akagitwa na Stéphanie, owabire amazire emyaka myingi atwire omuri Bufaransa. Ni biha bigezo ebi munyanyazi yabugine bwanyima y’okufurukira omuri Kameruni?

Stéphanie akagamba ati: “Nkatandika kurwaragurika, konka nkaguma ndi kuza  ah’irwariro kuronda emibazi.” Ogo mushija n’omukazi weye bakatunga emigisha ahabw’okwehangana. Alain akagamba ngu: “Ku twagire kuburira omu caro ca hare ekiri kwetwa Katé, tukashangayo abantu bingi abari kwenda kwega Bibuli. Bwanyima, tukaba nitubegeseza Bibuli aha simu. Abegi babiri bakabatizibwa, kandi omutwe gw’ababurizi gukatandikaho.” Stéphanie akongeraho ati: “Tihariho okushemererwa okuri kukira okuri kuruga omu kukwasa abantu kweha Yehova. Tukatunga oko kushemererwa ku twatandikire kukorera kunuya.” Hati, Alain na Stéphanie nibatayayira ebibina.

Gisèle akabatizibwa obu yabire agire kwega eby’obushaho omuri Itale. Oburyo obu omukazi n’omushija b’abapayoniya abamwegesize Bibuli babire bari korobyamu embera bukatuma yayenda kukora byingi omu murimo g’okuburira. Gisèle ku yahendire emishomo yeye, akahika ari kutandika kuhereza ari omupayoniya w’obwire bwona.

Gisèle akaba ari kwenda ngu agaruke omuri Kameruni kukorera Yehova byingi, konka akaba atinire. Akagamba ngu: “Nkaba nyine kweyihaho obugabe bw’okutura omuri Itale kandi nkasigaho abanywani n’abanyabuze bange ababire batwireyo.” Konka nabwe, omu Kwakatano 2016, Gisèle akagaruka omuri Kameruni.

Ku hahwire obwire, akagitwa na mwenetata ori kwetwa Léonce, kandi ofisi y’omuri Kameruni ekabashaba kuza kukorera omu tawuni ya Ayos, eyabire eri kwetenga ababurizi.

Embera zikaba ziri zita omuri Ayos? Gisèle akashoborora ati: “Hine obu amashanyarazi gabire gari kumara esande yona gabuzire, oshanga twaremwa kucaginga amasimu gitu. Eco kikaba nikituma bamara obwire bwingi batari kukora. Nkega kutecesa enku, kandi tukaba nitukoresa engorofani turi kuza kutaha amizi nyekiro turi kumurikisa amatoki ahabw’okuba emigera ekaba eri mice.” Ni enki ecakwasize Gisèle n’omushija weye kumanyira ezo mbera? Gisèle akagamba ati: “Ecatukwasize ni omwika gwa Yehova, obushagiki bw’omushija wange, n’abeka yitu na banywani bitu.”

Mbwenu shi Gisèle ashemerirwe ahabw’okugaruka omu ihanga ryeye? Yego! Akagamba ati. “Ni amazima tukabugana ebizibu kandi twahurira twahwa amani, konka ku twabyehanganire tukareba ku twakozire eki twabire tushemerire kukora. Hati nitwesiga Yehova kandi nituhurira twine obunywani burungi na we.” Léonce na Gisèle bakaza kwega Ishomero ry’Ababurizi b’Obukama kandi hati ni abapayoniya b’omutano b’obwire buce.

Nk’abarobi b’ebyenyanja, abari kugaruka omu mahanga gabo nibaraba omu mbera zigumire kandi beferereza ebintu byingi kugira ngu bakwase abari kwenda kuhurira obutumwa bw’Obukama. Hatariho okubanganisa, Yehova tari kubasa kwebwa ababurizi abari kwereka rukundo ahabw’izina ryeye. (Neh 5:19; Heb 6:10) Mbehi waba ori omu rindi ihanga kandi omu ihanga eri wazarirwemu hari kwetenga ababurizi, oryabasa kugarukayo? Ku orakikore basyoya, noyija kutunga emigisha myingi.—Enf 10:22.