1-2. Ni bata oku turi kubasa kukuratiza obuhabuzi oburi omu Nfumu 4:25? Gamba ecokureberaho.

TEKATEKA ahari ebi byokureberaho bishatu. Omunyanyazi okuzire natekateka aha birungi ebyamubireho omu bwire bwa kare. Nabugana ebizibu hati, konka agumizamu kukora cona eki ari kubasa kugira ngu akorere Yehova. (1 Kor 15:58) Burizoba natekateka ari hamwe na banywani beye omu nsi ensya. Ondijo munyanyazi nayijuka oku omwe omu b’omu kibina yamushobize, konka akasharamu kucehuza. (Kol 3:13) Mwenetata nayijuka enshobi ezi yakozire, konka ata omutima aha kuguma ari omwesigwa ahari Yehova.—Zab 51:10.

² Ni enki eki abo Bakristo bona bari kubuganiraho? Bona nibijuka ebi bakozire omu bwire bwa kare, konka baguma batari kubitekatekaho. Ahobwe, nibakunda kutekateka aha biro by’omu misho.—Shoma omu Nfumu 4:25.

3. Ahabw’enki tushemerire kuguma turi kutekateka aha biro by’omu misho?

³ Ahabw’enki tushemerire kuguma turi kutekateka aha biro by’omu misho? Nk’oku omuntu atari kubasa kuguma ari kureba omu misho ari n’okureba enyima, ni ko n’itwe tutari kubasa kuguma turi kuhereza Yehova turi n’okutekateka aha bintu ebyatubireho omu bwire bwa kare.—Luk 9:62.

4. Ni enki eki twaza kushwijuma omuri eki kicweka?

⁴ Omuri eki kicweka, twaza kushwijuma ebintu bishatu ebiri kubasa kutuma twaguma turi kutekateka aha byatubireho. (1) okwefuza ebiro bya kare, (2) okuhurira oyine ekiniga, n’(3) okwecwera orubanja. Twaza kureba oku emisinge ya Bibuli eri kubasa kutukwasa ‘kwebwa eby’enyima,’ tukata omutima aha by’omu misho.—Fil 3:13.

5. Ni kiha kintu ekiri kugambwa omu Mubuurizi 7:10 eki tushemerire kwerinda?

⁵ Shoma omu Mubuurizi 7:10. Eki cahandikirwe tikiri kugamba ngu ni kibi kwebuza ngu: ‘Ahabw’enki ebiro bya kare biri kukira ebya hati?’ Kwijuka ni ekiconco eki Yehova yatuhire. Ahobwe, eco cahandikirwe nikigamba ngu: ‘Otagira oti: Ahabw’enki ebiro bya kare biri kukira ebya hati?’ Omu bindi bigambo, eco nikituma twatandika kugeranisa ebiro bya kare n’ebya hati, rero tutekateka ngu ebiro bya hati ni bibi munonga. Obundi buhinduzi bwa Bibuli nibugamba oru runyiriri buti: “Otaribuza ngu: ‘Ahabw’enki embera zabire ziri ndungi munonga omu biro bya kare?’ Ti ec’obwenge kubuza eco kibuzo.”

6. Ahabw’enki kitari ec’obwenge kuguma turi kutekateka ngu tukaba turi omu embera ndungi? Gamba ecokureberaho.

⁶ Ahabw’enki kitari ec’obwenge kuguma turi kutekateka ngu tukaba turi omu embera ndungi? Kwefuza ebiro bya kare nikituma twatekateka aha birungi byonka ebi twabugine omu biro bya kare. Kandi eco nikituma twayebwa ebintu bibi ebi twabugine. Yetegereze ecokureberaho c’Abisirayeli. Bwanyima y’okuruga omuri Misri, bakebwa embera mbi ezi babire barimu bacariyo. Ahobwe, bakijuka ebyokurya birungi ebi babire bari kurya. Bakagamba ngu: ‘Twayijuka ebyenyanja ebi twabire turiira busha tukiri omuri Misri, emyongo, ebihaza, obutunguru bw’ebibabi n’obw’ebitakuri, na katunguricumu.’ (Kub 11:5) Konka shi mazima ebyo byokurya bakaba ‘nibabirira busha?’ Ingaha. Abisirayeli bakaba nibabihendekera munonga, kandi bakaba nibabonabonesibwa bari abagaragwa omuri Misri. (Kur 1:13, 14; 3:6-9) Konka bwanyima bakebwa ezo mbera ezabire zigumire, batandika kwefuza ebya kare. Bakata omutima aha birungi ebi barabiremu omu mwanya g’okuta omutima aha birungi ebi Yehova yabire ari kubakorera. Yehova tarashemerirwe ahabw’ogo mutwarize ogu bayorekire.—Kub 11:10.

7. Ni enki ecakwasize munyanyazi omwe kwerinda kwefuza ebiro bya kare?

⁷ Ni bata oku turi kubasa kwerinda kwefuza ebiro bya kare? Tekateka ahari  munyanyazi owatandikire kuhereza ahari Beteli ya Brooklyn omu mwaka 1945. Bwanyima akagitwa na mwenetata, rero bagumizamu kuhereza hamwe ahari Beteli. Konka, omu mwaka gwa 1970, omushija weye akarwara. Akagamba ngu iba ku yarebire ari hihi kufa akamuha obuhabuzi burungi obwabire buramukwase ari omufakazi. Akamugambira ngu: “Tukatunga eka eshemerirwe kandi abantu bingi eco ni co eki bari kuba nibenda.” Konka akamwijusya ngu: “Noyija kuguma kwijuka ebirungi ebi twarabiremu hamwe, konka otaguma ori kubitaho omutima. Bwanyima y’obwire, obusaasi nibwije kucendera. Otarihwa amani ninga shi ngu oyesasibwe ahabw’ebi warabiremu. Guma kushemerererwa obwire obu twamazire hamwe turi kuhereza Yehova. Okwijuka ni ekiconco eki Ruhanga yatuhire.” Mbehi obwo ti obuhabuzi burungi?

8. Ni bata oku omunyanyazi witu yagasirwe akabw’okwerinda kuta omutima aha bya kare?

⁸ Omunyanyazi witu akata ebyo bigambo aha mutima. Akagumizamu kuhereza Yehova omu bwesigwa kuhisya obu yafire ayine emyaka 92. Atakafire, akagira ngu: “Ku ndi kutekateka aha by’enyima nkareba oku namazire emyaka 63 ndi kuhereza Yehova omu murimo g’obwire bwona, mazima nimpurira mazirwe.” Ahabw’enki? Akashoborora ngu: “Mazima ekiri kutuma twamarwa ni eka yitu ya benetata na banyanyazi n’amasiko agu twine g’okutura omuri Paradiso omu nsi, turi hamwe na benetata na banyanyazi, turi kuhereza Omuhangi witu Mukuru, Ruhanga ow’amazima, Yehova, ebiro byona.” * Eco ku ni ecokureberaho kirungi c’omwe omu bagumizemu kuta omutima aha biro by’omu misho!

9. Nk’oku biri kugambwa omu Baleevi 19:18, ni ryari obu kiri kutugumira kusasira abandi?

⁹ Shoma omu Baleevi 19:18. Nikibasa kutugumira kusasira omuntu owatutwarize kubi yaba ari ow’omu kibina, munywani witu  ninga shi omunyabuzare. Ecokureberaho: Omunyanyazi akabeherera mugenzi weye ku amwibire esente. Bwanyima omunyanyazi owabire ari omu nshobi akashaba embabazi, konka mugenzi weye akaguma ari kukitekatekaho. Mbehi n’iwe warehurire basyoya? N’obu abamwe omuri itwe tutakahikaga omuri ezo mbera, nitubasa kuba twahurire twagirira ekiniga omuntu kandi tuhurira tutari kubasa kumusasira.

10. Ni enki ekiri kubasa kutukwasa twahurira twinire omuntu ekiniga?

¹⁰ Ni enki ekiri kubasa kutukwasa twahurira twinire omuntu ekiniga? Ekiri kubasa kutukwasa, ni okwijuka ku Yehova ari kureba ebintu byona. Namanya ebintu byona ebi turi kurabamu n’okutwarizibwa kubi oku turi kubugana. (Heb 4:13) Twashasha na we nashasha. (Isa 63:9) Kandi naturaganisa ku arije kutwihiraho ebintu byona ebiri kutubonabonesa.—Kush 21:3, 4.

11. Ni bata oku turi kugasirwa twasasira abandi?

¹¹ Tushemerire kwijuka ku turije kugira amagara marungi twasasira abandi. Eco omunyanyazi owu babeherire akacerebera. Obwire bukahika yayebwa eby’enyima. Akega ku twasasira abandi, Yehova na we ari kutusasira. (Mat 6:14) Akaba ari kumanya ku eki Omukristo mugenzi weye yamukorire kiri kibi, konka akasharamu kumusasira. Eco kikatuma yagumizamu kushemererwa kandi yaguma atire omutima aha kuhereza Yehova.

12. Ni enki eki turi kwegera aha biri omuri 1 Yohaana 3:19, 20?

¹² Shoma omuri 1 Yohaana 3:19, 20. Twena hine obu turi kwecwera orubanja. Ecokureberaho: Abamwe nibecwera orubanja ahabw’ebintu ebi bakozire batakegire amazima. Abandi bo nibecwera orubanja ahabw’enshobi ezi bakozire bamazire kubatizibwa. (Rom 3:23) Mazima, nitwenda ngu tugume turi kukora ebirungi. Konka ‘twena nitushobya omuri byingi.’ (Yak 3:2; Rom 7:21-23) N’obu tutari kubasa kushemererwa twayecwera orubanja, konka nikitukwasa. Ahabw’enki? Ahabw’okuba twaba turi kwecwera orubanja nikibasa kutukwasa kuhinduka kandi tumaririra kutagaruka kukora enshobi ezi twakozire.—Heb 12:12, 13.

13. Ahabw’enki tushemerire kwerinda omutwarize g’okuhurira turi kwecwera orubanja?

¹³ Konka, hine obu turi kubasa kuguma turi kwecwera orubanja n’obu twakuba twayehanire ebicumuro byitu kandi Yehova yatwerekire ku yatusasire. Eco ni kibi munonga. (Zab 31:10; 38:3, 4) Ahabw’enki? Tekateka aha cokureberaho c’omunyanyazi owagumire ari kwecwera orubanja ahabw’ebibi ebi yabire akozire kare. Akagamba ati: “Nkehurira ntari kubasa kukora byingi omu murimo gwa Yehova ahabw’okuba nkaba nimpurira nk’owacererirwe.” Abingi omuri itwe tukahikwaho embera n’ez’ogu munyanyazi. Obwe rero, tushemerire kwerinda omutwarize g’okuhurira turi kwecwera orubanja. Ahabw’enki? Ahabw’okuba Sitaane nashemererwa yareba twareka kuhereza Yehova kandi yatusasire!—Geranisa ebiri omu 2 Bakorinso 2:5-7, 11.

14. Ni enki ekiri kutuhamiza ku Yehova acatukunzire?

¹⁴ Konka nabwe, nitubasa kwebuza ngu: ‘Obwe shi Yehova acankunda?’ Twayebuza eco kibuzo, ni itwe turi kushuba tukacegarukamu. Emyaka myingi eyahwire, Omunara g’Omurinzi gukagamba ngu: “Nitubasa kuguma turi kukora ebintu bibi ebi twakozire omu bwire bwa kare. . . . Eco cabaho otahwa amahi. Otatekateka ku wakora ekibi eki Yehova atari kubasa kukusasira. Sitaane ni ko ari kwenda ngu oyehurire. Ahobwe wakora eco kibi okehurira washasha ni ekiri kwereka ku otakahikire hare. Gumizamu kushaba Ruhanga kugira ngu akusasire kandi akukwase kureka kugaruka kukora  eco kibi. Omuhungireho nk’oku omwana ari kuhungira aha muzire weye yahikwaho akabi, n’obu yakuba ari kukora enshobi emwe emirungi myingi, kandi Yehova nayija kukukwasa ahabw’okuba ni Ruhanga w’embabazi.” *

15-16. Ni bata oku bamwe bayehurire ku bamanyire ngu Yehova acabakunda?

¹⁵ Abahamya ba Yehova bingi ku bari kumanya ngu Yehova acabakunda nikibahumuriza. Ecokureberaho: Omu myaka eyahwire, mwenetata omwe akashoma enkuru eri omu kicweka ekiri kugira ngu: “Bibuli nehindura amagara g’abantu,” yamugumya. Akashoma omuri eco kicweka omunyanyazi owabire agumirwe kwesiga ku Yehova ari kumukunda ahabw’ebibi ebi yabire akzire omu bwire bwa kare. Ogo munyanyazi akaguma ari kwecwera orubanja na bwanyima y’okubatizibwa. Konka, ku yatekatekire munonga aha kitambo, akatandika kwesiga ku Yehova ari kumukunda. *

¹⁶ Eco cokureberaho kikakwasa kita mwenetata? Akahandika ati: “Obu nabire ncari muto nkaba ninkira kureba ponogurafe kandi kikaba kingumire kubireka. Ku hahwire obwire, nkashuba natandika kubireba. Nkarondera obuhabuzi aha bazehe b’ekibina kandi nakora empinduka. Abazehe bakampamiza ku Yehova ari kunkunda kandi ku ari kwenda kunsasira. Konka nabwe, ninkira kuhurira ntine omugasho kandi mpurira Yehova atari kunkunda. Ku nashomire enkuru y’omunyanyazi, ekankwasa. Hati nimanya ku ntashemerire kuhurira ku Ruhanga atari kunsasira; nkikozire nimba ndi kugamba ku ekitambo c’Omwana weye kitari kubasa kushweka ebibi byange. Eco kicweka nkakibika ngu ngume nkishome kandi nkitekatekeho nagira ezo nyehurira.”

17. Ni bata oku entumwa Paulo yayerinzire kwecwera orubanja?

¹⁷ Ebyokureberaho nk’ebyo nibitwijusya ebyahikire aha ntumwa Paulo. Atakabire Omukristo akaba nakora ebibi byingi munonga. Paulo akaba nayijuka ebi yakozire, konka akaba atari kubitaho omutima. (1 Tim  1:12-15) Akaba nareba ekitambo nk’ekiconco c’omuhendo eki Ruhanga yamuhire. (Gal 2:20) Eco kikatuma Paulo atagumizamu kwecwera orubanja, rero yata omutima aha kuha Yehova ebirungi kukira ebindi.

18. Ni enki eki twayegera omuri eki kicweka?

¹⁸ Ni enki eki twayegera aha bintu bishatu ebi twashwijuma omuri eki kicweka? (1) Okwijuka ni ekiconco eki Yehova yatuhire; konka n’obu embera zabire zibonire kare, ebiro by’omu misho byo nibyija kuba biri birungi munonga. (2) Abandi nibabasa kutugwisa kubi, konka twabasasira nikitukwasa kugumizamu kuhereza Yehova. (3) Twayecwera orubanja nikituma tutahereza Yehova tushemerirwe. Nka Paulo, tushemerire kwesiga tutari kubanganisa ku Yehova yatusasire.

19. Nitumanya tuta ku omu nsi ensya tutarije kwijuka ebintu byona ebi twakozire kare?

¹⁹ Twine omugisha g’okubaho ebiro byona. Ku turiba tutwire omu nsi ensya, titurije kwijuka ebintu byona ebi twakozire by’okutugwisa kubi. Bibuli negamba ahari obwo bwire eti: ‘Ebya ira tibirijukwa.’ (Isa 65:17) Tekateka ahari eki: Abamwe omuri itwe tubire abagurusi n’abakikuru turi kuhereza Yehova, konka omu omu nsi ensya, nitwija kushuba tube bato. (Yob 33:25) Reka twena tumaririre kureka kutekateka aha biro bya kare. Ahobwe, reka tumaririre kutekateka aha biro eby’omu misho!