1. Tukuratize ebiri omuri Matayo 7:13, 14, ahabw’enki turi kubasa kugamba ku turi omu rugendo?

TWENA turi omu rugendo. Entego yitu ni okutura omu nsi nsya eriba eyebembirwe omutegeki omunyarukundo ari we Yehova. Burizoba, nitugezaho kugendera omu omuhanda oguri kutasya omu magara. Konka, Yesu akagamba ku ogo muhanda gufunzire kandi ku kigumire kugurabamu. (Shoma omuri Matayo 7:13, 14.) Tituhikirire kandi corobi kuruga omuri ogo muhanda.—Gal 6:1.

2. Ni enki eki twaza kushwijuma omuri eki kicweka? (Nambwenu, reba akashanduku akari kugira ngu: ‘ Obucurezi nibutukwasa kukora empindahinduka.’)

² Twaba turi kwenda ngu tugume omu muhanda ogufunzire oguri kutasya omu magara, tushemerire kuhindura emitekatecere yitu n’emitwarize yitu. Entumwa Paulo akahiga Abakristo b’omuri Korinso kugumizamu kukora empindahinduka. (2 Kor 13:11) Oko kurabura n’itwe nikutukwataho. Omuri eki kicweka, twaza kushwijuma oku Bibuli eri kutukwasa kukora empindahinduka n’oku abanywani abakuzire bari kutukwasa kuguma omu muhanda oguri kutasya omu magara. Nambwenu, twaza kushwijuma obu kiri kubasa kutugumira kukuratira obuhabuzi obu ekitongore ca Yehova kiri kutuha. Twaza n’okureba oku obucurezi buri kubasa kutukwasa kukora empindahinduka kandi tukaguma twine okushemererwa.

3. Ni bata oku Ekigambo ca Ruhanga kiri kubasa kutukwasa?

³ Twagezaho kushwijuma emitekatecere yitu n’enyehurira zitu, nitubasa kubugana ekigezo. Kigumire kweshwijuma ahabw’okuba omutima gwitu nigubasa kutuhabisa. (Yer 17:9) Corobi kwebiha tukikiriza ebitekateko bibi. (Yak 1:22) Obwe rero, tushemerire kukoresa Ekigambo ca Ruhanga kugira ngu kituhabure. Ekigambo ca Ruhanga nikishurura abu  turi bo mu nda, ‘ebi turi kutekateka n’ebi tumaririre kukora omu mutima gwitu.’ (Heb 4:12, 13) Nitubasa kugamba ku Ekigambo ca Ruhanga kiri nk’ecoma ekiri kureba eby’omunda, kikatukwasa kwemanya ge. Konka, tushemerire kuba abacurezi twaba turi kwenda ngu obuhabuzi obu turi kutunga omuri Bibuli ninga shi omu kitongore ca Yehova butugasire.

4. Ni enki ekiri kwereka ku Saulo yabire omuntu ori kwetungura?

⁴ Ecokureberaho c’Omugabe Saulo nikitwereka ekiri kubaho twaremwa kuba abacurezi. Saulo aketungura yaremwa kwikiriza ku ashemerire kuhindura ebitekateko byeye n’ebikorwa byeye. (Zab 36:1, 2; Hab 2:4) Yehova akagambira Saulo eby’okukora yamara kucwecereza Abaamaleki. Konka, Saulo akanga korobera Yehova. Kandi omuhanuzi Samueli ku yamugambire ebikwatirine n’eyo nshonga, Saulo tarikirize enshobi zeye. Ahobwe, akagezaho kweshoborora n’okorobya enshobi zeye kandi yazita aha bandi. (1 Sam 15:13-24) Ebyo bitakabireho, nabwe akaba yayerekire omutwarize gw’okwetungura. (1 Sam 13:10-14) Ekiri kushasha, akikiriza omutima gweye kwetungura. Akanga kuhindura entekateka yeye, eco catuma Yehova yamuhana kandi yamwanga.

5. Ni enki eki turi kwegera aha cokureberaho ca Saulo?

⁵ Nitubasa kwegera ahari Saulo, twayebuza ebibuzo nk’ebi: ‘Mbehi natunga obuhazi omu Kigambo ca Ruhanga, nimpika ndi kuhindura emitekatecere yange? Mbehi ningezaho kutekateka ku ebi ndi kukora bitari bibi? Mbehi ninta emishango aha bandi ahabw’ebi ndi kukora?’ Yaba ecokugarukamu kitu ahari ebi bibuzo kiri yego, tushemerire kuhindura emitekatecere yitu. Twaba tutakikozire, nikibasa kutuma twayetungura kandi Yehova atayikiriza ngu tube banywani beye.—Yak 4:6.

6. Omugabe Saulo n’Omugabe Daudi nibatanira nkahe?

⁶ Yetegereze entanisa eri ahagati y’Omugabe Saulo n’Omugabe Daudi, owabire ari kukunda ‘ebiragiro bya [Yehova].’ (Zab 1:1-3) Daudi akaba namanya ku Yehova ari kujuna abacurezi, akanga abari kwetungura. (2 Sam 22:28) Eco kikatuma Daudi yayikiriza ngu ebiragiro bya Ruhanga bihindure emitekatecere yeye. Akahandika ngu: ‘Ninsima [Yehova] ompa obwenge, kandi nyekiro omutima gwange gunyegesa.’—Zab 16:7.

7. Ni enki eki turikora twaba turi abacurezi?

⁷ Twaba abacurezi, nikituma twayikiriza Ekigambo ca Ruhanga kuhindura ebitekateko byitu bibi bitakatumire twashisha. Ekigambo ca Ruhanga kiri nk’iraka eriri kutugambira ngu: ‘Ogu ni go muhanda, mube ni go mwahamya.’ Nikituhabura twatandika kutora omu muhanda mubi. (Isa 30:21) Twahurikiza Yehova, nikitugasira munonga. (Isa 48:17) Ecokureberaho: Titurije kwehurira kubi hagira omuntu owatuha obuhabuzi. Kandi nitwija kuhika hihi ya Yehova ahabw’okuba turi kwerebera ku ari kututwara nk’abana beye abu ari kukunda.—Heb 12:7.

8. Nk’oku biri kugambwa omuri Yakobo 1:22-25, ni bata oku turi kubasa kukoresa Ekigambo ca Ruhanga nk’endeberwamu?

⁸ Ekigambo ca Ruhanga kiri nk’endeberwamu. (Shoma omuri Yakobo 1:22-25.) Abingi omuri itwe nitukira kwerebera omu ndeberwamu omu kasheshe twaza kuruga omu ka. Nitureba yaba tushemerire kweboneza abandi batakaturebire. Ni co kimwe, twaba turi kushoma Bibuli burizoba, nitwija kureba yaba tushemerire kukora empinduka omu mitekatecere yitu. Abingi nibega ecahandikirwe ca burizoba omu kasheshe batakarugire omu ka. Nibikiriza ngu ebi bashoma bihindundure emitekatecere yabo. Eco nikituma izoba ryona bata omu nkora ebi bayega omuri Bibuli. Nambwenu, tushemerire  kushoma Ekigambo ca Ruhanga kandi tukakitekatekaho burizoba. Nikirebeka nk’ekintu corobi, konka ni co kintu ekiri kubasa kutuma twaguma omu muhanda ogufunzire oguri kutasya omu magara.

9. Ni ryari obu munywani wawe ari kubasa kukuha obuhabuzi?

⁹ Mbehi hine obu wagendire omu muhanda ogwatumire obunywani bwawe na Yehova bwasisikara? (Zab 73:2, 3) Mbwenu shi munywani wawe okuzire omu by’omwika ku yakuhire obuhabuzi, okamuhurikiza kandi wata omu nkora obuhabuzi bweye? Ku orabe wakikozire, mazima okakora ekintu kirungi kandi wamusima.—Enf 1:5.

10. Ni bata oku oshemerire kutwaza munywani wawe yakuha obuhabuzi?

¹⁰ Ekigambo ca Ruhanga nikitwijusya ngu: ‘Obuhuta obu ohutazibwa omunyamukago n’obuhikire.’ (Enf 27:6) Eco nikimanyisa ki? Tekateka ahari eki cokureberaho: Reka tugire ngu ori omu muhanda gurimu emotoka nyingi kandi ohugiire aha simu. Wayambuka omuhanda otabandize kureba aha rubaju, rero munywani wawe yakukwata omukono yakugarura enyima. Ahabw’okuba yakukwatisa amani, omukono gwawe gwashasha, konka catuma emotoka etakutomera. N’obu omukono guri kubasa kumara ebiro guri kushasha, noyitwa ekiniga ahabw’okuba munywani wawe yakukurura shi? Ingaha mazima! Ahobwe, nomusima ahabw’okukukiza. Ni co kimwe, munywani wawe yakugambira ku ebigambo byawe ninga shi ebikorwa byawe bitari birungi, omu kubanza nikibasa kukushasha. Konka, otariyanga obwo buhabuzi ninga ngu omwitirwe ekiniga. Noba wakora ec’obushema. (Mub 7:9) Ahobwe, omusime ahabw’obumanzi obu yayereka kugira ngu abikugambire.

11. Ni enki ekiri kutuma abamwe bayanga kwikiriza obuhabuzi obu banywani babo bari kubaha?

¹¹ Ni enki ekiri kutuma abamwe bayanga kwikiriza obuhabuzi obu banywani babo bari kubaha? Ni okwetungura. Abantu abari kwetungura nibakunda ‘kukinga amatu gabo’ kandi ‘banga kuhurira amazima.’ (2 Tim 4:3, 4) Nibaba bari kutekateka ku batari kwetenga obuhabuzi kandi ku bari abanyabwenge kusinga abandi. Konka, entumwa Paulo akahandika ngu: ‘Omuntu ori kwetekatekaho ngu n’ekintu, haza kunu atine ku ari, naba nayebiha.’ (Gal 6:3) Omugabe Sulemaani akabishoborora ge. Akahandika ngu: ‘Omusigazi omworo ow’obwenge nakira omugabe okuzire omushema, otacenda kuhaburwa.’—Mub 4:13.

12. Nk’oku biri kugambwa omu Bagalatia 2:11-14, ni enki eki turi kwegera aha ntumwa Petero?

¹² Yetegereze ecokureberaho eki entumwa Petero yatuterireho obu entumwa Paulo yamuherire obuhabuzi omu misho ga bona. (Shoma omu Bagalatia 2:11-14.) Kuri Petero yatire omutima aha ku Paulo yamuhire obuhabuzi n’ahu yabumuherire, akaba ari kubasa kubwanga. Konka, Petero akaba ari omunyabwenge. Akikiriza obwo buhabuzi kandi taranyigire Paulo. Ahobwe, bwanyima akagamba ku Paulo yabire ari ‘mugenzi wabo ori kukundwa.’—2 Pet 3:15.

13. Ni biha bintu ebi oshemerire kutekatekaho waza kuha munywani wawe obuhabuzi?

¹³ Ni biha bintu ebi oshemerire kutekatekaho waza kuha munywani wawe obuhabuzi? Mbere y’okugira eki wamugambira, oshemerire kwebuza ngu: “Mbehi ninyereba nk’omuntu ‘orengeserize okuhikirira’?” (Mub 7:16) Omuntu ori kutekataka ku ahikirire nacwera abandi orubanja, kandi tari kuha obuhabuzi agendire aha misinge ya Yehova. Wamara kweshwijuma noyija kushanga oshemerire kugambira munywani wawe ekizibu eki ayine, kandi okorese  ebibuzo ebiramukwase kureba enshobe yeye. Oshemerire kukoresa Bibuli waba ori kuhabura munywani wawe, kandi oyijuke ku atari iwe oshemerire kumucwera orubanja, ahobwe ku ni Yehova. (Rom 14:10) Koresa obwenge oburi omu Kigambo ca Ruhanga, kandi waba ori kuha omuntu obuhabuzi, toreza Yesu ori kugira esaasi. (Enf 3:5; Mat 12:20) Ahabw’enki? Ahabw’okuba Yehova nayija kututwariza nk’oku turi kutwariza abandi.—Yak 2:13.

14. Ni biha bintu ebi ekitongore ca Yehova kiri kutuha?

¹⁴ Yehova natuhabura omu muhanda oguri kuza omu magara akoresize ekitongore ceye c’omu nsi ekiri kutuha za vidiyo, ebitabo, n’enterane ebiri kutukwasa kuta omu nkora obuhabuzi oburi omu Kigambo ceye. Ebyo byona nibiba byegamire omu Byahandikirwe. Ab’omu Kakiko k’Abarisa baba bari kushwijuma oku omurimo g’okuburira gurakorwe ge, nibashaba omwika oguri kwera. Nambwenu, burijo nibashwijuma ensharamu ezi bakozire aha bikwatirine n’oku omurimo guri kukorwa. Ahabw’enki? Ni ahabw’okuba embera z’ensi nizihindahinduka, kandi ekitongore ca Yehova na co kishemerire kugenda n’empindahinduka.—1 Kor 7:31.

15. Ni kiha kigezo eki ababurizi abamwe babugine?

¹⁵ Mazima, twatunga obuhabuzi busya aha by’emicwe, nituhika turi kubwikiriza kandi tubuta omu nkora. Konka shi ni enki eki turi kukora ekitongore ca Yehova cakora empinduka eziri kukwata aha mbera zitu ezindi? Ecokureberaho: Omu myaka eyahwire, esente eziri kushohorera aha kombeka amaju gitu g’okuramizamu n’okugaboneza zikakizaho kweyongera. Eco kikatuma Akakiko k’Abarisa karagira ebibina byingi kukoresereza hamwe Amaju g’Obukama. Ezo mpinduka zikatuma ebibina byateranizibwa hamwe, kandi twaguza bimwe omu Byombeko by’Obukama. Esente ezi twabikire zikakoresibwa omu kombeka Enju z’Obukama omu bicweka ebiri kuzetenga munonga. Waba wabire otwire omu myanya ahu twagurize Enju y’Obukama kandi ebibina bikateranizibwa hamwe, kumanyira empinduka nsya nikibasa kukugumira. Ababurizi abamwe nibakora orugendo ruringwa kugira ngu baze omu nterane. Abandi abatireho amani gabo kugira ngu bombeke Enju y’Obukama  nibabasa kwebuza enshonga ahabw’enki twayigurize. Nibabasa kutekateka ngu amani gabo n’obwire bwabo ebi bakoresize bikafa busha. Konka nabwe, bacagumizemu korobera eyi ntebekanisa nsya kandi nibasimwa munonga.

16. Ni bata oku kuta omu nkora obuhabuzi oburi omu Bakolosai 3:23, 24 kiri kutukwasa kuguma twine okushemererwa?

¹⁶ Nitwija kuguma twine okushemererwa ku turayijuke ku ebi turi kukora byona turi kubikorera Yehova kandi ku ari kwebembera ekitongore ceye. (Shoma omu Bakolosai 3:23, 24.) Omugabe Daudi akatuteraho ecokureberaho kirungi obu yahayo itungo ryeye omu kombeka hekalu. Akagamba ati: ‘Mbwenu nkanye ndi oha, nyowe n’abantu bange, okubasa kukuhongera tuti n’omutima gwekundire? Ahakuba byona biruga ahari iwe, kandi ebi twakuha ni ebyawe.’ (1 Bus 29:14) Twahereza Yehova esente, nituba twamuha aha bi yatuhire. Nambwenu, Yehova natusima ahabw’obwire, amani, n’ebintu ebi turi kuhayo kugira ngu tushagike omurimo gweye.—2 Kor 9:7.

17. Ahabw’enki otashemerire kuhurira wahwa amani wareba oshemerire kuhindura omu ku obire ori kutwaza?

¹⁷ Kugira ngu twena tugume omu muhanda ogufunzire oguri kutasya omu magara, tushemerire kutoreza Yesu. (1 Pet 2:21) Wareba oshemerire kuhindura omu ku obire ori kutwaza, otahurira wahwa amani. Ako ni akamanyiso akari kukwereka ku ori kwenda korobera obuhabuzi bwa Yehova. Yijuka ku Yehova ari kumanya ku turi abantu abatahikirire; ni yo nshonga atari kututekatekaho kuba nka Yesu igana ahari igana.

18. Ni enki eki tushemerire kukora kugira ngu tuhike aha ntego yitu?

¹⁸ Reka twena tugume tuhangire amisho gitu aha biro by’omu misho kandi tube twetegwire kuhindura emitekatecere yitu n’ebikorwa byitu. (Enf 4:25; Luk 9:62) Reka tugume turi abacurezi, tugumizemu tushemerirwe, kandi ‘tuhugurane.’ (2 Kor 13:11) Ku turakikore tusyoya, ‘Ruhanga w’okukunda n’obusinge aryaguma [n’itwe].’ Kandi nikija kutuma twahika aha ntego yitu tushemerererwe orugendo rwitu.