Nkazarwa omu mwaka gwa 1983. Ku nazirwe nkaba nyine amagara marungi, konka ku nahikize emyaka ikumi, nkatandika kuhurira obusaasi omu mubiri gona. Izoba rimwe bwanyima y’emyaka ibiri, nkaza kwimuka omu kasheshe naremwa kutambura. Nkagezaho kugendesa amaguru, konka naremwa kutambura. Okwiha obwe, tinkatamburagaho. Nambwenu, oburwire bwange bukatuma ntakura. Erizoba, ninyingana nk’omwana muto.

Obu Abahamya ba Yehova babiri bayijire kututayayira nkaba ninguma omu ka ntari kubasa kurugamu. Ku babire nibija, nkaba nimbeshereka, konka eryo izoba nkikiriza abo bakazi kuganira nanye. Ku bangambire ahari Paradiso, nkijuka ebi nahurire ncayine emyaka itano. Omuri obwo bwire, omumishonari owabire ari kwetwa Jethro, owabire atwire omuri Suriname, akaba natayayira ecaro kitu rimwe omu kwezi kandi yatandika kwegesa tata Bibuli. Jethro akaba nakunda kuntwariza ge kandi anyereka rukundo. Nkaba nimukunda munonga. Nambwenu, shwenkuru na mukaka bakantwara omu nterane z’Abahamya ba Yehova ezabire ziri kubera omu caro kitu. Obwe rero, Florence, omwe omuri abo bakazi ababire bantayayire, ku yamburize yaba ndi kwenda kwega byingi, nkamugarukamu ngu, yego.

Florence akagaruka n’omushija weye, Justus, rero batandika kunyegesa Bibuli. Ku bamanyire ngu tindi kumanya kushoma, bakatandika kunyegesa kushoma. Bwanyima y’obwire buce, nkaba nimbasa kushoma. Izoba rimwe, ogo mushija n’omukazi bakangambira ku baza kukorera omurimo omuri Suriname. Ekiri kushasha, tihine omuri Orealla owabire arije kugumizamu kunyegesa Bibuli. Konka ekiri kushemeza, Yehova akagumizamu kuntekatekaho.

Hatakahwire obwire buringwa, omupayoniya ori kwetwa Floyd akija kukorera omuri Orealla kandi ku yabire ari kuburira aha nju n’enju tukabugana. Ku yamburize ebikwatirine n’okwega Bibuli, nkamwenyamu rero yambuza ngu: “Ahabw’eki wamwemya?” Nkamugambira ku nabire namazire kwega akatabo Ruhanga natwenza ki? kandi ku nabire natandikire kwega ekitabo Okumanya Okuri kwebembera Okuhisya Omu Magara Agatahwaho. * Nkamushobororera enshonga ahabw’enki nayemerize kwega Bibuli. Floyd akanyegesa ekitabo Okumanya, konka na we akaza kukorera omurimo ahandi. Nambwenu, nkashuba nabura ow’okunyegesa Bibuli.

 Konka omu mwaka gwa 2004, Granville na Joshua, ababire bari abapayoniya b’omutano bakija kukorera omurimo omuri Orealla. Ku babire bari kuburira aha nju n’enju, bampikaho. Ku bamburize yaba ndi kwenda kwega Bibuli nkamwenya. Nkababuza yaba bari kubasa kunyegesa ekitabo Okumanya kwiha aha ntandikiro. Nkaba ndi kwenda kureba yaba baranyegese nk’ebi ab’okubanza banyegesize. Granville akangambira ku enterane zabire ziri kubera omuri ako kacweka. N’obu nabire mazire emyaka ikumi ndi omu ka ntari kurugamu, nkaba ndi kwenda kuzizamu. Granville akija kunyakira yansindika aha kagaari, rero yantwara aha Nju y’Obukama.

Bwanyima y’obwire, Granville akangambira ngu nze omu Ishomero rya Kitewokurasi. Akangira ngu: “Tori kubasa kugenda, konka nobasa kugamba. Izoba rimwe, noyija kuha toku y’abantu bona. Mazima noyija kukibasa.” Ebigambo ebi yangambire bikatuma nayeyesiga.

Nkatandika kwekwatanisa omu murimo g’okuburira ndi hamwe na Granville. Konka, emihanda myingi ekaba eri mibi munonga, kuyirabamu aha kagaari kikaba kitorobi. Obwe rero, nkashaba Granville kunta aha kagaari rero akansindika. Mazima akanyamba. Nkabatizibwa omu Kwakana 2005. Ku namazire kubatizibwa, benetata bakamanyiza kukora aha bitabo omu kibina n’okukora aha byoma by’omuziki.

Konka ekiri kushasha, omu mwaka gwa 2007 tata akafa ahabwa butandu y’obwato. Eka yitu ekashasha munonga. Granville akija twashabira hamwe kandi yanshomera n’ecahandikirwe ekiri kuhumuriza. Bwanyima y’emyaka ibiri, nkatunga obundi busaasi, Granville na we akafa ahabwa butandu y’obwato.

Ekibina kitu kikasigara kitine omuzehe, konka kine omuhereza omwe. Okufa kwa Granville kukanshasha munonga ahakuba akaba ari munywani wange. Akaba ari omwesigwa kandi ari kunfaho omu by’omwika n’omu by’omubiri ebi nabire ndi kwetenga. Omu nterane ezakuratire okufa kweye, nkaba nyine omurimo g’okushoma Omunara g’Omurinzi. Nkashoma paragurafu ibiri z’okubanza, konka nkatandika kurira kandi amarira gakaguma nigija. Nkahika ndi kuruga ahari pulatifomu.

Nkatandika kwehurira ge ku benetata b’omu kindi kibina bijire kutukwasa omuri Orealla. Nambwenu, ofisi ekatusindikira ondijo mupayoniya ori kwetwa Kojo. Ecanshemize munonga, mama na murumuna wange bakatandika kwega Bibuli kandi babatizibwa. Omu kwa Kashatu 2015, nkaba omuhereza omu kibina. Bwanyima y’obwire buce, nkaha toku y’abantu bona y’okubanza. Eryo izoba nkijuka ebi Granville yangambire omu myaka eyahwire ngu: “Izoba rimwe, noyija kuha toku y’abantu bona. Mazima noyija kukibasa.”

Nkareba ebiganiro by’ahari tivi yitu ya JW^®, namanya Abakristo bagenzi bitu abari omu mbera nk’ezange. Konka n’obu bine obumuga, bakabasa kukora byingi kandi bashemerirwe. Obwe rero, nanye nimbasa kugira byingi by’okukora. Nkaba nyine entego y’okukorera Yehova cona eki ndi kubasa, obwe rero nkaba omupayoniya w’obwire bwona. Omu kwezi kwa Mwenda 2019, nkatunga amakuru masya agantangarize! Omuri oko kwezi bakangambira ku natoranwa kuba omuzehe w’ekibina kitu ekirimu ababurizi abari kuhika ahari 40.

Mazima, ninsima munonga benetata na banyanyazi abanyegesize Bibuli kandi bakankwasa omu murimo g’okuburira. Ekiri kukira byona, ninsima Yehova awagumire ari kuntekatekaho.