EKICWEKA C’OKWEGA 4
Yehova natuha emigisha twataho amani tukija aha Kijusyo
“Mugume mukore musyo muri kunyijuka.”—LUK 22:19.
ECESHONGORO CA 19 Ekiihuro kya Mukama Waitu
EMPINYE a
1-2. Ahabw’enki turi kwija aha Kijusyo ca buri mwaka?
HAHWA emyaka eri kuhika aha 2,000 Yesu ayehireyo ahabw’itu kandi atwigurireho omuhanda g’okwija kutunga amagara agatahwaho. Aha kiro ecabandize orufu rweye, akaragira abakurasi beye kuguma nibijuka ekikorwa ceye ca rukundo, ari kutandikisaho obugenyi bworobize obwabire burimu omugati na vinyo.—1 Kor 11:23-26.
2 Nitworobera ekiragiro ca Yesu ahakuba nitumukunda munonga. (Yoh 14:15) Aha Kijusyo ca buri mwaka, nitwereka ku nitumusima ahabw’ebi yatukorire turi kukwata obwire tukatecereza aha mugasho g’orufu rweye kandi tukashaba. Nambwenu nitwekwatanisa omu murimo g’okuburira, turi kweta abantu bingi ngu bekwatanise n’itwe ahari obwo bugenyi bw’omutano. Kandi tumaririre kwerinda ekintu cona ekiri kubasa kutuma twaremwa kwija aha Kijusyo.
3. Ni enki eki twaza kushwijuma?
3 Omuri eki kicweka, twaza kushwijuma ebintu bishatu ebi abahereza ba Yehova bari kukora, bari kwereka ku nibakora cona eki bari kubasa ngu bijuke orufu rwa Yesu: (1) Bari kutoreza ecokureberaho ca Yesu, (2) bari kweta abandi aha Kijusyo, kandi (3) bari kwekwatanisa omu Kijusyo n’obu bakuba bari kuraba omu mbera zigumire.
NITUTOREZA ECOKUREBERAHO CA YESU
4. Ni ziha nyegesa ezi turi kwega aha Kijusyo ca buri mwaka, kandi shi ahabw’enki tutashemerire kuzizanisa? (Luka 22:19, 20)
4 Aha Kijusyo ca buri mwaka, nituhurikiza toku eyegamire ahari Bibuli eri kugarukamu ebibuzo byingi ebi turi kwebuza. Nitwega enshonga ahabw’enki abantu bari kwetenga ekitambo n’oku omuntu omwe ari kubasa kufa ahabw’ebibi by’abantu bingi. Nibatwijusa eki omugati na vinyo biri kugeranisa n’abashemerire kubiryaho. (Shoma omuri Luka 22:19, 20.) Kandi nitutecereza aha migisha ebikirwe abine amasiko g’okwija kutura omu nsi. (Isa 35:5, 6; 65:17, 21-23) Ezo nyegesa tituri kuzizanisa. Abantu bingi munonga tibari kuzimanya kandi tibari kumanya omugasho gw’ekitambo ca Yesu. Nambwenu tibari kwijuka orufu rwa Yesu bakuratize ecokureberaho eki yatuterireho. Ahabw’enki?
5. Entumwa za Yesu ku zamazire kufa, ni bata oku abantu batandikire kwijuka orufu rwa Yesu?
5 Entumwa za Yesu ku zamazire kufa, Abakristo b’ebishuba bakataha omu kibina. (Mat 13:24-27, 37-39) Bakegesa ‘amazima gahengekire, nibosya abegi ngu babakurate.’ (Byak 20:29, 30) Emwe omuri omuri ezo nyegesa ezihengekire ezi abo Bakristo b’ebishuba batandikire kwegesa ni eri kugamba ku ekitambo ca Yesu kitarahibwe “rimwe kwekorera ebibi bya bingi,” nk’oku Bibuli eri kugamba. Ahobwe bakagamba ku eco kitambo kishemerire kuhebwayo emirundi myingi. (Heb 9:27, 28) Erizoba, abantu b’emitima mirungi nibikiriza ezo nyegesa z’ebishuba. Nibabuganira omu makanisa gabo burijo, nangwa babikora burizoba, kugira ngu bekwatanise omu ki bari kweta “ekitambo ca misa.” b Agandi madini go nigijuka orufu rwa Yesu emirundi mice, konka oshanga abingi omu bakurasi bago batari kumanya omugasho gw’ekitambo ca Yesu. Abamwe nibabasa kwebuza ngu: ‘Mbehi obwe ekitambo ca Yesu nikibasa kutuma nasaasirwa ebicumuro byange?’ Ahabw’enki bari kwebuza eco kibuzo? Nibabasa kuba bayegesibwe ku orufu rwa Yesu rutari kubasa kutuma basaasirwa ebicumuro. Mbwenu shi ni bata oku abakurasi ba Yesu ab’amazima bari kubakwasa?
6. Ni enki eki omutwe gw’abegi ba Bibuli bashoborokirwe omu mwaka gwa 1872?
6 Aha muheru gw’ekinyigana ca 19, omutwe gw’abegi ba Bibuli bebembirwe na Charles Taze Russell bakatandika kushwijuma Ebyahandikirwe babyetondire. Bakaba bari kwenda kumanya amazima agari kukwata aha kitambo n’oku tushemerire kwijuka orufu rweye. Omu mwaka gwa 1872, bakashoborocerwa ku Bibuli eri kugamba ngu Yesu akafera abantu bona. Ebi bacondorize tibarabyegumanire, ahobwe bakabigambira abandi bakoresize ebitabo, ebinyamakuru, na za magazini. Kandi tibaratinzire, bakatandika kuteranira hamwe omurundi gumwe buri mwaka kugira ngu bijuke orufu rwa Yesu.
7. Ni bata oku turi kugasirwa n’ebi abegi ba Bibuli b’omu bwire bwa kare bacondorize?
7 Erizoba nitugasirwa n’ebi abo Bakristo bacondorize kare. Bata shi? Ahabw’obuyambi bwa Yehova, tukamanya ebiri kukwata aha kitambo ca Yesu n’omugasho gwaco. (1 Yoh 2:1, 2) Nambwenu tukega ku Bibuli eri kugamba amasiko g’emiringo ibiri agu abantu abari kushemeza Ruhanga bine, ni okugamba amagara agatari kufa omu iguru agu bamwe barije kugira n’amagara agatahwaho agu abantu bingi barije kutunga. Ku turi kushwijuma oku Yehova ari kutukunda n’oku buri omwe omuri itwe ari kugasirwa n’ekitambo ca Yesu nitukizaho kukunda Yehova. (1 Pet 3:18; 1 Yoh 4:9) Obwe rero nk’oku benetata ba kare bakikozire, nitweta abandi ngu bije kwekwatanisa n’itwe aha Kijusyo c’orufu rwa Yesu.
NITWETA ABANDI KWIJA AHA KIJUSYO
Ni enki eki ori kubasa kukora kugira oyetwatanise omu kweta abantu aha Kijusyo? (Reba paragurafu ya 8-10) e
8. Ni enki eki Abahamya ba Yehova bakozire kugira ngu bete abandi aha Kijusyo? (Reba ekishushani.)
8 Abahamya ba Yehova bamara emyaka myingi bari kweta abantu kwija aha Kijusyo. Omu mwaka gwa 1881, benetata na banyanyazi b’omuri Amerika baketwa kwija kubuganira hamwe omu ka ya mwenetata w’omu tawuni ya Allegheny, Pennsylvania, kugira ngu bekwatanise omu Kijusyo. Bwanyima buri kibina kikatandika kwijuka ekihusyo okwaco. Omu Kwakashatu 1940, ababurizi bakashabwa kuguma bari kweta abantu bona b’omuri teritori kugira ngu na bo bekwatanise. Omu mwaka gwa 1960, ni bwo bw’okubanza obu Beteli yahire ebibina za kada z’okweta abantu. Okuruga obwo, twamara kutanga za kada nyingi munonga. Konka shi ahabw’enki turi kutaho amani kugira ngu twete abandi?
9-10. Ni baha abu turi kweta aha Kijusyo? (Yohana 3:16)
9 Enshonga emwe eri kutuma twayeta abandi aha Kijusyo, ni oku turi kwenda ngu abarije aha murundi g’okubanza bege ebi Yehova na Yesu batukorire. (Shoma omuri Yohana 3:16.) Nitwesiga ku ebi bari kureba n’ebi bari kuhurira aha Kijusyo biri kutuma bayenda kwega byingi n’okuba abahereza ba Yehova. Konka n’abandi nibagasirwa.
10 Nambwenu, nitweta n’Abahamya ba Yehova abafukirire. Nitubeta kugira ngu tubijuse ku Ruhanga acabakunda. Ku turi kubatumira bakija nitushemererwa munonga. Ku bari kwija aha Kijusyo, nibijuka okushemererwa oku babire bine bacakorera Yehova. Reba ecokureberaho ca Monica. c Akaba yafukirire, konka yashuba yaba omuburizi omu bwire bw’ecorezo ca COVID-19. Ku yamazire kwija aha Kijusyo c’omu mwaka gwa 2021, akagamba ati: “Eki Kijusyo ni ec’omutano ahari inye. Haba hahwa emyaka 20 ntari kuburira. Konka nashuba kuburira kandi natumira abandi aha Kijusyo. Nkakora cona eki ndi kubasa ngu nyete abantu bingi kugira ngu nyereke ku ninsima Yehova na Yesu ahabw’ebi bankorire.” (Zab 103:1-4) Abantu bayikiriza obutumire bwitu ninga batabwikirize, nitugumizamu kubeta ahakuba nitumanya ku kiri kushemeza Yehova.
11. Ni eha migisha eyi Yehova yatuhire ahabw’amani agu turi kutaho ngu twete abandi aha Kijusyo? (Hagayi 2:7)
11 Yehova akatuha emigisha ahabw’amani agu turi kutaho ngu twete abandi aha Kijusyo. N’obu twabire tucari omu corezo ca COVID-19 omu mwaka gwa 2021, abantu 21,367,603 bakija aha Kijusyo. Abo bantu bakakira hihi ebicweka bibiri n’ekicweka by’Abahamya ba Yehova abari omu nsi yona! N’obu Yehova ari kwesimira abantu bingi abari kwija aha Kijusyo, eki ari kwesimira munonga ni omutima gwa buri omwe omuri bo. (Luk 15:7; 1 Tim 2:3, 4) Nitwesiga tutari kubanganisa ku twayeta abantu aha Kijusyo, Yehova ari kutuha emigisha, kikatuma twabona abantu b’emitima mirungi.—Shoma omuri Hagayi 2:7.
NITWEKWATANISA AHA KIJUSYO N’OBU TWAKUBA TURI KURABA OMU MBERA ZIGUMIRE
Yehova natuha emigisha ahabw’amani agu turi kutaho ngu twekwatanise aha Kijusyo (Reba paragurafu ya 12) f
12. Ni ziha mbera eziri kubasa kutuma okwijuka orufu rwa Yesu catugumira? (Reba ekishushani.)
12 Yesu akahanura oku omu bwire bw’aha muheru, twabire turije kubugana embera zigumire, harimu okuhakanisibwa n’ab’omu maka gitu, okuhiganisibwa, endwara z’ebyorezo n’ebindi. (Mat 10:36; Mar 13:9; Luk 21:10, 11) Hine obu ezo mbera ziri kutuma okwijuka orufu rwa Yesu catugumire. Ni bata oku benetata na banyanyazi basingire ezo mbera zigumire, kandi shi ni bata oku Yehova yabakwasize?
13. Ni eha migisha eyi Yehova yahire Artem ahabw’okugira obumanzi akamaririra kwijuka orufu rwa Yesu ari omu kihome?
13 Okusibwa. Benetata abasibirwe ahabw’okwikiriza kwabo, nibakora cona eki bari kubasa kugira ngu bijuke orufu rwa Yesu. Reba ecokureberaho ca Artem. Omu bwire bw’Ekijusyo ca 2020, akasibirwa omu kashenge kace n’abandi basibe batano. N’obu yabire asibirwe, akabona ebintu by’okukoresa nk’ebigeraniso. Nambwenu akamaririra kutanga toku y’Ekijusyo, n’obu hatariho omuntu n’omwe owabire arije kuba amuhurikize. Abu yabire asibirwe na bo bakaba nibaresa kandi bari kugamba ebigambo bibi. Mbwenu shi ni enki eki Artem yakozire? Akabashaba kwehangana, bakamara eshaha nk’emwe batari kugamba ebigambo bibi kandi batari kuresa. Artem akatangara ku yerebire babyikiriza. Akagamba ati: “Nkabashaba ngu mbagambire aha bikwatirine n’Ekijusyo.” N’obu batarabyikirize, ku bamazire kureba n’okuhurira oku Artem yayijukire orufu rwa Yesu, bakamubuza ebibuzo byingi.
14. Ni bata oku Abahamya ba Yehova bayijukire orufu rwa Yesu omu bwire bw’ecorezo ca COVID-19?
14 Omu bwire bw’ecorezo ca COVID-19. Omuri obwo bwire , tukaba tutari kubasa kubuganira hamwe ngu twijuke orufu rwa Yesu. Konka eco tikiratuzibire kurwijuka. d Ebibina ebyabire biri kubasa kubona intaneti, bikekwatanisa ahari vidiyo. Mbwenu shi ni enki eki ababire batine intaneti bakozire, kandi orebire ari bo ababire bari bingi? Omu mahanga gamwe na gamwe, toku y’Ekijusyo ekaraba ahari tivi ninga shi ahari rediyo. Nambwenu za ofisi zitu zikakwata amaraka na vidiyo ya toku y’Ekijusyo omu ndimi eziri kurenga ahari 500, kugira ngu abantu b’omu tucweka twa here babase kwijuka orufu rwa Yesu. Bwanyima benetata bakaba nibakora eki bari kubasa cona kugira ngu bahise eyo toku aha babire bari kuyetenga.
15. Ni enki eki wayegera aha byahikire aha mwegi wa Bibuli ori kwetwa Sue?
15 Okuhakanisibwa n’ab’omu maka gitu. Hine abantu bamwe abu ab’omu maka gabo babire nibahiganisa, kituma kwijuka orufu rwa Yesu cabagumira. Reba ecokureberaho c’omwegi wa Bibuli ori kwetwa Sue. Ah’izoba eryabandirize Ekijusyo c’omu mwaka gwa 2021, Sue akagambira omwegesa weye wa Bibuli ku atarije kubasa kwekwatanisa aha Kijusyo ahabw’okurwanisibwa n’ab’omu ka yeye. Omwegesa weye akamushomera omuri Luka 22:44. Bwanyima akamushobororera ku omu bwire obu twine ebizibu, tushemerire kutoreza Yesu turi kushaba Yehova kandi tukamwesigira kimwe. Ah’izoba eryakuratireho, Sue akatebekanisa ebigeraniso kandi yereba okuramya kw’akasheshe k’omutano ahari jw.org. Omuri ogo mwebazo, akasitama omu kishenge ceye, yakuratana Ekijusyo aha simu. Bwanyima, Sue akahandikira omwegesa weye wa Bibuli ati: “Nyomwebazo ongarwiremu amani munonga. Nkozire cona eki ndi kubasa kugira ngu ntaferwa Ekijusyo kandi Yehova ankwasize. Hati nshemerirwe munonga kandi ninsima Yehova.” Mbehi n’iwe Yehova nabasa kukukwasa omu bwire obu ori omu mbera nk’ezo?
16. Ahabw’enki turi kwesiga ku Yehova arije kutuha emigisha twakora cona eki turi kubasa ngu twije aha Kijusyo? (Abaroma 8:31, 32)
16 Yehova nashemererwa munonga yareba turi kutaho amani ngu twijuke orufu rwa Yesu. Nitwesiga tutari kubanganisa ku arije kutuha emigisha twayereka ku nitumusima ahabw’ebi yatukorire. (Shoma omu Baroma 8:31, 32.) Obwe rero, maririra kwija aha Kijusyo c’ogu mwaka kandi omu bwire bw’Ekijusyo oyije kukora byingi omu murimo gwa Yehova.
ECESHONGORO CA 18 Okusiima Ekitambo
a Aha Rwakabiri ekiro ca 4 Okwakana, 2023, abantu bingi omu nsi yona nibija kubuganira hamwe ngu bijuke orufu rwa Kristo. Abingi omuri bo baryaba bayija aha murundi g’okubanza. Abandi nibija kuba bari Abahamya ba Yehova abafukirire. Abamwe nibija kugira ebi bayeferereza kugira ngu bacekwatanisemu. Oku embera zawe zakuba ziri kona, yesige otari kubanganisa ku Yehova arije kushemererwa ahabw’amani agu orije kutaho ngu oyije aha Kijusyo.
b Abakurasi b’ago madini nibikiriza ku ahari ogo mugenzo, omugati na vinyo biri kuhinduka omubiri n’eshagama bya Kristo byenyine. Ku bari kurya aha mugati kandi bakanywa n’ahari vinyo nibatecereza ku ekitambo ca Yesu kiri kuba cashuba kuhebwayo.
c Amazina agamwe gakahindurwa.
d Reba ahari jw.org ebicweka ebiri kugira ngu “Ekijusyo c’omu mwaka gwa 2021.”
