Abamwe bakakurira omu micwe aho ori kushanga abashija bingi bari kutwariza kubi abakazi. Ecokureberaho: Omureberezi omwe ori kutayayira ebibina omuri Bolivia ori kwetwa Hans, akagamba ati: “Abashija bamwe bakakurira omu micwe eri kutuma bayetungura batecereza ku bari kukira abakazi kandi babatwariza kubi.” Omuzehe w’omuri Tayiwani ori kwetwa Shengxian, akagamba ati: “Ahu ntwire abashija bingi nibahurira ku omukazi atashemerire kwejwanga omu bi bari kukora. Omushija yashaba omukazi weye obuhabuzi aha kintu nanka, abandi bashija nibamujoga.” Hariho n’abashija abari kushorora abakazi omu bundi buryo obutari kurebeka. Ecokureberaho: nibabasa kugamba ebintu ebiri kushesya ebiri kukwata aha bakazi.

Ekiri kushemeza ni oku omucwe ogu abashija bakuba bakuriremu oku gwakuba guri kona bari kubasa kuguhindura. Nibabasa kweyihamu enyehurira z’okutecereza ku abashija bari kukira abakazi. (Efe 4:22-24) Eco nibabasa kukikora batoreza ecokureberaho ca Yehova. Omuri eki kicweka twaza kureba oku Yehova ari kutwariza abakazi, oku benetata bari kubasa kumutoreza n’oku abazehe bari kubasa kukwata ey’okubanza bakereka ku nibaha banyanyazi ekitinisa.

NI BATA OKU YEHOVA ARI KUTWARIZA ABAKAZI?

Yehova ni ecokureberaho kirungi c’oku abashija bashemerire kutwariza abakazi. Ahabw’okuba ari Tata oyine esasi nakunda ab’omu ka yeye. (Yoh 3:16) Kandi abanyanyazi b’abesigwa nabareba nk’abahara beye b’omuhendo. Reba oburyo bumwe obu Yehova ari kubahamu ekitinisa.

Nabatwariza omu buryo obutarimu okushorora. Yehova ni ecokureberaho kirungi aha bikwatirine  n’okutwariza ge abakazi. (Kut 1:27) Tarahangire abashija bine obwenge ninga shi ebiconco ebiri kukira eby’abakazi. (2 Bus 19:7) Akahanga abashija n’abakazi bine obushoborozi oburi kwingana bw’okushoborocerwa amazima g’omuri Bibuli, n’okutoreza emitwarize yeye mirungi. Nambwenu Yehova nareba abashija n’abakazi b’abesigwa nk’abari kwingana, bakuba bine amasiko g’okutura omuri paradiso omu nsi ebiro byona ninga shi barije kuba abatambi n’abagabe omu iguru. (2 Pet 1:1) Mazima Yehova tari kushorora abakazi.

Nabatega amatu. Yehova nafa aha nyehurira z’abakazi n’ebiri kubemereza omutima. Ecokureberaho: Akahurikiza eshara ya Rasheri na Hana kandi yabagarukamu. (Kut 30:22; 1 Sam 1:10, 11, 19, 20) Nambwenu Yehova akakoresa abahandiki ba Bibuli batamu enkuru z’abashija ababire nibahurikiza abakazi. Ecokureberaho: Aburahamu akakuratiza obuhabuzi bwa Yehova bw’okuhurikiza omukazi weye Sara. (Kut 21:12-14) Omugabe Dawudi na we akahurikiza Abigayili. Kandi Dawudi akahurira ari Yehova owamutuma ngu bagambane. (1 Sam 25:32-35) Ahakuba Yesu ari kutoreza Ishe omu bwijwire akahurikiza nyina Mariya. (Yoh 2:3-10) Ebyo Byokureberaho nibyereka ku oburyo bumwe obu Yehova ari kwerekamu abakazi ku ari kubaha ekitinisa ari okubahurikiza.

Nabesiga. Ecokureberaho: Yehova akesiga Eva yamuha omurimo g’okureberera ensi yona. (Kut 1:28) Eco ku yakikozire akaba yayereka ku atari kumureba nk’ori ahaasi y’omushija weye Adamu, ahobwe akaba ari kumureba nk’omuyambi wa Adamu. Nambwenu Yehova akesiga abahanuzikazi ari bo Debora na Hulida omu kuhabura abahereza ba Yehova harimu abaramuzi n’abagabe. (Bar 4:4-9; 2 Bag 22:14-20) Omuri obu bwire Yehova nayesiga abakazi b’Abakristo abaha emirimo y’okukora. Abo bakazi b’abesigwa harimu ababurizi, abapayoniya, n’abamishonari. Nibakwasa omu kukora ebishushani by’amaju g’Obukama n’ag’ahari Beteli omu kugombeka n’omu kugareberera. Abamwe nibakora ahari Beteli abandi bakora ahari za ofisi z’obuhinduzi z’omu tucweka twa hare. Abo banyanyazi bari nk’ihe rihango eri Yehova ari kukoresa omu kuhikiriza ebi ari kwenda. (Zab 68:11) Mazima Yehova tari kureba abakazi nk’abine amani mace ninga nk’abatari kubasa.

NI BATA OKU BENETATA BARI KUBASA KWEGA KUTWARIZA ABAKAZI NK’OKU YEHOVA ARI KUBATWARIZA?

Imwe benetata kugira ngu tumanye yaba turi kutwariza abanyanyazi nk’oku Yehova ari kubatwariza, tushemerire kushwijuma emitecerereze yitu n’ebikorwa byitu tutari kwesasira. Kugira ngu eco tukikore nituba turi kwetenga obuyambi. Nk’oku bari kubasa kukoresa ecoma ekiri kureba omu nda bakakupima bakamanya oburwire obu oyine omu mubiri gwawe, ni ko n’omunywani murungi n’Ekigambo ca Ruhanga biri kutukwasa kumanya ebitecerezo bibi ebi twine aha bakazi. Ni enki ekiri kubasa kutukwasa kugira ngu tutunge obwo buyambi?

Buza munywani wawe murungi. (Emi 18:17) Nitubasa kubuza munywani witu w’omwesigwa oyine embabazi kandi ori kumanya kuringaniza ebibuzo nk’ebi: “Mbehi iwe oku ori kundeba noreba ndi kutwariza bata abanyanyazi? Mbehi nimbaha ekitinisa? Mbehi nimbasa kuhindura omu ku ndi kubatwariza?” Munywani wawe yakugambira ebintu ebi oshemerire kuhindura, otagezaho kweshoborora. Omu mwanya gw’eco ba oyetegwire kukora empinduka.

Yeyegese Ekigambo ca Ruhanga. Oburyo burungi obu turi kubasa kumanyamu yaba turi kutwariza ge abanyanyazi ni okushwijuma emitecerereze yitu n’emitwarize yitu tukoresize Ekigambo ca Ruhanga. (Heb 4:12) Twayeyegesa Ekigambo ca Ruhanga nitumanya abashija abatwarize ge abakazi, n’abatarabatwarize ge. Nitubasa kugeranisa oku babire nibabatwariza n’oku n’itwe turi kubatwariza. Nambwenu twageranisa enyiriri z’omuri Bibuli zimwe na zimwe nikibasa kuturinda kukoresa Ebyahandikirwe omu kushagika emitecerereze yitu mibi eyi twine aha bakazi. Ecokureberaho: Omuri 1 Petero 3:7, nihagamba ku tushemerire ‘kuha abakazi ekitinisa nk’enyabya ezitagumire.’ b Mbehi eco nikimanyisa ku abakazi bari aha nsi y’abashija, batine bwenge, kandi ku hatine eki bari kubasa kukora? Mazima tico kiri kumanyisa!  Geranisa ebigambo bya Petero n’ebiri omu Bagalatiya 3:26-29 ahari kugamba ku Yehova yatorine abakazi n’abashija kugira ngo bombi bije kutegekana na Yesu omu iguru. Ku turi kweyegesa Ekigambo ca Ruhanga kandi tukabuza omunywani murungi ngu atugambire oku turi kutwariza abakazi nikibasa kutuma twamanya oburyo burungi obu turi kubasa kwerekamu ku nituha abanyanyazi ekitinisa.

NI BATA OKU ABAZEHE BARI KUBASA KWEREKA KU NIBAHA EKITINISA ABANYANYAZI?

Benetata b’omu kibina nibabasa kwega oburyo burungi bw’okwereka ku nibaha abanyanyazi ekitinisa batoreza ecokureberaho kirungi c’abazehe. Ni bata oku abazehe bari kwereka abanyanyazi ekitinisa? Reba bumwe omu buryo obu bari kubasa kubyerekamu.

Nibasima abanyanyazi. Entuma Pawulo akatuteraho ecokureberaho kirungi c’okutoreza. Akasima abanyanyazi omu misho ga bona omu baruha eyi yahandikire ekibina ca Roma. (Rom 16:12) Tecereza oku abo banyanyazi bayehurire obu babire bari kushomerwa eyo baruha omu kibina? Ni co kimwe, n’abazehe nibasima abanyanyazi ahabw’emicwe yabo mirungi n’ahabw’emirimo eyi bari kukorera Yehova. Eco nikituma abanyanyazi bamanya ku bari kubafaho kandi ku nibabaha ekitinisa. Ebigambo ebiri kuhumuriza ebi omuzehe ari kubasa kugambira omunyanyazi nibasa kumukwasa kugumizamu kuhereza Yehova omu bwesigwa.—Emi 15:23.

Abazehe baba bari kusima abanyanyazi, nibabasima babyihire aha mutima kandi batarabire aha rubaju. Ahabw’enki? Omunyanyazi ori kwetwa Jessica akagamba ati: “Nikishemeza kureba benetata bari kugambira munyanyazi ngu ‘wakikora ge.’ Konka nitukizaho kushemererwa benetata batugambira ekintu eki bari kutusima, nk’okwegesa abana kusitama betonzire omu nterane, ninga nk’okuza kureta omwegi kugira ngu ayekwatanise omu nterane.” Abazehe ku bari kusima abanyanyazi  ahabw’ebintu byona ebi bari kukora, nikituma abanyanyazi bahurira bari ab’omu kibina kandi bari ab’omuhendo.

Nibahurikiza banyanyazi. Abazehe abari kwecureza nibamanya ku atari bo bonka abari kutanga ebitecerezo birungi. Abo bazehe nibashaba abanyanyazi kugamba ebitecerezo byabo, kandi babahurikiza betonzire baba bari kugamba. Ebyo nibituma abazehe bagumya abanyanyazi kandi bibagasira. Bata shi? Omuzehe ori kwetwa Gerardo, ori kukora ahari Beteli, akagamba ati: “Ku ndi kubuza abanyanyazi ebitecerezo byabo nikituma nakora emirimo yange kurungi. Emirundi myingi, noshanga bamazire obwire buringwa bari kukora emirimo kukira benetata.” Abanyanyazi bingi b’omu kibina noshanga bari abapayoniya, obwe rero noshanga bari kumanya abantu bingi abatwire omuri ako kacweka. Omuzehe ori kwetwa Bryan akagamba ati: “Banyanyazi bitu bine ebintu byingi birungi ebi bari kubasa kugasira ekitongore. Obwe rero nitugasirwa n’ebi bari kukora!”

Abazehe b’abanyabwenge tibari kwehuza ebitecerezo by’abanyanyazi. Ahabw’enki? Omuzehe ori kwetwa Edward akagamba ati: “Ekitecerezo ca munyanyazi nikibasa kukwasa mwenetata kushoborocerwa ekizibu kandi kituma yamanya oku arakwase abandi. (Emi 1:5) N’obu atari kubasa kukoresa ekitecerezo c’ogo munyanyazi, nabasa kumusima ahabw’okukimugambira.

Nibamanyiza abanyanyazi. Abazehe b’abanyabwenge nibarondesa oburyo obu bari kubasa kumanyizamu banyanyazi. Ecokureberaho, nibabasa kubamanyiza oku bari kubasa kwebembera poroguramu z’omurimo g’okuburira kugira ngu babe betegwire haba hatariho mwenetata owabatizibwe ori kubasa kuyebembera. Nibabasa kubegesa kukoresa amamashini kugira ngu bije kuyamba omu by’obwombeki. Abebembezi b’emirimo b’ahari Beteli, nibamanyiza abanyanyazi kukora emirimo etari emwe, harimu, ey’okuhunduza amaju, okugura n’okuguza, okukora omu by’esente, omu bya kompiyuta, n’ebindi. Abazehe ku bari kumanyiza abanyanyazi, nibaba bari kubereka ku bari ab’omuhendo kandi ku bari kubesiga.

Abanyanyazi bingi nibakoresa obumanyi obu bari kuhebwa n’abazehe omu kugasira abandi. Ecokureberaho: Abanyanyazi abamwe nibakoresa obumanyi obu bari kutungira omu by’obwombeki omu kombecera abahikirweho ebihikirizi. Abandi banyanyazi nibakoresa obumanyi obu bayegire omu kuburira omu misho ga bona omu kukwasa abandi banyanyazi bingi kukora kurungi omurimo g’okuburira. Ni bata oku abanyanyazi bari kwehurira ahabw’obumanyizi obu bari kuhebwa n’abazehe? Omunyanyazi ori kweta Jennifer akagamba ati: “Obu nayekwatanisize omu kombeka Enju y’Obukama, omuzehe omwe akamanyiza. Akaba nareba emirimo eyi ndi kukora, kandi abinsimira. Nkaba ninkunda kukorana na we ahakuba akaba natuma nahurira ku ndi ow’omugasho kandi ku ari kunyesiga.”

EBIRUNGI EBIRI KURUGA OMU KUTWARIZA GE ABANYANYAZI

Nitukunda banyanyazi bitu b’abesigwa nk’oku Yehova ari kubakunda! Obwe rero nitubatwariza nk’ab’omu ka yitu. (1 Tim 5:1, 2) Nitwesimira kukorana na bo. Kandi nitushemererwa munonga, bamanya ku turi kubakunda kandi ku turi kubafaho. Omunyanyazi ori kwetwa Vanessa akagamba ati: “Ninyesima munonga ahabw’okuba ndi omu muryango gwa benetata abari kutuma nahumurizibwa.” Omunyanyazi w’omuri Tayiwani akagamba ati: “Ninyesima munonga ahabw’okuba Yehova n’ekitongore ceye bari kureba abakazi nk’ab’omuhendo kandi bafa aha nyehurura zitu. Eco nikituma nagarurwamu amani kandi kituma nayesimira kuba ndi omu kitongore ca Yehova.”

Mazima, Yehova nayesimira abashija b’Abakristo abari kutwariza Abakristo nk’oku na we ari kubatwariza! (Emi 27:11) Omuzehe w’omuri Sikotilandi ori kwetwa Benjamin akagamba ati: “Abashija b’omuri egi nsi, tibari kuha ekitinisa abakazi. Obwe rero abakazi bataha omu Nju y’Obukama nituba turi kwenda ngu barebe ebiri kutana n’ebi bashangirwe bari kureba.” Nimureke twena tukore cona kubasika kugira ngu tutoreze Yehova turi kutwariza abanyanyazi omu murinekiri go gwa rukundo kandi tubahe ekitinisa.—Rom 12:10.