EKICWEKA C’OKWEGA 2
ECESHONGORO CA 19 Ekiihuro kya Mukama Waitu
Mbehi oyetegwire ekiro c’omutano eki turi kugira buri mwaka?
‘Mugume mukore musyo muri kunyijuka.’—LUK 22:19.
Entego
Reba enshonga Ekijusyo kiri ekiro c’omutano, oku ori kubasa kucetegura n’oku ori kubasa kukwasa abandi kugira ngu bije kucekwatanisamu.
1. Ahabw’enki Ekijusyo ari ezoba ry’omutano eriri kubaho buri mwaka? (Luka 22:19, 20)
ITWE abahereza ba Yehova, Ekijusyo c’orufu rwa Kristo ni ekiro c’omutano eki turi kugira buri mwaka. Ni co kiro conka eki Yesu yaragire abakurasi beye ngu bagume bijuke (Shoma omuri Luka 22:19, 20.) Tutegerize n’ekihika Ekijusyo ahabw’enshonga nyingi. Reka tushwijume zimwe omuri ezo.
2. Ni ziha nshonga zimwe eziri kutuma twategereza Ekijusyo twine ekihika?
2 Ekijusyo nikitwijusya omugasho gw’ekitambo. Nikitwijusya oburyo bwo kwereka ku nitusima aha bw’okwehayo kwa Yesu. (2 Kor 5:14, 15) Nambwenu, nikituha oburyo bw’‘okugumyana’ na benetata na banyanyazi. (Rom 1:12) Buri mwaka, benetata na banyanyazi abafukirire na bo nibija aha Kijusyo. Abamwe omuri bo nibabasa kugarukira Yehova ahabw’oku bayakirwa. Kandi abantu bingi nibatandika kugendera omu muhanda gw’amagara aha bw’ebi bareba n’ebi bahurira. Obwe rero tikiri kututangaza kuba Ekijusyo kiri ekiro c’omutano ahari itwe!
3. Ni bata oku Ekijusyo kiri kutuma twagira obumwe nka benetata na banyanyazi b’omu nsi yona? (Nambwenu reba ekishushani.)
3 Nambwenu, tecereza oku Ekijusyo kiri kutuma twagira obumwe nka benetata na banyanyazi b’omu nsi yona. Abahamya ba Yehova b’omu nsi yona nibateranira hamwe izoba ryamara kurenga. Twena nituhurikiza toku eri kwereka omugasho gw’ekitambo. Nitweshongora ebyeshongoro bibiri by’okuhumbisa Yehova, tutambuza ebigereraniso, kandi tugamba ngu amina bamara kushaba. Omu izoba rimwe ebibina by’omu nsi yona nibiba byamara kukora ebyo bintu. Tecereza oku Yehova na Yesu bari kushemererwa bareba twena tuteranire hamwe kugira ngu tubahe ekitinisa omuri obwo buryo?
Benetata na banyanyazi b’omu bicweka ebitari bimwe by’ensi nibetegurira eco kiro c’omutano (Reba paragurafu ya 3) f
4. Ni enki eki twaza kushwijuma omuri eki kicweka?
4 Omuri eki kicweka, twaza kushwijuma ebi bibuzo: Ni bata oku turi kubasa kutegura omutima gwitu kugira ngu twije kugasirwa n’Ekijusyo? Ni bata oku turi kubasa kukwasa abandi kugasirwa n’Ekijusyo? Kandi shi ni bata oku turi kubasa kukwasa abafukirire? Eby’okugarukamu by’ebyo bibuzo nibyija kutukwasa kwetegura eco kiro c’omutano.
NI BATA OKU TURI KUBASA KUTEGURA OMUTIMA GWITU KUGIRA NGU TWIJE KUGASIRWA N’EKIJUSYO?
5. (a) Ahabw’enki tushemerire kutecereza aha mugasho gw’ekitambo? (Zaburi 49:7, 8) (b) Ni enki eki wayegire omuri vidiyo eyine omutwe oguri kugamba ngu: Ahabw’enki Yesu yafire?
5 Bumwe omu buryo obu turi kubasa kukoresa ngu tutegure omutima gwitu kugira ngu twije kugasirwa n’Ekijusyo, ni okutecereza aha mugasho gwekitambo ca Yesu Kristo. Tihine ekintu eki twabire turi kubasa kukora ngu twecungure, tweyihe omu kibi n’orufu. (Shoma omuri Zaburi ya 49:7, 8; nambwenu reba vidiyo eri kugamba ngu: Ahabw’enki Yesu yafire?) a Obwe rero Yehova akakora entebekanisa y’okutanga omwana weye kugira ngu atucungure, kandi eco kikabashaba kweferereza ebintu byingi. (Rom 6:23) Oku turi kukizaho kutecereza aha ku Yehova na Yesu batuhire ekitambo, ni ko turi kukizaho kwereka ku nitusima ahabw’ekitambo. Twaza kureba bimwe omu bintu ebi Yehova na Yesu bayefererize kugira ngu batuhe ekitambo. Konka, reka tubanze turebe eki ekitambo kiri kumanyisa.
6. Ekitambo ni enki?
6 Ekitambo ni obuguzi oburi kushashurwa kugira ngu hagarurwe ekintu ecaba kitwirwe. Omuntu w’okubanza, ari we Adamu, akahangwa ahikirire. Ku yakozire ekibi, akaferwa amagara agatahwaho, kandi yatuma n’abana beye bona bagaferwa. Kugira ngu hagarurwe eki Adamu yabire yaferwa, Yesu akatanga omubiri gweye oguhikirire nk’ekitambo. Omu bwire obu yamazire omu nsi, ‘tarakozire kibi, n’omu kanwa keye tihararugiremu bugobya.’ (1 Pet 2:22) Yesu ku yafire, akatanga amagara geye agahikirire nk’agu Adamu yabire ayine.—1 Kor 15:45; 1 Tim 2:6.
7. Ni biha bigezo bimwe ebi Yesu yabugine obu yabire ari omu nsi?
7 Yesu akagumizamu korobera Ishe w’omu iguru n’obu yabugine ebigezo byingi obu yabire ari omu nsi. N’obu Yesu yazirwe ahikirire, akagumizamu korobera abazire beye ababire batahikirire. (Luk 2:51) Obu yabire acari omunyeto akaba ashemerire kwerinda ebigezo byona ebyabire biri kubasa kutuma atagumizamu korobera Yehova ninga ngu areke kugumizamu kumubera omwesigwa. Kandi obu yabire yamara kukura, akaba ashemerire kugumizamu kwerinda Sitane Omuregi, owabire namugeza ngu akore ebibi areke kugumizamu ari omwesigwa ahari Ruhanga. (Mat 4:1-11) Sitani akaba amaririre kugeza Yesu kugira ngu acumure rero aremwe kushashura ekitambo.
8. Ni biha bigezo ebindi ebi Yesu yayehanganire?
8 Omu murimo g’okuburira ogu Yesu yakorire omu nsi, akabugana ebigezo. Abangi beye bakamuhiganisa kandi bamutinatinisa bari kumugambira ku barimwita. (Luk 4:28, 29; 13:31) Akaba ashemerire n’okwehanganira okutahikirira kw’abakurasi beye. (Mar 9:33, 34) Obu babire bari kwenda kumwita, akakorerwa ebikorwa by’obugomi kandi bamukoza enshoni. Bwanyima bakamwita ari omu busasi bwingi kandi bakaba nibamurega ngu ni enkozi y’ebibi. (Heb 12:1-3) Akehanganira obwire bweye bw’aha muheru, atine oburinzi bwa Yehova. b—Mat 27:46.
9. Ekitambo ca Yesu nikituma twayehurira tuta? (1 Petero 1:8)
9 Mazima, Yesu akashasha munonga kugira ngu aheyo ekitambo. Mbehi n’iwe tori kuhurira wakizaho kukunda Yesu watecereza aha bi yakozire kugira ngu atange ekitambo aha bwawe?—Shoma omuri 1 Petero 1:8.
10. Ni enki eki Yehova yayefererize kugira ngu atuhe ekitambo?
10 Biri bita ahari Yehova? Mbwenu shi ni enki eki Yehova yayefererize kugira ngu Yesu ashashure eco kitambo? Yehova na Yesu binine rukundo egumire, nk’eri kuba eri ahagati y’omwana n’ishe. (Emi 8:30) Obwe rero, tecereza oku Yehova yabire ari kwehurira obu yabire nareba omwana weye ari kwehanganira ebyo bigezo ebi yabugine nabyo omu nsi. Hatariho okubanganisa bikamushasha munonga ku yarebire omwana weye ari kutwarizibwa kubi, kandi ari kuraba omu bigezo byingi.
11. Gamba ecokureberaho ekiri kwereka oku Yehova yayehurire obu Yesu yabire ari kwitwa.
11 Omuzire wena owafisize omwana weye, namanya ge obusaasi obu omuzire ari kuba ayine yafisa omwana weye. Nitwesiga ku haribaho okuzoka; konka eco tikiri kwihaho obusasi obu turi kugira ahabw’okufisa banywani bitu. Ebyo nibitukwasa kushoborocerwa oku Yehova yayehurire ku yarebire omwana weye owu ari kukunda ari kubonabona kandi ari kufa omu mwaka gwa 33 B.Y. c—Mat 3:17.
12. Ni enki eki turi kubasa kukora omu bwire oburi kubandiriza Ekijusyo?
12 Mbehi kwiha hati kuhisya aha Kijusyo, tori kubasa kweyegesa aha bikwatirine n’ekitambo ninga mukabyegaho omu kuramya kw’eka? Nobasa kukoresa ekitabo ekiri kukwasa Abahamya ba Yehova kucondoza (yaba kiriho omu rurimi rwanyu) ninga shi ebindi bitabo rero ocondoza byingi ebiri kukwata aha kitambo. d Nambwenu nobasa kushoma Ebyahandikirwe ebirikushomwa omu bwire bw’Ekijusyo ogendire aha ntebekanisa eri omu Katabo k’Omukristo n’Omurimo. Kandi ah’izoba ry’Ekijusyo otari yebwa kureba vidiyo y’omutano y’Ecahandikirwe c’izoba. Twategurira omutima gwitu ekijusyo nikija kutukwasa kukwasa abandi kugasirwa na co.—Ezr 7:10.
KWASA ABANDI KUGASIRWA
13. Ni kiha kintu c’okubanza eki tushemerire kukora kugira ngu tukwase abandi kugasirwa n’Ekijusyo?
13 Ni bata oku turi kubasa kukwasa abandi kugasirwa n’Ekijuyo? Ec’okubanza eki turi kubasa kukora ni okubatumira. Nambwenu kongera aha bantu abu turi kutumira nitubasa n’okuhandika abantu abo turi kubasa kutumira. Omuri abo harimu abanyabuzare bitu, abu turi kukora hamwe, abu turi kwegana, ninga abandi. N’obu twakuba tutine obutumire obucapire nitubasa kusindikira abantu linki aha mbuga. Mazima nitubasa kutangara twareba abantu bingi bayija!—Mub 11:6.
14. Gamba omugasho g’okutumira abantu.
14 Otaribanganisa aha muntu owu oshemerire kuha kada ninga ngu ogire owu wayehuzya. Izoba rimwe omunyanyazi oyine omushija otari Omuhamya, akatangara obu omushija weye yamugambire ku ari kwenda kwekwatanisa na we omu Kijusyo. Ahabw’enki camutangarize? Ni ahabw’okuba emirundi myingi akaba yamutumire konka atari kwija. Ogo mushija akagamba ati: “Bakampa obutumire.” Omuzehe w’omu kibina owu babire bamanyirine akamutumira. Ogo mushija akekwatanisa ahari eco Kijusyo kandi n’omu myaka eyakuratireho akagumizamu kwija.
15. Ni enki eki tushemerire kwijuka twaba turi kutumira abantu kwija omu Kijusyo?
15 Guma oyijuke ku abu turi kutumira bari kuba bine ebibuzo byingi namunonga baba batakijaga omu nterane zitu. Obwe rero nitubasa kutecereza aha bibuzo ebi bari kubasa kutubuza kandi twetegura kubagarukamu. (Kol 4:6) Abamwe nibabasa kwebuza ngu: ‘Ni enki ekirije kubaho ahari eryo zoba?’ ‘Nibyija kumara obwire oburi kwingana ki?’ ‘Mbehi hariho ebijwaro ebiragirwe kujwarwa ahari eryo zoba?’ ‘Mbehi hariho esente ezi nshemerire kushashura kugira ngu ncekwatanisemu?’ ‘Mbehi hariyo okushoroza esente?’ Twatumira omuntu aha Kijusyo tushemerire kumubuza ngu: “Mbehi hine ebibuzo ebi ori kwebuza?” rero bwanyima tugarukamu ebibuzo byeye. Nambwenu nitubasa kumwereka vidiyo eri kugira ngu Yijuka okufa kwa Yesu na Omu nju y’Abahamya ba Yehova nihakorerwamu enki? Kugira ngu tumukwase kushoborocerwa oku enterane zitu ziri kuba ziri. Kandi ishomo rya 28 omu kitabo Shemerererwa amagara ebiro byona! harimu ebintu byingi birungi ebi turi kubasa kumugambira.
16. Ni biha bibuzo ebi abari kwija aha Kijusyo bari kubasa kwebuza?
16 Abantu abine emitima mirungi ku bari kwija kwekwatanisa aha Kijusyo, hine ebindi bibuzo ebi bari kubasa kwebuza. Nibabasa kwebuza enshonga abantu bace ari bo abari kurya aha bigeraniso. Nambwenu nibabasa kwebuza enshonga ahabw’enki tutari kukora Ekijusyo emirundi myingi. Kandi nibabasa n’okwebuza yaba enterane z’Abahamya ba Yehova zona ari ko oku ziri kuba ziri. Ni amazima ebyo bintu byona nibigambwa omuri toku y’Ekijusyo konka abasya nibaba bari kwenda ngu tubibashobororere ge. Ekicweka c’aha rubuga, ekine omutwe oguri kugira ngu: “Ahabw’enki Abahamya ba Yehova bari kwijuka orufu rwa Yesu omu buryo oburi kutana n’oku agandi madini gari kikikora?” nikibasa kutukwasa kugarukamu bimwe omu bibuzo ebi abantu bari kwebuza. Nitwenda kukora cona eki turi kubasa mbere y’Ekijusyo, omu Kijusyo na bwanyima ya co kugira ngu tukwase ‘ab’emitima mirungi’ kugasirwa.—Byak 13:48.
GUMA OYAMBE ABAFUKIRIRE
17. Ni bata oku abazehe bari kubasa kukwasa abafukirire? (Ezekiyeli 34:12, 16)
17 Ni bata oku abazehe bari kubasa kukwasa abafukirire omu bwire bw’Ekijusyo? Mugume mubereke ku nimubakunda. (Shoma omuri Ezekiyeli 34:12, 16.) Mbere y’Ekijusyo nimubasa kubaterera kandi mubatayayira caba kiri kubasika. Mubahamize ku nimubakunda kandi ku muri kwendera kimwe kubakwasa oku kiri kubasika. Mubatumire aha Kijusyo. Bayija mubacire mushemerirwe. Na bwanyima y’Ekijusyo mugume mufe ahari abo benetata na banyanyazi abu turi kukunda kandi mubahe obuyambi bw’eby’omwika obu bari kwetenga kugira ngu bagarukire Yehova.—1 Pet 2:25.
18. Ni bata oku twena turi kubasa kukwasa abafukirire? (Abaroma 12:10)
18 Twena ab’omu kibina nitubasa kukwasa abafukirire kwekwatanisa aha Kijusyo. Bata? Nitubasa kukikora turi kubatwariza omu muringo gwa rukundo, ogw’embabazi kandi turi kubereka ekitinisa. (Shoma omu Baroma 12:10.) Yijuka ku kiri kubasa kuba kigumire abo benetata abu turi kukunda kugaruka omu nterane. Nibabasa kuba batinire ku tutari bakira ge. e Obwe rero bayija aha Kijusyo oyerinde kubashwaza ninga shi kugamba ekintu ekiri kubasa kubagwisa kubi. (1 Tes 5:11) Abo benetata na banyanyazi ni Abakristo bagenzi bitu. Ku turi kushuba kuramiza hamwe Yehova ni kitushemeza munonga!—Zab 119:176; Byak 20:35.
19. Ni eha migisha eyi turi kutunga twayijuka orufu rwa Yesu?
19 Mbehi tikiri kutushemeza kumanya ku Yesu yaturagire kugumizamu kwijuka orufu rweye buri mwaka? Ku turi kukikora nikitugasira kandi kigasira n’abandi omu buryo bwingi. (Isa 48:17, 18) Rukundo eyi turi kukunda Yehova na Yesu nekizaho kweyongera. Nituba turi kwereka ku nitubasima ahabwa byona ebi ebatukorire. Nikituma obunywani bwitu n’Abakristo bagenzi bitu bwakizaho kuhama. Kandi nitubasa kukwasa abandi kumanya oku na bo bari kubasa kutunga emigisha ahabw’ekitambo. Nimureke twena tukore cona eki turi kubasa kugira ngu twetegure Ekijusyo c’ogu mwaka!
NI BATA OKU TURI KUBASA . . .
-
kutegurira emitima yitu Ekijusyo?
-
kukwasa abandi kugasirwa n’Ekijusyo?
-
kukwasa abafukirire?
ECESHONGORO CA 18 Okusiima Ekitambo
a Koresa akashanduku ka rondesa akari ahari jw.org kugira ngu obone ebicweka na za vidiyo ebyagambwa omuri eki kicweka.
b Reba ekicweka c’“Ebibuzo by’abashomi” omu Munara g’Omurinzi gw’Okwakana 2021.
c Reba ekitabo Hika hihi ya Yehova, (Draw Close to Jehovah) cwek. 23, par. 8-9.
d Reba akashanduku akari kugira ngu “ Ebi ori kubasa kucondozaho.”
e Reba ekishushani n’akashanduku akine omutwe oguri kugira ngu “ Ni bata oku ebibina byatwarize?” Mwenetata owafukirire nahurira atinire kutaha omu Nju y’Obukama konka yasingura ezo nyehurira yatahamu. Benetata na banyanyazi bamwakira bashemerirwe.
f EKISHUSHANI C’AHARI: Omu bwire obu abahereza ba Yehova b’omu kicweka kimwe c’ensi batandikire kwekwatanisa omu Kijusyo, abandi b’omu bindi bicweka bo bacayetegura eco kiro.
