1. Ni enki eki ori kwijuka watecereza ahari rukundo ya Yehova?

 MBEHI waragerizeho kutera akashushani k’oku Yehova ari kushusha? Mbehi ku ori kugamba na we omu kushaba ni enki ekiri kwija omu bitecerezo byawe? N’obu tutari kubasa kureba Yehova, Bibuli nemugambaho omu buryo bwingi. Bibuli neyeta Yehova ‘izoba n’engabo’ kandi ‘omuriro oguri kurya busha.’ (Zab 84:11; Heb 12:29) Ezekiyeli akagamba ahari Yehova ari kugamba ku ahu ari kuba ari hari kushusha n’ibare rya safiro, nk’omuringa ogwezibwe, n’omuhanganzima ninga omukororombya. (Ezek 1:26-28) Ebyo bintu ebiri kugambwa ahari Yehova, nibibasa kututinisa ninga bitutera obwoba.

2. Ni enki ekiri kutuma abamwe batina kuhika hihi ya Yehova?

² Ahakuba tutari kubasa kureba Yehova nikibasa kutugumira kwikiriza ku ari kutukunda. Abamwe nibatecereza ku Yehova atari kubakunda ahabw’ebintu ebyababireho omu bwire bwa kare. Nibabasa no kuba babire bine b’ishe abatari kubakunda. Yehova namanya ezo nyehurira kandi namanya oku ziri kutugiraho engaruka. Kugira ngu atukwase akahandikisa omu Kigambo ceye emitwarize yeye mirungi.

3. Ni enki eki tushemerire kumanya ahari rukundo ya Yehova?

³ Ekigambo kimwe ekiri kushoborora ge Yehova ni rukundo. (1 Yoh 4:8) Bibuli negamba ku Yehova ari rukundo. Byona ebi ari kukora nabikora ahabwa rukundo. Rukundo ya Ruhanga netangaza, eyine amani kandi eco nikituma yayereka n’abantu abatari kumukunda. (Mat 5:44, 45) Omuri eki kicweka twaza kushwijuma ebiri kukwata ahari Yehova n’ahari rukundo yeye. Oku turi kukizaho kumanya ebiri kukwata ahari Yehova ni ko turi kukizaho kumukunda.

 YEHOVA NATUKUNDA MUNONGA

4. Noyehurira ota ahabw’embabazi nyingi za Yehova? (Nambwenu reba ekishushani.)

⁴ ‘Yehova ayine embabazi nyingi.’ (Yak 5:11) Bibuli nemugereranisa n’omuzire w’omukazi oyine rukundo nyingi. (Isa 66:12, 13) Tecereza aha muzire w’omukazi oyine rukundo ori kufa aha mwana weye ocari muto. Nasimbiza omwana weye ah’iguru kandi akikora ari kumugambira ebigambo birungi. Ogo mwana yarira ninga shi yaba ari kushasha, omuzire nakora cona ekiri kubasika kugira ngu amuhe ebi ari kwetenga. N’itwe twaba turi omu busasi nitubasa kwesiga tutari kubanganisa ku Yehova ari kutukunda. Omuhandiki wa zaburi akahandika ati: ‘Ku ntekateka byingi, nayemereza omutima, okuhumuriza kwawe kugwisa ge amagara gange.’—Zab 94:19.

5. Ni bata oku ori kugasirwa ahabwa rukundo etari kuhemuka ya Yehova?

⁵ Yehova ayine okusasira kwingi. (Zab 103:8) Tari kutureka twakora enshobi. Ihanga ry’Abisirayeli rikashasha Yehova emirundi myingi; konka Yehova akagumizemu kubereka rukundo etari kuhemuka ari kubagambira ati: ‘Ahabw’okuba mukambera enkoramutima, mwaba ab’okuhebwa ekitinisa, nanye nabakunda.’ (Isa 43:4, 5) Rukundo ya Ruhanga terahindukire. Burijo tushemerire kumwesiga. N’obu turi kubasa kukora ekibi c’amani, Yehova tari kutusigaho. Twayehana tubyihire aha mutima kandi tukagarukira Yehova na we natukunda rukundo etari kuhwaho. Naturaganisa ku arije ‘kutusasirira kimwe.’ (Isa 55:7) Bibuli negamba aha kusasira ‘nk’ebiro by’okugarurwa busya. . .ebiri kuruga ahari Yehova.’—Byak 3:19.

6. Omuri Zakariya 2:8 nihatwegesa ki ahari Yehova?

⁶ Shoma omuri Zekariya 2:8. Ahakuba Yehova ari kutukunda, namanya oku turi kwehurira kandi ayetegwire kuturinda. Ku turi kushasha na we nashasha. Eco nikituma twashaba ngu: ‘Ondinde nk’embone y’erisho.’ (Zab 17:8) Erisho ni ekicweka c’okwetondera mungonga kandi ni ec’omugasho aha mubiri. Obwe rero Yehova yatugereranisa n’emboni z’erisho ryeye, naba ari nk’owagamba ngu: ‘Wena ori kubakora kubi imwe bantu bange mwe, naba ari nk’ori kukora kubi ekintu cange c’omuhendo.’

7. Ahabw’enki tushemerire kukizaho kwesiga rukundo ya Yehova?

⁷ Yehova nayenda ngu oyikirize otari kubanganisa ku ari kukunda. Konka namanya ku ahabw’ebintu ebyatubireho omu bwire bwa kare, turi kubasa kwebuza yaba ari kutukunda. Ninga  shi nitubasa kuba turi kuraba omu bizibu ebiri kutuma twayebuza yaba Yehova ari kutukunda. Ni enki ekirije kutuma twakizaho kumwesiga? Ni okumanya oku yayerekire rukunda Yesu, abashukirweho omwika, n’itwe twena.

OKU YEHOVA YAYEREKIRE RUKUNDO YEYE

8. Ni enki ekiri kutuma Yesu yayesiga atari kubanganisa ku Ishe ari kumukunda?

⁸ Hakahwa emyaka myingi, Yehova n’omwana weye bari kukundana munonga. Rukundo eyi bari kukundana ni yo eri kukira ezindi zona omu iguru n’omu nsi. Yehova akereka ku nakunda Yesu nk’oku biri omuri Matayo 17:5. Yehova akaba ari kubasa kwegambira kusha ngu, ‘Ogu ni owu ndi kwikiriza.’ Konka akaba ari kwenda ngu n’itwe tumanye oku ari kukunda Yesu, ni yo nshonga yagambire ngu: ‘Omwana wange owu ndi kukunda munonga.’ Yehova akaba nayesimira Yesu ahabw’okuba yabire ayikirize kuhayo amagara geye. (Efe 1:7) Hatariho okubanganisa, na Yesu akaba ari kumanya ku Ishe ari kumukunda munonga. Emirundi myingi akaba ari kugamba atari kushereka ku Ishe ari kumukunda.—Yoh 3:35; 10:17; 17:24.

9. Ni biha bigambo ebiri kwereka rukundo eyi Yehova ari kukunda abashukirweho omwika? Shoborora. (Abaroma 5:5)

⁹ Nambwenu Yehova nahamiza abashukirweho omwika ku ari kubakunda. (Shoma omu Baroma 5:5.) Tecereza aha kigambo ekiri kugira ngu “gushukirwe.” Ekitabo kimwe kikashoborora ku ekigambo okushukwaho, kiri kumanyisa “ebintu ebiri kwija nk’omugera gw’amizi.” Mazima ebyo ni ebigambo by’amani ebiri kushoborora rukundo nyingi eyi Yehova ari kukunda abashukirweho omwika! Abashukirweho omwika nibamanya ku Ruhanga ari ‘kubakunda munonga.’ (Yud 1) Entumwa Yohana akashoborora oku bari kwehurira obu yahandikire ngu: ‘Murebe okukunda oku Ishe yatukunzire oku kuri, itwe okwetwa abana ba Ruhanga!’ (1 Yoh 3:1) Mbehi Yehova nakunda abashukirweho omwika kusha? Ingaha, Yehova akereka ku natukunda twena.

10. Ni kiha kintu ekiri kukira ebindi ekiri kukuhamiza ku Yehova ari kukukunda?

¹⁰ Ni kiha kintu ekiri kukira ebindi ekiri kwereka rukundo ya Yehova? Ni ekitambo. Birabire ahari eco kitambo, Yehova akereka ku ari kutukunda munonga kukira ondijo muntu wena! (Yoh 3:16; Rom 5:8) Yehova akatanga omwana weye w’omuhendo, yafera abantu bona kugira ngu tusasirwe kandi tube banywani beye. (1 Yoh 4:10) Oku turi kukizaho kushoborocerwa ebi Yehova na Yesu batukorire, ni ko turi kukizaho kushoborocerwa ku batwerekire rukundo nyingi munonga. (Gal 2:20) Yehova taratuhire ekitambo ahabw’okuba ari Ruhanga w’oburinganiza kusha. Ahobwe nambwenu ekitambo, ni ekiconco eki yatuhire ahabwa rukundo. Yehova akatwereka ku ari kutukunda ari kwikiriza kuhayo omuntu w’omuhendo munonga ahari we ni okugamba Yesu. Yehova akikiriza ngu omwana weye abonabone kandi afe aha bw’itu.

11. Ni enki eki omuri Yeremiya 31:3 hari kutwegesa?

¹¹ Nk’oku tubirebire Yehova tari kutugambira ku ari kutukunda kusha, ahobwe nanabitwereka omu bikorwa. (Shoma omuri Yeremiya 31:3.) Yehova ni munywani witu ahabw’okuba natukunda. (Gereranisa na Ebiragiro 7:7, 8.) Tihine ekintu ninga omuntu ori kubasa kututanisa n’eyo rukundo. (Rom 8:38, 39) Eyo rukundo netuma wayehurira ota? Shoma omuri Zaburi ya 23, orebe oku rukundo n’embabazi ebi Yehova yayerekire Dawudi byamugasire, n’oku n’itwe biri kubasa kutugasira.

RUKUNDO YA YEHOVA NETUMA WAYEHURIRA OTA?

12. Gamba omu bugufu ebiri omuri Zaburi ya 23?

¹² Shoma omuri Zaburi ya 23:​1-6. Omuri zaburi ya 23, Dawudi akeshongora ari kugamba oku Yehova yabire ari kumukunda n’oku yabire ari kumwereka embabazi nyingi. Akashoborora  obunywani obwabire buri ahagati yeye na Yehova, yagamba ku Yehova ari Omurisa weye. Dawudi akaba ari kuhurira arinzirwe na Yehova kandi mazima akaba ari kumwesiga. Dawudi akaba ari kumanya ku rukundo ya Yehova ari yo eyabire eri kumurinda omu kubaho kweye. Mbwenu shi ni enki ecabire kiri kutuma yamwesiga?

13. Ahabw’enki Dawudi yabire ari kwesiga ku Yehova ari kumufaho?

¹³ ‘Tindicena ekintu cona.’ Dawudi akahurira Yehova ari kumufaho ahabw’okuba akaba ari kumuha ebintu byona. Nambwenu Dawudi akaba ari kumanya ku Yehova ari munywani weye kandi ku ari kumwikiriza. Ni yo nshonga yabire ari kwesiga ku ebyabire biri kubasa kumuhikaho omu biro by’omu misho oku byakuba biri kona, Yehova yabire arije kumuha ebi ari kwetenga. Ahabw’okuba Dawudi yabire ari kwikiriza ku Yehova ari kumukunda, bikaba nibituma atayemereza omutina ahobwe bituma yatunga okushemererwa n’okumarwa.—Zab 16:11.

14. Ni bata oku Yehova ari kutufaho ari kutwereka rukundo?

¹⁴ N’itwe Yehova natufaho ari kutwereka rukundo, na munonga haba hariho ebintu bibi ebyatubireho. Claire, a owakozire ahari Beteli emyaka eri kurenga ahari 20, akahurira atine oku ari kubasa kuyamba ab’omu ka yeye obu babugine ebizibu bigumire kandi bikuratine. Ishe akarwara endwara eri kutuma ebicweka bimwe by’omubiri bitabasa kukora, omuhara owu bari kuzarwana yabingwa omu kibina kandi babugana obucene, ecatumire eka yabo yabura n’aho kutura. Ni bata oku Yehova yaberekire ku nabakunda kandi ku nabafaho? Claire akagamba ati: “Burijo Yehova akaba nareba yaba ab’omu ka yitu batungire ebi bari kwetenga byona. Yehova akaba natutungura atuha ebintu ebirengire  ebi twaba turi kutecereza! Emirundi myingi ninkunda kutecereza aha bwire obu nayerebire rukundo n’embabazi bya Yehova kandi mazima tindi kubasa kubyebwa. Ebyo bintu bikankwasa kwehanganira n’ebindi bizibu ebi nabire ndi kurabamu.”

15. Ahabw’enki Dawudi yahurire yahumurizibwa? (Nambwenu reba ekishushani.)

¹⁵ ‘Nagarura amani omu magara gange.’ Obumwe, Dawudi akaba nahurira acwekire entege ahabw’ebizibu ebi yabire ari kurabamu. (Zab 18:4-6) Konka, rukundo n’embabazi bya Yehova bikaba nibituma yashuba kutunga amani. Yehova natwara abanywani beye abaremerirwe ah’‘irisizo ry’obunyasi buto’ n’aha ‘rubaju rw’amizi agari kusheneneka.’ Ebyo bikaba nibituma Dawudi yashuba kutunga amani kandi agumizamu kukorera Yehova ayine okushemererwa.—Zab 18:28-32.

16. Ni bata oku rukundo ya Yehova eri kutuma wagarurwamu amani?

¹⁶ N’omuri obu bwire, ‘rukundo ya Yehova etari kuhemuka n’embabazi zeye nyingi’ ni byo ebiri kutuma twagumizamu kwehangana twaba turi kuraba omu bizibu. (Amag 3:22; Kol 1:11) Reba ecokureberaho ca Rachel. Akahurira yashoberwa obu omushija weye yamusigire wenka kandi akareka kukorera Yehova omu bwire bw’ecorezo ca COVID-19. Ni bata oku Yehova yamukwasize? Akagamba ati: “Yehova akaba natuma nayikiriza ntari kubanganisa ku ari kunkunda. Akakoresa abanywani baguma kwija kumara obwire bari hamwe nanye, turya hamwe ebyokurya, bampa twa mesegi oturimu ebyahandikirwe, kandi baguma kunyijusya ku Yehova ari kunfaho. Burijo ninsima Yehova ahabw’okunta omu ka mpango y’abantu abari kukundana.”

17. Ahabw’enki Dawudi yabire atari “kutina akabi”?

¹⁷ ‘Tinditina akabi kona ahabw’okuba ori hamwe nanye.’ Burijo amagara ga Dawudi gakaba nigakira kuba gari omu kabi kandi akaba ayine abangi bingi ababire bine amani. Konka, rukundo ya Yehova ekatuma yahurira ayine oburinzi. Dawudi akaba nahurira ku Yehova ari hamwe na we omu bizibu byona ebi yabire ari kubugana kandi ku yabire ari kumukiza. Eco ni co ecatumire yayeshongora ngu: ‘[Yehova] ankakiza ebyabire biri kuntinisa byona.’ (Zab 34:4) Dawudi akaba ayine enshonga ezabire ziri kutuma yatina, konka rukundo ya Yehova ekaba nekira ebyo bintu byona ebyabire biri kubasa kumutinisa.

18. Ni bata oku rukundo ya Yehova eri kukugumya wahurira oyine obwoba?

¹⁸ Ni bata oku okumanya ku Yehova ari kutukunda biri kutugumya twaba turi omu mbera zigumire? Omupayoniya ori kwetwa Susi akashoborora  oku we n’omushija weye bayehurire obu mutabani wabo yarugire omu ka akaza kwebisaho. Akagira ati: “Wahikwaho ekintu ekigumire omu kubaho kwawe nobasa kuhurira otine okushemererwa kandi ohurira hatine ekiri kubasa kukuyamba. Konka embabazi nyingi za Yehova nizituma twahurira tuturize kandi turinzirwe.” Rachel, akagira ati: “Izoba rimwe buri omu kiro obu nibire nyemerize omutima munonga kandi ntinire, nkagambira Yehova ebintu byona omu kushaba. Bwanyima ku nabire nimara kushaba nkaba nimpurira yampumuriza, nyehurira nk’omwana onyami omu kifuba ca nyina, bwanyima mpika ndi kuhungira. Obwo bwire ti ndi kubasa kubwebwa.” Omuzehe ori kwetwa Tasos akasibwa emyaka ina ahabw’okwanga kuza omu mahe. Ni bata oku yayerebire ku Yehova ari kumukunda kandi ku ari kumufaho? Akagamba ngu: “Yehova akanfaho omuri byona ebi nabire ndi kwetenga kandi yampa n’ebirengire. Ebyo bikatuma nagira amani kandi byatuma nakizaho kumwesiga. Nambwenu birabire aha mwika oguri kwera, Yehova akatuma nagumizamu kutunga okushemererwa n’obu amagara g’omu kihome gari kuba gatabonire. Eco kikampamiza ku nagumizamu kutaho amani kugira ngu muhike hihi, ari ko nabire ndakizeho kugasirwa ahabw’oburungi bweye. Obwe rero nkahika nintandika kukora obupayoniya bw’obwire bwona n’obu nabire ndi omu kihome.”

GUMYA OBUNYWANI BWAWE NA RUHANGA W’EMBABAZI NYINGI

19. (a) Ni bata oku kumanya ku Ruhanga ari kutukunda biri kugira engaruka aha bi turi kugamba omu shara? (b) Ni ruha runyiriri oruri kugamba ahari rukundo ya Yehova oru ori kukunda? (Reba akashanduku akari kugira ngu: “ Enyiriri eziri kutuma twahurira ku Yehova ari kutukunda.”)

¹⁹ Ebyokureberaho ebi twamara kushwijuma byatwereka ku Yehova, ‘Ruhanga oyine rukundo,’ ari hamwe n’itwe! (2 Kor 13:11) Nafa ahari buri omwe omuri itwe. Twakizaho kwikiriza ku ‘twehinguririzibwe na rukundo etari kuhemuka.’ (Zab 32:10) Oku turi kukizaho kutecereza aha ku ari kutwereka rukundo, ni ko turi kuhurira twakizaho kumuhika hihi. Nitubasa kumuhika hihi tumugambira oku turi kumukunda. Nitubasa kumugambira ebiri kutwemereza omutima byona kandi twesiga tutari kubanganisa ku ayetegwire kutukwasa.—Zab 145:18, 19.

20. Ni bata oku rukundo ya Yehova eri kutuma wamuhika hihi?

²⁰ Nk’oku omu bwire bw’embeho turi kuhika hihi y’omuriro, ni ko turi n’okuhika hihi rukundo ya Yehova nyingi. N’obu Yehova ayine rukundo nyingi nambwenu ayine embabazi nyingi. Obwe rero guma oyikirize rukundo ya Yehova omu kubaho kwawe. N’itwe nitubasa kwereka Yehova ku turi kumukunda turi kugamba ngu: ‘Ninkunda Yehova’!—Zab 116:1.