1-2. Ni biha bizibu ebi abahereza b’abesigwa ba Yehova bari kubugana?

 EMBERA ezigumire nizibasa kuhindura amagara gitu omu kanya kace. Ecokureberaho: Mwenetata w’omwesigwa ori kwetwa Luis a akamanya ku yabire arwire kansa y’amani. Omudokita akamugambira ku yabire asigize amezi mace kugira ngu afe. Monika n’omushija weye bakaba nibakora n’amani omu bikorwa by’omwika. Izoba rimwe, Monika akamanya ku omushija weye owabire ari omuzehe w’ekibina yabire amazire emyaka myingi ari kukora n’ebikorwa bibi. Omunyanyazi owabire acari wenka ori kwetwa Olivia, akahikwaho n’ihunga catuma yaruga omu ka yeye kandi ku yagarukire yashanga ryahirikire enju yeye. Omu kire kace munonga amagara g’abo bantu gakahika nigahinduka. Mbehi n’iwe hine ekintu ecakuhikireho kikahindura amagara gawe omu kire kace?

² Itwe abahereza ba Yehova b’abesigwa n’itwe nituhikwaho n’embera zigumire kandi nitubasa kurwara nk’oku biri kubasa kuhika aha bantu bona. Nambwenu nitubasa kuhikwaho n’okuhiganisibwa okuri kuruga aha bantu abari kwanga abahereza ba Ruhanga. N’obu Yehova atari kutwihiraho ezo mbera zigumire, naturaganisa ku arije kutuyamba. (Isa 41:10) Birabire aha buyambi obu ari kutuha nitubasa kugumizamu kushemererwa, tukora ensharamu ndungi, kandi tugumizamu kuba abesigwa ahari we n’obu twakuba turi omu mbera zigumire. Omuri eki kicweka, twaza kushwijuma oburyo buna obu Yehova ari kubasa kutukwasamu, twaba turi omu bizibu. Nambwenu nitwija kureba eki turi kubasa kukora kugira ngu tugasirwe n’obuyambi obu ari kutuha.

 YEHOVA NAYIJA KUKURINDA

3. Twaba turi kuraba omu bizibu bigumire ni enki ekiri kubasa kuturema kukora?

³ Ekizibu eki turi kubasa kubugana. Ku turi kuhika omu bizibu ebigumire nikitugumira kutecereza ge, n’okukora ensharamu ndungi. Ahabw’enki? Ni ahabw’okuba nituba twine obusasi bwingi. Nituba tucwekire entege ahabw’okwemereza omutima. Nitubasa kuhurira twashoberwa tubura eki twakukora. Reka turebe abanyanyazi babiri abu twaba tugambireho, oku bayehurire obu babire bari omuri bya bizibu. Olivia akagamba ati: “Ihunga ku ryahirikire enju yange nkahurira nashoberwa kandi nabura eki nabikoraho.” Monika akagamba oku yayehurire ahabw’ebi omushija weye yakozire ari kugamba ati: “Nkahurira nahemukirwa munonga. Kikaba nikingumira n’okukora ebintu ebi nabire nshangirwe ninkora. Ebi nabire nintecereza ngu tibikampikaho ni byo ebyampikireho.” Ni bata oku Yehova ari kuturaganisa ku arije kutukwasa twaba twemerize omutima?

4. Tukuratize ebiri omu Bafilipi 4:6, 7, ni enki eki Yehova ari kuturaganisa?

⁴ Oku Yehova ari kutukwasa. Naturaganisa ku arije kutuha eki Bibuli eri kweta ‘obusinge bwa Ruhanga.’ (Shoma omu Bafilipi 4:6, 7.) Obwo businge nibumanyisa kuhurira oturize omu bitecerezo n’omu mutima, ahabw’okumanya ku twine obunywani burungi na we. Obwo businge ‘burengire okwetegereza k’omuntu wena’ kandi ni burungi omu buryo obu tutari kubasa kwehuriza. Mbehi waratungwirwe n’oku ori kuhurira oturize wamara kushaba Yehova emirundi myingi? Ezo nyehurira ni ‘obusinge bwa Ruhanga.’

5. Ni bata oku obusinge bwa Ruhanga burije kurinda obwenge bwitu n’emitima yitu? (Nambwenu reba ekishushani.)

⁵ Nambwenu orwo runyiriri nirugamba ku obusinge bwa Ruhanga buri kurinda ‘emitima yitu’ n’‘obwenge bwitu.’ Ekigambo c’Orugurika ecahindwirwemu ngu “okurinda” kikaba nikikira kukoresibwa omu by’amahe, kiri kumanyisa omusirikare ori kugumizamu kurinda etawuni kugira ngu hatagira owayitahirira. Ababire batwire omuri eyo tawuni bakaba nibanyama baturize ahabw’okuba bakaba nibamanya ku amahe gabire garinzire amarembo. Ni co kimwe, obusinge bwa Ruhanga ku buri kurinda emitima yitu n’obwenge bwitu nituhurira tuturize ahabw’okuba nituba nitumanya ku turinzirwe. (Zab 4:8) Kimwe na Hana, ebizibu ebi twakuba twine n’obu byakuba bitahindukire ahonaho, na bwo nitubasa kuhurira twine obusinge. (1 Sam 1:16-18) Kandi twaba tuturize, emirundi myingi nikitworobera kugira emitecerereze mirungi n’okukora ensharamu ndungi.

6. Ni enki eki turi kubasa kukora kugira ngu tugasirwe n’obusinge bwa Ruhanga?

⁶ Eki turi kubasa kukora. Nk’oku abaturage b’omu bwire bwa kare babire nibashaba abasirikare kubarinda, n’itwe tushemerire kushaba  Yehova kugira ngu aturinde. Bata shi? Gumizamu kushaba kuhisya watunga obusinge bwa Ruhanga. (Luk 11:9; 1 Tes 5:17) Luis, owu tugambireho, akashoborora oku we n’omukazi weye Ana, babasize kwehangana obu bamanyire ku yabire asigize amezi mace ngu afe. Luis akagamba ngu: “Ku ori kuba ori omu mbera nk’ezo nikiba kigumire kukora ensharamu ndungi aha bikwatirine n’okutambirwa n’aha bindi bizibu. Konka eshara ni yo yatumire twagumizamu kugira obusinge omuri ebyo bizibu ebi twarabiremu.” Luis n’omukazi weye bakagamba ku babire nibashaba emirundi myingi bari kweshengereza Yehova ngu abahe obusinge, n’okutuza kandi abahe obwenge bw’okukora ensharamu ndungi. Kandi mazima akabakwasa. Waba ori kuraba omu bizibu byingi, guma obigambe byona omu shara, kandi noyija kutunga obusinge bwa Yehova oburije kurinda omutima gwawe n’obwenge bwawe.—Rom 12:12.

YEHOVA NAYIJA KUTUMA WAHAMA

7. Nitubasa kwehurira tuta twaba turi kuraba omu bibibu bigumire?

⁷ Ekizibu eki turi kubasa kubugana. Twaba turi kuraba omu mbera zigumire ebitecerezo byitu, enyehurira zitu n’emyetwarire yitu nibiba bihindukire. Nk’oku omuyaga guri kutwara obwato ahu guri kweyendera, n’itwe nitubasa kuhurira turi baso twaba turi kuraba omu bizibu. Ana owu tubire tugambireho akagamba ku yarabire omu bizibu byingi Luis ku yamazire kufa. Akagamba ngu: “Obumwe nkaba nimpurira nyehebire kandi ntandika kwecwera orubanja. Nambwenu nkaba ningira ekiniga ahabw’okwijuka ku yafire.” Ekiri kukira ahari eco Ana akaba nahurira ayine irungu kandi ahurira yacweka entege yaza kukora ensharamu ezi Luis yabire nakora ge. Hine n’obu yabire nayehurira ari nk’ori omu muyaga mwingi omu nyanja. Mbwenu shi ni bata oku Yehova ari kutukwasa twaba twine enyehurira nk’ezo?

8. Tukuratize ebiri omuri Isaya 33:6, ni enki eki Yehova ari kutuhamiza?

⁸ Oku Yehova ari kutukwasa. Natuhamiza ku arije kutuma twahama. (Shoma omuri Isaya 33:6.) Obwato ku buri kubugana omuyaga nibutandika kutora oku n’oku kandi kiburetera akabi. Kugira ngu butatwarwa n’omuyaga nibuba bwine ebyoma ebiri kuburinda. Ebyo byoma nibituma omuyaga gutatwara obwato munonga kandi bituma n’ababurimu batuza. Konka ebyo byoma nibikora ge obwato bwaba buri kugenda. Ni co kimwe na Yehova natuma twahama, twagumizamu kumubera abesigwa twaba turi omu bizibu.

9. Ni bata oku ebikoreso ebi turi kucondorezamu biri kubasa kutukwasa kuringaniza? (Nambwenu reba ekishushani.)

⁹ Eki turi kubasa kukora. Waba ori omu bizibu bigumire ebiri kubasa kugeranisibwa n’ihunga, gumizamu kugira entebekanisa ndungi y’eby’omwika.  Ni amazima nobasa kuba otacakora byingi nk’ebi wabire nokora omu bwire bwa kare, konka guma oyesige ku Yehova ari kuringaniza. (Geranisa n’ebiri omuri Luka 21:1-4.) Nobasa kweteraho entebekanisa y’eby’omwika, otunga obwire bw’okweyegesa Ekigambo ca Ruhanga kandi okitecerezaho. Ahabw’enki? Yehova nakoresa ekitongore ceye, omu kutuha obuhabuzi bw’eby’omwika oburi kubasa kutukwasa kugumizamu kuringaniza. Kugira ngu obone ebi ori kwenda nobasa kucondoza okoresize ebiri kurebeka omu rurimi rwawe, nk’ahari JW Library^®, Irangiro rya Watch Tower n’omu kitabo ekiri kukwasa Abahamya ba Yehova kucondoza. Monika owu tubire tugambireho, akagamba ku ari kukoresa ebyo bikoreso kugira ngu abone obuhabuzi oburi kubasa kumukwasa yahurira yagira ebitecerezo bibi. Ecokureberaho: Akacondoza aha kigambo “ekiniga.” Obundi bwire akaba narondesa aha “kugambanirwa” ninga shi aha “kuba omwesigwa.” Bwanyima akaba nabishoma kuhisa yahurira yatuza. Akagamba ngu: “Obu nabire ncatandika kushoma nkaba nimpurira nyemerize omutima munonga, konka ku nagumizemu kushoma nkahurira Yehova ari nk’owayija akampumuriza. Oku nagenzire ndi kushoma nkamanya ku Yehova yabire ari kumanya enyehurira zange zona kandi ku yabire ari kunyamba.” Obuyambi nk’obwe nibubasa kutuma wagumizamu kugira emitecerereze eringanire kuhisya watuza.—Zab 119:143, 144.

YEHOVA NAYIJA KUKUKWASA

10. Nitwehurira tuta twamara kuhikwaho n’ebintu ebiri kutinisa?

¹⁰ Ekizibu eki turi kubasa kubugana. Haba hariho ekizibu ekigumire ecakuhikireho, hine obu ori kuhurira otine mani omu mubiri n’omu nyehurira. Nitubasa kwehurira nk’omuzani owaba ari kwiruka munonga konka ahendeka rero agendera omu mbago. Eco nikibasa kutuma tutakora ebintu ge nk’oku tushangirwe turi kubikora ninga oshanga tutacayesimira ebintu ebi twabire nitukunda omu bwire bwa kare. Kimwe na Eliya nitubasa kuhurira kigumire kwimuka. Nituhurira turi kweyendera kuguma tunyami. (1 Bag 19:5-7) Ni enki eki Yehova ari kuturaganisa ku arije kutukorera twahurira tucwekire entege?

11. Ni buha bundi buryo obu Yehova ari kutukwasamu? (Zaburi 94:18)

¹¹ Oku Yehova ari kutukwasa. Naturaganisa ku arije kutukwasa. (Shoma omuri Zaburi ya 94:18.) Nk’oku omuntu ohendekire ari kuba ari kwetenga oramukwase kugenda, n’itwe obumwe nituba turi kwetenga obuyambi kugira ngu tugumizemu kukorera Yehova. Omu mbera  nk’ezo, Yehova natuhamiza ngu: ‘Nyowe, Yehova Ruhanga wawe, ndyakukwata omukono gwa buryo, nkugire nti: Otatina, nayija kukuyamba.’ (Isa 4 1:13) Omugabe Dawudi ebi akabyerebera. Obu yabire ari kuraba omu mbera zigumire ari n’okuhigwa n’abangi beye akagambira Yehova ngu: ‘Omukono gwawe gwa buryo gukakwasa.’ (Zab 18:35) Konka shi ni bata oku Yehova ari kutuha obuyambi?

12. Ni baha abu Yehova ari kukoresa kugira ngu batuyambe twaba tucwekire entege?

¹² Emirundi myingi Yehova natukwasa akoresize abandi. Ecokureberaho: Izoba rimwe Dawudi ku yabire acwekire entege, Yehova akohereza munywani weye Yonatani kugira ngu amuhumurize kandi amugambire ebigambo by’okumugumya. (1 Sam 23:16, 17) Nambwenu Yehova akohereza Elisa ngu aze kukwasa Eliya. (1 Bag 19:16, 21; 2 Bag 2:2) Omuri obu bwire, Yehova nabasa kukoresa abanyabuzare, banywani bitu ninga abazehe kugira ngu batukwase. Konka ku turi kuba turi omu mbera zigumire ninga turi omu bintu ebiri kutushasha, nitubasa kutikiriza obwo buyambi obu abandi bari kutuha. Nituba turi kuhurira turi kweyendera kuguma turi twenka. Kandi ebyo ni ebintu ebishangirwe. Mbwenu shi obwe ni enki eki tushemerire kukora kugira ngu tutunge obuyambi bwa Yehova?

13. Ni enki eki tushemerire kukora kugira ngu tugasirwe n’obuyambi bwa Yehova? (Nambwenu reba ekishushani.)

¹³ Eki turi kubasa kukora. Guma oyerinde kwetantara abandi. Ku turi kwetantara abandi nitubasa kwetecerezaho twenka kandi tutecereza n’aha bizibu ebi turi kurabamu kusha. Emitecerereze nk’eyo nebasa kugira engaruka aha nsharamu ezi turi kukora. (Emi 18:1) Ni amazima nituba turi kwetenga obwire bw’okuba turi twenka namunonga twaba turi omu bizibu. Konka nambwenu twarengesereza omu kumara obwire turi twenka, nitubasa kutatunga oburyo obu Yehova ari kukoresa ari kutukwasa. Obwe rero waba ori omu mbera zigumire guma ogezeho kwikiriza obuyambi obu ori kuhebwa n’abanyabuzare bawe, banywani bawe n’abazehe. Guma obarebe nk’ebikoreso ebi Yehova ari kukoresa kugira ngu akuyambe.—Emi 17:17; Isa 32:1, 2.

YEHOVA NAYIJA KUKUHUMURIZA

14. Ni ziha mbera ezi turi kubasa kubugana zikatuma twayemereza omutima?

¹⁴ Ekizibu eki turi kubasa kubugana. Twaba turi kuraba omu bizibu bigumire nitubasa kuhurira twemerize omutima. Omuri Bibuli harimo enkuru z’abahereza ba Ruhanga b’abesigwa, ababire bari kuhika omu mbera zigumire bemereza omutima ahabw’abangi babo ninga ebindi  bintu. (Zab 18:4; 55:1, 5) N’itwe nitubasa kuhiganisibwa ah’ishomero, aha murimo, omu banyabuzare n’abategeki. Nitubasa n’okutina okufa ahabw’oburwire. Omu bwire nk’obwe nitubasa kwehurira nk’omwana muto otine ow’okumuyamba. Ni bata oku Yehova ari kutukwasa omu mbera nk’ezo?

15. Ni enki eki omuri Zaburi ya 94:19 hari kutuhamiza?

¹⁵ Oku Yehova ari kutukwasa. Natuhumuriza kandi atukwasa kutuza. (Shoma omuri Zaburi ya 94:19.) Eyi Zaburi nebasa kutuma twatecereza aha mwana w’omuhara ori kuhurira atinire aremwa n’okuhungira ahabw’okuhurira enjura erimu enkuba n’omuyaga mwingi. Shusha nk’owareba ishe yija akamuterura, akamuhumuriza, akamunyamisa omu kifuba kuhisa obu yahungira. N’obu enkuba n’omuyaga byakuba bitahwire, kumanya ku anyami omu kifuba c’ishe nibibasa kutuma yahurira aturize. Obwe rero twaba turi kuraba omu bizibu ebiri kututinisa, nituba turi kwetenga kunyama omu kifuba ca Tata witu w’omu iguru omu buryo bw’akamanyiso kuhisya ebyo bizibu byahwa. Ni bata oku turi kubasa kutunga okuhumurizibwa kwa Yehova?

16. Ni enki eki turi kubasa kukora kugira ngu tugasirwe n’oku Yehova arikutuhumuriza? (Nambwenu reba ekishushani.)

¹⁶ Eki turi kubasa kukora. Burijo guma omare obwire na Yehova birabire omu kumushaba, n’okushoma Ekigambo ceye. (Zab 77:1, 12-14) Waba ori omu mbera zigumire ekintu c’okubanza eki oshemerire kukora ni okuhika hihi Sho w’omu iguru. Guma ogambire Yehova ebiri kukutinisa n’ebiri kukwemereza omutima byona. Guma omuhurikize ori kushoma Ekigambo ceye kandi oyerebere oku ari kukuhumuriza. (Zab 119:28) Guma oshome ebicweka by’omuri Bibuli namunonga ebiri kukuhumuriza. Ecokureberaho: Nobasa kugarurwamu amani washoma ebiri omu kitabo ca Yobu, eca Zaburi n’ec’Emigani ninga shi washoma ebigambo bya Yesu ebiri omuri Matayo ekicweka 6. Ku oragume kushaba Yehova kandi okashoma Ekigambo ceye noyija kuhumurizibwa.

17. Ni enki eki turi kwesiga tutari kubanganisa?

¹⁷ Nimureke tugumizemu kwesiga ku Yehova arije kuba n’itwe omu bwire bw’ebizibu omu kubaho kwitu. Tituri twenka. (Zab 23:4; 94:14) Yehova naturaganisa ku arije kutuhabura, kutuma twahama, kutukwasa kandi ku arije kutuhumuriza. Omuri Isaya 26:3 nihagamba ahari Yehova hari kugira ngu: ‘Omuntu ori kukwegecerera omutima gweye, oryamurindira omu businge buzima, ahabw’okuba nakwesiga.’ Obwe rero guma oyesige Yehova kandi oyikirize oburyo obu ari kukuyambamu. Ku orakikore basyo noyija kutunga amani n’omu bwire bw’ebizibu.