Konka, Yehova nayenda ngu tugumizemu ku mutegereza kuhisa obwire obu yatireho bw’okugira eki yakora bwahika. Aha bw’enki ari ari kutushaba tumutegereza? Kandi shi ni enki ekiri kubasa kutukwasa kumutegereza twine okushemererwa?

AHABW’ENKI YEHOVA ARI KUTUSHABA KUMUTEGEREZA?

Bibuli negira ngu: ‘Ni co Yehova aritegerereza, ngu abagirire embabazi, kandi ni co arihebwa ekitinisa, ngu abagirire esaasi; ahabw’okuba Yehova ni Ruhanga ocwa emanja z’oburyo, abari kumutegereza bona bine omugisha.’ (Isa 30:18) Ebyo bigambo Isaya akabihandikira Abayudaya babagomi (Isa 30:1) Konka, hakaba hariho Abayudaya abamwe ababire bari abesigwa kandi ebyo bigambo bikabaha amasiko. Ebyo bigambo ni bibasa kuha amasiko abahereza ba Ruhanga babesigwa b’omuri obu bwire.

Obwe rero, tushemerire kutegereza twehangine ahakuba Yehova na we nategereza ayehangine. Ayine obwire obu yatireho obu arije kumariraho kimwe eyi nsi mbi, kandi ategerize ngu obwo bwire buhike. (Mat 24:36) Obwo bwire nikija kurebeka ge ku ebi Sitani ari kurega Yehova n’abari kumukorera ari ebishuba. Nayija kucwekereza Sitane n’abantu bona abari kumushagika, konka itwe nayija ‘kutwereka embabazi.’

Yehova nabasa kutatwihiraho ebigezo ebi turi kurabamu, konka naturaganisa ku turi kubasa kushemererwa omu bwire obu tucategerize . Nk’oku Isaya yakigambire nitubasa kushemererwa omu bwire obu tucategerize ebintu birungi ebirije kubaho. (Isa 30:18) a Ni bata oku turi kubasa kutunga oko kushemererwa? Reba ebintu bina ebiri kubasa kutukwasa.

OKU TURI KUBASA KUTEGEREZA TUSHEMERIRWE

Guma ote omutima aha bintu birungi. Omugabe Dawudi akareba bintu byingi bibi omu kubaho kweye kona. (Zab 37:35) Konka akahandika ati: ‘Humurira omuri Yehova, omutegereze n’okugumisiriza; otayemereza omutima ahabw’omuntu ori kuhirwa omu muhanda gweye, akahikiriza enama zeye embi.’ (Zab 37:7) Dawudi akata ebyo bigambo omu bikorwa ari kugumizamu kutegereza okujunwa kweye. Nambwenu  akaguma nayijuka buri mugisha gona ogu Yehova yabire namuha. (Zab 40:5) N’itwe ku turagumizemu kuta omutima aha birungi omu mbera ezi turimu, omu mwanya g’okutecereza aha bintu bibi ebiri kutuhikaho, nikija kutworobera kutegereza Yehova.

Guma ohimbise Yehova oyine byingi by’okukora. Omuhandiki wa Zaburi ya 71, ori kubasa kuba yabire ari Dawudi akahandika ari kugira ati: ‘Ndyaguma n’amasiko obwire bwona, nyeyongere kukuhimbisa burizoba.’ (Zab 71:14) Ni bata oku Dawudi yabire arahimbise Yehova? Akaba ashemerire kugambira abandi ebiri kukwata ahari Yehova, kandi amuhimbisa ari kumweshongorera. (Zab 71:16, 23) N’itwe kimwe na Dawudi nitubasa kutunga okushemererwa omu bwire obu tucategerizemu Yehova. Nitumuhimbisa birabire omu murimo g’okuburira, omu biganiro byitu bya burijo n’omu kumweshongorera. Mbehi oburije waba ori kweshongora eceshongoro c’Obukama, tori kubasa kuta omutima aha butumwa oburimu?

Tunga okuhumurizibwa okuri kuruga ahari benetata na banyanyazi. Obwire obu Dawudi yabire ari omu mbera zigumire akagamba ngu: ‘Ndyayereka ku ninyesiga izina ryawe omu misho g’abari kwera bawe.’ (Zab 52:9) N’itwe nitubasa kutunga okuhumurizibwa okuri kuruga aha Bakristo bagenzi bitu, hatari omu nterane n’omu kuburira kusha, ahobwe nambwenu twaba turi omu bikorwa ebiri kubuganisa abantu bingi.—Rom 1:11, 12.

Gumya amasiko agu oyine. Omuri Zaburi ya 62:5 nihagira ngu: ‘Amagara gange gacurera nigategereza Ruhanga wenka; ahakuba ni we amasiko gange garugaho.’ Ni ekintu kikuru kugira amasiko gahamire namunonga emperu yaba etijire omu bwire obu turi kutecereza. Tushemerire kwesiga tutari kubanganisa ku ebiraganiso bya Yehova birije kuhikirira, n’obu twakuba tumazire obwire bwingi tubitegerize. Nitubasa kukizaho kugumya amasiko gitu, turi kweyegesa Ekigambo ca Ruhanga, harimu obuhanuzi, oku ebiri omuri Bibuli biri kwikirizingana, n’ebi Yehova ari kushoborora ebiri kumukwataho. (Zab 1:2, 3) Nambwenu tushemerire kugumizamu ‘kushaba omwika oguri kwera’ kugira ngu tugumizemu kugira obunywani burungi na Yehova, omu bwire obu tutegerize ngu ekiraganiso eki yaturaganisize c’amagara agatahwaho kihikirire.—Yud 20, 21.

Kimwe n’Omugabe Dawudi, guma oyesige otari kubanganisa ku Yehova ari kufa aha bari kumutegereza behangine, kandi ku ari kubereka rukundo yeye etari kuhemuka. (Zab 33:18, 22) Nyabura we, gumizamu kutegereza Yehova oyehangine ori kuta omutima aha bintu birungi, ori kumuhimbisa, ori kutunga okuhumurizibwa kw’Abakristo bagenzi bawe kandi ori kugumizamu kugumya amasiko gawe g’omuhendo.