1. Ni bata oku omwojo omwe yayerekire ku ayine amasiko g’okuzoka?

 OMWOJO ori kwetwa Matthew akarwara endwara egumire eri kumushaba kubagwa emirundi myingi. Obu yabire ayine emyaka mushanju, we n’abagizire eka yabo bakaba bari kureba ekiganiro ca buri kwezi ahari Tivi ya JW^®. Ekiganiro ku cagire kuhendera bakareba vidiyo y’omuziki erimu abantu abari kwakira ababo abafire bari kuzoka. b Bwanyima y’ekiganiro, Matthew akahika abazire beye, yabakwata omu ngaro, rero yabagambira ati: “Mbehi tata na mama, mwaba nimukimanya? N’obu ndifa nimbasa kuzoka. Mwije kuntegereza kusha; ti ko?” Mbehi nimubasa kwehuriza oku abo bazire bayehurire bamanya ku mutabani wabo ayine amasiko g’okuzoka?

2-3. Ahabw’enki ari kirungi ahari itwe okutecereza aha kiraganiso c’okuzoka?

² Obumwe na bumwe, twena nituba tushemerire kutecereza aha kiraganiso ca Bibuli c’oku harije kubaho okuzoka. (Yoh 5:28, 29) Ahabw’enki? Ahakuba nituba tutari kumanya obwire obu turi kubasa kuhikwaho n’endwara etungurine ninga shi kufisa omuntu witu. (Mub 9:11; Yak 4:13, 14) Amasiko g’okuzoka nigabasa kutukwasa kwehanganira ebyo bizibu. (1 Tes 4:13) Ebyahandikirwe nibituhamiza ku Tata witu w’omu iguru ari kutumanya ge kandi ku ari kutukunda munonga. (Luk 12:7) Tecereza oku Yehova Ruhanga ari kutumanya ge, okuhika n’aha kubasa kongera kutuhanga twine emicwe eyi twabire twine n’ebintu ebi twabire turi kwijuka. Nambwenu Yehova natukunda munonga ahakuba yatuhire amasiko g’okubaho ebiro byona kandi nayija kutuzora n’obu twakufa!

³ Omuri eki kicweka, twaza kubanza kushwijuma enshonga ahabw’enki tushemerire kwikiriza ekiraganiso c’okuzoka. Bwanyima, nitwija kushwijuma enkuru y’omuri Bibuli eri kugumya okwikiriza kwitu erimu ebigambo by’omu cahandikirwe kikuru ebiri kugira ngu: ‘Mwenenyoko nayija kuzoka.’ (Yoh 11: 23) Aha muheru, nitwija kureba eki turi kubasa kukora kugira ngu amasiko g’okuzoka gabe aga buzima ahari itwe.

4. Kugira ngu twesige ekiraganiso nanka, ni enki eki tushemerire kuba turi kwesiga? Gamba ecokureberaho.

⁴ Kugira ngu twesige ekiraganiso nanka, tushemerire kuba turi kwikiriza ku omuntu owakituraganisa ayine ecetengo n’amani g’okukihikiriza. Ecokureberaho: Reka tugire ngu enju yawe ekashenywa n’omuyaga gw’amani. Mbwenuho munywani wawe yakuraganisa ku arije kukukwasa kushuba kuyombeka. Yabigamba abyihire aha mutima, kandi noyikiriza otari kubanganisa ku ayine ecetengo c’okukukwasa. Ogo muntu yaba ari omwombeki kandi ayine n’ebikoreso, nohika ori kumanya ku ayine n’obushoborozi bw’okukuyamba. Obwe rero, noyikiriza eki yakuraganisa. Mbwenu shi kiri kita aha kiraganiso ca Ruhanga c’okuzora abafire? Konka shi ni amazima ayine ecetengo n’amani g’okukihikiriza?

5-6. Ahabw’enki turi kwesiga tutari kubanganisa ku Yehova ayine ecetengo c’okuzora abafire?

⁵ Mbehi Yehova ayine ecetengo c’okuzora abafire? Hatariho okubanganisa, acine. Akahumecera abahandiki bingi ba Bibuli rero bahandika eco kiraganiso c’oku arije kuzora abafire. (Isa 26:19; Hos 13:14; Kush 20:11-13) Kandi Yehova ku ari kuraganisa ekintu, burijo nakihikiriza. (Yos 23:14) Ni amazima, Yehova ayine ecetengo kingi c’okugarurira amagara abafire. Ahabw’enki twagamba tusyo?

⁶ Tecereza aha bigambo bya shwenkuruza Yobu. Akaba nayikiriza ngu n’obu yakufa, Yehova akaba arije kumugarurira amagara. (Yob 14:14, 15) Eco ni co cetengo eki Yehova ayinire abafire. Ayine ecetengo kingi c’okubazora, bine amagara marungi kandi bashemerirwe. Konka shi kiri kita aha bantu bingi abafire batakatungire omugisha g’okwega amazima agakwatirine na Yehova? Ruhanga witu oyine rukundo na bo nayendera kimwe kubazora. (Byak 24:15) Nayenda ngu bije kutunga omugisha g’okuba banywani beye kandi batunge amagara g’okuba hanu omu nsi. (Yoh 3:16) Buzima, nikirebeka ku Yehova ayine ecetengo c’okuzora abafire.

7-8. Ahabw’enki turi kubasa kwikiriza ku Yehova ayine amani g’okuzora abafire?

⁷ Mbehi Yehova ayine n’amani g’okuzora abafire? Yego buzima! Ahabw’okuba ni ‘Owobushoborozi bwona.’ (Kush 1:8) Obwe rero, ayine amani mingi g’okusinga omwangi wena, harimu n’orufu. (1 Kor 15:26) Okumanya eco nikitugaruramu amani kandi kituhumuriza. Reba ebyahikire ahari munyanyazi ori kwetwa Emma Arnold. We n’ab’omu ka yeye bakabugana ebintu bigumire ebiri kugeza okwikiriza kwabo omu rutaro rwa kabiri rw’ensi yona. Kugira ngu Emma ahumurize muhara weye ahabwa banywani babo ababire baferire omu kampu y’abanazi, akamugambira ati: “Yaba abafire batarizoka, obwe nikimanyisa ku orufu ruri kukiza Yehova amani; kandi eco tikiri kubasika.” Mazima tihariho ekintu na kimwe ekine amani kusinga Yehova! Yehova Ruhanga Owobushoborozi ni we owahangire amagara kandi ayine obushoborozi bw’okugagarurira abafire.

⁸ Endijo nshonga eri kutuma twayikiriza ku Ruhanga ayine amani g’okuzora abafire ni oku ayine obushoborozi bw’okwijuka obutine bugarukiro. Nayeta buri nyonyozi omu izina ryayo. (Isa 40:26) Nambwenu, nayijuka abantu bona abafire. (Yob 14:13; Luk 20:37, 38) Obwe rero, nayijuka omu buryo bworobi buri kantu kona akabire kagizire abantu abu ari kwenda kuzora, harimu n’amakuru gona g’omubiri gwabo, ebyababireho omu kubaho kwabo, n’ebintu byona ebi babire nibamanya.

9. Ahabw’enki ori kwesiga ekiraganiso ca Yehova c’okuzora abafire?

 ⁹ Nikirebeka ge, nitubasa kwesiga ekiraganiso ca Yehova c’okwija kuzora abafire ahakuba nitumanya ku ayine ecetengo n’amani by’okukihikiriza. Tecereza aha ndijo nshonga eri kutuma twayesiga ekiraganiso: Yehova akazora abafire omu bwire bwa kare. Omu bwire bwa Bibuli, Yehova akaha amani abashija b’abesigwa, harimu na Yesu, ngu bazore abafire. Reka tushwijume enkuru emwe eri kugamba aha cokutangaza c’okuzora omuntu eki Yesu yakozire, eri omuri Yohana ekicweka ca 11.

10. Ni enki ecabireho obu Yesu yabire ari kuburira eseri ya Yorudani orugire Betaniya, kandi shi akakora ki? (Yohana 11:1-3)

¹⁰ Shoma omuri Yohana 11:1-3. Tecereza aha bintu ebyabireho omuri Betaniya, omu mperu y’omwaka gwa 32 B.Y. Yesu akaba ayine abanywani b’amagara omuri eco caro, ari bo Lazaro na banyanyazi beye babiri, Mariya na Marita. (Luk 10:38-42) Konka Lazaro akarwara, kandi banyanyazi beye bayemereza omutima. Bakatuma entumwa ahari Yesu, owabire ori eseri ya Yorudani, aha rugendo rw’ebiro bibiri orugire Betaniya. (Yoh 10:40) Ekiri kushasha, ni oku obu eyo ntumwa yabire etakahikire ahari Yesu, Lazaro yafire. N’obu Yesu yamanyire ku munywani weye yamara kufa akaguma omu mwanya ogu yabire arimu, yamaramu ebiro bibiri byona, rero yabona kukora orugendo ari kuza Betaniya. Obwe rero obwire obu Yesu yahikireyo, Lazaro akaba amazire ebiro bina afire. Yesu akaba yaza kukora ekintu ecabire kiragasire banywani beye, kandi kikahisa Ruhanga ekitinisa.​—Yoh 11:4, 6, 11, 17.

11. Ni riha ishomo erikwatirine n’okugira abanywani barungi eri turi kwiha omuri eyi nkuru?

¹¹ Eyi nkuru netwegesa ishomo ry’okugira abanywani barungi. Tecereza ahari eki: Obu Mariya na Marita batumire entumwa ahari Yesu, tibaramugambire ngu ayije omu ka yabo omuri Betaniya. Bakamugambira kusha ngu munywani weye afire. (Yoh 11:3) Lazaro ku yamazire kufa, Yesu akaba nabasa kumuzora ari hare. Konka, Yesu akasharamu kuza Betaniya, kugira ngu abe ari hamwe na banywani beye, ari bo Mariya na Marita. Mbehi n’iwe oyine omunywani nk’ogwe ori kubasa kukutabara otasibire nomweta? Obwe rero waba omwine, omanye ku ari kubasa kukuyamba ‘omu bihikirizi.’ (Emi 17:17) Nimureke tugume tubere abandi abanywani barungi! Hati reka tugaruke ahari eyo nkuru turebe ebintu ebyakuratireho.

12. Ni enki eki Yesu yaraganisize Marita, kandi shi ahabw’enki Marita yabire atashemerire kukibanganisaho? (Yohana 11:23-26)

¹² Shoma omuri Yohana 11:23-26. Marita akamanya ku Yesu yahika hihi ya Betaniya. Akiruka yaza kumubugana, rero yamugambira ati: ‘Mukama wange, kuri obire ori aha, mwenetata yaba atarafe.’ (Yoh 11:21) Ni amazima, Yesu akaba ashemerire kuba akirize Lazaro. Konka Yesu akaba natecereza kukora ekindi kintu ecabire kiri ec’omutano. Akaraganisa Marita ati: ‘Mwenenyoko nayija kuzoka.’ Nambwenu akagambira Marita ezindi nshonga ezabire ziratume yayikiriza ekiraganiso ceye, ari kumugira  ati: ‘Ni inye kuzoka n’amagara.’ Buzima, Yesu ayine amani agu Ruhanga yamuhire, ni yo nshonga ayine obushoborozi aha magara n’orufu. Ebyo bitakabireho, akaba yazorire omuhara ocari muto owabire yamara kufa kandi akazora omusigazi, oku kiri kurebeka ah’izoba eri yabire aferireho. (Luk 7:11-15; 8:49-55) Konka shi akaba nabasa n’okuzora omuntu omazire ebiro bina afire kandi n’omutumbi gweye gutandikire kujunda?

13. Nk’oku biri kugambwa omuri Yohana 11:32-35, ni bata oku Yesu yatwarize yareba Mariya n’abandi bari kurira? (Nambwenu reba ekishushani.)

¹³ Shoma omuri Yohana 11:32-35. Reba ebyabireho bwanyima. Ondijo munyanyazi wa Lazaro ori kwetwa Mariya, na we akaza kubugana Yesu. Na we akagarukamu ebigambo ebi mwenenyina yabire agambire, ari kugira ati: ‘Mukama wange, kuri obire ori aha, mwenetata yaba atarafe.’ We n’abandi ababire bari na we bakaba bari kurira munonga. Yesu ku yabarebire kandi akahurira oku bari kurira, akagira obusaasi bwingi. Akagirira esaasi abo banywani beye, rero na we yarira. Namanya oku kiri kushasha twaferwa omuntu owu turi kukunda. Mazima, ayine ekihika c’okutwihiraho ebintu byona ebiri kutuma twarira!

14. Oku Yesu yatwarize yareba Mariya ari kurira nikitwegesa ki ahari Yehova?

¹⁴ Oku Yesu yatwarize yareba Mariya ari kurira nikitwegesa ku Yehova ari Ruhanga w’esaasi. Ahabw’enki turi kugamba tusyoya? Nk’oku twakirebire omu kicweka ecabandirize eki, Yesu nayereka emitecererereze n’enyehurira by’Ishe omu bwijwire. (Yoh 12:45) Obwe rero twashoma enkuru eri kugamba oku Yesu yarebire banywani beye bari kurira akabagirira esaasi na we akarira, nitumaya ku Yehova na we ari kushasha yareba turi kurira ahabw’obusaasi. (Zab 56:8) Mbwenu shi eco tikiri kutuma wayenda kukizaho kuhika hihi ya Ruhanga w’embabazi?

15. Nk’oku biri kugambwa omuri Yohana 11:41-44, ni Enki ecaberire aha kituro ca Lazaro. (Nambwenu reba ekishushani.)

¹⁵ Shoma omuri Yohana 11:41-44. Yesu akahika aha kituro ca Lazaro, rero yashaba ngu biheho ibare eryabire rihashwekire. Marita akabyanga, yagamba ku omutumbi gweye guri kubasa kuba gwatandikire kunuka. Yesu  akamugarukamu ati: ‘Tinakugira nti ku orikirize, noyija kureba ekitinisa ca Ruhanga?’ (Yoh 11:39, 40) Bwanyima Yesu akimusya amisho geye, yashabira omu misho ga bona. Akaba nayenda ngu ecokutangaza eki yabire yaza kukora kihise Yehova ekitinisa. Bwanyima Yesu aketa n’iraka rihango ati: ‘Lazaro, shohora oyije!’ Lazaro akahika nashohora yaruga omu kituro! Yesu akaba yakora ekintu eki bamwe babire bari kureba nk’ekitari kubasika.​—Reba obushobororo bw’ecahandikirwe c’omuri Yohana 11:17.

16. Ni bata oku enkuru y’omuri Yohana ekicweka ca 11 eri kutuma twayikiriza ku haribaho okuzoka?

¹⁶ Enkuru y’omuri Yohana ekicweka ca 11 netuma twakizaho kwikiriza ku haribaho okuzoka. Bata shi? Yijuka ku Yesu yaraganisize Marita ati: ‘Mwenenyoko nayija kuzoka.’ (Yoh 11:23) Yesu na we ari nk’Ishe ahakuba ayine ecetengo n’amani by’okuhikiriza eco kiraganiso. Okuba Yesu yarizire nicereka ku ayine ecetengo c’okwihaho orufu n’obusaasi obu ruri kureta. Kandi okuba Lazaro yarugire omu kituro, nambwenu nicereka ku Yesu ayine amani g’okuzora abafire. Nambwenu, tecereza aha bigambo ebi Yesu yayijukize Marita ari kugira ati: ‘Tinakugira nti ku orikirize, noyija kureba ekitinisa ca Ruhanga?’ (Yoh 11:40) Twine enshonga ndungi z’okwikiriza tutari kubanganisa ku ekiraganiso ca Ruhanga c’okuzora abafire kirije kuhikirira. Konka shi, ni enki eki turi kubasa kukora kugira ngu ago masiko gakizeho kuba aga buzima ahari itwe?

17. Ni enki eki tushemerire kuguma turi kwijuka twaba turi kushoma enkuru z’abantu abazokire?

¹⁷ Guma oshome enkuru z’omu bwire bwa kare eziri kugamba aha kuzoka kandi ozitecerezeho. Bibuli negamba aha bantu munana abazokire. c Mbehi tori kubasa kushwijuma enkuru ya buri omwe omuri bo? Ku orakikore, noyija kushanga babire bari abantu nk’itwe, ahakuba  hakaba harimu abashija, abakazi, n’abana. Ogume orondesemu amashomo agu ori kubasa kwegeramu. Ogume otecereze oku buri nkuru eri kwereka ku Ruhanga ayine ecetengo n’amani by’okugarura abafire. Ekiri kukira byona, ogume otecereze aha muntu ori kukira abandi bona owazokire, ari we Yesu. Yijuka ku okuba yazokire kandi akarebwa n’abantu bingi kiri kugumya okwikiriza kwitu.​—1 Kor 15:3-6, 20-22.

18. Ni bata oku ori kubasa kukoresa ge ebyeshongoro byitu ebiri kugamba aha masiko g’okuzoka? (Nambwenu rera obugambo bw’ahaasi.)

¹⁸ Guma okorese ge ‘ebyeshongoro by’omwika’ ebiri kugamba aha masiko g’okuzoka. d (Efe 5:19) Ebyo byeshongoro nibituma amasiko g’okuzoka gakizaho kuba aga buzima ahari itwe kandi kigumya okwikiriza kwitu. Guma obihurikize, obyemanyize, kandi mugume mubiganireho mwaba muri omu kuramya kw’eka. Guma obikwate omu mutwe. Bwanyima ku orije kubugana ekigezo kigumire ninga shi okaferwa omukundwa wawe, omwika gwa Yehova nigwija kukukwasa kwijuka ebyo byeshongoro, bikuhumurize kandi bikugumye.

19. Ni enki eki turi kubasa kutecereza aha bikwatirine n’okuzoka? (Reba akashanduku akari kugira ngu “ Ni enki eki orije kubabuza?”)

¹⁹ Guma okorese obushoborozi bwawe bw’okutecereza. Yehova akatuha obushoborozi bw’okwereba turi omu nsi ensya. Omunyanyazi omwe akagamba ati: “Nkamara obwire buringwa ndi kutecereza ahari paradiso, okuhika n’aha kuhurira empumuro y’ebimuri byaho oku erije kuba eri.” Tecereza ori kubugana n’abashija n’abakazi b’abesigwa ababireho omu bwire bwa Bibuli. Ni oha owu oyinire ekihika c’okubugana? Ni biha bibuzo ebi orije kumubuza? Nambwenu, tecereza ori kubugana n’abakundwa bawe abafire. Tecereza ebi oribagambira, oku orije kubahobera, n’oku orije kurira amarira g’okushemererwa.

20. Ni enki eki tushemerire kumaririra kukora?

²⁰ Mazima nitusima Yehova ahabw’amasiko g’okuzoka agu yatuhire! Nitwesiga ku eco kiraganiso kirije kuhikirira ahakuba Yehova ayine ecetengo n’amani g’okukihikiriza. Nimureke tumaririre kugumizamu kuhamya ago masiko gitu g’okuzoka. Ku turakikore tusyoya, nitwija kukizaho kuhika hihi ya Ruhanga, ori kuturaganisa ku abakundwa bitu barije kuzoka!