1-2. Ni enki eki tushemerire kukora omu bwire obu tucategerize ensi ensya?

 NITWESIMIRA ekiraganiso ca Yehova c’okwihaho egi nsi mbi akagisimbuza ensi ensya. (2 Pet 3:13) N’obu tutari kumanya obwire obu ensi ensya erijire, konka hariho ebihamya ebiri kwereka ku hasigire obwire buce.​—Mat 24:32-34, 36; Byak 1:7.

² Obwire obu twakuba tumazire omu mazima, twena tushemerire okugumya okwikiriza kwitu. Ahabw’enki? Ni ahabw’okuba n’abantu abine okwikiriza kugumire na bo nibabasa kucweka entege. Ni yo nshonga entumwa Pawulo yagambire ku okubura okwikiriza ari ‘ekibi ekiri kutwezingiraho omu buryo bworobi.’ (Heb 12:1) Kugira ngu tutacweka entege, tushemerire kugumizamu kushwijuma ebihamya ebiri kwereka ku ensi ensya eri hihi.​—Heb 11:1.

3. Ni enki eki twaza kushwijuma omuri eki kicweka?

³ Omuri eki kicweka, twaza kushwijuma oburyo bushatu obu turi kubasa kugumyamu amasiko gitu g’ensi ensya eyi Yehova ari kuturaganisa: (1) okutecereza aha kitambo, (2) okutecereza aha mani ga Yehova, (3) okumara obwire omu bikorwa by’omwika. Bwanyima nitushwijuma oku obutumwa obu Yehova yagambire Habakuki buri kugumya okwikiriza kwitu omuri obu bwire. Konka, nimureke tubanze tushwijume embera zimwe ezi turi kubasa kuba turi kurabamu omuri obu bwire eziri kutushaba okwikiriza kugumire aha kiraganiso c’ensi ensya.

 EMBERA EZIRI KUSHABA OKWIKIRIZA KUGUMIRE

4. Ni ziha nsharamu eziri kutushaba okwikiriza kugumire?

⁴ Burizoba, nitukora ensharamu eziri kutushaba okwikiriza kugumire. Ecokureberaho: Nitukora ensharamu ezikwatirine n’abanywani, eby’okweshemeza, amashomero, okutasana, okuzara abana, n’omurimo g’okutubisaho. Nitubasa kwebuza ngu: ‘Mbehi ensharamu ezi ndi kukora nizeraka ku ndi kwikiriza ngu eyi nsi mbi eri hihi kurugaho hakija ensi ensya ya Ruhanga? Ninga ensharamu zange niziba zegamire aha bitecerezo by’abantu abari kutecereza ngu orufu ni rwo muheru?’ (Mat 6:19, 20; Luk 12:16-21) Ku turagumye okwikiriza kwitu aha bikwatirine n’ensi ensya eri hihi kwija nitwija kukora ensharamu ndungi.

5-6. Ahabw’enki turi kuba tucenire okwikiriza kuhamire omu bwire bw’ebigezo? Gamba ecokureberaho.

⁵ Nambwenu nitubugana n’ebigezo ebiri kutushaba kugira okwikiriza kuhamire. Nitubasa kuhiganisibwa, turwara endwara etari kukira, ninga shi tuhikwaho n’ebindi bintu ebiri kubasa kutumaramu amani. Omu kubanza, nitubasa kubyehanganira twine obumanzi. Konka ebigezo nk’ebyo nibibasa kugumaho, obwe rero nibitushaba kugira okwikiriza kuhamire kugira ngu tubyehanganire kandi tugumizemu kukorera Yehova tushemerirwe.​—Rom 12:12; 1 Pet 1:6, 7.

⁶ Twaba turi omu kigezo, nitubasa kuhurira ensi ensya ya Yehova etaribaho. Mbwenu shi eco nikimanyisa ngu okwikiriza kwitu ni kuce. Ingaha mazima. Reka turebe ecokureberaho. Ku turi kuba turi omu bufukirizi bw’omu itumba, nitubasa kutecereza ngu ecanda tikiribaho. Kandi n’obundi ecanda nikihika aho kija. Ni co kimwe, twaba tucwekire entege munonga, nitubasa kuhurira ensi ensya eri nk’etarije kubaho. Konka twaba twine okwikiriza kuhamire, nituguma kwijuka ku ebiraganiso bya Ruhanga birije kuhikirira. (Zab 94:3, 14, 15; Heb 6:17-19) Twaba twine ago masiko, nitugumizamu kuta okuramya Yehova omu mwanya g’okubanza omu kubaho kwitu.

7. Ni eha mitecerereze eyi tushemerire kwerinda?

⁷ Reka turebe ahandi hantu ahari kutushaba kugira okwikiriza kugumire, ni okugamba omu murimo g’okuburira. Abantu bingi abu turi kuburira nibahurira ku ‘obutumwa burungi’ oburi kugamba aha nsi ensya ya Ruhanga eri hihi kwija, ari ebiroto. (Mat 24:14; Ezek 33:32) Tituri kwenda ngu eyo mitecerereze yabo y’okubanganisa etugireho engaruka. Kugira ngu eco tucerinde tushemerire kugumizamu kuhamya okwikiriza kwitu. Reka tushwijume oburyo bushatu obu turi kubasa kukikoramu.

GUMA OTECEREZE AHA KITAMBO

8-9. Ni bata oku okutecereza aha kitambo biri kugumya okwikiriza kwitu?

⁸ Oburyo bumwe obu turi kubasa kugumyamu okwikiriza kwitu, ni okutecereza aha kitambo. Ekitambo nikituhamiza ku ebiraganiso bya Yehova birije kuhikirira. Ku turi kutecereza twetonzire aha nshonga ahabw’enki Ruhanga yatuhire ekitambo n’eki kiri kumanyisa, nikigumya okwikiriza kwitu twesiga tutari kubanganisa ku ekiraganiso ca Ruhanga c’okutuha amagara agatahwaho omu nsi ensya kirije kuhikirira. Ahabw’enki twagamba tusyoya?

⁹ Mbwenu shi, ekitambo nikimanyisa ki? Yehova akatuma Omwana weye owu ari kukunda owu yabire atwire na we, yaruga omu iguru yazarirwa omu nsi ari omuntu ohikirire. Yesu ku yahikire omu nsi, akabugana ebigezo byona bigumire. Bwanyima akabonabona  kandi yayitwa orufu rubi. Mazima eco ni ekiconco c’omuhendo eki Yehova yatuhire! Ruhanga witu ori kutukunda akaba atarayikirize ngu Omwana weye owu ari kukunda abonabone kandi afe, rero ngu tubeho obwire buce. (Yoh 3:16; 1 Pet 1:18, 19) Ahakuba Yehova yashashwire ekiguzi kingi, nayija kukora cona ekiri kubasika kugira ngu tubeho ebiro byona omu nsi ensya eri hihi kwija.

GUMA OTECEREZE AHA MANI GA YEHOVA

10. Tukuratize ebiri omu Befeso 3:20 ni enki eki Yehova ari kubasa kukora?

¹⁰ Oburyo bwa kabiri bw’okugumyamu okwikiriza kwitu ni okutecereza aha mani ga Yehova. Ayine amani g’okuhikiriza ekintu cona eki yaturaganisize. Konka nk’abantu, nitubasa kuhurira okutunga amagara agatahwaho omu nsi ensya kitari kubasika. Konka hariho n’obundi bwire obu Yehova yagenzire ari kuraganisa abantu ebintu ebiri kurebeka nk’ebitari kubasika. Twijuke ngu ni Ruhanga Rukirabona. (Yob 42:2; Mar 10:27) Mbwenu shi nabasa kuturaganisa ebintu ebyorobize?​—Shoma omu Befeso 3:20.

11. Gamba ekiraganiso ca Ruhanga kimwe ecabire kiri kurebeka nk’ekitari kubasika. (Reba akashanduku akari kugira ngu “ Ebiraganiso bimwe ebyabire biri kurebeka nk’ebitari kubasika ebyahikirire.”)

¹¹ Reba ebintu bimwe ebyabire biri kurebeka nk’ebitari kubasika ebi Yehova yaraganisize abahereza beye b’omu bwire bwa kare. Akaraganisa Aburahamu na Sara ku babire barije kuzara omwana kandi bari omu myaka ya za bukuru. (Kut 17:15-17) Nambwenu akaraganisa Aburahamu ku oruzaro rweye rwabire rurije kuragwa ihanga rya Kanani. Konka abakomokire ahari Aburahamu, ni okugamba Abisirayeli, bakamara emyaka myingi bari abagaragwa omuri Egiputa; obwe rero eco kiraganiso ca Ruhanga nikibasa kuba carebekire nk’ekitari kubasika. Konka kikahikirira. Ku hahwire obwire, Yehova akagambira ku omukikuru ori kwetwa Elizabeti ku yabire arije kuzara omwana. Nambwenu akagambira omuhara owabire atakanyamagaho n’omushija, ori kwetwa Mariya, ku yabire arije kuzara omwojo owu Yehova yabire yaraganisize emyaka myingi omu musiri gwa Edeni, kandi eco kiraganiso na co kikahikirira!—Kut 3:15.

12. Ni bata oku ebiri omuri Yoshuwa 23:14 n’omuri Isaya 55:10, 11 biri kutuhamiza ku Yehova ayine amani?

¹² Ku turi kutecereza aha biraganiso bya Yehova ebyahikirire nikigumya okwikiriza kwitu kandi tumanya ku ayine amani g’okuhikiriza n’ekiraganiso c’ensi ensya. (Shoma omuri Yoshuwa 23:14; Isaya 55:10, 11.) Eco nikituma twayetegura ge kugira ngu tukwase abandi na bo besige ku ekiraganiso c’ensi ensya kitari ekiroto. Yehova wenyine akagamba aha bikwatirine n’iguru risya n’ensi ensya nagira ati: ‘Ebigambo ebi ni eby’okwesigwa kandi ni eby’amazima.’​—Kush 21:1, 5.

GUMA OMARE OBWIRE OMU BIKORWA BY’OMWIKA

13. Ni enki eki turi kubasa kukora kugira ngu enterane zigumye okwikiriza kwitu? Shoborora.

¹³ Oburyo bwa kashatu obu turi kubasa kugumyamu okwikiriza kwitu, ni okumara obwire omu bikorwa by’omwika. Ecokureberaho: Tecereza oku enterane ziri kutugasira. Anna, owamazire emyaka myingi ari kukora omurimo g’obwire bwona akagamba ati: “Enterane nizituma naguma nyine okwikiriza kuhamire. N’obu omwegesa yakuba atari kumanya kwegesa ge ninga shi atagire ekintu kisya eki yatwegesa, omu bi yatwegesa nindondesamu ekintu ekiri kubasa kutuma nayetegereza ge amazima g’omuri Bibuli kandi nikigumya okwikiriza kwange.” b Nambwenu ebitecerezo  by’abija omu nterane na byo nibitugasira.​—Rom 1:11, 12; 10:17.

14. Ni bata oku omurimo g’okuburira guri kugumya okwikiriza kwitu?

¹⁴ Nambwenu nitugumya okwikiriza kwitu twayekwatanisa omu murimo g’okuburira. (Heb 10:23) Barbara, owamazire emyaka eri kurenga 70 ari kuhereza Yehova, akagamba ati: “Nkerebera ku omurimo g’okuburira guri kugumya okwikiriza kwitu. Oku ndi kukizaho kugambira abandi ebiraganiso bya Yehova, ni ko n’okwikiriza kwange kuri kukizaho kuhama.”

15. Ni bata oku okweyegesa biri kugumya okwikiriza kwitu? (Nambwenu reba ebishushani.)

¹⁵ Ekindi kikorwa c’omwika ekiri kugumya okwikiriza kwitu, ni okweyegesa. Susan akerebera ku kiri ec’omugasho okugira entebekanisa y’okweyegesa. Akagamba ati: “Aha sande, ni bwo ndi kutegura Omunara g’okwega omu sande erakurateho. Orwokubanza n’Orwakabiri, nitegura enterane za rwagani omu sande. Agandi mazoba agasigara, ni bwo ndi kweyegesa.” Ahakuba Susan ari kuguma ahamire aha ntebekanisa yeye y’okweyegesa, nagumizamu kombeka okwikiriza kweye. Irene, omazire emyaka myingi ari kukorera ahari ofisi yitu nkuru akerebera ku okweyegesa obuhanuzi bw’omuri Bibuli kiri kugumya okwikiriza kwitu. Akagamba ati: “Nintangara ku ndi kumanya ku obuhanuzi bwa Yehova buri kuhikirira n’omu tuntu kuce.” c

‘BUZIMAZIMA BIRYIJA’

16. Ebigambo ebi Yehova yahamize Habakuki nibitugasira bita omuri obu bwire? (Abaheburayo 10:36, 37)

¹⁶ Abahereza ba Yehova bamwe bamara emyaka myingi bategerize obwire obu eyi nsi mbi erihweraho. Tukuratize oku abantu bari kureba ebintu, okuhikirira kw’ekiraganiso ca Ruhanga nikubasa kurebeka nk’okutinzire. Yehova namanya oku abahereza beye  bari kwehurira; ni yo nshonga yagambire omuhanuzi weye Habakuki ati: ‘Ahabw’okuba ebi wayorekwa ebyo byine obwire bwabyo obwatirweho; tibirituraho kuhikirizibwa, kandi tibiribiha. N’obu byakuturaho, obitegereze; buzimazima biryija, tibiricerererwa!’ (Hab 2:3) Mbehi ebyo bigambo ebi Ruhanga yagambire Habakuki ni we owu byabire biragasire wenka? Ninga n’itwe nibitugasira omuri obu bwire? Entumwa Pawulo akahumecerwa, yagarukiramu ebyo bigambo Abakristo abategerize ensi ensya n’ekihika. (Shoma omu Baheburayo 10:36, 37.) Obwe rero, nitubasa kwesiga ku n’obu eco kiraganiso cakurebeka nk’ekitinzire, ‘tikiribura kuhikirira kandi tikiricerererwa!’

17. Ni bata oku omunyanyazi omwe yakuratize obuhabuzi obu Yehova yahire Habakuki?

¹⁷ Abahereza ba Yehova bingi bamara obwire buringwa bari kukuratiza obuhabuzi bwa Yehova bw’okuguma ‘bategerize.’ Ecokureberaho: Louise, akatandika kukorera Yehova omu mwaka gwa 1939. Akagamba ati: “Omuri obwo bwire, nkaba nintekereza ngu Haramagedoni ekaba erije ntakaherize amashomero makuru. Konka eco tikirabireho. Namara emyaka myingi ndi kushoma enkuru z’omuri Bibuli z’abantu abategerize obwire buringwa ekihembo ca Yehova, harimu Nowa, Aburahamu, Yosefu, n’abandi. Okuguma tutegerize kikatuma nyowe n’abandi twaguma tutire omutima aha nsi ensya eri hihi kwija.” N’abandi bahereza ba Yehova abamazire emyaka myingi nibikirizana n’ebyo bigambo!

18. Ni bata oku okwetegereza ebyahangirwe biri kubasa kutuhamiza ku ensi ensya eri hihi kwija?

¹⁸ Ni amazima, ensi ensya tekijire. Konka, tecereza aha bintu ebiriho ebi turi kureba; harimu enyonyozi, ebiti, enyamishwa, n’abantu. N’obu hine obwire obu ebyo bintu byona byabire bitariho, tihine ori kubasa kubanganisa ku biriho. Konka biriho ahabw’okuba Yehova ni we owabihangire. (Kut 1:1, 26, 27) Nambwenu Ruhanga witu ayine ekigendererwa c’okutaho ensi ensya. Nayija kuhikiriza eco kiraganiso. Abantu nibija kushemerererwa amagara agatahwaho kandi agahikirire, omu nsi ensya. Nitwesiga tutari kubanganisa ku ensi ensya erije kwija omu bwire obu Ruhanga yatireho.​—Isa 65:17; Kush 21:3, 4.

19. Ni bata oku ori kubasa kugumya okwikiriza kwawe?

¹⁹ Konka obwo bwire butakahikire, ogume okorese buri mugisha gona ogu wabona ogumye okwikiriza kwawe. Ogume oyereke ku nosima ahabw’ekitambo. Ogume otecereze aha mani ga Yehova. Guma omare obwire omu bikorwa by’omwika. Ku orakore ebyo bintu byona, noyija kuba omuri ‘abo abariragwa ebyaraganisibwe ahabw’okwikiriza n’okwehangana.’​—Heb 6:11, 12; Rom 5:5.