1. Gamba embera ezi Yesu yakoziremu ecokutangaza ceye c’okubanza.

 TERA akashushani ori omu mperu y’omwaka gwa 29 B.Y., obu Yesu yabire natandika omurimo gweye. Yesu, nyina Mariya, na bamwe omu begi beye bakaba besirwe omu bugenyi omuri Kana, omu caro c’omu matemba g’etawuni ya Nazareti eyi Yesu yazarirwemu. Mariya akaba ari munywani w’eyo ka eyagizire obugenyi, kandi akaba nayenda kubakwasa kwakira abagenyi. Konka obu babire bacari omuri obwo bugenyi amarwa gakahwa, kandi eco kikaba kiri kubasa kushwaza omwojo n’omuhara ababire baza kutasana. b Nikibasika ku omubaro gw’abantu gwabire mwingi okukira oku babire babitegwire. Mariya akahika nashanga mutabani weye, rero yamugambira ati: ‘Tibine vinyo.’ (Yoh 2:1-3) Yesu akaba ayine kukora ki? Hakabaho ekintu ekiri kutangaza; akahindura amizi ‘vinyo endungi.’​—Yoh 2:9, 10.

2-3. (a) Ni bata oku Yesu yakoresize amani geye ari kukora ebyokutangaza? (b) Ni bata oku turi kubasa kugasirwa n’okutecereza aha byokutangaza bya Yesu?

² Yesu akakora ebindi byokutangaza byingi omu murimo g’okuburira. c Akakoresa amani agu yabire ayine yakora ebyokutangaza omu kukwasa abantu bingi munonga. Ecokureberaho: Omu byokutangaza bibiri byonka, ahu yagaburire abashija 5,000 na bwanyima abashija 4,000, abo bantu bona nibabasa kuba babire bari kurenga aha 27,000 obariremu  abakazi n’abana. (Mat 14:15-21; 15:32-38) Kandi omuri obwo bwire, nabwo Yesu akakiza abandi bantu bingi ababire barwire. (Mat 14:14; 15:30, 31) Tecereza oku catangarize abantu bingi ababire bari aho Yesu ku yamazire kubakiza kandi akabagaburira omu buryo bw’ecokutangaza!

³ Ebyokutangaza ebi Yesu yakozire byine eki biri kushoborora ahari itwe omuri obu bwire. Omuri eki kicweka, twaza kureba amashomo agari kugumya okwikiriza kwitu agu turi kwegera omuri ebyo byokutangaza. Bwanyima, nitwija kushwijuma oku turi kubasa kutoreza obucurezi n’esaasi ebi Yesu yayerekire obu yabire nakora ebyo byokutangaza.

4. Ebyokutangaza ebi Yesu yakozire ebiri kugumya okwikiriza kwitu nibitwegesa ahari oha?

⁴ Ebyokutangaza ebi Yesu yakozire nibitwegesa amashomo agari kugumya okwikiriza kwitu aha bikwatirine na we, konka nambwenu bitwegesa n’ebiri kukwata ahari Ishe. Kandi n’obundi, Yehova ni we burugo bw’ebyokutangaza. Omu Byakozirwe 10:38 nihatugambira ngu: ‘Ruhanga akashuka ahari [Yesu] omwika oguri kwera n’amani, yagendagenda nakora ebirungi, nakiza bona ababire nibitwa kubi Sitane, ahabw’okuba Ruhanga akaba ari hamwe na we.’ Nambwenu, oyijuke ku omu bi Yesu yagambire byona n’ebi yakozire, harimu n’ebyokutangaza, yabire natoreza omu bwijwire emitecerereze y’Ishe n’enyehurira zeye. (Yoh 14:9) Reka tushwijume amashomo ashatu agu turi kubasa kwegera aha byokutangaza bya Yesu.

5. Ni enki ecatumire Yesu yakora ebyokutangaza? (Matayo 20:30-34)

⁵ Ery’okubanza, Yesu n’Ishe nibatukunda munonga. Obu Yesu yabire ari omu nsi, akereka abantu rukundo nyingi yakoresa amani geye ari kubakorera ebyokutangaza kugira ngu abihe omu busaasi. Izoba rimwe, abashija babiri b’empumi bakamutakira ngu abakwase. (Shoma omuri Matayo 20:30-34.) Yesu akabanza ‘yabasaasira’ rero bwanyima yabakiza. Ekigambo c’Orugurika ecahindwirwemu ngu ‘akabasaasira’ nikimanyisa okugirira omuntu embabazi nyingi z’omu mutima. Ezo mbabazi nyingi eziri kurebecera omuri rukundo, ni zo ezatumire Yesu yagaburira abantu ababire bine enjara kandi akakiza omubembe. (Mat 15:32; Mar 1:41) Nitubasa kwesiga tutari kubanganisa ku Yehova, Ruhanga w’‘okusaasira’ n’Omwana weye bari kutukunda kandi ku bari kushasha bareba turi kubonabona. (Luk 1:78; 1 Pet 5:7) Buzima, nibendera kimwe okutwihiraho ebintu byona ebiri kutubonabonesa!

6. Ni gaha mani agu Ruhanga yahire Yesu?

⁶ Erya kabiri, Ruhanga akaha Yesu amani g’okwihiraho abantu ebizibu byona. Obu Yesu yakozire ebyokutangaza, akereka ku ayine amani g’okwihaho ebizibu byona ebi itwe tutari kubasa kweyihiraho. Ecokureberaho: Ayine amani g’okwihaho ekintu cona ekiri kuretera abantu ebizibu, ni okugamba ekicumuro eki twaragirwe na Adamu n’engaruka zaco, oburwire, n’orufu. (Mat 9:1-6; Rom 5:12, 18, 19) Ebyokutangaza ebi yakozire, bikereka ku ari kubasa kutwihiraho buri ndwara yona kandi ku ayine amani g’okuzora abafire. (Mat 4:23; Yoh 11:43, 44) Nambwenu, ayine amani g’okutegeka emiraba n’okubinga emyika mibi. (Mar 4:37-39; Luk 8:2) Mazima ku nikituhumuriza, okumanya ku Yehova yahire Omwana weye amani!

7-8. (a) Ebyokutangaza bya Yesu nibituhamiza ki? (b) Ni kiha cokutangaza eki ori kwenda kwija kureba omu nsi ensya?

⁷ Erya kashatu, nitubasa kwesigira kimwe emigisha erije kuretwa n’Obukama bwa  Ruhanga. Ebyokutangaza ebi Yesu yakozire ari omuntu, nibitwegesa ku arije kukora ebiri kukiraho obu arije kuba ari omugabe w’Obukama bwa Ruhanga bw’omu iguru. Reka turebe emigisha eyi turije kutunga omu bwire bw’obutegeki bwa Kristo. Nitwija kugira amagara agahikirire ahabw’okuba aryayihaho endwara yona n’obumuga bwona ebiri kuhika aha bantu. (Isa 33:24; 35:5, 6; Kush 21:3, 4) Titurije kongera kuhikwaho n’enjara hamwe n’engaruka z’ebihikirizi. (Isa 25:6; Mar 4:41) Nitwija kutunga okushemererwa kwingi obu turiba turi kwakira abantu bitu abafire bari kuruga ‘omu bituro.’ (Yoh 5:28, 29) Mbehi iwe, ni kiha cokutangaza eki ori kwenda kureba omu nsi ensya?

⁸ Obu Yesu yabire ari kukora ebyokutangaza, akereka obucurezi bwingi n’esaasi kandi eyo micwe n’itwe ni yo tushemerire kutoreza. Reka turebe ebyokureberaho bibiri, turi kutandikira aha nkuru y’obugenyi bw’omuri Kana.

9. Ni enki eki Yesu yakozire omu mbaga y’obugenyi? (Yohana 2:6-10)

⁹ Shoma omuri Yohana 2:6-10. Mbehi obu vinyo yahwire omu bugenyi, Yesu akaba ari kugemwa kugira eki yakora? Ingaha buzima. Tihariho obuhanuzi na bumwe obwabire bwagambire ku Mesiya yabire arije kukora ecokutangaza ca vinyo. Konka, n’iwe tecereza oku wabire orije kwehurira vinyo yahwa omu bugenyi bwawe. Oku kiri kurebeka, Yesu akagirira esaasi ab’eyo ka, namunonga omuhara n’omwojo, yahurira yayenda kubiha omu kishwaro. Obwe rero, nk’oku tukirebire tucatandika, ni co ecatumire yahika ari kukora  ecokutangaza. Akakwata amizi agari kwingana na lita 390 yagahinduramu vinyo ndungi. Nikibasika ku yakozire eyo vinyo nyingi kugira ngu hagire eyasigara y’okukoresa omu bundi bwire, ninga shi ngu bagiguze rero esente ezarugamu ziyambe eyo ka nsya. Mazima eco ku nikibasa kuba cahumurize ogo muhara n’omusigazi ababire bamara kutasana!

10. Ni biha bindi bintu ebyine amakuru ebiri kugambwa omuri Yohana ekicweka ca 2? (Nambwenu reba ekishushani.)

¹⁰ Reka turebe ebintu bimwe, konka ebyine amakuru ebiri kugambwa omuri Yohana ekicweka ca 2. Mbehi okareba ku Yesu atari we owijwize entango amizi? Omu mwanya g’okugira ngu Yesu abe ni we owashuka amizi omuri ezo ntango, akashaba abahereza ngu babe ni bo abakikora. (Orunyiriri rwa 6, 7) Na bwanyima y’okuhindura amizi vinyo, Yesu ti we owagitwarire omukuru w’obugenyi. Omu mwanya gw’eco, akagambira abahereza ngu babe ari bo abakikora. (Orunyiriri rwa 8) Nambwenu, nitumanya ku Yesu atarakwasire egirasi ya vinyo ngu ayerate embere y’abagenyi ari kugira ngu: ‘Mwena munywe ahari vinyo enuzire eyi nakora!’

11. Ni enki eki turi kubasa kwegera aha cokutangaza eki Yesu yakozire?

¹¹ Ni enki eki turi kubasa kwegera aha cokutangaza eki Yesu yakozire ari kuhindura amizi vinyo? Nitumwageraho ishomo ry’okwecureza. Yesu taretungwire yamara kukora eco cokutangaza; kandi na bwanyima nitumanya ku hatariho izoba na rimwe eri yayetungwire ahabw’ebi yahikireho. Omu mwanya gw’eco, akecureza kandi yagumizamu kuha ekitinisa Ishe w’omu iguru. (Yoh 5:19, 30; 8:28) Ku turatoreze Yesu tukagumizamu kwereba omu buryo oburinganire, titurije kwetungura aha bi twahikireho. Eki turahikeho cona omu murimo gwa Yehova, nimureke tutija kwerata ahabw’itu, ahobwe tugume twerate Ruhanga witu murungi, ari we owatuhire ogo mugisha g’okumuhereza. (Yer 9:23, 24) Nimureke tugumizemu kumuha ekitinisa ahakuba ni we okishemerire. Mbehi hariho ekintu eki turi kubasa kwehisaho Yehova yaba atatuyambire?​—1 Kor 1:26-31.

12. Ni buha buryo bundi obu turi kubasa kutorezamu obucurezi bwa Yesu? Gamba ecokureberaho.

¹² Reka tushwijume obundi buryo obu turi kubasa kutorezamu okwecureza kwa Yesu. Tecereza ahari ezi mbera: Omuzehe yamara obwire ari kuyamba omuhereza ocari muto kutegura toku yeye y’okubanza. Bwanyima, ogo muhereza ocari muto yahereza toku ndungi eyagarwiremu amani abagizire ekibina. Bwanyima y’enterane, omuntu omwe yija yagambira ogo muzehe ati: ‘Oriya mwenetata yahereza toku ndungi munonga; mbehi n’iwe tori kukikiriza?’ Mbehi ogo muzehe naba ashemerire kugamba ngu ‘yego, konka ni inye owamazire obwire ndi kumukwasa? Ninga nabasa kwecureza agamba ngu ‘yego buzima. Yatuha toku ndungi, nanye canshemeza munonga’? Ku turabe turi abacurezi, titurije kugamba ebintu birungi ebi twakorire abandi. Nitwesimira kumanya ku Yehova ari kubireba ebi turi kukora kandi ku ari kubikwata nk’eby’omugasho. (Geranisa na Matayo 6:2-4; Heb 13:16) Hatariho okubanganisa, ku turatoreze obucurezi bwa Yesu nitwija kushemeza Yehova.​—1 Pet 5:6.

13. Ni enki eki Yesu yabwine hihi y’etawuni ya Nayini kandi shi akakikoraho enki? (Luka 7:11-15)

¹³ Shoma omuri Luka 7:11-15. Tecereza ezi mbera ezabireho obu Yesu yabire yahisa rwagati omurimo gweye. Akaba yamara kukora orugendo ari kuza omu tawuni ya Galilaya eri kwetwa Nayini, hihi na Shunemu, ahu omuhanuzi Elisa yazorire omwana w’omukazi omu myaka 900 eyabire ehwire. (2 Bag 4:32-37)  Obu Yesu yabire yahika hihi y’etawuni, akabona abantu bari kushohora, baza kuzika. Ebyabire bibireho bikaba nibishasha munonga, ahakuba ni omufakazi owabire afisize omwana weye omwe owu yabire ayine. Konka ogo mukazi owabire ayine akahinda akaba atari wenka, ahabw’okuba abantu bingi b’omu tawuni bakaba bamushendekize. Yesu akemereza abo bantu, rero yakorera ogo mukazi owabire ari kurira ekintu ekiri kutangaza: Akazora omwojo weye! Eco ni ecokutangaza kimwe omu byokutangaza bishatu ebi Yesu yazorireho abantu ebiri kugambwa omu bitabo by’engiri.

14. Ni biha bintu bimwe ebyine amakuru ebiri kugambwa omu nkuru y’omuri Luka ekicweka ca 7? (Nambwenu reba ekishushani.)

¹⁴ Reka turebe ebindi bintu ebyine amakuru ebiri kugambwa omu nkuru y’omuri Luka ekicweka ca 7. Mbehi wareba ku Yesu yabandize ‘yareba’ ogo mukazi owabire ayine obusaasi rero bwanyima ‘akamugirira esaasi’? (Orunyiriri rwa 13) Obwe rero, ebi yarebire, yenda okureba ogo mukazi ari kugenda embere y’omutumbi g’omwana weye ari kurira, bikatuma omu mutima gweye hayijuramu esaasi. Yesu taragirire ogo mukazi esaasi kusha, ahobwe akereka ku nayeta omu mwanya gweye. Hatariho okubanganisa, akamugambisa n’iraka rirungi eriri kuhumuriza, yamugira ati: ‘Otarira.’ Bwanyima, akagira eki yakora. Akahika nazora ogo mwana w’omwojo, ‘yamutwarira nyina.’​—Orunyiriri rwa 14, 15.

15. Ni enki eki turi kubasa kwegera aha cokutangaza ca Yesu?

¹⁵ Ni enki eki turi kubasa kwegera aha cokutangaza eki Yesu yakozire ari kuzora omwana w’omufakazi? Ishomo eri turi kwegeramu, ni oku tushemerire kwereka embabazi abantu abari kuraba omu busaasi. Ni amazima, itwe tituri kubasa kuzora abafire nka Yesu. Konka, nk’oku Yesu yakikozire, nitubasa kugirira esaasi abine akahinda, turi kubanza twayetegereza. Nitubasa kugira eki twakora tubereka esaasi omu bi turi kugamba n’ebi turi kukora kugira ngu tubakwase kandi tubahumurize. d (Emi 17:17; 2 Kor 1:3, 4; 1 Pet 3:8) Nangwa n’ebigambo  bice hamwe n’ebimanyiso by’omubiri nibibasa kuhumuriza.

16. Nk’oku kiri kurebeka aha kishushani, ni enki eki ori kwegera aha cokureberaho c’omuzire owafisize omwana weye omu myaka ya juba?

¹⁶ Reba eki cokureberaho. Omu myaka eyahwire, omunyanyazi omwe akareba omuzire ari kurira obu babire bari kweshongora eceshongoro omu nterane. Eco ceshongoro kikaba nikigamba aha kuzoka kandi hakaba hahwire obwire buce ogo muzire afisize muhara weye ocari muto. Ogo munyanyazi ku yamurebire akamushanga, yamuta omukono aha mabega, rero bayeshongorera hamwe. Ogo muzire w’omukazi bwanyima akija kugamba ati: “Nkahurira nakunda munonga benetata na banyanyazi.” Akahurira yashemererwa munonga ahabw’okuza omu nterane. Akagamba ati: “Ahompaho, omu Nju y’Obukama, ni ho turi kwiha obuyambi.” Obwe rero, nitubasa kwesiga ku Yehova ari kureba ebikorwa bice by’esaasi ebi turi kukorera abafisize kandi ‘ab’emitima ehendekire.’​—Zab 34:18.

17. Ni enki eki twayega omuri eki kicweka?

¹⁷ Twayeyegesa enkuru z’omu bitabo by’engiri eziri kugamba aha byokutangaza bya Yesu nitwija kutunga ebirungi byingi. Nizitwegesa ku Yehova na Yesu bari kutukunda munonga, ku Yesu ayine amani g’okwihiraho abantu ebizibu byona, kandi tu tushemerire kwesigira kimwe emigisha eyi Obukama bwa Ruhanga buri hihi kuturetera. Twaba turi kushwijuma ezo nkuru, nitubasa n’okutecereza aha micwe ya Yesu eyi tushemerire kutoreza. Mbehi tori kubasa kukora entebekanisa y’okweyegesa ebindi byokutangaza ebi Yesu yakozire ninga mukabyega omu kuramya kw’eka? Mugume murebe ebintu by’omugasho ebi mwayegeramu, kandi mubigambire abandi. Tecereza oku murije kugumyana mwaba muri kuganira n’abandi aha bi mwashomire!—Rom 1:11, 12.

18. Ni enki eki turije kwega omu kicweka ekiri kukurataho?

¹⁸ Obu Yesu yabire ari hihi kuhendera omurimo gweye, akakora ecokutangaza ca kashatu omu bi yakozire by’okuzora abafire. Konka co kikaba nikitana n’ebindi, ahakuba akazora munywani weye kandi omu mbera ezitashangirwe. Ni enki eki turi kubasa kwegera ahari eco cokutangaza ekiri kugambwa omu ngiri? Ni bata oku kiri kuhamya amasiko gitu g’okuzoka? Ekicweka ekiri kukurataho, nikija kugarukamu ebyo bibuzo.