1. Ni enki eki turi kwikiriza?

 AHAKUBA turi abahereza ba Yehova, nitumanya ku ari kutukunda kandi ku ari kwenda ngu tubeho tushemerirwe. (Rom 8:35-39) Nambwenu nitwikiriza ku emisinge ya Bibuli eri kutugasira burijo twayigenderaho. (Isa 48:17, 18) Konka shi, tukakora ki twabugana ebizibu ebi tutetegire?

2. Ni biha bizibu ebi turi kubasa kubugana, kandi shi nibibasa kutuma twayebuza ki?

² Twena abahereza ba Yehova nitubugana ebizibu. Ecokureberaho: Omwe omu bagizire eka yitu nabasa kutuhemukira. Nitubasa kubugana ekibuzo c’oburwire kitume tutakora byingi omu murimo gwa Yehova. Nitubasa kuhikwaho n’ekihikirizi kitugiraho engaruka mbi. Nambwenu nitubasa kuhiganisibwa ahabw’okwikiriza kwitu. Twabugana ebigezo nk’ebyo nitubasa kwebuza ngu: ‘Ahabw’enki ebi biri kumpikaho? Mbehi hine ekintu kibi eki nakozire? Mbehi nicereka ku Yehova atacampa emigisha?’ Mbehi warehurire basyoya? Caba carakubireho otacweka entege. Abahereza ba Yehova b’abesigwa bingi na bo bakehurira basyoya.​—Zab 22:1, 2; Hab 1:2, 3.

3. Ni enki eki turi kwegera aha biri omuri Zaburi ya 34:19?

³ Shoma omuri Zaburi ya 34:19. Reba ebintu by’omugasho bibiri ebyagambwa omuri eyi zaburi: (1) Abahikirire nibabugana ebizibu. (2) Yehova natwiha omu bigezo. Ni bata oku ari kutwiha omuri ebyo bigezo? Oburyo bumwe obu ari kukikoramu, ni okutukwasa kugira emitecerereze eringanire omuri eyi nsi. N’obu Yehova ari kuturaganisa ku turije kutunga okushemererwa ahabw’okumukorera, tari kutwihiraho ebizibu byona hati. (Isa 66:14) Natuhiga kuta omutima aha biro birungi eby’omu misho obu turije kuba twine amagara agu ari kwenda ngu twesimire ebiro byona. (2 Kor 4:16-18)  Konka obwo bwire butakahikire natukwasa kwehangana burizoba.​—Maga 3:22-24.

4. Ni enki eki twaza kushwijuma omuri eki kicweka?

⁴ Reka turebe eki turi kubasa kwegera aha byokureberaho by’abahereza ba Yehova b’abesigwa b’omu bwire bwa Bibuli n’ab’omuri obu bwire. (Zab 55:22) Nk’oku twaza kukireba nitubasa kubugana ebizibu ebi tutetegwire, konka twayegamira ahari Yehova tarije kuremwa kutufaho. Ku turabe turi kushwijuma ebyo byokureberaho, yebuze ngu: ‘Mbehi kuri yaba ari inye ori omuri ezi mbera naba ndakore ki? Ni bata oku ebi byokureberaho biri kutuma nayesiga Yehova? Ni gaha mashomo agu nabonamu agu ndi kubasa kukoresa omu kubaho kwange?’

5. Ni biha bizibu ebi Yakobo yabugine ahabw’okukorera Labani? (Reba ekishushani c’aha kishembeso.)

⁵ Abahereza ba Yehova b’omu bwire bwa kare bakaba nibahikwaho n’ebizibu ebi babire batetegwire. Reka turebe ecokureberaho ca Yakobo. Ishe akamuragira kurondera omukazi omuri bahara ba Labani, ni okugamba omunyabuzare wabo owabire ari kwikiriza, kandi akamuraganisa ku Yehova yabire arije kumuha emigisha myingi. (Kut 28:1-4) Obwe rero Yakobo akakora eyo nsharamu ndungi. Akaruga omu ihanga rya Kanani yagenda orugendo ruringwa ari kuza owa Labani owabire ayine abahara babiri, ari bo Leya na Rasheli. Yakobo akakunda muhara wa Labani muto ari we Rasheli, kandi yayikiriza kumukorera emyaka mushanju yona kugira ngu ishe amumuhingire. (Kut 29:18) Konka ebintu tibiragenzire nk’oku Yakobo yabire ari kubyenda. Labani akakora akakoryo yamuhingira muhara weye mukuru ari we Leya. Labani akikiririza Yakobo kutasana na Rasheli bwanyima y’esande emwe konka yamutegeka kumukorera endijo myaka mushanju. (Kut 29:25-27) Nambwenu Labani akaremwa kuhikiriza ezindi ndagano ezi yabire akozire na Yakobo. Labani akakoresa Yakobo emyaka 20 yona ari kumurya emisi!—Kut 31:41, 42.

6. Ni biha bindi bizibu ebi Yakobo yayehanganire?

⁶ Yakobo akehanganira ebindi bizibu. Akaba ayine eka mpango konka etari kwikirizingana. Bakahika n’aha kuguza mwenishe Yozefu omu bugaragwa. Batabani ba Yakobo babiri ari bo Simeyoni na Levi bakaretera ebizibu eka yabo kandi bajumisa izina rya Yehova. Nambwenu Rasheli, omukazi wa Yakobo owu yabire ari kukunda, akafa obu yabire ari kuzara omwana wabo wa kabiri. Kandi enjara ku yaterire omu ihanga rya Yakobo akagemwa kufurukira omuri Egiputa ari omu myaka ya za bukuru.​—Kut 34:30; 35:16-19; 37:28; 45:9-11, 28.

7. Ni bata oku Yehova yayerekire ku nashagika Yakobo?

⁷ Omuri ebyo bizibu byona ebi Yakobo yabugine tararekire kugumizamu kwesiga Yehova n’ebiraganiso byeye. Yehova na we akashumbusha Yakobo ari kumwereka ku amushagikire. Ecokureberaho: N’obu Labani yahemukire Yakobo, Yehova akamuha emigisha ari kumuha eby’omubiri ebi ari kwetenga. Nambwenu tecereza oku Yakobo yahurire yashemerererwa Yehova munonga ku yashubire kubugana n’omwana weye Yozefu owu yabire ari kutecereza ngu akafa! Obunywani obu Yakobo yabire ayine na Yehova bukamukwasa kwehanganira ebyo bigezo. (Kut 30:43; 32:9, 10; 46:28-30) N’itwe twagumizamu kugira obunywani burungi na Yehova nitwija kubasa kwehanganira ebigezo ebi tutetegwire.

8. Ni enki eki Omugabe Dawudi yabire ari kwenda kukora?

⁸ Omugabe Dawudi akaba atari kubasa kukora ebi yabire ari kwenda kukorera Yehova byona. Ecokureberaho: Akaba ayine ecetengo kingi c’okombekera Ruhanga hekalu.  Eco cetengo akakigambira omuhanuzi Natani. Natani na we akamugarukamu ati: ‘Kora ekikuri aha mutima cona, ahakuba Ruhanga ari hamwe n’iwe.’ (1 Bus 17:1, 2) Tecereza oku ebyo bigambo byagumize Dawudi. Nabasa kuba yahikire ari kutegura eby’okombeka.

9. Ni bata oku Dawudi yatwarize bwanyima y’okuhurira amakuru mabi?

⁹ Konka ku hahwireho obwire buce ogo muhanuzi akareta agandi makuru agatari kushemeza. Ahari ‘eco kiro’ cenyine Yehova akagambira Natani ku Dawudi yabire atarije kombeka hekalu ahobwe ku mutabani weye ku ari we owabire arije kuyombeka. (1 Bus 17:3, 4, 11, 12) Ni bata oku Dawudi yatwarize bwanyima y’okuhurira obwo butumwa? Akahika nahindura entego yeye. Akata omutima aha kurundana esente n’ebikoreso ebi mutabani weye yabire arije kukoresa omu kombeka.​—1 Bus 29:1-5.

10. Ni bata oku Yehova yahire Dawudi emigisha?

¹⁰ Ahonaho Dawudi ku yamazire kugambirwa ku yabire atarayombeke hekalu Yehova akahika nakora na we endagano. Akaraganisa Dawudi ku omwe omuri bijukuru beye yabire arije kutegeka ebiro byona. (2 Sam 7:16) Omu nsi ensya, Yesu nayija kutegeka omu bwire bw’emyaka rukumi. Tecereza oku Dawudi arije kushemererwa ku ari manya ngu Yesu akakomoka omu muryango gweye! Eyi nkuru netwereka ku n’obu twakuba tutari kubasa kukora byona ebi turi kwenda kukorera Yehova naba atwinire endijo migisha myingi eyi atubikire eyi tutari kutecereza.

11. Ni bata oku Abakristo b’omu kinyigana c’okubanza batungire emigisha n’obu Obukama bwabire butarayije omu bwire obu babire bari kutekateka? (Ebyakozirwe 6:7)

¹¹ Abakristo b’omu kinyigana c’okubanza na bo bakabugana ebizibu. Ecokureberaho: Bakaba bategerize okwija k’Obukama bwa Ruhanga konka bakaba batari kumanya obwire obu bwabire burijire. (Byak 1:6, 7) Mbwenu shi ni enki eki bakozire? Bakagumizamu kuhugira omu murimo g’okuburira. Oku obutumwa burungi bwabire buri kujanjara hona bakerebera oku Yehova yabire ari kubaha emigisha ahabw’amani agu babire bari kutaho.​—Shoma omu Byakozirwe 6:7.

12. Ni enki eki Abakristo b’omu kinyigana c’okubanza bakozire obu haterire enjara?

¹² Obwire bumwe enjara y’amani ekatera ‘omu nsi yona.’ (Byak 11:28) Kandi Abakristo b’omu kinyigana c’okubanza na bo ekabahikaho. Tecereza oku na bo babonabwine ahabw’okubura ebyokurya. Hatariho okubanganisa abebembezi b’amaka bakemereza omutima ahabw’okubura eby’okubisaho abagizire amaka gabo. Kandi shi abacari bato ababire bari kutecereza eby’okwagura omurimo g’okuburira? Mbehi nibabasa kuba batecerize kuhindura eyo ntebekanisa? Oku embera zakuba ziri kona, abo Bakristo bakehangana. Bakagumizamu kuburira nk’oku bari kubasa kandi bayekwatanisa omu kuyamba Abakristo bagenzi babo b’omuri Yudaya.​—Byak 11:29, 30.

13. Ni eha migisha eyi Abakristo batungire omu bwire bw’enjara?

¹³ Ni eha migisha eyi Abakristo batungire omu bwire bw’enjara? Abakristo abatungire obuyambi bw’ebyokurya bakerebera omukono gwa Yehova. (Mat 6:31-33) Bakakizaho kuba abanywani b’Abakristo bagenzi babo abayijire kubayamba. Kandi abahireyo ebiconco ninga shi abayekwatanisize omu kuyamba omu bundi buryo na bo bakatunga okushemererwa okuri kuruga omu kugaba. (Byak 20:35) Abo bona Yehova akabaha emigisha ahabw’okwehanganira ezo mbera.

14. Ni enki ecahikire ahari Barinaba n’entumwa Pawulo kandi shi ni enki ecarugiremu? (Ebyakozirwe 14:21, 22)

¹⁴ Abakristo bakaba nibakira kuhiganisibwa  namunonga bibahikaho batabyetegwire. Reba ebyahikire ahari Barinaba hamwe na Pawulo obu babire bari kuburira omu kacweka ka Lusitura. Omu kubanza abo bantu bakabakira kandi babahurikiza. Kandi bwanyima, abari kubahiganisa ‘bakosya abantu,’ rero abamwe omuri bo batera Pawulo amabare bamusiga bari kugira ngu afire. (Byak 14:19) Konka Barinaba na Pawulo bakaza kuburira omu kandi kacweka. Ni enki ecarugiremu? Bakahindura ‘abegi bingi’ kandi ebigambo byabo n’ecokureberaho cabo bikagumya Abakristo bagenzi babo. (Shoma omu Byakozirwe 14:21, 22.) Ahakuba Barinaba na Pawulo bataratinire oko kuhiganisibwa kikatuma abantu bingi bagasirwa. N’itwe ku turagumizemu kukora omurimo gwa Yehova tutari kuruha nayija kutuha emigisha.

15. Ni enki eki wayegera aha cokureberaho ca mwenetata A. H. Macmillan?

¹⁵ Omu myaka eyabandize omwaka gwa 1914, abahereza ba Yehova bakaba betegwire ekintu c’omutano. Reba ecokureberaho ca mwenetata A. H. Macmillan. Mwenetata Macmillan akaba ari kutecereza ku yabire ari hihi kutunga ekiconco ceye c’okuza okutura omu iguru kandi n’abandi ni ko babire bari kutecereza. Omuri toku eyi yatangire omu Kwamwenda 1914, akagamba ati: “Eyi nebasa kuba ari yo toku yange y’aha muheru.” Konka eyo toku ti yo yabire ari yo y’aha muheru. Bwanyima mwenetata Macmillan akahandika ati: “Abamwe omuri itwe tukaba twayebihire turi kutecereza ku twabire turaze omu iguru ahonaho.” Akongeraho ati: “Konka ekintu kirungi eki twabire tushemerire kukora ni okugumizamu kuhugira omu murimo gwa Mukama.” Mwenetata Macmillan akakikora yaguma ahugire omu murimo. Akaba nakora omurimo g’okuburira atireho amani. Akatunga omugisha g’okugaruramu amani benetata bingi ababire bari omu kihome ahabw’okwanga okugwera orubaju omu by’obutegeki. Kandi akagumizamu kwekwatanisa omu nterane z’ekibina n’omu myaka yeye y’eza bukuru. Mbwenu shi ni eha migisha eyi mwenetata Macmillan yatungire ahabw’okukoresa obwire bweye ategerize ekiconco ceye? Ari kuburayo obwire buce ngu afe, omu mwaka gwa 1966, akahandika ati: “Hati okwikiriza kwange kukahama kukiza kare hona.” Eco ni ecokureberaho c’okutoreza namunonga twaba twamazire obwire buringwa tutegerize!—Heb 13:7.

16. Ni kiha kigezo eki Herbert Jennings n’omukazi weye babugine eki babire batetegwire? (Yakobo 4:14)

¹⁶ Abahereza ba Yehova bingi nibehanganira ebizibu by’oburwire ebitungurine. Ecokureberaho: Omu nkuru y’ebyabireho ya mwenetata Herbert Jennings b akagamba enkuru y’oku we n’omukazi weye bashemererirwe omurimo g’obumishonari omuri Gana. Konka bwanyima bakamushangamu endwara y’omu mutwe. Mwenetata Jennings akagamba ebigambo by’omuri Yakobo 4:14, yagamba ku ebyamubireho byabire biri “ebya ‘nyansakare’ ebi tutari kumanya.” (Hashome.) Akahandika ati: “Tukikiriza ezo mbera ezi twabugine twaruga omuri Gana kandi twasigaho banywani bitu bingi, twagaruka omuri Kanada kugira ngu tuze kuronderayo obujanjabi.” Yehova akakwasa mwenetata Jennings n’omukazi weye bagumizamu bari kumukorera omu bwesigwa n’obu babugine eco kigezo.

17. Ni bata oku ecokureberaho ca mwenetata Jennings cakwasize Abakristo bagenzi beye?

¹⁷ Ebigambo bya mwenetata Jennings ebiri omu nkuru yeye bikagasira abandi.  Omunyanyazi omwe akahandika ati: “Tinkashomagaho enkuru ngu enkore aha mutima nk’eya mwenetata eyi nashomire. . . . Okushoma enkuru ya mwenetata Jennings, oku yasigireho omurimo gweye akaza kufa aha burwire bweye, kikankwasa kwegiraho emitecerereze eringanire.” Nambwenu hine mwenetata owahandikire ati: “Bwanyima y’okumara emyaka myingi ndi omuzehe w’ekibina, kikanshaba kwemereza ogo murimo ahabw’oburwire bw’omu mutwe. Ku nabire ninshoma enkuru z’ebyabireho nkaba nimpurira ndi busha. . . . Konka ku nashomire enkuru y’oku mwenetata Jennings yayehanganire oburwire bweye kikangaruramu amani.” Eco nikitwijusa ku n’itwe twayehanganira ebizibu ebiri kutuhikaho tutabyetegwire kiri kubasa kugumya abandi. N’obu ebintu byakuba bitagenzire nk’oku turi kubyetega nabwo nitubasa kubera abandi ecokureberaho omu kwikiriza n’omu kwehangana.​—1 Pet 5:9.

18. Nk’oku biri kurebeka aha kishushani ni enki eki wayegera aha cokureberaho ca munyanyazi w’omuri Nayijeriya?

¹⁸ Ebihikirizi ebitari bimwe nk’eca COVID-19 bikahika aha bahereza ba Yehova bingi. Ecokureberaho: Hine omufakazi w’omuri Nayijeriya owabire atine eby’okumutunga. Izoba rimwe buri omu kasheshe muhara weye akamubuza ebi babire bararye bamara kuteka akakopo kamwe k’omuceri aku babire basigize. Ogo munyanyazi akagambira muhara weye ku babire batine esente ninga ebyokurya konka ku babire bashemerire kutoreza ecokureberaho c’omufakazi wa Zarefati bakarya ebyokurya ebyabire bisigire obundi bakesigira kimwe Yehova. (1 Bag 17:8-16) Konka ku babire batakatecerize aha ki babire bararye ahari camushana y’eryo izoba, Abakristo bagenzi babo bakabaretera eby’okubayamba. Hakaba harimu ebyokurya ebiramare esande ibiri zona. Ogo munyanyazi akagamba ku yabire atari kumanya ku Yehova yabire ahurikize ebi  yagambire muhara weye. Mazima ku turayesige Yehova, ebiri kutuhikaho nibibasa kutuma twakizaho kumuhika hihi omu mwanya g’okutucwa entege.​—1 Pet 5:6, 7.

19. Ni kuha kuhiganisibwa oku Aleksey Yershov yabugine?

¹⁹ Omu myaka ya juba benetata na banyanyazi bingi bakahikwaho okuhiganisibwa oku babire batetegwire. Reba ebyahikire ahari mwenetata Aleksey Yershov, otwire omuri Burusiya. Abahamya ba Yehova bakaba bikirizibwe obu mwenetata Yershov yabatizibwe omu mwaka gwa 1994. Konka omu myaka eyakuratireho embera zikahinduka omuri Burusiya. Omu mwaka gwa 2020, eka ya mwenetata Yershov akatahirirwa kandi yacakwa. Nambwenu ebintu byeye bikakwatwa. Bwanyima y’amezi mace gavumenti ekamutaho emishango bagamba ku yabire ari enkozi y’ebibi. Ebintu bikakizaho kuba bibi obu bakoresize vidiyo y’okumurega eyakwasirwe n’omuntu owabire ari kweshushanisa nk’ori kwenda kwega Bibuli. Mazima obwo ni obugambani!

20. Ni bata oku mwenetata Yershov yahamize obunywani bweye na Yehova?

²⁰ Mbehi ebyahikire ahari mwenetata Yershov bikarugamu emigisha? Yego. Obunywani bweye na Yehova bukakizaho kuhama. Akagamba ati: “Nyowe n’omukazi wange nitushabira hamwe emirundi myingi. Nkerebera ku nabire ntari kubasa kwerabya omuri ezo mbera kuri Yehova ataranyambire.” Akongeraho ati: “Okweyegesa nikunkwasa kutacweka entege. Ninkunda kutecereza aha nkuru z’abahereza ba Yehova b’omu bwire bwa kare. Omuri Bibuli harimu enkuru nyingi eziri kwereka omugasho g’okugumizamu kutuza n’okwereka ku nitwesiga Yehova.”

21. Ni enki eki twayegera omuri eki kicweka?

²¹ Ni enki eki twayegera omuri eki kicweka? Omuri eyi nsi nitubasa kuhikwaho n’ebizibu ebi tutetegwire. Konka nabwo burijo Yehova nakwasa abahereza beye ku bari kumwesiga. Nk’oku ecahandikirwe kikuru kiri kubigamba, ‘ebibonabono by’ohikirire ni byingi, konka Yehova abimwihamu byona.’ (Zab 34:19) Nimureke twerinde kuta omutima aha bizibu ebi turi kubugana ahobwe tugumizemu kuguta ahari Yehova, ahakuba ayine amani g’okutufaho n’okutureberera. Eco ku turakikore nitwija kwikirizana n’ebigambo ebi entumwa Pawulo yagambire ari kugira ati: ‘Nimbasa kukora byona omuri Kristo ompa amani.’​—Fil 4:13.