Waba nokimanya?
Ahabw’enki omu mahe ga Dawudi habire harimu n’abanyamahanga?
BAMWE omu banyamahanga ababire bari omu mahe ga Dawudi hakaba harimu Zaleki w’Omwamoni, Uriya w’Omuheti, na Ituma w’Omumowabu. a (1 Bus 11:39, 41, 46) Nambwenu omu basirikare ba Dawudi hakaba harimu ‘Abakereti, Abapeleti n’Abagati.’ (2 Sam 15:18) Abakereti n’Abapeleti nibakira kugambwaho ku babire bine obunywani bugumire na Abafilistiya. (Ezek 25:16) Abagati na bo bakaba bine obukomoko omu tawuni y’Abafilistiya ya Gati.—Yos 13:2, 3; 1 Sam 6:17, 18.
Mbwenu shi ahabw’enki Dawudi yayikirize ngu abo banyamahanga baze omu mahe geye? Ni ahabw’okuba yabire ari kwesiga ku babire batari kubasa kumuhemukira kandi ku babire batari kubasa n’okuhemukira Yehova. Ecokureberaho: Hine ekitabo ekiri kushoborora Bibuli ecagambire aha Bakeleti n’Abapeleti kiri kugira ngu: “Bakaguma bari abesigwa ahari Dawudi omu bwire obugumire kukira obundi obu yabire ari kutegeka.” (The New Interpreter’s Dictionary of the Bible) Bata shi? Obu ‘abashija b’Abisirayeli’ bayangire kukuratira Omugabe Dawudi, ahobwe bakakuratira ‘omushija otine oku ari ori kwetwa Sheba,’ Abakeleti n’Abapeleti bakaguma na Dawudi kandi bamukwasa kwemereza okwegomeka kwa Sheba. (2 Sam 20:1, 2, 7) Obundi bwire mutabani w’Omugabe Dawudi ori kwetwa Adoniya akenda kuba omugabe omu mwanya gwa Salomoni. Konka Abakeleti n’Abapeleti bakaguma na Dawudi kandi bamukwasa kwemeka Solomoni owu Yehova yabire atorine ngu ayije kuba omugabe.—1 Bag 1:24-27, 38, 39.
Ondijo munyamahanga owagumire ari omwesigwa ahari Dawudi ni Itayi wa Gati. Itayi n’abashija beye 600 bakashagika Dawudi obu mutabani weye Abusolomu yamwegomekireho kandi akegarurira n’emitima y’Abisirayeli ngu barwanise omugabe. Omu kubanza, Dawudi akagambira Itayi ku yabire atari kubasa kwekwatanisa na we omu kurwana ahabw’okuba yabire ari omunyamahanga. Konka Itayi akamugambira ati: ‘Nindahira Yehova otahwaho, na mukama wange omugabe, eyi mukama wange omugabe ariza, yaba kufa ninga okugumaho, nanye omwiru wawe ni yo ndiza!’—2 Sam 15:6, 18-21.
Itayi akaguma ahamire ahari Dawudi, omugabe owu Yehova yabire atorine
N’obu Abakereti, Abapeleti n’Abagati babire bari abanyamahanga, bakaba bari kumanya ku Yehova ari Ruhanga ow’amazima kandi ku yabire yatireho Dawudi ngu abe Omugabe. Hatariho okubanganisa, kikashemeza Dawudi kureba abo bashija bari kugumizamu kumubera abesigwa!
a Ekiragiro ca Ruhanga ekiri kurebeka omu Biragiro 23:3-6, kikaba nikizibira Abamoni n’Abamowabu kuteranira hamwe n’Abisirayeli bari kuramya Ruhanga. Konka nikirebeka ku eco kiragiro cabire kiri kumanyisa ku babire batari kubasa kuhebwa obugabe bw’okuba abanyihanga nk’oku cabire kiri aha Bisirayeli. Konka nambwenu bakaba bari kubasa kwekwatanisa na bo kandi baturana n’Abahereza ba Ruhanga. Reba ekitabo ekiri kushoborora Bibuli (Insight on the Scriptures), ekitabo 1, p. 95.
