EKICWEKA C’OKWEGA 16
ECESHONGORO CA 64 Okwejumba omu Kushaarura Tushemereirwe
Oku ori kubasa kukizaho kwesimira omurimo g’okuburira
‘Muhereze Yehova mushemerirwe.’—ZAB 100:2.
ENTEGO
Eki kicweka caza kutwereka ebintu ebi turi kubasa kukora kugira ngu tukizaho kwesimira omurimo g’okuburira.
1. Ni bata oku abamwe bari kwehurira baba bari omu murimo g’okuburira? (Nambwenu reba ekishushani.)
ITWE abahereza ba Yehova nituburira abandi ahabw’okuba turi kukunda Tata witu w’omu iguru kandi turi kwenda ngu tukwase batahi bitu kumumanya. Ababurizi bingi nibesimira kwekwatanisa omu murimo g’okuburira. Konka abandi tibari kwesimira ogo murimo. Ahabw’enki? Ahabw’okuba nibabasa kuhurira ku batari kubasa kuba abegesa barungi. Abandi nibabasa kutina kuza omu maka g’abantu abatabatumiire. Ninga bahurira bari kubasa kubehuzya. Kandi abandi bo nibabasa kuba bayegesibwe ku batashemerire kugwisa kubi abandi. N’obu abo benetata na banyanyazi bari kuba nibakunda munonga Yehova, nikibasa kubagumira kuburira obutumwa burungi abantu abu batari kumanya. Konka nibaba bari kumanya oku ogo murirmo guri og’omugasho munonga, kandi nibagwekwatanisamu burijo. Hatariho okubanganisa nibashemeza Yehova!
Mbehi noshemerererwa omurimo g’okuburira? (Reba paragurafu ya 1) )
2. Waba otacayesimira omurimo g’okuburira, ahabw’enki otashemerire kucweka entege?
2 Mbehi obumwe nikikugumira kwesimira omurimo g’okuburira ahabw’enyehurira nk’ezi twamara kureba aha ruguru? Yaba ariko kiri otacweka entege. Okuhurira otari kweyesiga munonga nibyereka ku ori omucurezi kandi ku otari kwenda kugwisa kubi abantu. Kandi tihariho omuntu ori kwangwa, namunonga yagezaho kukorera abandi ebirungi. Isho w’omu iguru namanya kurungi ebizibu ebi ori kurabamu kandi nayenda kukuha obuyambi obu ori kwetenga. (Isa 41:13) Omuri eki kicweka twaza kureba ebintu bitano ebiri kubasa kukukwasa wahurira oyine enyehurira nk’ezo kandi turebe n’ekiri kubasa kukukwasa kugira ngu oyesimire omurimo g’okuburira.
REKA EKIGAMBO CA RUHANGA KIKUGUMYE
3. Ni enki ecakwasize omuhanuzi Yeremiya kuburira abandi?
3 Kwiha omu bwire bwa kare obutumwa oburi omu Kigambo ca Ruhanga bukagumya abahereza ba Yehova omu bwire obu babire nibahebwa emirimo egumire kuyihikiriza. Reka tukwate ecokureberaho c’omuhanuzi Yeremiya. Akahurira yatina munonga obu Yehova yamuhire omurimo g’okuburira. Yeremiya akagamba ati: ‘Tindi kumanya kugamba ahabw’okuba ncari muto.’ (Yer 1:6) Mbwenu shi ni enki ecabire kiramuhe obumanzi bw’okuburira? Ecabire kiramugumye ni Ekigambo ca Ruhanga. Akagamba ati: ‘Omu mutima gwange oshusha oti harimu omuriro oguri kubuguma oguri omu magufa gange, okufa mamige nikundusya.’ (Yer 20:8, 9) N’obu Yeremiya yabire ayine teritori egumire, obutumwa obu yahirwe ngu atangaze bukamuha amani agu yabire ari kwetenga ngu akore ogo murimo.
4. Ni enki ekiri kubaho twashoma Ekigambo ca Ruhanga kandi tukakitecerezaho? (Abakolosayi 1:9, 10)
4 Abakristo nibagira amani ahabw’obutumwa bw’omu Kigambo ca Ruhanga. Obu Pawulo yabire ari kuhandikira ab’omu kibina c’omuri Kolosayi, akagamba ku obumanyi obu benetata babire bine bwabire burije kutuma ‘bagenda nk’oku aba Yehova bashemerire’ kandi bagumizamu ‘kwana ebyana omu mirimo yona emirungi.’ (Shoma omu Bakolosayi 1:9, 10.) Eyo mirimo mirungi netwariramu kuburira obutumwa burungi. Obwe rero twashoma Ekigambo ca Ruhanga kandi tukakitecerezaho, nitukizaho kwikiriza ku Yehova arije kutuha amani kandi tushoborocerwa ku ni ec’omugasho kutangaza obutumwa bw’Obukama.
5. Ni bata oku turi kubasa kukizaho kugasirwa twashoma Bibuli kandi tukayeyegesa?
5 Kugira ngu tugasirwe n’ebiri omu Kigambo ca Ruhanga, tushemerire kwerinda kushoma turi kwenda kumara ekicweka kusha, ahobwe tweyegesa twetonzire kandi tutecereza ahabi turi kushoma. Guma okwate obwire oburi kumara. Washoma ebyahandikirwe bikakugumira kubishoborocerwa otabyehuzya. Ahobwe nobasa kukoresa Irangiro ry’ebitabo bya Watch Tower ninga Ekitabo ekiri kukwasa Abahamya ba Yehova kucondoza kugira ngu orebe obushobororo obwagambirwe ahari orwo runyiriri. Waguma kukwata obwire oburi kumara bw’okweyegesa nibyija kutuma wakizaho kwikiriza ku ebi Ekigambo ca Ruhanga kiri kugamba biri amazima. Oku orije kukizaho kwesimira ebi ori kweyegesa, ni ko orije kukizaho kwesimira kubigambira abandi.
GUMA OYETEGURE GE OMURIMO G’OKUBURIRA
6. Ahabw’enki tushemerire kwetegura ge twaza kuburira?
6 Wayetegura ge omurimo g’okuburira nibyija kutuma otatina kuganira n’abantu. Yesu akakwasa abegi beye kwetegura mbere y’okuza omu murimo g’okuburira. (Luk 10:1-11) Ahabw’okuba batire omu bikorwa ebi Yesu yabegesize, abo begi bakahika aha birungi byingi kandi catuma batunga okushemererwa.—Luk 10:17.
7. Ni bata oku turi kubasa kwetegura omurimo g’okuburira? (Nambwenu reba ekishushani.)
7 Ni bata oku turi kubasa kwetegura omurimo g’okuburira? Tushemerire kutecereza twetonzire ahabi turi kwenda kugamba, mbwenuho tureba oku turi kubasa kubigamba omu ngambo yitu ya burijo. Nambwenu nikibasa kutugasira twatecereza nk’aha buryo bubiri ninga bushatu obu abantu b’omuri teritori yitu bari kukira kuganiraho rero turonda oku turi kubasa kubagarukamu. Kandi twaba nitugamba n’abantu nitugezaho kutuza, kumwenya nangwa tugezaho n’okugamba na bo nk’abanywani babo.
Yetegure ge omurimo g’okuburira (Reba paragurafu ya 7)
8. Ni mubuha buryo obu Abakristo bari nk’enyabya z’ibumba ezi entumwa Pawulo yagambireho omu cokureberaho ceye?
8 Entumwa Pawulo akereka entego eyi turi kuba twine twaba turi omu murimo g’okuburira ari kugira ati: ‘Konka obu butungi tubwine omu nyabya z’ibumba.’ (2 Kor 4:7) Mbwenu shi obwo butungi ni buha? Ni omurimo oguri kurokora amagara ni okugamba okuburira obutumwa bw’Obukama. (2 Kor 4:1) Mbwenu shi ezo nyabya nizimanyisa ki? Nizigeranisa abahereza ba Ruhanga abari kugambira abandi obutumwa burungi. Omu bwire bwa Pawulo bakaba nibakira kukoresa enyabya ezikozirwe omu ibumba bari kutwara ebintu by’omuhendo nk’eby’okurya, vinyo n’esente. Omu buryo nk’obwe Yehova nareba ku obwo butumwa burungi buri obw’omuhendo. Ahabw’obuyambi bwa Yehova nitubasa kutunga amani agu turi kwetenga kugira ngu tuburire obwo butumwa.
SHABA OBUMANZI
9. Ni bata oku turi kubasa kusingura obwoba bw’okutina abantu? (Nambwenu reba ekishushani.)
9 Obumwe nitubasa kuhurira turi kutina abantu. Ni bata oku turi kubasa kusingura eco kizibu? Yijuka eshara eyi entumwa zashabire obu baziragire kutashuba kuburira. Omu mwanya g’okutina bakashaba Yehova ngu abakwase ‘kugamba ekigambo ca Ruhanga n’obumanzi bwona.’ Yehova akahika ari kugarukamu okushaba kwabo. (Byak 4:18, 29, 31) Obumwe n’itwe twaguma kutina abantu, tushemerire kushaba Yehova kugira ngu atukwase kugambira abandi obutumwa burungi. Shaba Yehova akukwase, rukundo eyi ori kukunda abandi eyeyongere rero kitume otatina kubagambira obutumwa burungi.
Shaba obumanzi (Reba paragurafu ya 9)
10. Ni bata oku Yehova ari kutukwasa kuhikiriza omurimo gwitu g’okuba Abahamya? (Isaya 43:10-12)
10 Yehova akatutorana ngu tube Abahamya beye kandi naturaganisa ku arije kutuha obumanzi. (Shoma omuri Isaya 43:10-12.) Ka turebe uburyo buna obu ari kukikoramu. Ecokubanza, Yesu naba ari hamwe nitwe twaba turi kuburira obutumwa burungi. (Mat 28:18-20) Ecakabiri, Yehova akatorana Bamarayika ngu batukwase. (Kush 14:6) Ecakashatu, Yehova akatuha omwika gweye oguri kwera kugira ngu gutukwase kugumizamu kwijuka ebi turi kwega. (Yoh 14:25, 26) Ecakana, Yehova akatuha benetata na banyanyazi b’okutushagika. Ahabw’obuyambi bwa Yehova n’obwa benetata na banyanyazi abari kukunda, twine buri kintu eki turi kwetenga kugira ngu tugire eki twahikaho.
GUMA OBUGANISE N’EBI ABANTU BARI KWETENGA KANDI OBAREBEMU EBIRUNGI
11. Twaba turi omu murimo g’okuburira ni enki eki tushemerire kukora kugira ngu tukizaho kubona abantu? (Nambwenu reba ekishushani.)
11 Mbehi nocweka entege washanga omu ka harimu abantu bace? Mbwenu shi ahabw’enki otari kubasa kwebuza ngu: ‘Abantu b’omuri teritori yange bari nkahe?’ (Byak 16:13) ‘Mbehi bagire aha murimo ninga bagire omu katare?’ Mbehi washanga ariko oku kiri tori kubasa kubona abantu bingi waburira aha muhanda? Mwenetata ori kweta Joshua akagamba ati: “Nkatunga oburyo bw’okuburira naba ninza omu katare n’aho bari kuba bemirire.” We n’omukazi weye Bridget, bakerebera ku bari kubona abantu bingi omu maka gabo baza kuburira omu myebazo ninga shi bakazayo aha sande omu ihangwe.—Efe 5:15, 16.
Hindura obwire n’emyanya eyi ori kuburiramu (Reba paragurafu ya 11)
12. Ni bata oku turi kubasa kumanya ebi abantu bari kwikiriza ninga ebi bari kutecereza?
12 Washanga omuntu atari kwesimira obutumwa, gezaho kumanya ebi ari kwikiriza n’ebi ari kutecereza. Joshua na Bridget nibakoresa ekibuzo ekiri omu misho g’akatabo kace baba bari kutandikisa ekiganiro cabo. Ecokureberaho: Baba bari kukoresa akatabo kace akari kugira ngu Bibuli erimu enki? Nibagambira abantu ngu: “Abamwe nibareba Bibuli nk’ekitabo ca Ruhanga konka abandi tiko oku bari kuyireba. Mbwenu shi iwe noyireba ota?” nibituma babasa kutandikisa ebiganiro.
13. Ahabw’enki turi kubasa kureba ku hine eki twahikireho omu murimo g’okuburira n’obu abantu bakuba batari kwikiriza ebi turi kubagambira? (Emigani 27:11)
13 Okugira eki twahikaho omu murimo g’okuburira tibiri kurebecera omu bi turi kuhikaho. Ahabw’enki? Ahabw’okuba nituba tukozire eki Yehova n’Omwana weye bari kwenda ngu tukore arico okuba abahamya. (Byak 10:42) N’obu twakuba tutabwine abo okuganira na bo ninga shi bakanga kwakira obutumwa bwitu, nitubasa kushemererwa ahabw’okumanya ku turi kuhimbisa Tata witu w’omu iguru.—Shoma omu Migani 27:11.
14. Ahabw’enki tushemerire kushemererwa ondijo muburizi yabona omuntu ori kwenda kumanya amazima?
14 Nambwenu nitubasa kushemererwa ondijo muburizi yabona omuntu ori kwenda kumanya amazima omuri teritori. Hariho Omunara g’Omurinzi ogwageranisize omurimo ogu turi kukora n’okurondesa omwana owabuzire. Abingi nibabasa kwekwatanisa omu kumurondesa kandi barondera omu tucweka otutari kushushana. Ogo mwana yamara kuboneka buri omwe, n’abatamubona nibaba bine enshonga eziri kutuma bashemererwa. Omu buryo nk’obwe, buri muntu omu kibina nabasa kugira eki yakora omu murimo g’okuhindura omuntu omwegi. Twena nitwetengwa kugira ngu tumare teritori yitu kandi twena nitushemererwa hagira owatandika kwija omu nterane.
TA OMUTIMA AHARI RUKUNDO EYI ORI KUKUNDA YEHOVA N’ABATAHI BAWE
15. Ni bata oku kuta omu bikorwa ebiri omuri Matayo 22:37-39 biri kutukwasa kongera amani omu murimo g’okuburira? (Nambwenu reba ekishushani c’aha kishembeso.)
15 Nitubasa kongera amani omu muriro g’okuburira, turi kuta omutima ahari rukundo eyi twinire Yehova n’abatahi. (Shoma omuri Matayo 22:37-39.) Tecereza oku Yehova ari kushemererwa yareba turi kukora omurimo g’okuburira n’oku abantu bari kushemererwa batandika kwega Bibuli! Guma oyijuke ku abantu abari kuhurikiza obutumwa obu turi kubagambira kandi bakasharamu kushemeza Yehova, na bo bari kubasa kubaho ebiro byona.—Yoh 6:40; 1 Tim 4:16.
Okuta omutima ahari rukundo eyi turi kukunda Yehova n’abatahi nibyija kutuma twakizaho kwesimira omurimo g’okuburira (Reba paragurafu ya 15)
16. Ni bata oku turi kubasa kutunga okushemererwa omu murirmo g’okuburira twaba tutari kubasa kuruga omu ka? Tanga ecokureberaho.
16 Mbehi notura omu ka ahabw’enshonga zimwe na zimwe? Yaba ariko kiri, guma otecereze aha ku ori kubasa kwereka ku nokunda Yehova n’abatahi bawe. Omu bwire bw’ecorezo ca COVID-19, Samuel na Dania bakaba batari kubasa kuruga omu ka yabo. Omuri obwo bwire obwabire bugumire, burijo bakaba nibaburira bakoresize esimu, bahandika amabaruha kandi begesa abegi ba Bibuli bakoresize Zoom. Samuel akaba naburira abu yabire nabugana na bo aha irwariro yaza kukwata emibazi ya kansa. Akagamba ati: “Obwo bwire obwabire bugumire bukatuma nacweka entege omu bitecerezo, omu by’omubiri n’omu buryo bw’omwika. Tukaba nitwenda kutunga okushemererwa omu murirmo gwa Yehova.” Omuri obwo bwire Dania na we akamara amezi ashatu ari aha kitanda arwire. Kandi akaba nayetenga kumara amezi mukaga ari omu kagari k’abine obumuga. Akagamba ati: “Nkagezaho kukora byona ebi nabire ndi kubasa omu mbera ezi nabire ndimu. Nkaba nimburira omudokita owabire nayija kuntambira kandi nganira n’abantu ababire bari kwija kwakira ebintu omu nju. Nambwenu nkaba ninganira nkoresize esimu n’omukazi owabire ari kubuganisa abarwire n’abadokita.” N’obu Samuel na Dania babire batari kubasa kukora byingi nk’ebi babire nibakora kare, bakagezaho kukora ebi bari kubasa kandi batungiramu okushemererwa.
17. Ni bata oku ori kubasa kugasirwa munonga n’obuhabuzi obu twahebwa omuri eki kicweka?
17 Nobasa kukora ebintu bitano ebi twashwijuma omuri eki kicweka. Buri buhabuzi bwona obu twamara kushwijuma nitubasa kubugeranisa n’akacweka k’ekintu ekine ebicweka byingi kugira ngu kibase kukora. Otwo tucweka twona twakorera hamwe niharugamu ebirungi byingi. Twagumizamu kuta omu bikorwa obwo buhabuzi, nibyija kutuma twagumizamu kwerinda enyehurira mbi, kandi tutunga okushemererwa omu murimo g’okuburira.
NI BATA OKU EBI BINTU BIRI KUBASA KUKUKWASA KWESIMIRA OMURIMO G’OKUBURIRA?
-
Okukwata obwire oburi kumara bw’okwetegura ge
-
Okushaba obumazi
-
Okuta omutima ahari rukundo eyi turi kukunda Yehova n’abatahi bitu
ECESHONGORO CA 80 “Roza Oreebe Yehova ku Ari Murungi”
