EKICWEKA C’OKWEGA 10
Ahabw’enki oshemerire kubatizibwa?
‘Mwena mubatizibwe.’—BYAK 2:38.
ECESHONGORO CA 34 Okugyendera omu Bwesigwa
EMPINYE a
1-2. Ni enki ekiri kubaho abantu ku bari kubatizibwa kandi shi ni enki eki oshemerire kushwijuma?
MBEHI wararebire abantu bari kuza kubatizibwa? Okareba bari kugarukamu ebibuzo bibiri bine obumanzi. Okareba abanyabuzare n’abanywani bona bashemerirwe. Ku barugire omu mizi, okahurira babakomera amahi kandi bashemerirwe. Ogeranisize, buri sande abantu bingi nibeha Yehova, baba Abahamya ba Yehova Ruhanga ababatizibwe.
2 Mbwenu shi kiri kita ahari iwe? Yaba ori kutecereza aha by’okwija kubatizibwa, ori omuntu w’omutano omuri egi nsi, ahakuba orimu ‘kurondesa Yehova.’ (Zab 14:1, 2) Yaba ocari muto ninga okuzire, eki kicweka nikikukwataho. Kandi n’obu twakuba twamazire kubatizibwa, nituba turi kwenda kugumya ecetengo kitu c’okuhereza Yehova ebiro byona. Obwe rero reka turebere hamwe enshonga ishatu omu nshonga nyingi eziri kutuma twahereza Yehova.
NOKUNDA AMAZIMA N’OKUHIKIRIRA
Sitane yamara emyaka myingi ari kushisha izina rya Yehova kandi na hati acagumizemu kurishisha (Reba paragurafu ya 3-4)
3. Ahabw’enki abahereza ba Yehova bari kukunda amazima n’okuhikirira? (Zaburi ya 119:128, 163)
3 Yehova akaragira abahereza beye ngu bakunde amazima. (Zek 8:19) Nambwenu, Yesu akahiga abakurasi beye ngu bakunde amazima. (Mat 5:6) Eco nikimanyisa ku bashemerire kukora ebihikire, ebirungi, n’ebishemire omu misho ga Ruhanga. Mbehi nokunda amazima n’okuhikirira? Nitwikiriza tutari kubangaisa ku ori kubikunga. Noyanga ebishuba kandi oyanga n’ebintu bibi byona. (Shoma omuri Zaburi ya 119:128, 163.) Ebishuba nibyereka nyinabyo, ari we Sitane, omutegeki w’egi nsi. (Yoh 8:44; 12:31) Sitane naba ayine entego y’okushisha izina rya Yehova Ruhanga, eriri kwera. Sitane akatandika kujanjaza ebishuba ebiri kubeherera Ruhanga, atandikire omuri Edeni. Akabeherera Yehova ngu ni Omutegeki ori kwekunda, otari kwesigwa kandi otari kufa aha bantu. (Kut 3:1, 4, 5) Ebishuba ebi Sitane ari kubeherera Yehova nibigumizamu kuhindura emitecerereze n’emitima by’abantu. Obwe rero abantu ku bari kwanga amazima Sitane nahika ari kutuma bakora ebikorwa bibi.—Rom 1:25-31.
4. Ni bata oku Yehova yayerekire ku ari Ruhanga ow’amazima? (Nambwenu reba ekishushani.)
4 Yehova ni Ruhanga w’amazima, kandi ahabw’okuba ari emfura nayegesa ago mazima abari kumukunda. (Zab 31:5) Eco ku ari kukikora, nikituma bacweka aha bishuba bya Sitane. Nambwenu Yehova nayegesa abahereza beye oku bari kubasa kuba abesigwa n’abahikirire. Eco nikituma bahurira bine ekitinisa n’obusinge. (Emi 13:5, 6) Mbehi n’iwe ni co yakukorire ahakuba wayegire Bibuli? Okamanya ku emihanda ya Yehova eri kugasira abantu bona kandi ku n’iwe eri kukugasira. (Zab 77:13) Ni yo nshonga ori kwenda kukora ebi Yehova ari kwenda. (Mat 6:33) Noyenda kurwanirira amazima, n’okwereka ku ebishuba ebi Sitane ari kugamba ahari Yehova, bitahikire. Ni bata oku ori kubasa kukikora?
5. Ni enki ekirije kukukwasa kushagika amazima n’okuhikirira?
5 Nobasa kusharamu kubaho omu buryo oburi kwereka ku otari kwenda kuhurikiza ebishuba bya Sitane kandi ku ori kwenda kugendera omu mazima. Nobasa kwereka ku Yehova ari we Mutegeki wawe kandi oyereka ku ori kwenda kukora ebihikire. Ni enki ekirije kukukwasa kukora eyo nsharamu? Shaba Yehova ori kumweha kandi obyereke abantu bona ori kubatizibwa. Okukunda amazima n’okuhikirira ni co ekiri kukuhiga kubatizibwa.
NOKUNDA YESU KRISTO
6. Ni ziha nshonga eziri omuri Zaburi ya 45:4 eziri kutuma twakunda Yesu Kristo?
6 Ahabw’enki nokunda Yesu Kristo? Reba enshonga zimwe eziri omuri Zaburi ya 45:4. (Hashome.) Yesu narwanirira amazima, obucurezi n’okuhikirira. Yaba n’iwe ori kukunda amazima n’okuhikirira, nikihuririnkana ku nokunda na Yesu Kristo. Tecereza oku Yesu yarwanirire amazima n’okuhikirira. (Yoh 18:37) Mbwenu shi ni bata oku Yesu ari kushagika obucurezi?
7. Ni enki ekiri kukushemeza aha bikwatirine n’obucurezi bwa Yesu?
7 Yesu narwanirira obucurezi birabire aha cokureberaho ceye. Ecokureberaho: Nahimbisa Ishe omu mwanya g’okwehimbisa. (Mar 10:17, 18; Yoh 5:19) Mbehi noyehurira ota ku ori kutecereza aha bucurezi bwa Yesu? Mbehi nikituma wayenda kukunda ogo Mwana wa Ruhanga kandi oyenda kumutoreza? Mazima ni ko kiri. Ahabw’enki Yesu ari omucurezi? Ni ahabw’okuba nakunda Ishe ori kwecureza kandi namutoreza. (Zab 18:35; Heb 1:3) Mbehi n’iwe tori kuhurira wayenda kuba munywani wa Yesu ahakuba ari kutoreza emicwe y’Ishe omu bwijwire?
8. Ahabw’enki turi kukunda Omugabe witu Yesu?
8 Nitukunda Omugabe witu Yesu ahakuba nayesigwa. Yehova akamanyiza Omwana weye kandi yamutaho ngu abe Omugabe. (Isa 50:4, 5) Nambwenu tecereza ahari rukundo etarimu okwekunda eyi Yesu yayerekire. (Yoh 13:1) Ahakuba Yesu ari Omugabe wawe, oshemerire kumukundira kimwe. Akagamba ku abari kumukunda, ni okugamba banywani beye, bari kumwereka rukundo bari korobera ebiragiro byeye. (Yoh 14:15; 15:14, 15) Ku ni omugisha kuba turi banywani b’Omwana wa Ruhanga!
9. Ni bata oku okubatizibwa kwa Yesu kuri kushushana n’okw’abakurasi beye?
9 Kimwe omu biragiro bya Yesu ni oku ari kwenda ngu abakurasi beye babatizibwe. (Mat 28:19, 20) Akatuteraho ecokureberaho. Konka hine ahu okubatizibwa kweye kuri kutanira n’okw’abakurasi beye. (Reba akashanduku akari kugira ngu “ Entanisa eri ahagati y’okubatizibwa kwa Yesu n’okw’abakurasi beye.”) Konka nibishushana omu bundi buryo. Yesu ku yabatizibwe, akehayo ahari Yehova ngu akore ebi ari kukunda. (Heb 10:7) Ni co kimwe, abakurasi ba Kristo nibabatizibwa bari kwereka abantu bona ku bayehire Yehova Ruhanga. Okuruga obwo nibaba batandika kubaho bari kukora ebi ari kwenda, bitari ebyabo. Obwe rero nibaba bari kutoreza ecokureberaho ca Mukama wabo, ari we Yesu.
10. Ahabw’enki rukundo eyi ori kukunda Yesu eshemerire kutuma wabatizibwa?
10 Noyikiriza ku Yesu ari Omwana omwe wa Yehova kandi ku yamutorine ngu abe omutegeki witu. Nomanya ku Yesu ahikirire kandi ku ari kutoreza Ishe omu kwereka obucurezi. Okega ku yagaburire abine enjara, ku yahumurize abacwekire entege kandi ku yakirize abarwire. (Mat 14:14-21) Okareba oku ari kwebembera ekibina ceye omuri obu bwire. (Mat 23:10) Kandi nomanya ku arije kukora ebiri kukiraho omu biro by’omu misho ari Omugabe w’Obukama bwa Ruhanga. Ni bata oku ori kubasa kwereka ku nomukunda? Noyereka ku nomukunda ori kumutoreza. (Yoh 14:21) Nobasa kutandika kukikora ori kweha Yehova kandi ori kubatizibwa.
NOKUNDA YEHOVA RUHANGA
11. Ni eha nshonga eri kukira ezindi eshemerire kutuma twabatizibwa, kandi ahabw’enki?
11 Enshonga eri kukira ezindi eri kutuma wabatizibwa ni eha? Yesu akereka ekiragiro ca Ruhanga ekiri kukira ebindi ari kugira ati: ‘Okunde Yehova Ruhanga wawe n’omutima gwawe gona, n’amagara gawe gona, n’obwenge bwawe bwona, kandi n’amani gawe gona.’ (Mar 12:30) Mbehi n’iwe ni ko ori kukunda Ruhanga?
Yehova ni we soko y’ekirungi cona eki wayesimire n’eki orije kwesimira (Reba paragurafu ya 12-13)
12. Ahabw’enki nokukunda Yehova? (Nambwenu reba ekishushani.)
12 Hariho enshonga nyingi eziri kutuma twakunda Yehova. Ecokureberaho: Okamanya ku ari we ‘soko y’amagara’ kandi ku ari we ori kutuha ‘ekiconco cona ekihikire.’ (Zab 36:9; Yak 1:17) Buri kintu cona kirungi eki twine, ni Ruhanga ori kutukunda kandi w’emfura owakituhire.
13. Ahabw’enki ekitambo kiri ekiconco c’omuhendo?
13 Ekitambo ni ekiconco c’omutano eki Yehova yatuhire. Ahabw’enki twagamba tusyo? Tecereza aha bunywani obu Yehova ayine n’omwana weye. Yesu akagamba ati: ‘Tata nankunda’ kandi nanye ‘nimukunda.’ (Yoh 10:17; 14:31) Obunywani bwabo bukagenda buri kuguma oku bagenzire bari kumarana obwire buringwa munonga. (Emi 8:22, 23, 30) Mbwenuho tecereza oku Yehova yayehurire obu yayikirize ngu omwana weye ayitwe. Yehova nakunda abantu harimu n’iwe, ecatumire yayikiriza kuhayo Omwana weye owu ari kukunda kugira ngu iwe n’abandi mubase kubaho ebiro byona. (Yoh 3:16; Gal 2:20) Tihine enshonga eri kukira eyo eri kutuma twakunda Ruhanga.
14. Ni eha ntego eri kukira ezindi eyi ori kubasa kweteraho?
14 Rukundo eyi ori kukunda Yehova ekakizaho kweyongera oku wakirizeho kumumanya. Hatariho okubanganisa nohurira ori kwenda kumuhika hati n’omu biro by’omu misho. Kandi noyija kukibasa. Nakuhiga ari kukweshengereza ngu oshemeze omutima gweye. (Emi 23:15, 16) Eco nobasa kukikora atari omu bigambo kusha ahobwe n’omu bikorwa. Oku ori kubaho nibyereka yaba ori kukunda Yehova by’amazima. (1 Yoh 5:3) Eyo ni yo ntego eri kukira ezindi eyi ori kubasa kweteraho.
15. Ni bata oku ori kubasa kwereka ku nokunda Yehova?
15 Ni bata oku ori kubasa kwereka ku nokunda Yehova? Ecokubanza, ni okumweha ori kumushaba eshara y’omutano okamugambira ku ari we wenka owu orije kukorera. (Zab 40:8) Bwanyima, noyija kwereka abantu bona ku wayehire Yehova ori kubatizibwa. Nk’oku tubigambire omu kutandika, obwo ni bwija kuba buri obwire bw’omutano omu kubaho kwawe. Noyija kuba watandika amagara masya, otari kubaho ahabwawe ahobwe ori kubaho ahabwa Yehova. (Rom 14:8; 1 Pet 4:1, 2) Eco nobasa kukihurira nk’ekintu ekigumire, kandi ni ko kiri. Konka nikikwigurira oburyo burungi bw’okubaho oyine amagara marungi. Bata shi?
16. Nk’oku biri kugambwa omuri Zaburi ya 41:12, ni bata oku Yehova arije kuhemba abari kumweha kandi bakamukorera?
16 Yehova ni emfura okukira abantu bona. Eki wakumuha cona, we nakukubira emirundi myingi. (Mar 10:29, 30) Nayija kukuha ebintu ebiri kushemeza, akuhe ekihembo, kandi akuhe amagara agari kushemeza nangwa n’omuri egi nsi. Kandi ogo ni omurozo kusha. Orugendo oru ori kutandika wabatizibwa tirushemerire kuhendera. Nobasa kugumizamu kukorera Sho omukundwa, ebiro byona. Rukundo eri ahagati yawe na Sho neyije kugumizamu kweyongera, kandi ahabw’okuba ari kuturaho ebiro byona, n’iwe noyija kubaho ebiro byona.—Shoma omuri Zaburi ya 41:12.
17. Ni kiha kintu eki Yehova atine eki ori kubasa kumuha?
17 Ku ori kutera entambwe y’okweha Yehova kandi okabatizibwa noba watunga omugisha g’okumuha ekintu c’omuhendo munonga. Akakuha ekintu cona kirungi n’obwire burungi bw’okushemerererwa obu wabire otakabonaga. N’iwe nobasa kuha Omuhangi w’iguru n’ensi ekintu eki atine, ni okugamba okumweha n’amagara gawe gona. (Yob 1:8; 41:11; Emi 27:11) Mbwenu shi hariho obundi buryo burungi bw’okubaho oburi kukira obwo? Hatariho okubanganisa, enshonga nkuru eshemerire kutuma wayeha Yehova kandi okabatizibwa, ni rukundo eyi ori kumukunda.
NOZIBIRWA KI?
18. Ni biha bibuzo ebi ori kubasa kwebuza?
18 Obwe rero, ekibuzo ni eki: Mbehi noyija kubatizibwa? N’iwe wenka ori kubasa kugarukamu eco kibuzo. Konka nikija kukugasira ku orayebuze ngu: ‘Ninzibirwa ki?’ (Byak 8:36) Guma oyijuke enshonga ishatu ezi twamara kushwijuma. Ey’okubanza, Nokunda amazima n’okuhikirira. Yebuze ngu: ‘Mbehi ntegerize n’ekihika obwire obu abantu bingi barije kugambisa amazima kandi bakakora ebihikire?’ Eya kabiri, nokunda Yesu Kristo. Yebuze ngu: ‘Mbehi ninyenda ngu omwana wa Ruhanga antegeke, kandi nkuratize ecokureberaho ceye. Eya kashatu, eri kukira ezindi zona, ni oku ori kukunda Yehova. Yebuze ngu: ‘Mbehi ninyenda kushemeza omutima gwa Yehova ndi kumukorera ahabw’okuba ari Ruhanga wange?’ Mbwenu shi yaba wagarukamu ebyo bibuzo ngu yego, ahabw’enki otari kubatizibwa? Nozibirwa ki?—Byak 16:33.
19. Ahabw’enki otashemerire kubanganisa aha kubatizibwa? Gamba ecokureberaho. (Yoh 4:34)
19 Yaba ori kubanganisa aha kubatizibwa, reba ecokureberaho eki Yesu yakoresize. (Shoma omuri Yohana 4:34.) Mbehi wareba ku Yesu yagereranisize okukora ebi Yehova ari kwenda n’ebyokurya. Ahabw’enki? Ebyokurya nibitugasira. Yesu akaba namanya ku byona ebi Yehova ari kutushaba biri kutugasira. Yehova tari kwenda ngu abantu bakore ebintu ebiri kubasa kubashasha. Mbehi omu bi Yehova ari kukushaba harimu n’okubatizibwa? Yego. (Byak 2:38) Obwe rero, nobasa kwesiga ku wayorobera ekiragiro c’okubatizibwa kirije kukugasira. Mbwenu shi yaba otari kubasa kubanganisa waza kurya ebyokurya ebinuzire, ahabw’enki ori kubanganisa aha kubatizibwa?
20. Ni enki eki turishwijuma omu kicweka ekiri kukurataho?
20 Nozibirwa ki? Abingi nibabasa kugarukamu ngu: “Ntinketegwire.” Enshonga eri kutuma wabanganisa ni oku eyo nsharamu eri kukira ezindi zona ezi wakozireho. Obwe rero nikikushaba obwire n’amani by’okutekateka, kugira ngu oyetegure. Konka shi ku wakuba oyine ecetengo c’amani c’okutera eyo ntambwe, ni enki eki ori kubasa kukora kugira ngu oyetegure? Ecokugarukamu c’eco kibuzo nitwija kukishwijuma omu kicweka ekiri kukurataho.
ECESHONGORO CA 28 Okuba Munywani wa Yehova
a Okubatizibwa ni entambwe y’omugasho ahari buri mwegi wa Bibuli. Mbwenu shi ni enki ekishemerire kutuma omwegi yatera eyo ntambwe? Omu kigambo kimwe, ni rukundo. Konka shi ni rukundo eyi ari kukunda oha? Omuri eki kicweka, twaza kugarukamu ebyo bibuzo, kandi turebe n’ekirarugemu twaba Abakristo ababatizibwe.
