Ahabw’enki omunyabuzare wa hihi yagambire ngu akaba arashishe omugabane gweye yatasana na Rusi? (Rus 4:1, 6)

Omu bwire bwa Bibuli, omushija ku yabire nafa atakazire, abantu bamwe bakaba nibebuza ngu: Ni enki ekirije kuhika aha misiri yeye? Mbehi izina ryeye niryija kwebekana? Ebiragiro bya Musa nibigarukamu ebyo bibuzo.

Ni enki ecabire nikibaho omushija ku yabire nafa ninga shi akaba omucene akaguza omusiri gweye? Omwojo ori kuzarwa na we akaba nagucungura ninga shi agugura. Kikaba nikituma ogo musiri gwaguma omu kika.​—Lev 25:23-28; Kub 27:8-11.

Mbwenu shi ni bata oku izina ry’omuntu ofire ryabire riri kubasa kuguma kwijukwa? Kikaba nikibaho ori kuzarwa na we yatasana n’omukazi weye nk’oku cabire ahari Rusi. Akaba natasana n’ogo mukazi ofisize omushija weye kugira ngu amuzarire omwana w’okucungura ebintu byeye. Eyo ntebekanisa erimu rukundo ekaba nekwasa abafakazi. —Bir 25:5-7; Mat 22:23-28.

Tecereza aha byahikire ahari Nawomi. Akaba ayine omushija ori kwetwa Elimeleki. Obu Elimeleki n’abatabani beye babiri bafire, akasigara atine ow’okumufaho. (Rus 1:1-5) Nawomi ku yagarukire omuri Yuda, akaragira Rusi ngu ashabe Bowazi acungure omusiri gwabo. Bowazi akaba ari omunyabuzare wa hihi wa Elimeleki. (Rus 2:1, 19, 20; 3:1-4) Konka Bowazi akamanya ku habire hariho ondijo munyabuzare wa hihi kumusinga. Obwe rero ogo munyabuzare ni we owabire ashemerire kuba omucunguzi.​—Rus 3:9, 12, 13.

Omu kubanza, ogo ‘munyabuzare wa hihi’ akaba ayikirize kubayamba. (Rus 4:1-4) N’obu yabire arije kugura ogo musiri n’esente nyingi, akaba namanya ku Nawomi yabire atari kubasa kuzara omwana w’okucungura omusiri gwa Elimeleki ahabw’okuba akaba yakuzire. Eco nikimanyisa ku omusiri gwabire gurabarirwe omu buhunguzi bw’ogo munyabuzare wa hihi; obwe rero gakaba gari amagoba geye.

Konka ogo munyabuzare wa hihi akahindura ensharamu ku yamanyire ngu akaba ashemerire kutasana na Rusi. Akagamba ati: ‘Nyowe tindi kubasa kukicungura ntakashisha omugabane gwange.’ (Rus 4:5, 6) Ahabw’enki yahindwire ensharamu?

Kuri ogo munyabuzare wa hihi ninga shi ondijo muntu yabire aratasane na Rusi bakazara omwana, ogo mwana ni we owabire arahebwe omugabane gwa Elimeleki. Mbwenu shi ni bata oku eco cabire kirashishe omugabane gw’omunyabuzare wa hihi? Bibuli teri kukigamba; konka reba oburyo bumwe.

• Obw’okubanza, esente ezi yabire yagura ogo musiri zikaba zirabe nk’ezafa busha ahabw’okuba gukaba gutarabe ogweye. Gukaba gurabe og’omwana wa Rusi.

• Obwa kabiri, akaba aragire omurimo g’okugaburira Rusi na Nawomi kandi abafaho.

• Obwa kashatu, Rusi ku yabire aramuzarire abana, na bo bakaba nibija kuhebwa aha mugabane ogu yaba ashangirwe ayine.

• Obwa kana, yaba ogo mucunguzi yabire ashangirwe atine bana, omwana owu yabire arazare na Rusi akaba arahebwe omusiri gweye kandi ahebwa n’ogwa Elimeleki. Kandi omusiri gweye gukaba gurahebwe omwana owazirwe ari kwetererwa izina rya Elimeleki. Ogo munyabuzare wa hihi akaba atetegwire kwegura eyo mitwaro yona ya Nawomi. Akikiririza ondijo munyabuzare owabire akuratireho ori kwetwa Bowazi ngu abe ari we owabacungura. Bowazi akabacungura kugira ngu ‘agarureho izina rya nyakufa omu mugabane gweye.’​—Rus 4:10.

Omunyabuzare wa hihi we akaba ari kwenda kuguma ayine izina ryeye n’omugabane gweye. Eco akakikora ahakuba akaba ari kwekunda. Konka omu mwanya g’okurinda izina ryeye, tiriragumire kwijukwa. Nambwenu akaferwa omugisha g’omutano ogu Bowazi yatungire g’okuba omwe omuri bishenkuru ba Mesiya, ari we Yesu Kristo. Omunyabuzare wa hihi akakekunda yaferwa omugisha g’okukwasa abari kwetenga obuyambi!—Mat 1:5; Luk 3:23, 32.