1-2. Yaba otaketegwire kubatizibwa, ahabw’enki otashemerire kucweka entege? (Reba ekishushani c’aha kishembeso.)

 YABA oyine entego y’okubatizibwa, mazima oyine entego ndungi. Mbehi oyetegwire kubatizibwa hati? Yaba ari ko kiri kandi abazehe bakikirize, nyabura we otayeziringa. Ku orabatizibwe noyija kutunga emigisha myingi omu murimo gwa Yehova.

² Mbehi hine owarakugambire ku hine ebindi bintu ebi oshemerire kukora mbere y’okubatizibwa? Ninga okabyerebera? Caba ari ko kiri, otacweka entege. Nobasa kutunguka ohika ahari eyo ntambwe y’omugasho, yaba ocari muto ninga okuzire.

3. Ni enki eki Omunyetiyopiya yaburize Filipo, kandi shi nikituma twayebuza kiha kibuzo? (Ebyakozirwe 8:36, 38)

³ Shoma omu Byakozirwe 8:36, 38. Omunyetiyopiya akabuza omuburizi ori kwetwa Filipo ati: ‘Ekiri kunzibira kubatizibwa ni enki?’ Omunyetiyopiya akaba ayine ecetengo c’okubatizibwa; konka shi mazima akaba ayetegwire?

4. Ni bata oku Omunyetiyopiya yayerekire ku yabire amaririre kugumizamu kwega?

⁴ Ogo Munyetiyopiya ‘akaba agire Yerusalemu kuramya.’ (Byak 8:27) Obwe rero ashemerire kuba yabire ari omukurasi w’edini y’Abayudaya. Hatariho okubanganisa, akaba yayegire ebiri kukwata ahari Yehova birabire omu bihandiko ebiri kwera by’Ebyahandikirwe by’Oruheburayo. Konka na bwo, akaba ari kwenda kwega byingi ebiri kukiraho. Mbwenu shi obu Filipo yabugine ogo Munyetiyopiya akashanga ari kukora ki? Akaba ari kushoma omuzingo gw’ekitabo c’omuhanuzi Isaya. (Byak 8:28) Ogo muzingo gukaba gurimu ebyokurya by’omwika ebigumire. Omunyetiyopiya akaba atari kwenda kwega enyegesa  z’okubandizaho kusha, ahobwe akaba ari kwenda kugumizamu kwega.

5. Ni enki eki Omunyetiyopiya yabire nakoresa ebi yabire ari kwega?

⁵ Ogo mushija akaba ari omwebembezi omu butegeki bw’omugabekazi Kandake wa Etiyopiya ahakuba akaba ‘ari omubiki w’ebintu byeye byona.’ (Byak 8:27) Obwe rero nabasa kuba yabire ahugire ahabw’eyo mirimo myingi. Konka, akakwata obwire bw’okuza kuramya Yehova. Akaba atari kwega amazima kusha, ahobwe akaba nata n’omu bikorwa ebi yabire ari kwega. Obwe rero akaba nagenda engendo ndingwa, ari kuruga omuri Etiyopiya ari kuza omuri Yerusalemu kugira ngu aramye Yehova. Ezo ngendo nizibasa kuba zabire nizitwariramu obwire n’esente, konka ogo mushija akabyeferereza kugira ngu aramye Yehova.

6-7. Ni bata oku rukundo eyi Omunyetiyopiya yabire ari kukundamu Yehova yagumizemu kukura?

⁶ Omunyetiyopiya akegera ahari Filipo amazima masya g’omugasho, harimu n’agari kugamba ahari Mesiya. (Byak 8:34, 35) Mazima bikamukora aha mutima ku yayegire eki Yesu yamukorire. Ni bata oku yabire aratwaze? Akaba ari kubasa kuguma ari omukurasi w’edini y’Abayudaya. Omu mwanya gw’eco, rukundo eyi yabire ari kukunda Yehova n’Omwana weye ekeyongera. Kikatuma yagira empinduka kugira ngu abatizibwe abe omukurasi wa Yesu Kristo. Filipo akareba ku Omunyetiyopiya yabire ayetegwire, rero yamubatiza.

⁷ Ku oratoreze ecokureberaho c’ogo Munyetiyopiya, noyija kwetegura kubatizibwa. N’iwe noyija kugamba oyine obwesige oti: ‘Ekiri kunzibira kubatizibwa ni enki?’ Reka tushwijume oku ori kubasa kumutoreza ori kugumizamu kwega, ori kuta omu bikorwa ebi ori kwega, kandi ori kugumizamu kukizaho kukunda Ruhanga.

8. Ni bata oku ebiri omuri Yohana 17:3 biri kukukwataho?

⁸ Shoma omuri Yohana 17:3. Mbehi ebyo bigambo bya Yesu bikakukwasa kusharamu kwega Bibuli? Abingi omuri itwe ni byo ebyatukwasize. Konka shi ebyo bigambo nambwenu nibitugambira kugumizamu kwega? Yego. Tituriyemereza kwega kugira ngu ‘tumanye Ruhanga omwe ow’amazima.’ Nitwija kugumizamu kwega ebiro byona. (Mub 3:11; Yoh 17:3) Oku turakizeho kwega, ni ko turakizeho kuhika hihi ya Yehova.​—Zab 73:28.

9. Ni enki eki tushemerire kukora twamara kumanya enyegesa z’okubandizaho z’omuri Bibuli?

⁹ Nikihuririnkana ku okwega ebiri kukwata ahari Yehova biri kutandikira aha nyegesa z’okubandizaho. Omu baruha eyi entumwa  Pawulo yahandikire Abaheburayo, akagamba ku ezo nyegesa ziri ‘eby’okubandizaho ebyorobi.’ Akaba atari kugamba ku ‘eby’okubandizaho’ bitine mugasho, ahobwe akaba ari kubigeranisa n’amate agari kukuza omwana. (Heb 5:12; 6:1) Konka nambwenu akagambira Abakristo bona ngu bege ebiri kukira aha nyegesa ez’okubandizaho, bege amazima agagumire g’Ekigambo ca Ruhanga. Mbehi nohurira oyine ekihika c’okwega enyegesa ezigumire z’omuri Bibuli? Mbehi noyenda kugumizamu kutunguka, ori kugumizamu kwega ebiri kukwata ahari Yehova n’aha bigengererwa byeye?

10. Ahabw’enki abamwe kwega kiri kutugumira?

¹⁰ Konka abingi omuri itwe noshanga okwega kiri kutugumira. Kandi shi iwe? Mbehi ah’ishomero okaba nokunda kushoma n’okwega? Mbehi bikaba nibikunurira kandi ohurira byine omugasho? Ninga okaba noyereba nk’otari omwegi murungi? Yaba ari ko kiri, ti iwe wenka. Konka, Yehova nabasa kukuyamba. Ahikirire kandi ni we Mwegesa murungi kukira abandi bona.

11. Ni bata oku Yehova ari kwereka ku ari we ‘Mwegesa mukuru’?

¹¹ Yehova nayegambaho ku ari we ‘Mwegesa wawe mukuru.’ (Isa 30:20, 21) Ni omwegesa ori kwehangana, oyine embabazi kandi ori kweta omu mwanya gwawe. Nareba ebirungi omu begi beye. (Zab 130:3) Kandi tari kutushaba kukora ebi tutari kubasa. Yijuka ku yakuhire ekiconco kirungi, ni okugamba obwonko. (Zab 139:14) Tukahangwa twine obushoborozi bw’okwega. Omuhangi witu nayenda ngu tugumizemu kwega kandi tubyesimire. Obwe rero ni ec’obwenge kugira ‘ecetengo’ c’okumanya amazima g’omuri Bibuli hati. (1 Pet 2:2) Yetereho entego eyi ori kubasa kuhikaho y’okushoma Bibuli n’okuyeyegesa kandi oyihamireho. (Yos 1:8) Yehova nayija kukuha amani okunde ebi ori kushoma kandi okizeho kwega ebiri kumukwataho.

12. Ahabw’enki tushemerire kutecereza ahari Yesu n’omurimo ogu yakozire twaba turi kweyegesa?

¹² Burijo ogume nokwata obwire otecereze ahari Yesu n’omurimo ogu yakozire. Okukuratiza ecokureberaho ca Yesu omu bwijwire ni co ekirije kutukwasa kugumizamu kukorera Yehova na munonga omuri obu bwire obugumire. (1 Pet 2:21) Yesu akagamba atari kushereka ebizibu ebi abakurasi beye babire barije kubugana. (Luk 14:27, 28) Konka, akaba ari kwesiga ku abakurasi beye babire barije kusingura ebyo bizibu nk’oku na we yabisingwire. (Yoh 16:33) Yega byingi ebiri kukwata ahari Yesu kandi oyetereho entego y’okumutoreza omu kubaho kwawe.

13. Ni enki eki oshemerire kugumizamu kushaba Yehova, kandi ahabw’enki?

¹³ Okumanya konka tikuri kumara. Omugasho gwako g’okubanza ni okutukwasa kukizaho kwega ebiri kukwata ahari Yehova n’okugira emicwe nk’eyeye, harimu rukundo n’okwikiriza. (1 Kor 8:1-3) Waba ori kwega, ogume oshabe Yehova kugira ngu akukwase kugira okwikiriza kugumire. (Luk 17:5) Nagarukamu eshara nk’ezo. Okwikiriza kugumire okwegamire aha bi ori kumanya ahari Ruhanga nikwija kukukwasa kugira eki wakora.​—Yak 2:26.

14. Ni bata oku entumwa Petero yayerekire omugasho g’okuta omu bikorwa ebi turi kwega? (Nambwenu reba ekishushani)

¹⁴ Entumwa Petero akagamba oku kiri ec’omugasho abakurasi ba Yesu kugumizamu kuta omu bikorwa ebi bari kwega. Akabigamba ari kukoresa enkuru ya Nowa eri kugambwa omuri Bibuli. Yehova akagambira Nowa ku yabire arije kukoresa omwijuro ari kucwecereza  abantu babi b’omu bwire bweye. Okumanya ku habire haza kubaho omwijuro ti co conka ecabire kiratume Nowa n’ab’omu ka yeye barokoka. Yetegereze ku Petero yagambire aha bi Nowa n’ab’omu ka yeye bakozire mbere y’omwijuro ‘bari kombeka emeri.’ (1 Pet 3:20) Nowa n’ab’eka yeye bakata omu bikorwa ebi Ruhanga yabire abegesize bari kombeka emeri eyabire eri mpango munonga. (Heb 11:7) Bwanyima Petero akageranisa ebi Nowa yakozire n’okubatizibwa, ari kuhandika ngu: ‘Ekintu ekiri nk’eco ni co ekiri kubakiza.’ (1 Pet 3:21) Obwe rero, nitubasa kugeranisa ebi ori kukora kugira ngu oyetegure kubatizibwa n’ebi Nowa n’eb’eka yeye bamazire emyaka myingi bari kukora bari kombeka emeri. Ni biha bintu ebi oshemerire kukora kugira ngu oyetegure kubatizibwa?

15. Ni enki eki oshemerire kukora kugira ngu oyereke ku oyehanire obyihire aha mutima?

¹⁵ Kimwe omu bintu by’okubanza ebi tushemerire kukora ni okwehana ebicumuro byitu tubyihire aha mutima. (Byak 2:37, 38) Wayehana obyihire aha mutima nikituma wahinduka. Mbehi okareka omucwe ogu ari go gona oguri kushasha Yehova, harimu obushambani, kuresa ninga shi okugamba ebigambo bibi? (1 Kor 6:9, 10; 2 Kor 7:1; Efe 4:29) Yaba otakakikozire, ogume ogezeho kukora empinduka. Gambira omuntu ori kukwegesa Bibuli ninga shi obuze abazehe b’ekibina kugira ngu bakukwase kandi bakuhe obuhabuzi. Yaba ocari muto kandi ocatura omu ka, ogume oshabe abazire obuyambi bakukwase kusingura emicwe mibi eri kubasa kutuma otabatizibwa.

16. Okugira entebekanisa ndungi y’eby’omwika nihatwariramu enki?

¹⁶ Nambwenu nikikugasira waguma oyine entebekanisa ndungi y’eby’omwika. Omuri eyo ntebekanisa nihatwariramu okuza omu nterane n’okuzekwatanisamu. (Heb 10:24, 25) Kandi wayijuza ebiri kushabwa ngu obe omuburizi, guma oyekwatanise omuri ogo murimo. Oku orakizeho kwekwatanisa omuri ogo murimo oguri kurokora amagara, ni ko orakizeho kugukunda. (2 Tim 4:5) Yaba ocari muto kandi ocatwire omu ka, yebuze ngu: ‘Mbehi abazire bange nibakunda kunyijusa kuza omu nterane ninga omu murimo g’okuburira? Ninga ninyeyijusa?’ Ku orakore  ebyo bintu batari kukugema, noba wayereka ku oyine okwikiriza kandi ku nokunda Yehova Ruhanga. Ebyo ni ebikorwa by’‘okutina Ruhanga,’ kandi ni ekiconco eki ori kubasa kuha Yehova. (2 Pet 3:11; Heb 13:15) Byona ebi ori kuha Yehova obyekundire kandi batari kukugema nibimushemeza. (Geranisa n’ebiri omu 2 Bakorinto 9:7.) Nitukora ebyo bintu byona ahakuba nitwenda kuha Yehova ebirungi kukira ebindi.

17-18. Ni guha mucwe ogurije kukukwasa kutunguka okahika aha kubatizibwa, kandi ahabw’enki? (Emigani 3:3-6)

¹⁷ Omu bwire obu ori kutunguka ngu ohike aha kubatizibwa, noyija kubugana ebizibu. Abamwe nibabasa kukushecerera ahabw’okwikiriza kwawe kandi nibabasa kukuhakanisa ninga bakuhiganisa. (2 Tim 3:12) Nobasa kuba ori kutaho amani kugira ngu osingure ekikorwa kibi, konka obumwe na bumwe oshuba kukikora. Nambwenu nobasa kucweka entege wareba entego yawe otari kuyihikaho juba. Mbwenu shi ni enki ekirije kukukwasa kwehangana? Ni rukundo eyi ori kukunda Yehova.

¹⁸ Rukundo eyi ori kukunda Yehova ni go mucwe murungi oguri kukira eyindi ogu oyine. (Shoma omu Migani 3:3-6.) Rukundo nyingi eyi ori kukunda Ruhanga niyija kukukwasa kwehanganira ebizibu ebi ori kubugana. Emirundi myingi, Bibuli negamba ku Yehova ayinire abahereza beye rukundo etari kuhemuka. Eyo rukundo teri kukwaho ebiro byona. (Zab 100:5) Okahangwa omu kishushani ca Ruhanga. (Kut 1:26) Ni bata oku ori kubasa kumutoreza ori kwereka rukundo nk’eyo?

19. Ni bata oku ori kubasa kwereka ku nosima Yehova ahabw’ebintu byona ebi yakukorire? (Abagalatiya 2:20)

¹⁹ Guma oyereke ku nosima. (1 Tes 5:18) Burizoba, guma oyebuze ngu, ‘Ni bata oku Yehova yanyereka rukundo?’ Bwanyima osime Yehova omu shara kandi omugambire ebintu ebi yakukorera otarabire aha rubaju. Guma orebe ebikorwa ebi ari kukukorera iwe aha bwawe ebiri kwereka ku ari kukukunda, nk’oku entumwa Pawulo yabyerebire. (Shoma omu Bagalatiya 2:20.) Yebuze ngu: ‘Mbehi nanye ninyenda kumwereka rukundo?’ Rukundo eyi ori kukunda Yehova neyija kukukwasa kusingura ebigezo kandi ekukwase kwehanganira ebizibu. Neyija kukukwasa kugumizamu n’entebekanisa yawe y’eby’omwika  kandi etume burijo wayereka Sho w’omu iguru ku nomukunda.

20. Ni bata oku ori kweha Yehova, kandi shi ni bata oku eri ensharamu y’omugasho?

²⁰ Ku hari kuhwaho obwire, rukundo eyi ori kukunda Yehova netuma wamushaba eshara y’omutano, ni okugamba okumweha. Yijuka ku wayeha Yehova ori kutunga omugisha g’omutano g’okuba oweye ebiro byona. Okuraganisa Yehova ori kumweha nikituma wayehanganira ebizibu byona ebi orabugane. Eyo ndagano nekorwa rimwe. Obwe rero wayeha Yehova noba wakora ensharamu etari ey’okuzanisa. Konka, omu nsharamu zona ezi ori kukora omu kubaho kwawe, okweha Yehova ni yo nsharamu ndungi kukira ezindi. (Zab 50:14) Sitane nayija kugezaho kucendeza rukundo eyi ori kukunda Sho kugira ngu oreke kuguma ori omwesigwa. Konka otarikiriza ngu Sitane akusingure! (Yob 27:5) Rukundo egumire eyi ori kukunda Yehova neyija kukukwasa kuhikiriza endagano eyi waragine na we kandi okizeho kumukunda.

21. Ahabw’enki turi kubasa kugamba ku okubatizibwa ari entandikiro y’okukorera Yehova?

²¹ Ku oramare kweha Yehova, obigambire abazehe b’ekibina kugira ngu omanye eki orakuratizeho. Konka ogume oyijuke ku otari kuhenderera aha kubatizibwa. Noba watandika amagara masya g’okukorera Yehova ebiro byona. Obwe rero, hati ni bwo bwire bw’okugumya rukundo eyi ori kukunda Yehova. Yetereho entego ezirije kukukwasa kugumizamu kumukunda. Ebyo nibyija kutuma wahika aha kubatizibwa. Mazima eryo izoba niryija kuba riri kushemeza. Nitushaba ngu rukundo eyi ori kukunda Yehova n’Omwana weye bigumizemu kukura ebiro byona!