1. Ni enki eki abazire bari kwendeza abana babo?

 IMWE bazire mwe, nitumanya ku muri kwenda kukwasa abana banyu kumanya Yehova kandi bakamukunda. Konka Ruhanga tari kurebeka. Mbwenu shi, ni bata oku muri kubasa kukwasa abana banyu kureba ku ariho kandi bakamuhika hihi?​—Yak 4:8.

2. Ni bata oku abazire bari kubasa kwegesa abana babo emicwe ya Yehova?

² Oburyo burungi bw’okukwasa abana kuhika hihi ya Yehova ni okwegera hamwe Bibuli. (2 Tim 3:14-17) Konka, Bibuli negamba obundi buryo obu abacari bato bari kubasa kwegeramu ebya Yehova. Omu kitabo c’emigani nihagambwamu omuzire ori kuhabura omwana weye ngu agume kwijuka emicwe ya Yehova eri kurebecera omu byahangirwe. (Emi 3:19-21) Twaza kushwijuma oburyo bumwe obu abazire bari kubasa kukoresamu ebyahangirwe omu kwegesa abana babo emicwe ya Yehova.

3. Ni buha buyambi obu abazire bashemerire kuha abana babo?

³ Bibuli negamba ku emicwe ya Ruhanga ‘eri kurebecera kimwe, eri kumanyirwa aha bi yahangire.’ (Rom 1:20) Imwe bazire mwe, nimukunda kumara obwire muri n’abana banyu aheru y’eka. Obwe rero mugume mukorese obwo bwire muri kukwasa abana banyu kureba oku ‘ebyahangirwe’ biri kwereka emicwe mirungi ya Yehova. Reka turebe oku abazire bari kubasa kwegera aha buryo obu Yesu yabire nayegesamu.

4. Ni bata oku Yesu yakoresize ebyahangirwe omu kwegesa abakurasi beye? (Luka 12:24, 27-30)

 ⁴ Yetegereze oku Yesu yabire nakoresa ebyahangirwe omu kwegesa. Izoba rimwe, akagambira abegi beye ngu betegereze enyonyi n’ebimuri. (Shoma omuri Luka 12:24, 27-30.) Yesu akaba nabasa kugamba aha nyamishwa ninga shi ekihingwa ekindi konka akagamba aha nyonyi n’ekimuri ebi abegi beye babire bashangirwe bari kumanya. Abegi beye bashemerire kuba babire nibareba enyonyi ziri kuguruka omu mwanya n’ebimuri biri omu misiri. Mbehi notera akashushani Yesu ari kutunga engaro ebyo bintu ari kubyereka abegi beye? Kandi shi ni enki eki yakozire bwanyima y’okugamba ebyo byokureberaho? Akegesa abegi beye ishomo erikwatirine n’obufura n’embabazi ebi Ishe w’omu iguru Yehova ayine. Nayija kugaburira abahereza beye b’abesigwa kandi abajweke nk’oku ari kubikorera enyonyi n’ebimuri.

5. Ni biha byahangirwe ebi abazire bari kubasa kukoresa bari kwegesa abana babo ebiri kukwata ahari Yehova?

⁵ Imwe bazire mwe, mbehi nimwija kutoreza oburyo bwa Yesu bw’okwegesa? Nimubasa kugambira abana banyu omucwe ogu mwakunzire aha byahangirwe, yenda nk’ebihingwa ninga enyamishwa. Mwaba muri kukikora, mugume mwijuke kushoborora eki biri kwegesa aha mitwarize ya Yehova. Bwanyima n’iwe nobasa kubuza omwana wawe enyamishwa ninga ekihingwa eki ari kukunda. Ku oragambe aha byahangirwe ebi ari kukunda nayija n’okushemererwa waba ori kumwegesa emitwarize ya Yehova.

6. Ni enki eki turi kwegera aha cokureberaho ca nyina wa Christopher?

⁶ Mbehi abazire bashemerire kumara obwire buringwa bari kucondoza aha nyamishwa ninga shi ekihingwa mbere y’okukiganiraho n’abana babo? Eco tikiri kwetengesa. Yesu tarashoborwire ebintu byingi ebikwatirine n’oku Yehova ari kugaburira enyonyi n’oku ari kujweka ebimuri. Ni amazima omwana wawe nabasa kuba ari kwenda kumanya byingi aha byahangirwe, konka okubyetegereza ninga shi kumubuzaho otubuzo tuce nibimara. Reba ebi mwenetata ori kwetwa Christopher acayijuka aha bi yayegire acari muto: “Mama akaba nagamba ebigambo bice aha byahangirwe ebyabire bitwehinguririze. Ecokureberaho: Ku twabire nituhika aha mishozi, akaba natugambira ngu ‘mbehi mwareba oku eriya mishozi eri miringwa kandi ku ebonire munonga? Mazima Yehova ni murungi.’ Nambwenu ku twabire nituhika aha nyanja akaba natugambira ngu ‘murebe oku eriya miraba eyine amani! Mazima Ruhanga ayine amani.’” Christopher akagamba ati: “Ebyo bigambo byorobi konka ebyabire nibituma twatecereza bikatukwasa munonga.”

7. Ni bata oku ori kubasa kumanyiza abana bawe kutecereza aha byahangirwe?

⁷ Oku abana bawe bari kugenda bari kukura, nobasa kubamanyiza kukizaho kutecereza aha byahangirwe n’okwetegereza eki biri kutwegesa aha micwe ya Yehova. Nobasa kugamba aha cahangirwe kimwe, rero obuza abana bawe ngu: “Eki cahangirwe nikitwegesa ki ahari Yehova?” Noyija kutangara kandi oshemererwe ku orahurire ebi barakugarukemu.​—Mat 21:16.

8. Ni buha buryo burungi obu abazire b’Abisirayeli babire nibabona ku babire nibagenda ‘omu muhanda’?

⁸ Yehova akaba yagambire abazire b’Abisirayeli ngu begese abana babo ebiragiro byeye baba bari kugenda “omu muhanda.” (Bir 11:9) Emihanda ya kare y’omuri Isirayeli ekaba neraba omu byaro. Bakaba nibabasa kureba enyamishwa, enyonyi n’ebimuri ebitari bimwe.  Obwe rero obwire obu abazire b’Abisirayeli babire nibagenda omu muhanda n’abana babo, bakaba nibabona obwire burungi bw’okubegesa ebiri kukwata ahari Yehova. Imwe bazire mwe, oku kiri kurebeka n’imwe mwine oburyo bw’okwegesa abana banyu ebiri kukwata aha byahangirwe. Reka turebe oku abazire bamwe bakikozire.

9. Ni enki eki ori kubasa kwegera ahari Punitha na Katya?

⁹ Omuzire ori kwetwa Punitha otwire omu tawuni mpango y’omuri Indiya, akagamba ati: “Ku turi kuza kushura abanyabuzare bitu omu caro, obwo bwire nitubureba nk’omugisha g’okwegesa abana bitu ebiri kukwata aha byahangirwe bya Yehova. Nimanya ku abana bange bari kushoborocerwa ge ebyahangirwe baba batari omu kavuyo k’etawuni.” Imwe bazire mwe, abana banyu tibarije kwebwa ebintu ebi mwabegesa muri ahantu haturize. Omunyanyazi w’omuri Moludova ori kwetwa Katya, akagamba ati: “Ebintu birungi ebi ncayijuka ni ebi narebire ndi n’abazire bange turi omu caro. Ninyesima ahakuba banyegesize ncari omwana kwemereramu, nketegereza eki ebyahangirwe biri kunyegesa ahari Yehova.”

10. Ni enki eki abazire abatwire omu tawuni bari kubasa kukora caba kiri kubagumira kuza omu caro? (Reba akashanduku akari kugira ngu “ Obuyambi bw’abazire.”)

¹⁰ Mbwenu shi okakora ki yaba kitari kukubasikira kuza omu caro? Amol, otwire omuri Indiya akagamba ati: “Omu kacweka aku ntwiremu abazire nibakora n’amani mingi, kandi orugendo ry’okuza omu caro nirusera munonga. Konka okusitama omu busitani n’ah’iguru y’enju nihabasa kuba omwanya murungi g’okwetegereza ebyahangirwe kandi bitukwasa kwega emicwe ya Yehova.” Wayetegereza oyetonzire, noyija kujumbura ebyahangirwe hihi y’eka yawe ebi ori kubasa kwereka abana bawe. (Zab 104:24) Nobasa kubona enyonyi, ebihingwa, n’ebindi. Karina, otwire omuri Jamani, nagira ngu: “Mama nakunda ebimuri;  obwe rero obu nabire ncari muto, tukaba nitugenda hamwe n’amaguru rero anyereka ebimuri birungi ebitari bimwe.” Imwe bazire mwe, nambwenu nimubasa n’okukoresa vidiyo nyingi n’ebitabo ebiri kugamba aha byahangirwe ebi ekitongore kitu cakozire eby’okwegesa abana banyu. Obwe rero, embera zona ezi wakuba orimu, nobasa kukwasa abana bawe kwetegereza ebi Ruhanga yahangire. Reka tushwijume emicwe emwe ya Yehova eyi ori kubasa kwegesa abana bawe.

11. Ni bata oku abazire bari kubasa kukwasa abana babo kwerebera rukundo ya Yehova?

¹¹ Kugira ngu okwase abana bawe kwerebera ku Yehova ayine rukundo, oshemerire kubereka oku enyamishwa nyingi ziri kufa aha byana byazo. (Mat 23:37) Nambwenu, nobasa kubagambira ebintu ebyahangirwe ebitari bimwe ebi Ruhanga yahangire ebiri kutushemeza. Karina, owu tugambireho, akagira ati: “Obu nyowe na mama twabire nitutambura hamwe, akaba nangambira ngu nyemereremu nyetegereze oku buri kimuri kiri kirungi n’oku kiri kwereka rukundo ya Yehova. Na hati n’obu hahwire emyaka myingi, ncayetegereza ebimuri oku bikozirwe n’amabara gabyo. Nibinyegesa oku Yehova ari kutukunda munonga.”

12. Ni bata oku abazire bari kubasa kukwasa abana babo kwetegereza obwenge bwa Ruhanga? (Zaburi ya 139:14) (Nambwenu reba ekishushani.)

¹² Kwasa abana bawe kwetegereza obwenge bwa Ruhanga. Yehova ni omunyabwenge ori kutukira. (Rom 11:33) Ecokureberaho: Nobasa kugambira abana bawe oku amizi agari kurugamu enjura gari kwetorora omu mwanya. (Yob 38:36, 37) Nambwenu, nobasa kubagambira oku omubiri g’omuntu gwahangirwe omu buryo oburi kutangaza. (Shoma omuri Zaburi ya 139:14.) Yetegereze oku omuzire ori kwetwa Vladimir yakikozire. Akagamba ati: “Izoba rimwe, mutabani wange aketera ahaasi n’egari yahutara. Bwanyima y’ebiro bice, ekisebe kikakira. Nyowe n’omukazi wange, tukamushobororera ku Yehova yahangire omubiri omu buryo oburi kutuma gwagaruka kweyombeka. Tukamushobororera ku omu bintu ebi abantu bari kukora, hatariho ekintu na kimwe ekiri kubasa kweyombeka. Ecokureberaho: Emotoka yakora butandu teri kwekanika. Ebi twagambire mutabani witu bikatuma yashoborocerwa ku Yehova ayine obwenge.”

13. Ni bata oku abazire bari kubasa kukwasa abana babo kwetegereza obwenge bwa Yehova? (Isaya 40:26)

 ¹³ Yehova natugambira ngu twimusye amisho turebe oku amani geye gari kutuma iguru n’ensi byagumizamu kubaho. (Shoma omuri Isaya 40:26.) Nobasa kushaba abana bawe ngu bagume barebe ah’iguru kandi batecereze aha micwe ya Yehova. Reba eki munyanyazi ori kwetwa Tingting w’omuri Tayiwani acayijuka obu yabire acari omwana. Akagamba ati: “Izoba rimwe, mama akantwara twaza kurara aheru omu ihema, rero ku bwayizire twareba enyonyozi ah’iguru kandi hakaba hatariho amatara g’okututeganisa. Omuri obwo bwire nkaba ndi kutina ab’orwingano rwange, kandi nkaba ndi kwebuza yaba ndije kugumizamu kukorera Yehova omu bwesigwa. Mama akanshaba kutecereza aha ku Yehova yakoresize ago mani omu kuhanga enyonyozi zona kandi n’okwijuka ku ari kukoresa ago mani omu kutukwasa kwehanganira ebizibu. Ku twarugire kwetegereza ebyo byahangirwe, kikatuma nayenda kumanya ge Yehova kandi namaririra kumukorera.”

14. Ni bata oku abazire bari kubasa kukoresa ebyahangirwe kugira ngu bakwase abana babo kureba ku Yehova ari Ruhanga ori kushemererwa?

¹⁴ Ebi Yehova yahangire nibyereka ku ari Ruhanga ori kushemererwa kandi bitwereka oku ari kwehurira. Abanyabwenge omu bya sayansi bakagamba ku enyamishwa nyingi ziri kukunda kuzana, harimu enyonyi n’ebyenyanja. (Yob 40:20) Mbehi tokahuriraga abana bawe bari kusheka bamara kureba enyamishwa ziri kuzana? Nibabasa kusheka bareba akana k’epusi kari kwiruka aha mupira ninga shi obwana bw’embwa buri kuzana. Mbwenu shi ku orashube kureba abana bawe bari kushecerera enyamishwa, tori kubasa kubagambira ku turi kukorera Ruhanga ori kushemererwa?​—1 Tim 1:11.

15. Ni enki ekiri kubasa kukwasa abazire kumanya ebiri aha mutima gw’abana babo? (Emigani 20:5) (Nambwenu reba ekishushani.)

¹⁵ Hine obu kiri kugumira abana kugambira abazire babo ebizibu ebi bari kubugana. Yaba ari ko kiri, noba oshemerire kutaho amani kugira  ngu omanye ebi abana bawe bari kutecereza. (Shoma omu Migani 20:5.) Abazire bamwe nibakikora baba bari hamwe n’abana babo bari kushemerererwa ebyahangirwe. Ahabw’enki? Enshonga emwe ni oku hari kuba hatariho eby’okuhuza abana n’abazire. Omuzire w’omuri Tayiwani ori kwetwa Masahiko akagamba endijo nshonga ari kugira ati: “Twaza kurambura turi n’abana bitu, tukaza kutemba omushozi ninga kutamburira aha mizi, nibahurira baturize. Obwe rero ni bwo kiri kutworobera kubabuza ebibari aha mutima kandi nibabitugambira.” Katya, owu tugambireho akagira ati: “Ku nabire ninduga ah’ishomero, mama akaba nantwara omu busitani burungi. Ku twabire nituhika aho hantu ahaturize, kikaba nikinyorobera kumugambira ebi narabamu ah’ishomero ninga shi ebiri kunyemereza omutima.”

16. Ni bata oku ab’omu maka bari kubasa kuhumura kandi bakesima baba bari kushemerererwa hamwe ebyahangirwe bya Yehova?

¹⁶ Nambwenu ebyahangirwe bya Yehova nibituma ab’omu ka baruhuka kandi bibashemeza, kituma bakizaho kukundana. Bibuli negamba ku hariho ‘obwire bw’okusheka n’obwire bw’okuzina.’ (Mub 3:1, 4) Yehova akahanga emyanya mirungi omu nsi eyi turi kubasa kukoreramu ebintu ebi turi kukunda. Ab’omu maka bingi nibakunda kuba hamwe omu mahamba, omu byaro, omu mishozi, ninga shi baza kuhumurira aha mizi. Abana bamwe nibakunda kwiruka kandi bazanira omu busitani, betegereza enyamishwa, bibira omu mizi, omu migera, n’omu nyanja. Mazima, twine oburyo bwingi kandi burungi bw’okweshemeza twetorwirwe n’ebi Yehova yahangire!

17. Ahabw’enki abazire bashemerire kukwasa abana babo kushemerererwa ebyahangirwe bya Ruhanga?

¹⁷ Omu nsi ensya ya Ruhanga, abazire n’abana babo nibija kushemerererwa ebi Yehova yahangire okukira kare hona. Obwo bwire, titurije kutina enyamishwa ninga shi ngu na zo zitutine. (Isa 11:6-9) Nitwija kushemerererwa ebi Yehova yahangire ebiro byona. (Zab 22:26) Konka, imwe bazire mwe, mutategereza obwo bwire ngu mube ari bwo mwakwasa abana banyu kushemerererwa ebyahangirwe. Ku murakorese ebyahangirwe omu kwegesa abana banyu ebiri kukwata ahari Yehova, nibija kwikirizana n’ebigambo ebi omugabe Dawudi yagambire, ari kugira ati: ‘Ayi Yehova, omu biri kukorwa byona tiharimu ebiri nk’ebyawe.’​—Zab 86:8.