1. Ni kiha kintu kiri kushemeza abantu bingi ku bari kwija omu nterane zitu? (Nambwenu reba ekishushani.)

 TECEREZA aha mushija n’omukazi abija omu nterane z’Abahamya ba Yehova aha murundi g’okubanza. Batangara munonga ahabw’oku babakira n’ekihika kandi bakabereka rukundo. Ku baruga omu nterane bari kugaruka omu ka, omukazi yagambira omushija weye ati: ‘Mazima, Abahamya ba Yehova ni ab’omutano.’

2. Ahabw’enki abantu bamwe batire ensibo?

² Rukundo eyi Abahamya ba Yehova bari kwereka ni ey’omutano. Konka nambwenu, Abahamya ba Yehova na bo tibahikirire. (1 Yoh 1:8) Obwe rero oku turi kukizaho kumanya ab’omu kibina, ni ko turi kubasa n’okubarebamu enshobe. (Rom 3:23) Ekiri kushasha, ni oku bamwe bayikirize ngu okutahikirira kw’abandi kubateze ensibo.

3. Ni kiha kimanyiso ekiri kwereka abakurasi ba Yesu ab’amazima? (Yohana 13:34, 35)

³ Nambwenu shuba orebe aha cahandikirwe kikuru c’eki kicweka. (Shoma omuri Yohana 13:34, 35.) Ni kiha kimanyiso ekiri kwereka abakurasi ba Kristo ab’amazima? Ni rukundo, ti okutahikirira. Nambwenu, yijuka ku Yesu ataragambire ngu: ‘Ni bwo murimanya ku muri abegi bange.’ Akagamba ati: ‘Ni bwo abantu bona barimanya ku muri abegi bange.’ Obwe rero Yesu akereka ku abakurasi beye atari bo bonka ababire barije kumanya ku bari abakurasi beye ab’amazima ahabwa rukundo eyi bari kwerekana, ahobwe n’ab’aheru y’ekibina ku babire barije kubyerebera.

4. Ahabw’enki rukundo ari co kimanyiso ecabirie kirije kwereka Abakristo ab’amazima?

 ⁴ Abantu bamwe abatari Abahamya ba Yehova nibabasa kwebuza ngu: ‘Ni bata oku rukundo kiri ekimanyiso ekiri kwereka abakurasi ba Yesu ab’amazima? Ni bata oku Yesu yayerekire rukundo entumwa zeye? Kandi shi ni bata oku turi kubasa kutoreza ecokureberaho ca Yesu omuri obu bwire?’ Abahamya na bo nibagasirwa ku bari kutecereza ahari ebyo by’okugarukamu by’ebyo bibuzo. Eco ku bari kukikora nikibakwasa kukizaho kwereka rukundo, namunonga abandi baba bari kubakorera enshobe.​—Efe 5:2.

5. Shoborora ebigambo bya Yesu ebiri omuri Yohana 15:12, 13.

⁵ Yesu akashoborora ge ku rukundo ey’omutano ari yo eyabire erayereke abakurasi beye. (Shoma omuri Yohana 15:12, 13.) Mbehi wareba ku Yesu yabaragire? Akagira ati: ‘Mukundane nk’oku nabakunzire.’ Eco nikimanyisa ki? Nk’oku Yesu yagenzire ari kubishoborora, eyo ni rukundo etarimu okwekunda, kandi ni yo eri kutuma Abakristo bafera bagenzi babo caba kiri kwetengesa. b

6. Ni bata oku Ekigambo ca Ruhanga kiri kwereka omugasho g’okwereka rukundo?

⁶ Ekigambo ca Ruhanga nikigamba munonga ahari rukundo. Omu nyiriri ezi abantu bingi bari kukunda munonga harimu nk’eziri kugira ngu: ‘Ruhanga ni rukundo.’ (1 Yoh 4:8) ‘Kunda mutahi wawe nk’oku oyekunda.’ (Mat 22:39) ‘Rukundo neshweka ebibi byingi.’ (1 Pet 4:8) ‘Rukundo tehwaho ebiro byona.’ (1 Kor 13:8) Ezo nyiriri hamwe n’ezindi nizereka buri omwe omugasho g’okwemanyiza kugira ogo mucwe murungi gwa rukundo n’okugwereka.

7. Ahabw’enki Sitane atari kubasa kubuganisiza abantu hamwe kandi ngu berekane rukundo eya buzima?

 ⁷ Abantu bingi nibebuza ngu: ‘Tukamanya tuta edini ey’amazima? Amadini gona nigagamba ku nigegesa amazima, konka ebi gari kwegesa ahari Ruhanga nibitana.’ Sitane akahabisa abantu ari kutuma habaho ebitongore byingi by’amadini, konka ebiri kwerondera amagoba. Konka, we tari kubasa kuretaho omuryango gwa benetata omu nsi yona abari kukundana. Yehova wenka ni we ori kukibasa. Eco nikihurirwa ahakuba rukundo eya buzima neruga ahari Yehova, kandi omwika gweye n’emigisha eyi ari kutuha, ni byo biri kutuma abari kumuramya bakundana. (1 Yoh 4:7) Obwe rero, tikiri kututangaza kuba Yesu yagambire ku rukundo etarimu okwekunda ari yo eyabire erije kuranga abakurasi beye ab’amazima?

8-9. Ni bata oku abantu bingi bayehurire ku barebire rukundo ey’Abahamya ba Yehova bari kwerekana?

⁸ Nk’oku Yesu yakigambire, abantu bingi bakamanya abakurasi beye ab’amazima birabire ahari rukundo eyi bari kwerekana. Ecokureberaho: Mwenetata ori kwetwa Ian nayijuka obu yagire omu kiterane ekihango aha murundi g’okubanza, ecaberire omu kibuga c’emizano hihi y’eka yabo. Hakaba hahwire amezi mace Ian agire omuri eco kibuga, konka ari omu by’emizano. Akagira ati: “Eco kiterane co kikaba nikitana n’ebi nabire narebire. Abahamya bakaba bari kutwaza ge kandi bajwire ge, nangwa n’abana babo bine emitwarize mirungi.” Akongeraho ati: “Ekiri kukira byona, abantu bakaba bine obusinge n’okumarwa, kandi ebyo ni byo ebi nabire ndi kwenda. Tihine toku n’emwe eyi ndi kwijuka, konka emitwarize y’Abahamya ekankora aha mutima.” c Nikihuririnkana ku ekiri kutuma twagira emitwarize mirungi ari rukundo eyi turi kwerekana. Ahabw’okuba turi kukunda benetata na banyanyazi, nitubatwariza ge kandi tubaha ekitinisa.

⁹ Mwenetata ori kwetwa John na we akagira enyehurira nk’ezo obu yagire omu nterane aha murundi g’okubanza. Akagamba ati: “Nkatangara ku narebire bona bari kukundana; mbehi noreba bari abantu abahikirire. d Rukundo eya buzima eyi bari kwerekana ekampamiza ku nabona edini ey’amazima.” Hariho n’abandi bantu bingi abayerebire ku abahereza ba Yehova ari bo Abakristo ab’amazima.

10. Ni ryari obu turi kuba twine omugisha g’okwereka rukundo y’Abakristo? (Nambwenu reba obugambo bw’ahaasi.)

¹⁰ Nk’oku twabireba turi kutandika, tihariho Omuhamya n’omwe ohikirire. Hine obu bari kubasa kugamba ebintu ninga shi bakora ebintu bitugwisa kubi. e (Yak 3:2) Eco cabaho, nituba twatunga omugisha g’okwereka rukundo ey’Abakristo omu ku turayetware. Mbwenu shi omuri ezo mbera, ni enki eki turi kubasa kwegera aha cokureberaho ca Yesu?​—Yoh 13:15.

11. Ni eha micwe mibi eyi Yakobo na Yohana bayerekire? (Nambwenu reba ekishushani.)

¹¹ Yesu akaba atari kwetega okuhikirira aha bakurasi beye. Akabakwasa kugira emicwe mirungi eyi Yehova ari kusima, konka yabikora omu muringo gwa rukundo. Izoba rimwe, entumwa zeye, ari zo Yakobo na Yohana, bakagambira nyina ngu abashabire ahari Yesu  ngu ayije kubaha omwanya gw’ekitinisa omu Bukama. (Mat 20:20, 21) Yakobo na Yohana bakereka omucwe g’okwetungura n’okwenda kukira abandi.​—Emi 16:18.

12. Mbehi Yakobo na Yohana ni bo bonka abayerekire emicwe mibi? Shoborora.

¹² Yakobo na Yohana ti bo bonka abayerekire emicwe mibi omuri obwo bwire. Yijuka oku n’ezindi ntumwa zatwarize. Bibuli negira ngu: ‘Abandi ikumi ku babihurire, bayitirwa ekiniga abo benenyina bombi.’ (Mat 20:24) Obwe rero nitubasa kwehuriza oku Yakobo, Yonana n’ezindi ntumwa batongine. Ezindi ntumwa nizibasa kuba zagambire ngu: ‘Imwe nimutecereza ngu muri baha, kuhika n’aha kushaba emyanya mirungi omu Bukama? Nimutecereza ngu ni imwe mwenka abakozire n’amani omurimo gwa Yesu. N’itwe tushemerire kutunga emyanya y’omutano!’ Oku byakuba byagenzire kona, ezo ntumwa zikikiriza ngu ezo mbera zishishe rukundo yabo, n’obu bitaramazire obwire buringwa.

13. Ni bata oku Yesu yatwarize aha bikwatirine n’enshobe z’entumwa zeye? (Matayo 20:25-28)

¹³ Ni bata oku Yesu yatwarize omuri eco kibuzo? Tarabagirire ekiniga. Taragambire ku yaza kuronda ezindi ntumwa ezabire ziri kwecureza kandi ezabire zirije kuguma ziri kwereka rukundo. Ahobwe, Yesu akehanganira abo bashija b’abesigwa yabakwasa kutecereza ge. (Shoma omuri Matayo 20:25-28.) Akagumizamu kwehanganira ezo ntumwa  kandi yagumizamu kuzereka rukundo, n’obu atari bwo bw’okubanza obu zagerizeho kwenda kumanya owabire ari mukuru omuri zo.​—Mar 9:34; Luk 22:24.

14. Ni ziha mbera ezi entumwa za Yesu zakuriremu?

¹⁴ Hatariho okubanganisa, Yesu akaba nayijuka embera ezi entumwa zakuriremu. (Yoh 2:24, 25) Bakaba bakurire omu tucweka ahu abebembezi b’amadini babire nibafa aha kitinisa n’emyanya mikuru. (Mat 23:6; geranisa na vidiyo eri omuri Bibuli y’okweyegeserezamu eri kushoborora ebiri omuri Matayo 23:6, eri kugira ngu Emyanya mikuru omuri Sinagogi.) Nambwenu abebembezi b’edini b’Abayudaya bakaba nibereba nk’abahikirire. f (Luk 18:9-12) Yesu akaba namanya ku ezo mbera zabire ziri kubasa kuhindura oku entumwa zeye zabire ziri kwereba n’oku zabire ziri kureba abandi. (Emi 19:11) Akaba atari kwetega okuhikirira aha begi beye kandi akaba nabehanganira ku babire nibashobya. Akaba namanya ku bine emitima mirungi; obwe rero akaba nabehanganira kandi abakwasa kweyihamu okwetungura n’okwereba nk’abagumire, rero babisimbuza rukundo.

15. Ni enki eki turi kwegera aha byabire ahari Yakobo na Yohana?

¹⁵ Nitubasa kwegera aha byabire ahari Yakobo na Yohana. Obu bashabire emyanya y’ekitinisa omu Bukama bakaba bagwire. Konka n’ezindi ntumwa na zo zikaba zigwire ahakuba zikikiriza ngu ezo mbera zishishe obumwe bwabo. Konka Yesu akatwariza ge azo ntumwa 12 zona kandi yazereka rukundo. Ebyo nibitwegesa ki? Eki tushemerire kufaho ti ebi abandi bari kutukorera kusha, ahobwe tushemerire n’okufa aha ku turatwaze n’engaruka ezirarugemu. Mbwenu shi ni enki ekiri kubasa kutukwasa? Twagira ekiniga ahabw’Omukristo mugenzi witu, nitubasa kwebuza ngu: ‘Ahabw’enki eki yankorera canshasha munonga? Mbehi ti inye oyine omucwe mubi ogu nshemerire kukoraho? Mbehi tari kubasa kuba yantwariza kubi ahabw’okuba ari kuraba omu mbera zigumire? Mbehi n’obu naba nyine enshonga z’okugubwa kubi tindi kubasa kwereka rukundo etarimu okwekunda nkabyehuzya?’ Oku turi kukizaho kutwariza ge abandi kandi tukabereka rukundo, ni ko turi kukizaho kwereka abandi ku turi abakurasi ba Yesu ab’amazima.

16. Ni enki ekindi eki turi kubasa kwegera aha cokureberaho ca Yesu?

¹⁶ Nambwenu ecokureberaho ca Yesu nikitwegesa ku tushemerire kugezaho kwehuriza embera z’Abakristo bagenzi bitu. (Emi 20:5) Yesu we akaba nabasa kureba ebiri omu mutima. Konka itwe, eco tituri kubasa kukikora. N’obu tutari kukibasa, nitubasa kwehanganira okutahikirira kwa benetata na banyanyazi. (Efe 4:1, 2; 1 Pet 3:8) Eco nikitworobera twabanza kumanya embera ezi bakuriremu. Reka turebe ecokureberaho.

17. Ni bata oku omureberezi ori kutayayira ebibina yagasirwe n’okumanya ge mwenetata?

¹⁷ Omureberezi omwe ori kutayayira ebibina by’omuri Afurika y’omu Burugwizoba, nayijuka mwenetata owu yabire ari kutecereza ku ari kutwaza kubi. Konka shi ni bata oku ogo mureberezi yatwarize? Akagamba ati: “Omu mwanya g’okwehuzya ogo mwenetata, nkagezaho kumumanya ge.” Ogo mureberezi ori  kutayayira ebibina ku yakikozire basyoya, akamanya ku ogo mwenetata yakurire omu mbera ezatumire yatwaza nka basyoya. Ogo mureberezi akongeraho ati: “Ku namazire kumanya oku ogo mwenetata yatireho amani kugira ngu arwanise embera ezi yakuriremu, nkamusima. Bwanyima tukaba abanywani.” Ku turagezeho kumanya benetata na banyanyazi, nikija kutworobera kubereka rukundo.

18. Ni biha bibuzo ebi tushemerire kwebuza haba hine Omukristo mugenzi witu otushobize? (Emigani 26:20)

¹⁸ Obumwe hine obu turi kuba tushemerire kuganira n’Omukristo mugenzi witu ori kuba otushobize. Konka tushemerire kubanza twayebuza ebi bibuzo: ‘Mbehi nyine ebihamya byona?’ (Emi 18:13) ‘Mbehi yakikora atakigenderire?’ (Mub 7:20) ‘Mbehi nyowe tinkakoragaho enshobe nk’eyo?’ (Mub 7:21, 22) ‘Mbehi ku ndagambire ogo muntu eco kizibu, nikituma naretaho obusinge ninga ebintu nibikizaho kuba bibi?’ (Shoma omu Migani 26:20.) Ku turakwate obwire tukebuza ebyo bibuzo, nitubasa kureba ku rukundo eyi turi kukunda benetata eshemerire kutuma twayehuzya enshobe zabo.

19. Ni enki eki wamaririra kukora?

¹⁹ Hatariho okubanganisa, Abahamya ba Yehova bona bakwatire hamwe, ni bo abari kwereka ku bari abegi ba Yesu ab’amazima. Nambwenu buri omwe omuri itwe nayereka ku ari omukurasi wa Yesu ow’amazima yayereka benetata na banyanyazi rukundo etarimu okwekunda, n’obu bakuba bari kumushobeza. Eco nikija kutuma abandi bayerebera ku turi omu dini ey’amazima, kandi na bo nibija kwija kwekwatanisa n’itwe omu kuramya Yehova, Ruhanga wa rukundo. Nimureke tugumizemu kwerekana rukundo, ari yo kamanyiso k’Abakristo ab’amazima.