1. Ni eha migisha eyi turi kutunga ahabw’okuba turi omu kitongore ca Yehova?

 MAZIMA twine omugisha ahabw’okuba turi omu kitongore ca Yehova omuri obu bwire bugumire bw’aha muheru. Oku embera ziri kweyongera kuba mbi omu nsi, Yehova akatuha benetata na banyanyazi b’omu by’omwika b’okutukwasa. (Zab 133:1) Natukwasa kugira amaka agarimu okushemererwa. (Efe 5:33–6:1) Nambwenu natuha obwenge oburi kutukwasa kwehanganira ebizibu ebi turi kubugana kandi tukatunga obusinge bw’omu mutima.

2. Ni enki eki tushemerire kukora, kandi shi ahabw’enki?

² Obwe rero tushemerire kukora n’amani kugira ngu tugumizemu kuhereza Yehova omu bwesigwa. Ahabw’enki? Ni ahabw’okuba obumwe nitubasa kwehurira kubi ahabw’okutahikirira kw’abandi. Nambwenu nitubasa kwehurira kubi ahabw’enshobe ezi turi kukora emirundi myingi. Tushemerire kwehangana omu murimo gwa Yehova (1) twatwarizibwa kubi n’Abakristo bagenzi bitu, (2) twatwarizibwa kubi n’abu twatasine, kandi (3) twayehurira kubi ahabw’enshobe zitu. Omuri eki kicweka, twaza kureba buri emwe omuri ezo mbera. Nambwenu twaza kureba oku turi kubasa kwegera aha muntu w’omwesigwa ori kugambwa omuri Bibuli owahikirweho na zimwe omuri ezo mbera.

GUMIZAMU KWEHANGANA HAGIRA OMUKRISTO MUGENZI WAWE OWAKUTWARIZA KUBI

3. Ni biha bizibu ebi abahereza ba Yehova bari kubugana?

³ Ekizibu. Bamwe omu Bakristo bagenzi bitu bine emicwe eri kubasa kutugwisa kubi. Abandi bo nibabasa kutuhemukira ninga batukorera ebintu ebitari kwereka rukundo. N’abari kutwebembera nibabasa kukora enshobe. Embera nk’ezo nizibasa  kutuma abamwe babanganisa aha kitongore ca Ruhanga. Omu mwanya g’okugumizamu kuhereza Ruhanga ‘bakwatanisize’ n’abo benetata na banyanyazi, nibemereza kwekwatanisa n’abo ababatwarize kubi ninga shi bemereza kwija omu nterane. (Zef 3:9) Mbehi eco kihikire? Reba eki turi kubasa kwegera aha cokureberaho c’omuntu ori kugambwa omuri Bibuli owarabire omu mbera nk’ezo.

4. Ni biha bizibu ebi entumwa Pawulo yabugine?

⁴ Ecokureberaho c’omuri Bibuli. Entumwa Pawulo akaba namanya ku benetata na banyanyazi b’Abakristo babire batahikirire. Ecokureberaho: Pawulo ku yatandikire kwekwatanisa n’Abakristo b’omu kibina c’omuri Yerusalemu, abamwe bakaba nibamutina. (Byak 9:26) Bwanyima, abantu abamwe bakaba nibamugambaho ebishuba kugira ngu abandi bareke kumwesiga. (2 Kor 10:10) Pawulo akareba omuzehe ari kukora ensharamu mbi eyaterize abandi ensibo. (Gal 2:11, 12) Kandi Mariko owabire nakwatanisa na Pawulo, akamugwisa kubi munonga. (Byak 15:37, 38) Pawulo akaba ari kubasa kwikiriza ngu zimwe omuri ezo mbera zitume atagumizamu kwekwatanisa n’abamutwarize kubi. Konka, akagumizamu kureba ebirungi omuri benetata na banyanyazi kandi yagumizamu kukorera Yehova omu bwesigwa. Ni enki ecakwasize Pawulo kwehangana?

5. Ni enki ecakwasize Pawulo kutacweka entege akaguma nakunda benetata na banyanyazi? (Abakolosayi 3:13, 14) (Nambwenu reba ekishushani.)

⁵ Pawulo akaba nakunda benetata na banyanyazi. Rukundo eyi yabire nakunda abandi ekamukwasa kwerinda kufa aha nshobe zabo, ahobwe yafa aha mitwarize yabo mirungi. Nambwenu rukundo ni yo eyakwasize Pawulo kukora ebi yahandikire ebiri omu Bakolosayi 3:13, 14. (Hashome.) Reba oku Pawulo yatwarize Mariko. N’obu Mariko yasigire Pawulo omu rugendo rweye rw’okubanza rw’obumishonari, Pawulo taramunyigire. Bwanyima, Pawulo ku yahandikire ebaruha ab’omu kibina c’omuri Kolosayi akasima Mariko ku ari omukozi mugenzi weye ‘owamuhumurize.’ (Kol 4:10, 11) Obu Pawulo yabire asibirwe omuri Roma akashaba Mariko ngu ayije kumukwasa. (2 Tim 4:11) Oku kiri kurebeka, Pawulo akagumizamu kukunda benishe. Ni enki eki turi kubasa kwegera ahari Pawulo?

6-7. Ni bata oku turi kubasa kugumizamu kwereka rukundo benetata na banyanyazi n’obu batahikirire? (1 Yoh 4:7)

⁶ Eki biri kutwegesa. Yehova nayenda ngu twehangane twaba turi kwereka rukundo benetata na banyanyazi. (Shoma omuri 1 Yohana 4:7.) Benetata na banyanyazi batutwariza kubi, tushemerire kwesiga ku baba batari kwenda kutushasha, ahobwe ku baba bari kwenda kukora  ekihikire bikatuma bahubuka. (Emi 12:18) Ruhanga nakunda abahereza beye b’abesigwa n’obu bakuba bari kukora enshobe. Ku turi kukora enshobe, tari kutusigaho kandi tari kuguma atwinire ekiniga. (Zab 103:9) Mazima ni ec’omugasho munonga kutoreza Tata witu ori kusaasira!—Efe 4:32–5:1.

⁷ Guma oyijuke ku oku turi kukizaho kuhika hihi n’emperu ari ko oku tushemerire kuhika hihi ya benetata na banyanyazi. Nitumanya ku turije kukizaho kuhiganisibwa. Nitubasa n’okusibwa ahabw’okwikiriza kwitu. Ebyo ku biri tuhikaho nitwija kuba turi kwetenga benetata na banyanyazi kukira kare hona. (Emi 17:17) Reba ebyahikire aha muzehe w’omuri Supeyini ori kwetwa Josep. a We n’abandi benetata bakasibwa ahabw’okwanga kugwera orubaju. Akagamba ati: “Okugwisibwa kubi n’Abakristo bagenzi bitu abu twabire tusibirwe hamwe kikaba kiri ekintu ekiri kubasa kubaho burijo ahabw’okuba tihine ebi twabire turi kusherekana. Obwe rero tukaba nitukwatanisa kandi tusaasirana tubyihire aha mutima. Eco kikatuma twaguma twine obumwe kandi tuhurira twine oburinzi. Tukaba twetorwirwe n’abasibe ababire batari kuhereza Yehova. Izoba rimwe nkahendeka omukono bantaho bande kandi tihine ekintu na kimwe eki nabire ndi kubasa kwekorera. Konka omwe omuri benetata akanfaho, yameshera ebijwaro kandi yakora n’ebiri kukira ahari ebyo. Nkerebera rukundo eya buzima omu bwire obu nabire ndikuyetenga.” Mazima ni ec’omugasho kutereza ebizibu ebitwinine na benetata omuri obu bwire!

GUMA OYEHANGANE OWU MWATASINE YAKUTWARIZA KUBI

8. Ni biha bizibu ebi abatasine bari kubasa kubugana nabyo?

⁸ Ekizibu. Abatasine bona nibahikwaho n’ebizibu. Bibuli negamba ku abatasine ‘barigira obusaasi omu mubiri.’ (1 Kor 7:28) Ahabw’enki? Ahabw’okuba obushwere nibubuganisa abantu babiri abatahikirire, abine emitwarize etari kushushana, kandi bine ebi bari kukunda n’ebi bari kwanga bitari kushushana. Obumwe noshanga bakurire n’omu micwe etari kushushana n’ahantu ahatari kushushana. Bwanyima y’obwire nibabasa n’okwereka emitwarize eyi babire batakerekaga batakatasine. Emwe omuri eyo mitwarize nebasa kuretera eka ebizibu. Omu mwanya gwa buri omwe kushwijuma ngu arebe yaba ari we oresire ebyo bizibu n’oku arabitereze, hine obu ari kushinja mugenzi weye. Nibabasa kureba okwangana ninga okutana ari go mubazi gw’ebizibu byabo. Konka shi okutana ni go mubazi? b Reka turebe eki turi kubasa kwegera aha cokureberaho c’omuntu ori kugambwa omuri Bibuli owayehanganire ebizibu bigumire munonga by’omu ka yeye.

9. Ni biha bizibu ebi Abigayili yabugine?

⁹ Ecokureberaho c’omuri Bibuli. Abigayili akaba yatasine n’omushija ori kwetwa Nabali owu Bibuli eri kugamba ku yabire ari omunyamwaga kandi ayine emicwe mibi. (1 Sam 25:3) Nikibasa kuba cabire kigumire Abigayili kubana n’ogo mushija. Mbehi Abigayili akaba arije kureba ebyo bizibu nka rwekwaso y’okutana n’omushija weye? Mbehi Abigayili hine obu yatungire oburyo bw’okushenya amaka geye? Yego, akatunga obwo buryo obu Dawudi owabire arije kuba omugabe wa Isirayeli yayijire kwita omushija weye ahabw’okutwariza kubi Dawudi n’abashija beye. (1 Sam 25:9-13) Abigayili akaba ari kubasa kuhunga kituma Dawudi yahika aha ntego yeye y’okwita Nabali.  Konka, akaganira na Dawudi yamushaba kureka kwita Nabali. (1 Sam 25:23-27) Ni enki ecatumire yakikora?

10. Ahabw’enki Abigayili yagumire kwehanganira ebizibu byona ebigumire by’omu ka yeye?

¹⁰ Abigayili akaba ari kukunda Yehova kandi ari kuha ekitinisa emisinge ya Yehova y’eby’obushwere. Hatariho okubanganisa akaba namanya eki Ruhanga yagambire Adamu obu yamuhire omukazi ari we Eva. (Kut 2:24) Abigayili akaba namanya ku Yehova ari kureba obushwere nk’ekintu ekiri kwera. Akaba ari kwenda kushemeza Ruhanga kandi eco ni co ecatumire yayenda kurokora ab’omu ka yeye harimu n’omushija weye. Akahika nagira eki yakora kugira ngu Dawudi atayita omushija weye Nabali. Nambwenu akaba ayetegwire kushaba embabazi z’ekibi eki yabire atakozire. Mazima Yehova akaba nakunda ogo mukazi owayerekire obumanzi kandi owabire atari kwekunda. Ni enki eki abashija n’abakazi bari kubasa kwegera aha cokureberaho ca Abigayili?

11. (a) Ni enki eki Yehova ari kushaba abatasine? (Abefeso 5:33) (b) Ni enki eki ori kubasa kwegera aha ku Carmen yatireho amani ngu arinde eka yeye? (Nambwenu reba ekishushani.)

¹¹ Eki biri kutwegesa. Yehova akaragira abatasine kuha ekitinisa entebekanisa y’eby’obushwere n’obu abu batasine na bo bakuba batari kwikirizingana. Mazima nikishemeza Ruhanga yareba abatasine bari kutaho amani ngu batereze ebizibu ebi bine kandi bari kwerekana rukundo etarimu okwekunda bari n’okuhana ekitinisa. (Shoma omu Befeso 5:33.) Tecereza aha cokureberaho ca Carmen. Ku hahwire emyaka mukaga Carmen atahire omu maka, akatandika kwega Bibuli n’Abahamya ba Yehova kandi bwanyima yabatizibwa. Carmen akagamba ati: “Omushija wange tarakunzire ensharamu eyi nakozire. Kukorera Yehova kikamushasha. Akaba nanjuma kandi antinatinisa ku arinsigaho.” N’obu byabire biri baso, Carmen akehangana. Akamara emyaka 50 ari kukora n’amani kugira ngu eka yeye egumizemu kwerekana rukundo n’okuhana ekitinisa. Bwanyima akagamba ati: “Oku emyaka yagenzire eri kuhwa, nkamanya ku nshemerire kuganira n’omushija wange omu muringo murungi kandi nkamuha ekitinisa. Ku namanyire ku Yehova ari kureba amaka nk’ekintu c’omuhendo, nkakora cona eki ndi kubasa kugira ngu gatasisikara. Obwe rero tindabasize kusiga omushija wange ahabw’okuba nkaba ninkunda Yehova.” c Wabugana ebizibu omu maka gawe oshemerire kwesiga ku Yehova arije kukukwasa kandi akakuha amani g’okwehangana.

 GUMA OYEHANGANE WACWEKA ENTEGE AHABW’ENSHOBE ZAWE

12. Ni biha bizibu ebi turi kubasa kubugana twakora enshobe z’amani?

¹² Ekizibu. Nitubasa kuhurira twacweka entege twakora ekibi c’amani. Bibuli negamba ku ebibi byitu biri kubasa ‘kutushasha omu mutima.’ (Zab 51:17) Mwenetata ori kwetwa Robert akakora n’amani kugira ngu ayijuze ebiri kushabwa ngu abe omuhereza w’ekibina. Konka, akakora ekibi c’amani yareba ku yahemukire Yehova. Akagamba ati: “Ku nakirizeho kutecereza aha kibi eki nakozire omuntuwomunda wange akakizaho kuntera. Eco kikatuma nayehurira kubi munonga. Bwanyima nkatuza kandi nashaba Yehova. Nkaba nintecereza ku Yehova yabire atarije kongera kumpurira ahabw’okuba nabire namuhemukire.” Ku turi kukora ekibi c’amani nitucweka entege tutandika kutecereza ku Yehova yatusigireho kandi ku hatine enshonga eshemerire kutuma twagumizamu kumuhereza. (Zab 38:4) Yaba ni iwe ori kwehurira basoya, nobasa kutecereza aha cokureberaho c’omuhereza wa Yehova w’omwesigwa ori kugambwa omuri Bibuli owayehangine akagumizamu kuhereza Yehova n’obu yabire yakozire ekibi.

13. Ni eha nshobe y’amani eyi Petero yakozire, kandi shi nibiha bindi bintu bibi ebi yakozire?

¹³ Ecokureberaho c’omuri Bibuli. Omu kiro ecabandirize okufa kwa Yesu, entumwa Petero akakora enshobe nyingi ezatumire yayehurira kubi omu kubaho kweye. Ecokubanza, Petero akabanza yayeyesiga yagamba ku ari gumizamu kuba omwesigwa n’obu ezindi ntumwa zona zabire zirasige Yesu. (Mar 14:27-29) Nambwenu obu babire bari omu musiri gwa Gesemani, Petero akaremwa kugumizamu kuba misho. (Mar 14:32, 37-41) Kandi ku bigire kukwata Yesu, Petero akahunga. (Mar 14:50) Bwanyima, Petero akehakana emirundi ishatu ku atari kumanya Yesu kandi yanarahira. (Mar 14:66-71) Mbwenu shi Petero akehurira ata ku yamanyire ngu yakora ekibi c’amani? Akinama yarira ahabw’obusasi bwingi obu yagizire. (Mar 14:72) Tecereza obusasi obu Petero yagizere bwanyima y’amashaha obu yamanyire ngu munywani weye Yesu yafa. Mazima Petero akagira obusasi bwingi!

14. Ni enki ecakwasize Petero kwehangana akagumizamu kuhereza Yehova? (Reba ekishushani c’aha kishembeso.)

¹⁴ Omuri ezo mbera zona Petero akagumizamu kuhereza Yehova ayehangine. Taretanisize n’ezindi ntumwa ahobwe akabahika kandi oku kiri kurebeka bakamuhumuriza. (Luk 24:33) Nambwenu Yesu ku yazokire akeyereka Petero, kandi nikibasika ku yamugarwiremu amani. (Luk 24:34; 1 Kor 15:5) Bwanyima, omu mwanya g’okumugambira kubi ahabw’enshobe  ezi Petero yakozire, Yesu akagumya munywani weye Petero ari kumugambira ku arije kumuha obujunanizibwa bwingi. (Yoh 21:15-17) N’obu Petero yabire ari kumanya ku yakozire ekibi c’amani konka taracwekire entege. Ahabw’enki? Ni ahabw’okuba akaba nayesiga ku Mukama weye Yesu acamukunda. Kandi n’ezindi ntumwa zikagumizamu kumukwasa. Ni enki eki turi kubasa kwegera aha cokureberaho ca Petero?

15. Ni enki eki Yehova ari kwenda ngu twesige tutari kubanganisa? (Zaburi 86:5; Abaroma 8:38, 39) (Nambwenu reba ekishushani.)

¹⁵ Eki biri kutwegesa. Yehova nayenda ngu tugumizemu kwesiga ku ari kutukunda kandi ku ari kutusaasira. (Shoma omuri Zaburi ya 86:5; Abaroma 8:38, 39.) Ku turi kukora enshobe nitwehurira kubi. Eco ni ekintu ekishangirwe. Obwe rero titushemerire kutecereza ku tutari kukundwa ninga ku tutari kubasa kusasirwa. Ahobwe tushemerire kuhika nitwikiriza obuyambi. Robert owu tubire tugambireho akagamba ati: “Nkakora ekibi ahabw’okwesiga ku nyowe ahabwange nabire ndikubasa kweyiha omu bigezo.” Akareba ku yabire ashemerire kuganira n’abazehe. Akagamba ati: “Ku naganirire n’abazehe kikanyereka ku nabire ncakundwa kandi nkamanya ku abazehe na bo babire bari kunkunda. Bakankwasa kwikiriza ku Yehova ataransigireho.” Ni itwe tushemerire kwesiga tutari kubanganiza ku Yehova ari kutukunda kandi ku ari kutusaasira twayehana, tukashaba obuyambi kandi tukamaririra kutashuba kukora enshobe ezi twakozire. (1 Yoh 1:8, 9) Twayesiga eco, nikija kuturinda kucweka entege ahabw’enshobe ezi twakora ninga twatera ensibo tukagwa.

16. Ahabw’enki tushemerire kumaririra kwehangana tukagumizamu kukorera Yehova?

¹⁶ Yehova nashemererwa ahabw’amani agu turi kutaho ngu tumuhereze omuri obu bwire bugumire bw’aha muheru. Yehova nagumizamu kutukwasa kugira ngu tugumizemu kumuhereza n’obu twakukora enshobe aha bwitu. Nitubasa kugumizamu kukunda benetata na banyanyazi kandi tubasaasira, n’obu bakututwariza kubi. Nitubasa kwereka ku nitukunda Ruhanga kandi ku nituha ekitinisa entebekanisa yeye turi kukora cona eki turi kubasa kugira ngu tutereze ebizibu byona ebi twine omu maka gitu. Kandi twakora ekibi tushemerire kwikiriza obuyambi bwa Yehova, twikiriza rukundo yeye n’embabazi kandi tugumizamu kumukorera. Tushemerire kwesiga ku Yehova arije kutuha emigisha twagumizamu kumukorera twaba ‘tutacwekire entege.’—Gal 6:9.