1. Ni ziha nyehurira ezi abamwe omu bahereza ba Yehova bari kubasa kugira?

 MAZIMA nikitushemeza kumanya ku Yehova ari kutwikiriza itwe abahereza beye twena! Bibuli negira ngu: ‘Yehova nashemerererwa abantu beye.’ (Zab 149:4) Konka obumwe na bumwe nitubasa kutandika kucweka entege, kituma twatandika kwebuza ngu: ‘Mbehi Yehova nanyikiriza nyowe aha bwange?’ Hariho abahereza ba Yehova b’abesigwa bingi abari kugambwa omuri Bibuli, abayeburize ekibuzo nk’eco.—1 Sam 1:6-10; Yob 29:2, 4; Zab 51:11.

2. Ni baha abu Yehova ari kwikiriza?

² Bibuli neyereka ge, ku n’obu abantu batahikirire, Yehova ari kubasa kubikiriza kandi abareba nk’abari kukora ebirungi. Bata shi? Tushemerire kwikiriza Yesu Kristo kandi tukabatizibwa. (Yoh 3:16) Eco twakikora nituba twayereka omu misho g’abantu bingi ku twayehanire ebibi byitu kandi ku twaraganisize Ruhanga kukora ebi ari kwenda. (Byak 2:38; 3:19) Yehova nashemererwa munonga twakora ebyo bintu kugira ngu tube banywani beye. Oku turi kukora cona eki turi kubasa kugira ngu tubeho tubuganisize n’endahiro yitu y’okweha Yehova, natwikiriza kandi tuba banywani beye.—Zab 25:14.

3. Ni enki eki twaza kushwijuma?

³ Konka shi, ahabw’enki abamwe bari kubasa kutecereza ku Ruhanga atari kubikiriza? Ni bata oku Yehova ari kutwereka ku ari kutwikiriza? Kandi shi ni bata oku Abakristo bari kubasa kwesiga batari kubanganisa ku Ruhanga ari kubikiriza?

ENSHONGA ABAMWE BARI KUBASA KUTECEREZA KU YEHOVA ATARI KUBIKIRIZA

4-5. N’obu twakuba turi kuhurira tutine mugasho, ni enki eki turi kubasa kwesiga?

⁴ Abingi omuri itwe kwiha tucari abana, tukakura turi kuhurira ku tutine mugasho. (Zab 88:15) Mwenetata ori kwetwa  Adrián akagamba ati: “Burijo nkaba ninkunda kuhurira ntine mugasho. Ninyijuka ku obu nabire ncari omwana, ny’owe n’ab’omu ka twabire turi kukunda kushaba ngu twije kutura omuri paradiso, konka nyowe nyereba nk’otari kubasa kuturayo.” Tony, owakurire omu ka etari ey’Abakristo akagamba ati: “Abazire bange, tihine obu bangambireho ku bari kunkunda ninga ngu banyereke ku bari kunyesimira. Ebyo bikaba nibituma nahurira ku hatine ekintu eki ndi kubasa kukora kugira ngu mbashemeze.”

⁵ Yaba hariho obu turi kuhurira tutine mugasho, nitubasa kwijuka ku Yehova ari we owatutorine akatweyiriza hihi. (Yoh 6:44) Namanya ebirungi byitu, n’obu itwe twakuba tutari kubyerebamu kandi namanya ebiri omu mitima yitu. (1 Sam 16:7; 2 Bus 6:30) Obwe rero, nitubasa kumwesiga yatugambira ku turi ab’omuhendo.—1 Yoh 3:19, 20.

6. Ni bata oku entumwa Pawulo yabire ari kwehurira ahabw’ebibi ebi yakozire kare?

⁶ Abingi omuri itwe tutakamanyire amazima, tukaba nitukora ebintu ebiri kubasa kutuma twagumizamu kwecwera orubanja. (1 Pet 4:3) Kandi Abakristo bona, nibatura bari kurwanisa obweremwa bwabo. Mbehi n’iwe hine obu ori kuhirira ku Yehova atari kubasa kukusaasira? Yaba ari ko kiri, ogume oyijuke ku hariho n’abandi bahereza ba Yehova b’abesigwa ababire bari kwehurira basyoya. Ecokureberaho: Entuma Pawulo akaba ari kuhurira atine mugasho, ku yabire ari kutecereza aha kutahikirira kweye. (Rom 7:24) Ni amazima, Pawulo akaba yayehanire ebibi byeye kandi yabatizibwe. Konka nabwo akegambaho ku ni we ‘muto omu ntumwa’ kandi ku ni we ‘musisi w’okubanza.’—1 Kor 15:9; 1 Tim 1:15.

7. Ni enki eki tushemerire kwijuka aha bikwatirine n’ebibi ebi twakozire kare?

⁷ Tata witu w’omu iguru naturaganisa ku arije kutusaasira twayehana tubyihire aha mutima. (Zab 86:5) Obwe rero twayehana tubyihire aha mutima, nitubasa kwesiga ebi ari kutugambira omu Kigambo ceye ku arije kutusaasira kimwe.—Kol 2:13.

8-9. Ni bata oku turi kubasa kusingura enyehurira z’okutecereza ku Yehova atari kubasa kutwikiriza?

⁸ Twena nituba turi kwenda kuhereza Yehova omu bwijwire oku turi kubasa. Konka abamwe nibabasa kuhurira hatine eki bari kubasa kukora ngu Yehova abikirize. Omunyanyazi ori kwetwa Amanda akagamba ati: “Burijo ninkunda kutecereza ku okuha Yehova ebirungi kukira ebindi biri kumanyisa kukora ebintu byingi. Emirundi myingi nikituma nagezaho kukora n’ebi ntari kubasa. Naremwa kukora ebi naba ndi kwenda kukora nikituma nahurira ku naremwa kukora ebi Yehova ari kwenda.”

⁹ Ni bata oku turi kubasa kusingura enyehurira z’okuhururira ku tutari kubasa kwikirizibwa na Yehova? Guma oyijuke ku Yehova ari kuringaniza. Tari kutushaba kukora ebirengire ebi turi kubasa. Nayesima ahabw’amani agu turi kutaho kugira ngu tumukorere ebirungi kukira ebindi. Nambwenu guma otecereze aha byokureberaho by’abantu abakorire Yehova n’amagara gabo gona. Tecereza aha cokureberaho ca Pawulo. Akakora n’amani omu murimo gwa Yehova, yatambura engendo ndingwa, kandi yatandikisa ebibina byingi. Konka shi, embera ezi yabire arimu ku zahindukire atabase kuburira nk’oku yabire nakikora kare, Ruhanga akareka kumwikiriza? Ingaha mazima. Akagumizamu kukora ebi yabire ari kubasa, kandi Yehova akamuha emigisha. (Byak 28:30, 31) Omu buryo nk’obwe, ebi turi kukorera Yehova nibibasa kuhinduka. Konka eki ari kureba nk’ecomugasho ahari we ni enshonga eziri kutuma twamukorera. Nimureke turebe oburyo obu Yehova ari kutwerekamu ku ari kutwikiriza.

 NI BATA OKU YEHOVA ARI KUTWEREKA KU ARI KUTWIKIRIZA?

10. Ni bata oku turi kubasa ‘kuhurira’ Yehova ari kutugambira ku ari kutwikiriza? (Yohana 16:27)

¹⁰ Birabire ahari Bibuli. Yehova ayine oburyo bwingi obu ari kwerekamu abahereza beye ku nabakunda kandi ku ari kubikiriza. Ebyahandikirwe birimu ahantu habiri ahu yagambire Yesu ku ari kumukunda kandi ku ari kumwikiriza. (Mat 3:17; 17:5) Mbehi n’iwe noba ori kwenda kuhurira iraka rya Yehova ari kukugambira ku ari kukwikiriza? Yehova tari kutugambisa omu iraka eriri kuhurirwa, konka natugambisa birabire omu Kigambo ceye. Nitubasa ‘kuhurira’ iraka rya Yehova eriri kutuhamiza ku ari kutwikiriza, twashoma ebigambo bya Yesu ebiri omu bitabo by’engiri. (Shoma omuri Yohana 16:27.) Yesu akereka emitwarize y’Ishe omu buryo obuhikirire. Obwe rero twashoma oku Yesu yayerekire abakurasi beye ababire batahikirire ku ari kubikiriza, nikibasa kutwereka oku Yehova na we ari kutugambira ebigambo nk’ebyo.—Yoh 15:9, 15.

11. Ahabw’enki ebizibu ebi turi kubugana bitari kumanyisa ku Yehova atari kutwikiriza? (Yakobo 1:12)

¹¹ Birabire aha bikorwa byeye. Yehova ayetegwire kutukwasa n’okutuha ebi turi kwetenga by’omubiri. Konka obumwe, Yehova nabasa kwikiriza ebintu bibi bituhikaho nk’oku byahikire ahari Yobu owabire ahikirire. (Yob 1:8-11) Twahikwaho n’ebigezo tikiri kumanyisa ku Yehova ari kuba atacatwikiriza. Ahobwe ni oburyo obu turi kuba twatunga bw’okwereka ku turi kukunda Ruhanga kandi ku turi kumwesiga. (Shoma omuri Yakobo 1:12.) Kandi omu bwire bw’ebyo bigezo nitwija kwerebera oku ari kutukunda ari kutukwasa kwehangana.

12. Ni enki eki turi kubasa kwegera aha byahikire ahari Dmitrii?

¹² Reba ecokureberaho ca mwenetata Dmitrii otwire omuri Asia. Akihwa aha murimo, kandi yamara amezi mingi atakabwine ogundi. Obwe rero, akasharamu kongera obwire obu yabire ari kumara omu murimo g’okuburira kandi ebyo bikereka ku yabire ari kwesiga Yehova. Hakahwa amezi mingi atakabwine ogundi murimo. Bwanyima akarwara endwara eyabire eshambire, kandi eyabire eri kutuma atabasa kwimuka omu kitanda. Akatandika kwebuza yaba yabire ari omuzire n’omushija murungi kandi yatandika kubanganisa yaba Yehova yabire ari kumwikiriza. Bwanyima muhara weye akamuhandikira akapapura kace akariho ebigambo by’omuri Isaya 30:15 ebiri kugira ngu:  “Omu kutuza n’omu kwesiga ni mwo amani ganyu gariruga.” Akakareta, yakata aha rubaju rw’ahu yabire anyami aha kitanda, rero yamugambira ati, “Tata, waguma kuhurira otari ge, ogume oyijuke eki cahandikirwe.” Dmitrii akareba ku yabire ashemerire kusima Yehova ahakuba eka yeye yabire ecabasa kutunga ebyokurya, ebijwaro, n’ah’okutura. Akagamba ati: “Eki nabire nshemerire kugumizamu kukora, ni okugumizamu kutuza n’okwesiga Yehova Ruhanga wange.” Yaba oyine ekigezo nk’eco nobasa kwesiga ku Yehova arije kugumizamu kukufaho kandi akakukwasa kwehangana.

13. Ni baha abu Yehova ari kubasa kukoresa omu kutwereka ku ari kutwikiriza, kandi shi nakikora ata?

¹³ Birabire aha Bakristo bagenzi bitu. Yehova natwereka ku ari kutwikiriza akoresize benetata na banyanyazi. Ecokureberaho: Nabasa kutuma abandi batugambira ebigambo ebiri kutugaruramu amani omu bwire obu turi kubyetenga. Omunyanyazi w’omuri Asia eco akacerebera obu yabire ari omu bizibu bigumire. Akihwa aha murimo gweye kandi yarwara endwara eshambire. Bwanyima omushija weye akakora ekibi c’amani kandi catuma atagumizamu kuba omuzehe w’ekibina. Akagamba ati: “Nkaba ntari kwehuriza enshonga ahabw’enki ebyo bintu ari inye owu byabire biri kuhikaho. Nkatecereza ku hine ekibi eki nabire nkozire kandi ku Yehova yabire atacanyikiriza.” Konka ogo munyanyazi akashuba kwesiga ku Yehova yabire ari kumwikiriza. Bata shi? Akagamba ati, “Abazehe b’ekibina bakanganiriza, bampamiza ku Yehova ari kunkunda.” Bwanyima, akashaba Yehova obuyambi. Akagamba ati: “Ahari eryo zoba nkatunga n’ebaruwa eyabire yaruga ahari benetata na banyanyazi b’omu kibina cange. Obu nabire ndi kushoma ebigambo ebiri kuhumuriza ebyabire birimu, nkahurira ku Yehova ari we owangarukamu.” Ni amazima, Yehova nakira kutwereka ku ari kutwikiriza, birabire  aha bigambo by’embabazi ebi abandi bari kutugambira.—Zab 10:17.

14. Ni buha bundi buryo obu Yehova ari kutwerekamu ku ari kutwikiriza?

¹⁴ Nambwenu Yehova natwereka ku ari kutwikiriza ari kukoresa Abakristo bagenzi bitu ngu batuhe obuhabuzi omu bwire obu turi kubwetenga. Ecokureberaho: Omu kinyigana c’okubanza, Yehova akakoresa entuma Pawulo yahandikira Abakristo bagenzi beye amabaruha 14. Ago mabaruha gakaba garimu n’obuhabuzi oburimu rukundo. Ahabw’enki Yehova yakoresize Pawulo ngo atange obwo buhabuzi? Yehova ni omuzire murungi, nahana abana beye ‘abu ari kushemerererwa.’ (Emi 3:​11, 12) Obwe rero, twatunga obuhabuzi obwegamire ahari Bibuli, nituba twatunga ekihamya ekiri kwereka ku Ruhanga ari kutwikiriza. (Heb 12:6) Ni biha bindi bintu ebiri kutwereka ku Yehova ari kutwikiriza?

EBINDI BIHAMYA EBIRI KWEREKA KU YEHOVA ARI KUTWIKIRIZA

15. Ni baha abu Yehova ari kubasa kuha omwika gweye oguri kwera, kandi shi ebyo nibituma twayesiga ki?

¹⁵ Yehova naha omwika gweye oguri kwera abantu abu ari kwikiriza. (Mat 12:18) Nitubasa kwebuza ngu: ‘Mbehi hine ebyana by’omwika ebi ndi kwereka omu kubaho kwange?’ Mbehi noreba wakirizeho kwehanganira abandi kukiza oku wabire ori otakamanyire Yehova? Oku ori kukizaho kwereka ebyana by’omwika omu kubaho kwawe ni ko ori kukizaho kwerebera ebihamya ebiri kwereka ku Yehova ari kukwikiriza!—Reba akashanduku akine omutwe oguri kugira ngu “Ebyana by’omwika ni . . . ”

16. Ni baha abu Yehova ari kukoresa omu kutangaza obutumwa burungi, kandi shi nibituma wayehurira bata? (1 Abatesalonika 2:4)

¹⁶ Yehova nayesimira kuha abantu abu ari kwiriza omurimo g’okutangaza obutumwa burungi. (Shoma omu 1 Batesalonika 2:4.) Reba oku omunyanyazi ori kweta Jocelyn yagasirwe n’okwekwatanisa omu kugambira abandi obutumwa burungi. Izoba rimwe, Jocelyn akimuka ari kuhurira acwekire entege. Akagamba ati: “Nkahurira ntine mani kandi nahurira ntine mugasho. Konka nkaba ndi omupayoniya kandi eryo izoba ni ryo eri nabire ninza kuburira. Obwe rero nkashaba, rero naza omu murimo.” Omuri ako kasheshe, Jocelyn akabugana na Mary, omukazi w’omunyambabazi, owayikirize kwega Bibuli. Bwanyima y’amezi mace, Mary akagamba ku yabire ashabire Ruhanga kumukwasa, obu Jocelyn yakomangire aha rwigi  rweye. Bwanyima, Jocelyn akatecereza aha byamubireho rero yagamba ati: “Nkahurira Yehova ari nk’owangambira ngu, ‘Ninkwikiriza.’” Ni amazima, ti buri wena ari kuhika aha birungi omu murimo g’okuburira. Konka nitubasa kwesiga tutari kubanganisa ku Yehova ari kushemererwa yareba turi kukora cona eki turi kubasa ngu tuhise aha bandi obutumwa burungi.

17. Ni enki eki turi kubasa kwegera aha cokureberaho ca Vicky aha bikwatirine n’ekitambo? (Zaburi 5:12)

¹⁷ Yehova nayijusa abantu abu ari kwikiriza omugasho gw’ekitambo. (1 Tim 2:5, 6) Konka shi tukakora ki, yaba turi kuhurira Yehova atari kutwikiriza, n’obu twakuba turi kwikiriza ekitambo ceye kandi twabatizibwe? Guma oyijuke ku burijo otashemerire kwesiga enyehurira zawe ahobwe ku oshemerire kwesiga Yehova. Nareba abantu abari kwikiriza ekitambo ceye nk’abahikirire kandi abaraganisa kubaha emigisha. (Shoma omuri Zaburi ya 5:12; Rom 3:26) Okutecereza aha kitambo bikakwasa Vicky. Izoba rimwe ku yatecerize munonga aha kitambo, akagamba ati: “Yehova akanyehanganira obwire buringwa. . . . Konka, hine obu nabire ndi kutecereza ahari Yehova nti: ‘Rukundo yawe tenyinire omugasho. Ekitambo c’Omwana wawe, tikiri kubasa kushweka ebibi byange.’” Oku yakirizeho kutecereza aha mugasho gwekitambo, akatandika kureba ku Yehova ari kumukunda. N’itwe nituhurira ku Yehova ari kutukunda kandi ku ari kutwikiriza twatecereza aha kitambo eki yatuhire.

18. Twagumizamu kukunda Tata witu w’omu iguru, ni enki eki turi kubasa kwesiga tutari kubanganisa?

¹⁸ N’obu twakugezaho kuta omu bikorwa ebintu ebi twamara kushwijuma, na bwo obumwe nitubasa kuhurira Yehova atari kutwikiriza. Eco cakubaho, ogume oyijuke ku Yehova ari ‘kwikiriza abari kumukunda.’ (Yak 1:12) Obwe rero, gumizamu kuba munywani wa Yehova kandi oyetegereze oburyo bwona obu ari kukoresa ngu akwereke ku ari kukwikiriza. Burijo, guma oyijuke ku Yehova ‘atari hare y’omuntu wena omuri itwe.’—Byak 17:27.