1. Ni bata oku Bibuli eri kushoborora rukundo eya buzima?

 ‘ENDIMI za [rukundo] nizaka nk’ez’omuriro gwa Yehova. Amizi mingi tigari kubasa kuraza rukundo, n’emyegemure tekagimira.’ b (Cesh 8:6, 7) Mazima ebyo bigambo ku nibishoborora ge rukundo! Nibihamiza abatasine ku bari kubasa kwerekana rukundo etari kuhwaho.

2. Abatasine nibabasa kukora ki kugira ngu rukundo yabo etacendera?

² Kugira ngu abatasine bagirane rukundo etari kuhwaho nikiruga ahari bo. Ecokureberaho: Kugira ngu omuriro gugumizemu kwaka, noba oshemerire kugumizamu kwenegeza enku. Waba otakikozire, omuriro niguhika aho gurara. Ni co kimwe, rukundo eri ahagati y’omushija n’omukazi nebasa kugumizamu kuhama, konka bagumizamu kugumya obunywani bwabo. Obumwe rukundo y’omushija n’omukazi nebasa kucendera, namunonga baba bine ebizibu by’akasente, oburwire, ninga shi ebizibu by’okurera abana. Mbwenu shi yaba wagire omu maka, ni bata oku ori kubasa kutuma ‘endimi z’omuriro gwa Yah’ zagumizamu kwaka? Omuri eki kicweka, twaza kushwijuma ebintu bishatu ebiri kubasa kutuma obunywani bwanyu bwaguma kandi mukagira eka erimu okushemererwa. c

3. Ni bata oku kugira obunywani buhamire na Yehova kiri kubasa kukwasa abatasine kukundana? (Omuburizi 4:12) (Nambwenu reba ekishushani.)

³ Kugira ngu ‘endimi z’omuriro gwa Yah’ zigumizemu kwaka, omushija n’omukazi bombi bashemerire kukora cona eki bari kubasa kugira ngu bagumye obunywani bwabo na Yehova. Ni  bata oku obwo bunywani buri kugumya obushwere bwabo? Abatasine baba bari kureba obunywani bwabo na Yehova nk’obw’omuhendo, nikija kuborobera kuta omu bikorwa obuhabuzi obu ari kutuha kandi eco ni co ekirabarinde ebizibu ebiri kubasa kutuma rukundo yabo yacendera. (Shoma omu Muburizi 4:12.) Nambwenu, abantu abakuzire omu by’omwika nibataho amani kugira ngu batoreze Yehova n’emicwe eyi ari kwereka, nk’embabazi, okwehangana, n’okusasira. (Efe 4:32–5:1) Omushija n’omukazi abari kwereka eyo micwe nibatuma rukundo yabo yakura. Omunyanyazi ori kwetwa Lena, omazire emyaka eri kukira ahari 25 ari omu maka, akagamba ati: “Corobi munonga kukunda omuntu okuzire omu by’omwika n’okumuha ekitinisa.”

4. Ahabw’enki Yehova yatorine Yosefu na Mariya ngu bije kuba abazire b’Omwana owabire arije kurugamu Mesiya?

⁴ Reka tukwate ecokureberaho c’omuri Bibuli. Yehova ku yagire kutorana omushija n’omukazi ababire barije kuba abazire ba Mesiya, akatorana Yosefu na Mariya omu bandi bingi ababire bakomokire ahari Dawudi. Ahabw’enki? Bombi bakaba bine obunywani burungi na Yehova, kandi akaba namanya ku eka yabo yabire erije kuhama ahabw’okuba yabire eyombekire ahari we. Imwe abatasine, ni enki eki muri kubasa kwegera ahari Yosefu na Mariya?

5. Ni enki eki abashija bari kubasa kwegera ahari Yosefu?

⁵ Yosefu akaba nahika ari korobera obuhabuzi bwa Yehova, kandi eco kikatuma yaba omushija murungi. Emirundi eri kuhika ahari ishatu yona, Ruhanga akamuha obuhabuzi oburi kukwata aha ka yeye. Omuri eyo mirundi yona, akaba nahika ari korobera Ruhanga n’obu cabire kiri kumushaba kukora empinduka z’amani. (Mat 1:20, 24; 2:13-15, 19-21) Ahakuba Yosefu yabire nayorobera obuhabuzi bwa Ruhanga, akabasa kurinda Mariya, yamushagika, kandi yamuha ebi yabire ari kwetenga. Tecereza oku ebikorwa bya Yosefu byatumire Mariya yamukunda munonga kandi akamuha ekitinisa! Imwe bashija mwe, nimubasa kutoreza Yosefu muri kurondera obuhabuzi omuri Bibuli mwaba muri kufa aha maka ganyu. d Ku murate omu bikorwa obwo buhabuzi, n’obu byakuba biri kubashaba kukora empinduka z’amani, nimuba mwayereka ku nimukunda abakazi banyu kandi nikija kutuma amaka ganyu gahama. Omunyanyazi w’omuri Vanuwatu, owamara emyaka eri kukira ahari 20 ari omu maka, akagamba ati: “Omushija wange ku ari kuronda obuhabuzi bwa Yehova kandi akabuta omu bikorwa, ninkizaho kumuha ekitinisa, mpurira ndinzirwe kandi nkizaho kwesiga ensharamu ezi ari kukora.”

6. Ni enki eki abakazi bari kubasa kwegera ahari Mariya?

⁶ Mariya akaba yayombekire obunywani burungi na Yehova aha bweye; okwikiriza kweye kukaba kutegamire aha bi Yosefu yabire  nakora. Akaba namanya ge Ebyahandikirwe. (Reba obushobororo bw’ebiri omuri Luka 1:46.) Nambwenu, akaba nakwata obwire bw’okutecereza aha Byahandikirwe. (Luk 2:19, 51) Hatariho okubanganisa, ahakuba Mariya yabire akuzire omu by’omwika, ni co ecatumire yaba omukazi w’omutima. Omuri obu bwire, abakazi bingi na bo nibagezaho kukora nk’ebi Mariya yakozire. Ecokureberaho: Omunyanyazi ori kwetwa Emiko akagamba ati: “Obu nabire ncari omunyeto nkaba nyine entebekanisa yange y’okweyegesa. Konka ku natahire omu maka, nkareba ku okwikiriza kwange kwabire kwegamire aha bi omushija yabire nakora, ahakuba ni we owabire nashaba kandi ayebembera okuramya kw’eka. Konka bwanyima, nkareba ku nabire nshemerire kweyombecera obunywani burungi na Yehova ahabwange. Obwe rero hati, nketeraho obwire bw’okuba ndi nyenka na Ruhanga wange, ndi kushaba, ndi kweshomesa Ebyahandikirwe, kandi ndi kubitecerezaho.” (Gal 6:5) Imwe bakazi mwe, ku muragumizemu kugumya obunywani bwanyu na Yehova, abashija banyu nibija kubasima kandi babakunde munonga.​—Emi 31:30.

7. Ni enki eki abashija n’abakazi bari kubasa kwegera ahari Yosefu na Mariya aha bikwatirine n’okuramiza hamwe?

⁷ Nambwenu Yosefu na Mariya bakaba nibakorera hamwe kugira ngu bombeke obunywani burungi na Yehova. Bakaba nibamanya omugasho g’okuramiza hamwe Yehova nk’eka. (Luk 2:22-24, 41; 4:16) Nikibasa kuba cabire nikibagumira, namunonga obu eka yabo yamazire kuba mpango, konka bakagezaho. Mazima eco ku ni ecokureberaho kirungi aha batahire omu maka omuri obu bwire! N’imwe mwaba mwine abana, nk’oku cabire kiri ahari Yosefu na Mariya, nikibasa kubagumira kuza omu nterane, n’okutaho entebekanisa y’okuramya kw’eka. Nambwenu kutaho obwire bw’okweyegesa n’okushabira hamwe nk’omushija n’omukazi, nikibasa kubagumira. N’obu kirabe kiri kisyo, mwijuke ku mwaramiza hamwe Yehova obunywani bwanyu buri kukizaho kuhama. Obwe rero, mugume mute okuramya Yehova omu mwanya g’okubanza.

8. Ni enki eki omushija n’omukazi abine ebizibu omu ka yabo bari kubasa kukora kugira ngu bakizeho kugasirwa n’okuramya kw’eka?

⁸ Mbwenu shi mukakora ki obushwere bwanyu bwaba burimu ebizibu? Ekitecerezo c’okuramiza hamwe nk’eka, nikibasa kutabashemeza. Caba kiri kisyoya, mugume mutandike muri kushwijuma ebintu bice kandi ebi mwembi muri kwikirizanaho. Eco nikija kugumya obunywani bwanyu kandi n’ecetengo canyu c’okukora ebintu by’omwika nikija kukizaho kweyongera.

9. Ahabw’enki omushija n’omukazi bashemerire kumara obwire hamwe?

⁹ Nambwenu, abagizire eka nibabasa kongera rukundo yabo bari kumara obwire bari hamwe. Ku muri kukikora basyoya, nikibasa kubarinda kutana omu bitecerezo n’omu nyehurira. (Kut 2:24) Reba eki Lilia na Ruslan bayerebire bwanyima y’okumara obwire buce batasine, omu myaka 15 ehwire. Lilia akagamba ati: “Tukashanga tutine obwire bwingi bw’okuba hamwe nk’oku twabire turi kutecereza. Ebiro byona tukaba nitubimara turi omu mirimo y’okutubisaho, emirimo y’omu ka, n’okufa aha bana bitu. Tukareba ku obunywani bwitu bwabire burafukirire twaba tutaronzire obwire bw’okuba hamwe nk’omushija n’omukazi.”

10. Ni bata oku abatasine bari kubasa kuta omu bikorwa omusinge oguri omu Befeso 5:15, 16?

¹⁰ Ni enki eki omushija n’omukazi bari kubasa kukora kugira ngu babone obwire bw’okuba hamwe oburi kumara? Mushemerire kutaho obwire bw’okuba hamwe. (Shoma omu Befeso  5:15, 16.) Mwenetata w’omuri Nayijeriya ori kwetwa Uzondu, akagamba ati: “Naba ndi kukora entebekanisa y’emirimo yange, nintamu n’obwire obu ndamare n’omukazi wange turi hamwe nk’omushija n’omukazi, kandi mbuta omu mwanya g’okubanza.” (Fil 1:10) Reba oku omukazi w’omureberezi ori kutayayira ebibina w’omuri Moludova ori kwetwa Anastasia, ari kukoresa obwire bweye. Akagamba ngu: “Ningezaho kukora emirimo yange yona omushija wange yaba acahugire. Eco nikituma twembi twabanza kuhuguka rero tumara obwire turi hamwe.” Konka shi mukakora ki yaba muri kutura muhugire mukabura obwire bw’okuba hamwe?

11. Ni eha mirimo eyi Akwila na Purisikila babire bari kukorera hamwe?

¹¹ Abatasine nibabasa kwegera aha cokureberaho ca Akwila na Purisikila, omushija n’omukazi ababire bari kugambwa kurungi n’Abakristo bingi b’omu kinyigana c’okubanza. (Rom 16:3, 4) N’obu Bibuli etari kugamba byingi aha bushwere bwabo, neyereka ku babire bari kukorera hamwe, omu mirimo eshangirwe, omu kuburira, n’omu kukwasa abandi. (Byak 18:2, 3, 24-26) Kandi ni amazima, ahakuba Bibuli ku eri kubagamba nebagamba bari hamwe.

12. Ni enki eki omushija n’omukazi bari kubasa kukora kugira ngu bamare obwire bari hamwe? (Nambwenu reba ekishushani.)

¹² Ni bata oku abatasine bari kubasa kutoreza Akwila na Purisikila? Guma otecereze aha bintu byingi ebi iwe na mugenzi wawe muri kwenda kukora. Mbehi timuri kubasa kubikorera hamwe, omu mwanya g’okubikora buri omwe okweye? Ecokureberaho: Akwila na Purisikila, bakaba nibaburira hamwe. Mbehi n’imwe mwine entebekanisa y’okuburira hamwe? Nambwenu Akwila na Purisikila bakaba bari kukorera hamwe. Mbehi n’obu mwakuba mutine omurimo gumwe, timuri kubasa kukora emirimo y’omu ka muri hamwe? (Mub 4:9) Ku muri kukora emirimo muri hamwe, nimutunga n’obwire bw’okuganira. Robert na Linda bamara emyaka eri kukira 50 batasine. Robert akagamba ati: “Tugambisize amazima, tituri kubona obwire bw’okuba hamwe turi kweshemeza. Konka ku ndi koza amasohwani omukazi wange akija akagomosa, ninga shi ndi kubagara ebinyasi na we aka kondora, nimpurira nshemerirwe munonga. Ku turi kukorera ebintu hamwe, nituhurira twakizaho kuhikana kandi rukundo yitu nekizaho kweyongera.”

13. Kugira ngu omushija n’omukazi bamare obwire hamwe by’amazima, ni enki eki bashemerire kukora?

¹³ Konka, mwijuke ku okumara obwire muri hamwe conka, kitari kumanyisa ngu nimwija kugira obumwe. Omukazi w’omuri Burazili, akagamba ati: “Omuri obu bwire, obu hariho eby’okutujagaraza byingi, nkareba ku turi kubasa kugwa omu mutego g’okutecereza ku turi kumara obwire hamwe, ngu ni ahabw’okuba turi kuba omu nju emwe. Nkareba ku okuba hamwe ari ekintu c’okubanza. Konka eca kabiri, ku ari okwereka ku nofa aha bi  owu mwatasine ari kwenda.” Reba oku Bruno n’omukazi weye Tays, bari kufanaho. Bruno akagamba ati: “Obwire bw’okuba hamwe ku buri kuhika, nituta hare amasimu gitu rero tubwesimira.”

14. Ni enki eki omushija n’omukazi bari kubasa kukora baba batari kwesimira obwire obu bari kumara bari hamwe?

¹⁴ Konka shi mukakora ki, yaba obwire obu iwe n’owu mwatasine muri kumarana butari kubashemeza? Obumwe nobasa kushanga mutari kukunda ebintu bimwe, ninga shi omwe ari kunyiza mugenzi weye. Mbwenu shi mukakora ki? Yijuka ecokureberaho c’omuriro eki tugambireho tucatandika. Tiguri kuhika nigwaka ahonaho. Niguba guri kwenda ngu ogume ori kutamu otuku tuce, rero bwanyima otamu enku mpango. Mbwenu shi n’imwe timuri kubasa kumarana obwire buce burizoba? Mugume mukore ebintu ebi mwembi muri kwesimira, mwerinde kukora ebintu ebiri kubasa kutuma mutayikirizana. (Yak 3:18) Ku muragume kutandikira aha buntu buce, mporampora nimwija kuhembera rukundo yanyu.

15. Ahabw’enki okuhana ekitinisa kiri ec’omugasho kugira ngu rukundo y’abatasine ekizeho kweyongera?

¹⁵ Okuhana ekitinisa ni ekintu c’omugasho omu batasine. Ni nk’enku eziri kutuma omurimo gwayaka n’amani. Enku zaba zitariho, omuriro niguhika guri kurara. Omu buryo nk’obwo, abatasine baba batari kuhana ekitinisa, rukundo yabo nehika aho efukirira. Konka omushija n’omukazi abatasine ku bari kutamu amani ngu bahane ekitinisa, rukundo yabo negumaho. Ekikuru ti oku ori kutecereza ngu noha owu mwatasine ekitinisa, ahobwe ni oku ari kwehurira yaba ori kukimuha. Penny na Aret bamazire emyaka eri kukira ahari 25 batasine. Penny akagamba ati: “Okuhana ekitinisa kikatuma omu ka yitu habamu omwika murungi. Buri omwe omuri itwe nagambira mugenzi weye ebiri aha mutima ayeshwanjwire ahakuba naba ari kumanya ku arije kuhurira ebitecerezo byeye.” Mbwenu shi okakora ki kugira ngu owu mwatasine ahurire ku ori kumuha ekitinisa? Reba ecokureberaho ca Aburahamu na Sara.

16. Ni enki eki abashija bari kubasa kwegera aha cokureberaho ca Aburahamu? (1 Petero 3:7) (Nambwenu rebe ekishushani.)

¹⁶ Aburahamu akaba naha Sara ekitinisa. Akaba nahurikiza ebitecerezo bya Sara kandi afa n’aha nyehurira zeye. Izoba rimwe, Sara akaba ayemerize omutima yagambira Aburahamu enyehurira zeye, nangwa yamushinja ngu ni we owatuma byabaho. Mbehi Aburahamu akamugarukamu kubi? Ingaha mazima. Akaba namanya ku Sara ari omukazi ori koroba kandi ku ari kumushagika. Aburahamu akahurikiza omukazi weye kandi yagezaho kutereza eco kizibu. (Kut 16:5, 6) Ebyo nibitwegesa ki? Imwe bashija mwe, mwine obushoborozi bw’okukorera ab’omu maka ganyu ensharamu. (1 Kor 11:3) Konka ekintu ekirimu rukundo eki muri kubasa kukora, ni  okubanza mwabuza abakazi banyu ebitecerezo mutakashaziremu, namunonga eyo nsharamu yaba eri kubasa kubakwataho. (1 Kor 13:4, 5) Obumwe na bumwe, omukazi wawe nabasa kuba ayemerize omutima, rero ayenda kukugambira oku ori kwehurira. Mbehi noyereka ku ori kumuha ekitinisa ori kumuhurikiza oyetonzire? (Shoma omuri 1 Petero 3:7.) Angela na Dmitry bamazire emyaka eri kuhika ahari 30 batasine. Angela akagira ati: “Dmitry nagezaho kumpurikiza haba hine ebiri kunyemereza omutima ninga shi haba hariho eki ndi kwenda kumugambira. Nanyehanganira, n’obu nakuba ndi kutegekwa n’enyehurira.”

17. Ni enki eki abakazi bari kubasa kwegera aha cokureberaho ca Sara? (1 Petero 3:5, 6)

¹⁷ Sara akaba naha Aburahamu ekitinisa ari kushagika ensharamu zeye. (Kut 12:5) Izoba rimwe, Aburahamu akasharamu kwakira abagenyi abu babire batetegwire. Akashaba Sara kwemereza ebi yabire ari kukora ngu ategure emigati myingi. (Kut 18:6) Sara akagira jubajuba yashagika eyo nsharamu eyi Aburahamu yabire yakora. Imwe bakazi mwe, nimubasa kutoreza Sara muri kushagika ensharamu z’abashija banyu. Ku murakikore, nimwija kugumya obushwere bwanyu. (Shoma omuri 1 Petero 3:5, 6.) Dmitry, owu tugambireho omuri paragurafu eri kubandiriza eyi, akagira ati: “Ninyesimira oku Angela ari kutaho amani ngu ashagike ensharamu zange, n’obu twakuba tutari kubihurira kimwe. Ensharamu ezi nakora zaba zitarugiremu ebirungi, tari kunshinja ngu ni inye owabireta.” Mazima, nicoroba kukunda omuntu ori kukuha ekitinisa!

18. Ni bata oku abatasine bari kugasirwa ku bari kukorera hamwe omu kwenegeza rukundo yabo?

¹⁸ Omuri obu bwire, Sitane nayenda kushisha rukundo eyi Abakristo abatasine bari kuba bine. Namanya ku abatasine bacendeza rukundo yabo, bari kutandika n’okureka Yehova. Konka, rukundo eya buzima teri kubasa kucendera! Obwe rero, nimureke rukundo yanyu ebe nka rukundo eyagambirwe omu Ceshongoro ca Solomoni. Mwombeke amaka ganyu ahari Yehova, mugire obwire bw’okuba hamwe, muhane ekitinisa kandi mufe aha bi abu mwatasine na bo bari kwetenga. Ku murakore ebyo byona, amaka ganyu nigija kuhimbisa Yehova, we burugo bwa rukundo eya buzima kandi rukundo yanyu neyija kuba nk’ebirimi by’omuriro ebitari kurara.