1-2. Ni enki eki turi kubasa kwebuza aha bikwatirine n’eshara zitu?

 MBEHI wareburize yaba Yehova ari kugarukamu eshara zawe? Yaba carakubireho, omanye ngu ti iwe wenka. Benetata na banyanyazi bingi bakagamba ku byababireho, namunonga obu babire bari kuraba omu bwire obugumire. Twaba turi omu busaasi, n’itwe nikibasa kutugumira kureba ku Yehova ari kugarukamu eshara zitu.

² Reka turebe enshonga ahabw’enki turi kubasa kwesiga ku Yehova ari kugarukamu eshara z’abahereza beye. (1 Yoh 5:15) Nambwenu, twaza kugarukamu ebi bibuzo: Ahabw’enki obumwe kiri kurebeka nk’ahu Yehova atari kutugarukamu? Ni bata oku Yehova ari kutugarukamu twamushaba omuri obu bwire?

3. Ahabw’enki Yehova ari kwenda ngu tumushabe?

³ Ebyahandikirwe nibituhamiza ku Yehova ari kutukunda munonga kandi ku ari kutureba nk’ab’omuhendo. (Hag 2:7; 1 Yoh 4:10) Ni yo nshonga ari kutugambira ngu tumushabe obuyambi. (1 Pet 5:6, 7) Nayenda kutukwasa ngu tugume hihi na we kandi twehanganire ebizibu ebi turi kubugana.

4. Nitumanya tuta ku Yehova ari kugarukamu eshara z’abahereza beye? (Nambwenu reba ekishushani.)

⁴ Nitukunda kushoma omuri Bibuli enkuru eziri kwereka ku Yehova yagarukiremu eshara z’abahereza beye. Nobasa kutecereza aha cokureberaho ca Dawudi. Akabugana abangi bingi, kandi burijo akaba narondera obuyambi ahari Yehova birabire omu kushaba. Izoba rimwe, akeshengereza Yehova nagira ati: ‘Hurira okushaba kwange, ayi Yehova; otege okutu okweshengereza kwange; ahabw’okwesigwa kwawe n’okuhikirira kwawe ongarukemu.’ (Zab 143:1) Yehova akagarukamu ezo shara ezi Dawudi yabire namushaba ngu amucungure. (1 Sam 19:10, 18- 20; 2 Sam 5:17-25) Ni yo nshonga Dawudi yabire ari kubasa kugamba ayine obwesige ngu: ‘Yehova aba hihi ya bona abamutakira.’ N’itwe nitubasa kugira obwesige nk’obwo.​—Zab 145:18.

5. Mbehi Yehova akaba nagarukamu eshara z’abahereza beye nk’oku babire bari kubyenda? Gamba ecokureberaho. (Nambwenu reba ekishushani.)

⁵ Yehova nabasa kugarukamu eshara zitu omu buryo obu tutari kutecereza. Eco ni co ecahikire aha ntumwa Pawulo. Akashaba Ruhanga ngu amwihireho ‘ihwa ry’omu mubiri.’ Pawulo akashaba emirundi ishatu yona, ari kugamba ahari eco kizibu eki yabire ayine. Mbehi Yehova akahurira ezo shara za Pawulo? Yego, konka oburyo obu yamugarukiremu, ti bwo obu Pawulo yabire ari kutecereza. Omu mwanya g’okugira ngu Yehova amwihireho ekizibu eki yabire ayine, akamuha amani g’okugumizamu kumuhereza ari omwesigwa.​—2 Kor 12:7-10.

6. Ahabw’enki obumwe kiri kubasa kurebeka nk’ahu Yehova atari kutugarukamu?

⁶ N’itwe, hine obu turi kubasa kutunga ecokugarukamu ekiri kutana n’eki twaba nitutecereza. Nitwesiga tutari kubanganisa ku Yehova ari we ori kumanya oburyo burungi obu aratukwasemu. Nabasa ‘n’okukora ebiri kukirira kimwe ebi turi kushaba ninga ebi turi kutekateka.’ (Efe 3:20) Ni ahabw’eco, ecokugarukamu c’eshara zitu nikibasa kwija omu bwire obu tutetegire n’omu buryo obu tutari kutecereza.

7. Ahabw’enki obumwe turi kuba tushemerire kuhindura omu bi turi kushaba? Gamba ecokureberaho.

⁷ Hine obu turi kubasa kuhindura omu bi turi kushaba, bwanyima y’okushoborocerwa ebi Yehova ari kwenda. Reka turebe ecokureberaho ca mwenetata Martin Poetzinger. Hahwire obwire buce mwenetata Poetzinger atasize, akasibirwa omu kampu y’Abanazi. Omu kubanza, akashaba Yehova ngu amukwase kuruga omuri eyo kampu kugira ngu aze kufa aha mukazi weye, kandi ashube akore omurimo g’okuburira. Konka bwanyima y’esande ibiri, akareba ku hatine ekihamya na kimwe ecabire kiri kwereka ku Yehova yabire ari kwenda ngu aruge omuri eco kihome. Ni ahabw’eco, akashaba ati: “Yehova, ninkushaba ngu onyereke eki ndakore.” Bwanyima akatandika kutecereza aha mbera ezi abandi benetata b’omuri eyo kampu babire bari kurabamu. Abingi omuri bo bakaba bemerize omutima ahabw’abakazi babo n’abana babo. Bwanyima akashaba ngu: “Yehova, ninkusima ahabw’okumpa omurimo musya. Nyabura we, onkwase mbase kugumya benetata abari aha.” Kandi omu myaka mwenda eyakuratireho, akagimara ari kugumya benetata ababire bari omu kampu!

8. Ni kiha kintu kikuru eki tushemerire kugumizamu kwijuka twaba turi kushaba?

 ⁸ Tushemerire kwijuka ku Yehova ayine ekigendererwa eki ari kwenda kuhikiriza kandi ku arije kukihikiriza akuratize obwire obu yatireho. Omuri eco kigendererwa, harimu okwihaho ebizibu byona ebiri kutuma twabonabona omuri obu bwire, harimu nk’ebihikirizi, oburwire, n’orufu. Yehova aryahikiriza eco kigendererwa ceye akoresize Obukama bweye. (Dan 2:44; Kush 21:3, 4) Konka obwo bwire butakahikire, nayikiriza ngu Sitane agumizemu kutegeka ensi. b (Yoh 12:31; Kush 12:9) Kuri Yehova yayihireho ebizibu by’abantu omuri obu bwire, kikaba kirarebeke ku obutegeki bwa Sitane hine eki bwahikireho. Obwe rero omu bwire obu tucategerize ngu Yehova ahikirize ebiraganiso byeye, tikiri kumanyisa ku ari kutureka tutine buyambi. Reka turebe oburyo bumwe obu Yehova ari kutukwasamu.

9. Ni bata oku Yehova ari kubasa kutukwasa twaba turi kwenda kukora ensharamu? Gamba ecokureberaho.

⁹ Natuha obwenge. Yehova naraganisa kutuha obwenge obu turi kwetenga kugira ngu tukore ensharamu ndungi. Namunonga nitwetenga obwenge bwa Ruhanga twaza kukora ensharamu zigumire eziri kukwata aha magara gitu, nk’okutasa ninga shi okutatasa. (Yak 1:5) Reka turebe ecokureberaho c’omunyanyazi owabire atakagire omu maka, ori kwetwa Maria. c Akaba ari kukora omurimo g’obupayoniya bw’obwire bwona ashemerirwe obu yabugine mwenetata. Akagamba ati: “Oku twagenzire turi kugirana obunywani, ni ko n’enyehurira zitu zagenzire ziri kweyongera. Nkaba nimanya ku nabire nshemerire kukora ensharamu ndungi. Nkashaba Yehova munonga, ndi kumugambira eco kizibu. Nkaba ninyenda ngu Yehova ampe obuhabuzi, konka nkaba nimanya ku atari we owabire arije kunkorera ensharamu.” Akerebera ku Yehova yagarukiremu eshara zeye ari kumuha obwenge. Bata shi? Akacondoza omu bitabo byitu yabonamu ebicweka ebyamukwasize kugarukamu ebibuzo byona ebi yabire ari kwebuza. Nambwenu akikiriza obuhabuzi bw’obwenge obu nyina yamuhire. Obwo buhabuzi bukakwasa Maria kurinda enyehurira zeye. Aha muheru, akabasa kukora ensharamu ndungi.

10. Tukuratize ebiri omu Bafilipi 4:13, ni enki eki Yehova arije kukora ngu akwase abahereza beye? Gamba ecokureberaho. (Nambwenu reba ekishushani.)

¹⁰ Natuha amani g’okwehangana. Yehova nayija kutuha amani g’okwehanganira ebigezo, nk’oku yakikorire entumwa Pawulo. (Shoma omu Bafilipi 4:13.) Reka turebe oku Yehova yakwasize mwenetata ori kwetwa Benjamin  kwehanganira embera ezigumire. Benjamin akamara emyaka yeye yona y’obunyeto ari n’ab’eka yeye batwire omu kampu z’empungi omuri Afurika. Benjamin akagamba ati: “Nkaba ninshaba Yehova burizoba ngu ampe amani g’okukora ebiri kumushemeza. Yehova akagarukamu eshara zange ari kumpa obusinge bw’omu mutima, obumanzi bw’okugumizamu kuburira, n’ebitabo by’okweyegesezamu kugira ngu ngumizemu kuguma omu by’omwika.” Akagumizamu nagira ati: “Okushoma enkuru z’Abakristo bagenzi bange n’okumanya oku Yehova yabakwasize kwehangana kikankwasa kumaririra kuguma ndi omwesigwa ahari we.”

11-12. Ni bata oku Yehova ari kukoresa ab’eka yitu y’eby’omwika omu kugarukamu eshara zitu? (Nambwenu reba akishushani.)

¹¹ Nakoresa eka yitu y’eby’omwika. Omu kiro ecabandize orufu rwa Yesu, akashaba munonga. Akashaba Yehova ngu amwihireho ekigezo, ahakuba akaba yaza kwitwa bari kumushinja ngu akajuma Ruhanga. Omu mwanya g’okumwihiraho eco kigezo, akamwoherereza mwenishe w’omumarayika ngu amugumye. (Luk 22:42, 43) Obwe rero, Yehova nabasa kutukwasa akoresize benetata ninga banyanyazi abari kututerera esimu ninga shi bakatutayayira kugira ngu batugumye. Twena nitubasa kurondesa oburyo bw’okugambira Abakristo bagenzi bitu ‘ekigambo kirungi’ c’okubagumya.​—Emi 12:25.

¹² Reka turebe ecokureberaho ca munyanyazi ori kwetwa Miriam. Bwanyima y’esande nce Miriam afisize omushija weye, akaba ari omu ka wenka kandi ayehebire. Akaba ari kurira kandi ari kwenda ow’okuganira na we. Akagira ati: “Nkaba ntine mani g’okugira owu naterera esimu, obwe rero nkashaba Yehova. Ku nabire ndi kurira kandi ndi kushaba, nkahurira esimu yagamba. Akaba ari omuzehe w’ekibina kandi ari munywani w’eka yitu.” Miriam akatunga okuhumurizibwa okwarugire ahari ogo muzehe n’omukazi weye. Nayikiriza atari kubanganisa ku Yehova ari we owatumire ogo mwenetata yamuterera.

13. Gamba ecokureberaho ekiri kwereka ku Yehova ari kubasa kukoresa abantu abatari kumuramya omu kugarukamu eshara zitu.

¹³ Yehova nabasa kukoresa abantu abatari  kumuramya. (Emi 21:1) Obumwe, Yehova nabasa kugarukamu eshara z’abahereza beye ari kutuma abantu abatari kumuramya babarwanirira. Ecokureberaho: Akatuma omugabe Arutazerusi yayikiririza Nehemiya ngu agaruke omu rurembo rwa Yerusalemu kugira ngu akwase omu kugaruka kombeka engo zarwo. (Neh 2:3-6) N’omuri obu bwire, Yehova nabasa kutuma abantu abatari kumuramya baturwanirira twaba turi kubyetenga.

14. Ni enki eki wakunda omu nkuru y’ebyahikire ahari Soo Hing? (Nambwenu reba akishushani.)

¹⁴ Omunyanyazi ori kwetwa Soo Hing akerebera ku Yehova yamukwasize akoresize omudokita weye. Mutabani weye ayine ebizibu ebitari bimwe by’omu mutwe. Ogo mwana ku yakozire butandu y’amani, nyina n’ishe bakasigaho omurimo gwabo kugira ngu bamufeho. Eco kikatuma esente zabahwaho. Soo Hing akagamba ku yahurire yaba nk’orukoba orwakweguka rukahwayo. Akashuka ebiri omu mutima gweye ahari Yehova, ari kumushaba ngu amukwase. Omudokita owabire nakwasa mutabani wabo, akahurira yayenda kubakwasa. Akatuma batunga obuyambi bwa gavumenti n’ah’okutura. Bwanyima y’obwire, Soo Hing akagira ati: “Mazima tukerebera omukono gwa Yehova omuri eki kizibu. Yehova ni Ruhanga ‘ohurira okushaba.’”​—Zab 65:2.

15. Ni enki ecakwasize omunyanyazi omwe kumanya ku eshara zeye zabire ziri kugarukwamu?

¹⁵ Obushangirwe eshara zitu tiziri kugarukwamu omu buryo bw’ecokutangaza. Konka akingi ebyokugarukamu ebi turi kutunga ni byo ebi turi kuba turi kwetenga kugira ngu tugumizemu kuba abesigwa ahari Tata witu w’omu iguru. Obwe rero ogume oyetegereze, orebe yaba Yehova agarukiremu eshara zawe. Omunyanyazi ori kwetwa Yoko akaba nareba Yehova ari nk’otari kugarukamu eshara zeye, konka akatandika kuhandika ebi yabire namushaba. Ku hahwire obwire akashuba yareba omu bi yahandikire omu kitabo kandi yashanga Yehova yagarukiremu eshara zeye hihi ya zona, nangwa n’ezi yabire yayebirwe. Obwe rero obumwe na bumwe, nituba tushemerire kukwata obwire tukatecereza oku Yehova yagenzire ari kugarukamu eshara zitu.​—Zab 66:19, 20.

16. Ni bata oku turi kubasa kwereka okwikiriza aha bikwatirine n’eshara? (Abaheburayo 11:6)

¹⁶ Tituri kwereka okwikiriza birabire omu  kushaba kusha, ahobwe nambwenu nitukwereka birabire omu kwikiriza ebyokugarukamu by’eshara zitu oku byakuba biri kona. (Shoma omu Baheburayo 11:6.) Reka turebe ecokureberaho ca Mike n’omukazi weye Chrissy. Bakaba bine entego z’okuza kukora ahari Beteli. Mike akagamba ati: “Tukamara emyaka myingi turi kushaba kuza kukora ahari Beteli kandi tubigambira Yehova emirundi myingi, konka tibaratwesire.” Mike na Chrissy bakagumizamu kwesiga ku Yehova ari we ori kumanya oburyo burungi bw’okubakoresa omu murimo gweye. Bakagumizamu bari kukora nk’oku bari kubasa bari kukora omurimo g’obupayoniya, ahu ababurizi b’Obukama babire bari kwetenga, kandi bari kuyamba omu kombeka amaju g’Obukama. Erizoba ni abareberezi abari kutayayira ebibina. Mike akagira ati: “Yehova taragarukiremu eshara zitu nk’oku twabire turi kubyenda, konka akazigarukamu omu buryo oburi kukira n’obu twabire turi kutecereza.”

17-18. Tukuratize ebiri omuri Zaburi ya 86:6, 7, ni enki eki turi kubasa kwesiga tutari kubanganisa?

¹⁷ Shoma omuri Zaburi ya 86:6, 7. Dawudi, omuhandiki wa zaburi, akaba nayesiga atari kubanganisa ku Yehova yabire nahurira eshara zeye kandi akazigarukamu. N’iwe nobasa kugira obwo bwesige. Ebyokureberaho ebi twashwijuma omuri eki kicweka, nibituhamiza ku Yehova ari kubasa kutuha obwenge n’amani ebi turi kwetenga kugira ngu twehangane. Nabasa kukoresa Abakristo bagenzi bitu abakuzire omu by’omwika, ninga shi n’abantu abatari kumuramya omuri obu bwire kugira ngu atukwase omu buryo obutari bumwe.

¹⁸ N’obu burijo Yehova atari kugarukamu eshara zitu nk’oku turi kubyenda, nitumanya ku arije kuzigarukamu. Nayija kutuha ebi turi kwetenga kandi abituhe omu bwire obu tubicenire. Obwe rero, gumizamu kushaba Yehova oyine obwesige ku arije kukufaho hati kandi ku arije ‘kuhazya ekintu cona ekihurire ebi kiri kwetenga’ omu nsi ensya eri hihi kwija.​—Zab 145:16.