▪ Tihine eki Bibuli eri kukigambaho. Konka negamba ebintu byingi ebiri kutuma twashoborocerwa enshonga eyatumire basharamu baso.

Marayika akagambira Mariya ku yabire arije kugira enda kandi akazara. Obu Marayika yagambire obu butumwa, Mariya na Yosefu bakaba batwire omuri Nazareti, omu tawuni eyi Yosefu yabire atwiremu ya Garilaya. (Luk 1:26-31; 2:4) Bwanyima ku barugire omuri Egiputa bakagaruka omuri Nazareti. Yesu akakurira omuri ako kacweka kandi yaba Omunyanazareti. (Mat 2:19-23) Ni yo nshonga turi kuhika nitwijuka Nazareti twagamba Yesu, Yosefu na Mariya.

Mariya akaba ayine omunyabuzare ori kwetwa Elizabeti owabire otwire omuri Buyudaya. Elizabeti akaba ari omukazi w’omutambi Zekariya kandi ni we owijire kuba nyina wa Yohana omubatizi. (Luk 1:5, 9, 13, 36) Mariya akaza kutayayira Elizabeti kandi yaguma na we amezi ashatu omuri Buyudaya. Bwanyima Mariya akagaruka omuri Nazareti. (Luk 1:39, 40, 56) Nikihurirwa ku Mariya yabire ayine n’abandi banyabuzare omuri ako kacweka ka Buyudaya.

Obwire bukahika Yosefu yayorobera ekiragiro c’okuza ‘kwehandikisa.’ Obwe rero, Yosefu akakora orugendo rw’okuruga Nazareti ari kuza Betelehemu ‘omu tawuni ya Dawudi’ kandi ni ho ahu obuhanuzi bwabire bwagambire ku Mesiya yabire arazarirwe. (Luk 2:3, 4; 1 Sam 17:15; 20:6; Mik 5:2) Bwanyima Mariya ku yamazire kuzara Yesu, Yosefu akanga kumukoresa orugendo ruringwa rw’okugaruka Nazareti ayine omwerere. Bakaguma omuri Betelehemu ahabire hari kwingana na kiromita mwenda orugire Yerusalemu. Eco kikaba kiratume byaborobera kuguma bari kutwara omwana wabo omuri hekalu n’okutamba ebitambo.​—Lev 12:2, 6-8; Luk 2:22-24.

Marayika wa Ruhanga akaba yagambire Mariya ku omwana owu yabire arije kuzara yabire araze aha ‘kitebe c’obugabe ca Dawudi’ kandi akategeka ari ‘Omugabe.’ Mbehi Yosefu na Mariya bakatecereza ku ni ec’obwenge kuguma omu tawuni ya Dawudi kugira ngu abe ari ho Yesu yazarirwa? (Luk 1:32, 33; 2:11, 17) Nibabasa kuba bashaziremu kugumayo kugira ngu bategereze akamanyiso akari kwereka eki Ruhanga yabire ari kwenda ngu bakore.

Tituri kumanya obwire obu babire bamara omuri Betelehemu obu bamwe omu bari kuragurisa enyonyozi bayijire kubareba. Konka obwo bwire bakaba batwire omu nju kandi mutabani wabo akaba atacari omwerere. (Mat 2:11) Nikirebeka ku omu mwanya g’okugaruka Nazareti bagumire omuri Betelehemu obwire buringwa kandi bahakwata nk’owabo.

Herode akaragira kwita ‘abana b’abojo bona ababire bahikize emyaka ibiri.’ (Mat 2:16) Marayika akija kurabura Yosefu na Mariya ngu bahungire omuri Egiputa bari hamwe na Yesu kandi yabashaba kugumayo kuhisa Herode yamara kufa. Bwanyima, Yosefu akatwara eka yeye omuri Nazareti. Ahabw’enki bataragarukire omuri Betelehemu? Tibaragarukireyo kugira ngu berinde mutabani wa Herode ori kwetwa Alikirayo kandi borobere okurabura kwa Ruhanga. Omuri Nazareti ni ho ahabire haratume Yosefu yabasa kukwasa Yesu ngu abe omuhereza murungi wa Ruhanga.​—Mat 2:19-22; 13:55; Luk 2:39, 52.

Ekiri kushasha, Yosefu akafa Yesu atakigurire abandi omuhanda g’okuza kutegecera omu iguru. Obwe rero Yosefu nayija kuzocera kutura omu nsi. Abingi nibija kutunga omugisha g’okumubuza enshonga we na Mariya bagumire omuri Betelehemu bwanyima y’okuzara kugira ngu bamanye byingi.